Lesa Alikke Nguukonzya Kupa Kuti Nyika Eeyi Itangonyooki

EDGAR MITCHELL, uuenzya ndeke zyuunka kumwezi, naakali mujulu wakaamba kuti nyika “ilamweka citaambiki.”

Leza wakailenga kabotu nyika kutegwa bantu kabakkala. Naakailenga nyika eeyi, bangelo “bakoompolola mukusekelela kwabo.” (Jobu 38:7) Notubona mboyakalengwa nyika eeyi, andiswe tulakonzya kumulumba Leza. Kuli zyintu zinji zigambya izipa kuti bantu azilenge zimwi buyo kazipona. Bantu ncobazyi kapati ncakuti, masamu azisyango zyoonse zibelesya mumuni, muya uutegwa carbon dioxide alimwi ameenda kutegwa zibe abusani. Zyanikucita boobu, zitupa muya ngotuyoya (oxygen), uuyandika kapati mubuumi.

Ibbaibbele litondezya kuti Leza wakapa muntu mulimo wakwiibamba kabotu nyika. (Matalikilo 1:28; 2:15) Pele kutegwa zilenge zyoonse kazipona kabotu, muntu wakeelede kuti kauyanda munzi wakwe ooyu akuubeleka kabotu mulimo ngwaakapegwa. Alimwi muntu wakapegwa nguzu zyakulisalila cakucita, aboobo wakali kukonzya kusala kuunyonyoona munzi ooyu. Oobu mbwaakacita. Buyamba abulyato mbobwapa kuti kube mapenzi ataambiki.

Mapenzi amwi aaliko: (1) Akaambo kakuti zisamu zinji zyagonkwa, eeci capa kuti muya unyongane. (2) Ikuciindizya kubelesya misamu iijaya tuuka kwapa kuti tuuka tunji tufwe itunyamuna buungu bwazisyango akutola kuzisyango zimbi. (3) Ikuciindizya kuzuba nswi, kusofwaazya lwizi amilonga capa kuti inswi ziceye. (4) Ibuyamba bwabantu mbobwapa kuti zilengwaleza ziceye alimwi bamwi baamba kuti eeci ncecapa kuti kukasaala kwanyika kwiindile. Basyaabusongo bamwi ibalanganya zilawo baamba kuti ikunyenguluka kwacaanda cili mumasena aatontola kapati aali kunyika akumusanza ncitondezyo cakuti kukasaala kwanyika kwaindila.

Bantu bamwi baamba kuti kuvwula kwantenda zilicitikila ncitondezyo cakuti nyika yanyongana. Leza wakatupa nyika kutegwa katupona kakunyina kubbadala. (Matalikilo 1:26-29) Nokuba boobo, zyintu zicitika mazuba aano munyika zitondezya kuti bantu banji tabayandi kwiibamba kabotu nyika eeyi, naa bajisi bubi kucita nzyobayanda. Mubwini, bantu ‘bainyonyoona nyika’ kweelana abusinsimi buli kulugwalo lwa Ciyubunuzyo 11:18.

Businsimi bwamu Bbaibbele butondezya kuti ciindi casika cakuti Jehova Leza Singuzuzyoonse iwakalenga zyintu zyoonse zipa kuti katupona, anyonyoone bantu banyonyoona nyika. (Zefaniya 1:14; Ciyubunuzyo 19:11-15) Bantu kabatana inyonyoona cakumaninina nyika, Leza uyakubweza ntaamu—aciindi ncotutayeeyeli.a (Matayo 24:44) Masimpe, Leza alikke nguukonzya kupa kuti nyika eeyi itanyonyooki.

Bupanduluzi buyungizidwe