‘Zyintu Nzyaakacita Zilaunka Angwe’
BA THEODORE JARACZ, umwi wamu Kabunga Keendeelezya ka Bakamboni ba Jehova, bakamanizya buumi bwakwe bwaanyika mu June 9, 2010. Wakali aamyaka iili 84 yakuzyalwa alimwi wakasiya bakaintu ba Melita, mbobakakwetene limwi kwa myaka iili 53. Alimwi wakasiya mucizi wakwe, abajwa botatwe, musankwa omwe basimbi botatwe.
Wakazyalwa mu September 28, 1925, mu dolopo lya Pike County, Kentucky, mucisi ca U.S.A., Mukwesu Jaracz wakabbapatizigwa kali amyaka yakuzyalwa iili 15, mu August 10, 1941. Myaka yobilo yakatobela, kali amyaka iili 17 wakatalika mulimo wabupainiya, amane wakazumanana mumulimo waciindi coonse kwamyaka iili 67.
Mu 1946, kali amyaka iili 20, Mukwesu Jaracz wakanjila cikolo ca Watchtower Bible School of Gilead mukkilasi yanamba 17. Nobakamanizya, wakatumwa kuyoobeleka kali mulangizi wabbazu ku Cleveland, Ohio mu United States. Mu 1951, wakapegwa mulimo wakuyoyeendelezya mutabi waku Australia. Yearbook ya Bakamboni ba Jehova yamu 1983 yakaamba kuti: Mukwesu Jaracz “wakabakulwaizya kapati bakwesu mucisi coonse ca Australia akaambo kabusungu mbwakajisi mukweendelezya kabotu zyintu alimwi wakali kusololela kabotu mumulimo wamumuunda.”
Nakajokela kucisi ca United States, Mukwesu Jaracz wakaakukwata ba Melita Lasko mu December 10, 1956. Kabakwetene bakatalika mulimo wakuswaya mbungano alimwi bakabeleka mulimo wamu mabbazu awacooko mumasena manji amu United States alimwi bakabeleka canguzu. Kumamanino aa 1974, bakaba uumwi waba Kabunga Keendeelezya ka Bakamboni ba Jehova.
Mukwesu Jaracz unakuyeeyegwa akaambo kakulyaaba akusyomeka kuli Jehova alimwi wakali kubeleka milimo yabwami camoyo woonse. Wakali kubayanda bakaintu bakwe alimwi wakali muntu uusimide kumuuya wakali kubabikkila maano bantu. (1 Ko. 13:4, 5) Wakatondezya kuti ulababikkila maano bantu kwiinda mukubeendelezya kabotu boonse alimwi caluzyalo. Kuyungizya waawo, wakatondezya kuti ulabayanda alimwi akubikkila maano bantu kwiinda mukubeleka cabusungu mulimo wamumuunda.
Nokuba kuti tuluuside akaambo kakusweekelwa umwi wacibeela camukwasyi wa Bbeteli alimwi cibeela cabunyina bwanyika yoonse, tulikkomene kuti Mukwesu Jaracz wakabeleka cakusyomeka mumulimo wakwe kuli Jehova kwamyaka minji. Tulaalusyomo lwakuti ‘wakali kusyomeka mane kusikila kulufwu, eelyo wakatambula musini wabuumi.’(Ciy. 2:10) Alimwi tulasyoma kuti ‘zyintu nzyaakacita zilaunka angwe.’—Ciy. 14:13.