Kkuti lya Ela
Nkondo Akati ka Davida a Goliati—Sena Yakacitika Ncobeni?
Bantu bamwi baladooneka kuti naa cibalo camakani aakaindi aajatikizya Davida a Goliati ngamasimpe naa nkaano buyo. Sena andinywe mwaadooneka makani aaya ciindi nomwali kubala cibalo cainda? Ikuti kacili boobo, amulange-lange mibuzyo yotatwe iitobela.
1 | Sena masimpe kuti muntu inga walampa mamita aabalilwa ku 2.9?
Bbaibbele lyaamba kuti Goliati “wakali kulampa tukokola tuli cisambomwe ajanza livwungulwidwe.” (1 Samuele 17:4) Kakokola kaambwa aawa kakali kulampa masentimita aali 44.5; mpoonya janza livwungulwidwe lyakali kulampa masentimita aali 22.2. Tukokola tuli cisambomwe twasanganizyigwa ajanza livwungulwidwe tusika kumamita aali 2.9. Bamwi balakazya akwaamba kuti Goliati tanaakali kusika aawo kulampa, pele amulange-lange kaambo aaka: Mazuba aano, muntu uuzyibidwe kuti ngowakali kwiinda kulampa wakali kwiinda amamita aali 2.7. Sena mubwini tacikonzyeki kuti Goliati wakali kulampa masentimita aali 15 naa kwiinda aawo? Wakali wamusyobo waba Refaimu, bamaalumi bakazyibidwe kapati akaambo kabupati bwabo bugambya. Cipepa cimwi caku Egepita camumwaanda wamyaka wa 13 B.C.E. cakaamba kuti basikalumamba bamwi bayoosya ibakali kukkala mu Kanana bakali kwiinda amamita aali 2.4 kulampa. Aboobo, nokuba kuti kulampa kwa Goliati kuboneka kuti kulagambya, pesi mubwini cilakonzyeka.
2 | Sena Davida wakali muntu wini-wini?
Kuli ciindi basyaazibwene mumakani aa Bbaibbele nobakasola kwaamba makani aamba Mwami Davida kuti kakali kaano buyo, pele eeci cakakatazya. Basikuvwukkula zyakaindi bakajana malembe aakaindi aakali kwaamba “zyaŋanda ya Davida.” Kunze lyaboobo, Jesu Kristo wakaamba kuti Davida wakali muntu wini-wini. (Matayo 12:3; 22:43-45) Makani aakuti Jesu ngowakali Mesiya alisinizyidwe kwiinda mumazyalani obilo aatondezya kuti wakazwa kuzyalani lya Mwami Davida. (Matayo 1:6-16; Luka 3:23-31) Cilisalede kuti Davida wakali muntu wini-wini.
3 | Sena zintu izyaambwa mucibalo zyakacitikila mubusena bwancobeni?
Bbaibbele lyaamba kuti nkondo yakacitikila ku Kkuti lya Ela. Pele alimwi lilaamba cacigaminina, nkaambo litondezya kuti ba Filisiti bakali kumbali aacilundu akati kamadolopo obilo, Soko a Azeka. Mpoonya bana Israyeli bakali kutala aakkuti kumbali aacilundu cimbi cakalangene akkuti. Sena aaya akali masena aancobeni?
Amubone ncaakaamba muntu umwi wakaswaide busena oobu caino-ino: “Muntu iwakali kutweenzeezya walo watakali mukombi, wakatutola ku Kkuti lya Ela. Twakabelesya kazila ikakatutola atala eeni aacilundu. Mpoonya notwakali kulanga mukkuti, wakatubalila lugwalo lwa 1 Samuele 17:1-3. Kumane wakatutondekela kutala aakkuti akwaamba kuti: ‘Okuya, busena nkobuli kulumwensyi nkokuli zitantaala zyadolopo lya Soko.’ Mpoonya wakalanga kulubazu lumbi akwaamba kuti, ‘Okuya kutala, kululyo, nkokuli zitantaala zyadolopo lya Azeka. Ba Filisiti bakali akati kamadolopo aalya, kumbali aamalundu aalya aalibonya. Aboobo ambweni twiimvwi abusena mpobakabede bana Israyeli.’ Ndakayeeya Saulo a Davida kuti bakaimvwi abusena mpondakaimvwi. Mpoonya twakaselemuka kuzwa atala aacilundu, notwakasika mukkuti, twakainda mukalonga kakanyina maanzi pele ikakazwide mabwe. Ndakatalika kweezeezya Davida kabweza mabwe aabulungene osanwe mukalonga aaka, lyomwe ndyaakabelesya kujaya Goliati.” Mbubwenya mbuli bantu banji, sikuswaya ooyu wakagambwa kapati kubona mbozili zyamasimpe zintu zilembedwe mu Bbaibbele.
Kunyina kaambo keni kakonzya kupa kudooneka mbocili camasimpe cibalo eeci camakani aakaindi. Cibikkilizya bantu beni-beni alimwi amasena aancobeni. Ciinda kubota ncakuti, ncibeela ca Jwi lya Leza ilyakasololelwa amuuya, aboobo cakazwa kuli Leza wakasimpe walo “uutakonzyi kubeja.”—Tito 1:2; 2 Timoteyo 3:16.