Mibuzyo Yabasikubala

Ciiindi Saatani naakaambila Eva kuti tanaakali kuyoofwa ikuti naakalya mucelo wacisamu cakuzyiba bubotu abubi, sena wakali kwaambila Eva muzeezo uudumide kapati mazuba aano wakuti kuli cintu cizumanana kupona muntu afwa?

Peepe. Diabolosi tanaakaambila Eva kuti ikuti naakalya mucelo iwakakasyidwe a Leza, mubili wakwe wakali kuyoofwa pele muuya wakwe wakali kuyoozumanana kupona kubusena bumbi. Kaambaula kwiinda munzoka, Saatani wakaamba kuti ikuti Eva naakalya mucelo wacisamu eeco, kunyina naakali ‘kukonzya kufwa pe.’ Ncaakali kupandulula Saatani ncakuti Eva wakali kunoozumanana kupona, kakkomene abuumi bubotu anyika, buumi bwakuteendelezyegwa a Leza.—Matl. 2:17; 3:3-5.

Ikuti naa njiisyo yakubeja iidumide mazuba aano yakuti kuli cintu cizumanana kupona muntu afwa tiiyakatalikila mu Edeni, ino ndilili noyakatalika? Tatukonzyi kwaamba cacigaminina. Pele tulizyi kuti bukombi bwakubeja boonse bwakamana ciindi ca Zambangulwe lyakumazuba aa Nowa. Mbwaanga balikke ibakafwutuka zambangulwe ngu Nowa amukwasyi wakwe alimwi boonse bakali bakombi bakasimpe, kunyina iwakali kuyiisya njiisyo zyabukombi bwakubeja.

Aboobo njiisyo eeyi iidumide mazuba aano yakuti kuli cintu cizumanana kupona muntu afwa, yeelede kuti yakatalika nolyakainda Zambangulwe. Pele ino mbuti mboyakasakana? Yakasakana ciindi Leza naakanyonganya myaambo ku Babelo alimwi bantu nobakamwaika “munyika yoonse,” tacidoonekwi buya kuti bakazumanana anjiisyo yakuti bantu bajisi buumi butafwiki. (Matl. 11:8, 9) Kufwumbwa naa yakatalika lili njiisyo yakubeja eeyi, tulakonzya kuba masimpe kuti “usyi wabubeji,” nkokuti Saatani Diabolosi, ngonguwe wakaitalisya alimwi wakakkomana kubona mboyakasakana.—Joh. 8:44.