Zilongezyo Ziboola Kuli Baabo Ibamumvwida Leza

Musinsimi Musa wakaamba kuti, ikuti twaitobela milawo ya Leza, nkokuti Leza uyootulongezya. (Deuteronomo 10:13; 11:27) Tulamumvwida Leza kutali akaambo kakuyoowa kusubulwa. Pele bube bwa Leza bubotu mbobutukulwaizya kumumvwida akaambo kakuti tulamuyanda alimwi tulatantamuka kucita cintu cili coonse cikonzya kumupa kuusa. “Kuyanda Leza caamba kuti katubamba milawo yakwe.”—1 Johane 5:3.

Pele ino kumvwida Leza kupa buti kuti atulongezye? Atubone nzila zyobilo.

1. KUMVWIDA LEZA KUYOOTUPA KUBA BASONGO

“Mebo, nde Jehova ndime Leza wako, ndime ndikuyiisya kuti ugwasyigwe, uukusololela munzila moyelede kweendela.”—ISAYA 48:17.

Jehova Leza, Mulengi wesu, ulituzyi alimwi ulatupa busolozi mbotuyandika. Kuti katuyanda kuti njiisyo zyakwe zitugwasye kusala kabotu, tweelede kwiiya Jwi lya Leza kutegwa tuzyibe Leza ncayanda kuti tucite mpoonya akucicita.

2. KUMVWIDA KUYOOTUPA KUKKOMANA

“Ibakkomene mbaabo baswiilila jwi lya Leza akucita ncolyaamba!”—LUKA 11:28.

Mazuba aano, mamiliyoni aabantu ibatobela ncolyaamba Jwi lya Leza balikkomene kapati. Mucikozyanyo, amubone mwaalumi umwi waku Spain walo iwakali kufwambaana kunyema alimwi akweendelezya bamwi calunya, kubikkilizya abakaintu bakwe. Bumwi buzuba wakabala ncaakalemba musinsimi Musa kujatikizya bube bwakukkazika moyo bwa Josefa, mwana wa Jakobo. Josefa wakasambalwa kali muzike alimwi wakaangwa muntolongo kanyina mulandu; pele wakazumanana kukkazika moyo, kuba siluumuno alimwi akulekelela. (Matalikilo, caandaano 37-45) Mwaalumi ooyu waku Spain wakaamba kuti: “Kuzinzibala kuyeeya cikozyanyo ca Josefa kwakandikulwaizya kuba abube bwakubomba moyo, luzyalo alimwi akulilesya. Akaambo kaceeci, lino ndipona buumi bukkomanisya kapati.”

Jwi lya Leza lilapa busolozi bujatikizya mbotweelede kubeendelezya bamwi. Atuzyibe zinji kujatikizya makani aaya mucibalo citobela.