Mibuzyo Yabasikubala

Nkaambo nzi Banakristo ncobeelede kubikkila maano kujatikizya mapulogilamu aakulembelana tugwalo twaafooni naa akkompyuta?

Banakristo bamwi babelesya tekkinoloji yamazuba aano kubandika abanamukwasyi alimwi a Bakamboninyina. Pele Munakristo uusimide kumuuya ulabikkila maano kululayo oolu: “Muntu uucenjede abona mapenzi ulayuba, pele aabo batakwe maano balaunka nkukonya ooko, aboobo balapenga.”—Tus. 27:12.

Tulizyi kuti Jehova uyanda kutukwabilila. Aboobo kunyina notuyanzana abaabo baleta kwaandaana, ibagusyidwe mumbungano naa ibasumpula njiisyo zyakubeja. (Rom. 16:17; 1Kor. 5:11; 2Joh. 10, 11) Ibamwi mumbungano inga kabatalilemeki kabotu. (2Tim. 2:20, 21) Aboobo ciindi notusala balongwe, tweelede kukabikkila maano kaambo aaka. Pele cilakonzya kukatazya kusala kabotu balongwe ikuti katubandika ambabo kubelesya tugwalo twaafooni naa akkompyuta.

Cilayandika kapati kubikkila maano notusala balongwe bali kabotu ikwaambisya ciindi bantu bali mukabunga mbotulembelana tugwalo nobali banji kapati. Banakristo bamwi bali mutubunga muli bantu banji kapati, calo cisololela kuzintu zibyaabi kapati. Aboobo mbuti mukwesu naa mucizyi mbwakonzya kubikkila maano ikuti kali mukabunga muli bantu banji kapati? Tacikonzyeki kubazyiba boonse bali mukabunga alimwi ambobubede bukkale bwabo bwakumuuya. Lugwalo lwa Intembauzyo 26:4 lwaamba kuti: “Tandiyanzani abantu bampelenge, alimwi ndilabatantamuka basikuupaupa ameso.” Eeci citondezya kuti ncabusongo kapati kulembelana buyo abaabo mbotuzyi.

Nomuba mukabunga kasyoonto, Munakristo weelede kubikkila maano kujatikizya ciindi ncabelesya alimwi azintu bantu nzyobabandika mukabunga aako. Tatweelede kulimvwa kuti tweelede kwiingula tugwalo toonse, tacikwe makani akaambo kabandikwa naa bulamfwu bwaciindi ncomubelesya. Paulo wakacenjezya Timoteyo kujatikizya bantu “basikuvwiya abasikunjililila twaambo tutabajatikizyi.” (1Tim. 5:13) Mazuba aano, cilakonzyeka kucita cikozyenye afooni naa akkompyuta.

Kunyina Munakristo uusimide kumuuya uukonzya kwaamba naa kuswiilila makani aajatikizya kukazya basyominyina alimwi amakani aamaseseke aajatikizya mbabo. (Int. 15:3; Tus. 20:19) Kuyungizya waawo, teelede kwiinduluka naa kuswiilila makani aanyina bumboni. (Ef. 4:25) Tulijisi makani manji mabotu aazwa mu Bbaibbele alimwi amalipooti ngotukonzya kusyoma awebbusaiti yesu, jw.org, alimwi amumapulogilamu aa JW Broadcasting^® aamwezi amwezi.

Bakamboni bamwi babelesya nzila eeyi kusambala, kuula alimwi akwaambilizya makwebo naa mulimo. Aaya makani aamakwebo alimwi taajatikizyi kukomba Jehova. Banakristo ibayanda kuba abukkale ‘bwakutayandisya mali’ beelede kutantamuka cilengwa cili coonse cakubelesya bunyina bwesu kusumpula makwebo aabo.—Heb. 13:5.

Sena tweelede kubelesya nzila yakulembelana tugwalo afooni naa akkompyuta kutegwa tulombelele mali aakugwasya basyomima ibabulide naa ibakacitikilwa ntenda? Kanji-kanji tulatondezya kubikkilana maano kwiinda mukugwasyanya alimwi akukulwaizyanya. (Jak. 2:15, 16) Pele kucita boobu kwiinda mukubelesya tubunga tujisi bantu banji kulakonzya kunyonganya bubambe bubotu bucitwa aofesi yamutabi iili kubusena nkomukkala naa mbungano yanu. (1Tim. 5:3, 4, 9, 10, 16) Alimwi buya kunyina umwi wesu uunga wayanda kupa bamwi kuyeeya kuti twakasalwa munzila yaalubazu kutegwa katulanganya bakwesu.

Tuyanda kucita zintu zikonzya kupa kuti Leza alemekwe. (1Kor. 10:31) Aboobo ciindi notusala kubelesya mapulogilamu aakulembelana tugwalo twaafooni naa akkompyuta naa zibelesyo buyo zimbi zijatikizya tekkinoloji, tweelede kubikkila maano kuntenda zikonzya kujanika alimwi akucenjela.