Marzo

Jefté lu xmakgasitsikgo xnatalan chu xlakgsitsilakanikgo tuku xkgalhi. Wa xlakata xafuerza tamakxtuka ktiyat nema xtapakgsini (Juec. 11:1-3). Maski chuna akgspulalh, xla xatapaxuwan kamakgtayalh akxni skinikgolh xtamakgtay (Juec. 11:4-11). Jefté tlakg xlakaskinka akxilhli nakgalhmakgtaya xtukuwani Jehová nixawa xtaʼakglhuwit. Aktanks xlakpuwanit namakgapaxuwa Jehová chu uma tlan kitaxtunilh xpalakata chu amakgapitsin (Heb. 11:32, 33). ¿La nachuna natlawayaw la tlawalh Jefté? Kalilakpuwaw uma: ¿Tuku xtlawaw komo chatum tala nitlan nakinkamamakgkatsiniyan o nakinkatlawaniyan tuku nitlan? Chuna natlawayaw la Jefté, namaklakaskinaw tastakyaw nema limin Biblia akxni wi tuku natlawaputunaw. Maski nitlan nalimakgkatsiyaw chuntiya kaskujnaniw Jehová xliputum kilitliwakgakan. Kastalaniw xliʼakxilhtit Jefté, kamastaw talakaskin pi xlimapakgsin Jehová nakinkamakgtayayan natayaniyaw tuku tuwa natitaxtuyaw chu nakinkamaxkiyan litliwakga xlakata natlawayaw tuku tlan (Rom. 12:20, 21; Col. 3:13). w16.04 1:7, 9, 10

Lu xlakaskinka pi natayaniyaw asta akxni namin lisputni, chu ni kajwatiya tsinu kilhtamaku. Kalilakpuwaw pi akgtum barco tsankgama kchuchut. Komo tiku tajumakgolh kbarco lakgtaxtuputunkgo, talakaskin napaxtawakatnankgo asta kxkilhtun pupunu chu nipara tsinu xlitaxlajwanitkan. Nachuna, komo latamaputunaw kParaíso, talakaskin natayaniyaw asta akxni namin lisputni chu nipara tsinu kilitaxlajwanitkan. Kililakapastakatkan la apóstol Pablo: «Ni kxlajwananaw» (2 Cor. 4:16). Chuna la Pablo, kanajlayaw pi Jehová nakinkamakgtayayan asta akxni namin lisputni. Pablo tsokgli: «Wa xpalakata, lu[...] tlan klikatsi mpi asta ni mpala wa linin, chu na ni mpala wa nkakilhtamaku, ni mpala ángeles, chu na ni mpala wa nti malanankgoy, chu na ni mpala ti nkgalhikgoy litliwakga, chu na ni mpala wa ntu anan nchu, chu na ni mpala wa ntu namin nkilhtamaku, chu na ni mpala wa ntu xala katalhman, chu na ni mpala wa ntu xala katutsu, chu na ni mpala wa nkatuwaj tamalakatsukun, ntlan [nakinkamamakgatliyan] kxtapaxkit Dios wa ntu nkgalhiyaw xpalakata Cristo Jesús nkimPuchinakan» (Rom. 8:37-39). w16.04 2:17, 18

Kaskini Jehová liskgalala xlakata naʼakxilha akxni liʼakxilhpaka chu kaskini tamakgtay xlakata natlawaya tuku tlan. Xlakata ni makgxtakga Jehová, max namanukana kpulachin o atanu la namakgapatinankana. Komo chuna natlawakan, kaskini Jehová kamakgtayan liwana nakawaniya amakgapitsin tuku xlakata ni makgtanuya kkakilhtamaku. Liwana kakatsi pi Jehová namakgtayayan natayaniya (Hech. 4:27-31). Jehová kinkamaxkin Biblia xlakata nakinkamatliwakglhan. Komo nalilakpuwana versículos, namakgtayayan ni namakgtanuya kkakilhtamaku. Kakatsini versículos chu kakalakapastakti, uma namakgtayayan komo ni nakgalhiya Biblia. Biblia na namakgtayayan tlakg nakanajlaya tuku Dios malaknunit. Talakaskin liwana nakanajlayaw xlakata natayaniyaw taputsastalanit (Rom. 8:25). Kalaksakti versículos nema lichuwinankgo tuku lu lipaxuwaputuna kxasasti katiyatni, chu kalakpuwanti la komo antiya wila. w16.04 4:14, 15

Tiku pulalinkgo nixaxlikana takanajla ni lichuwinankgo xalakwan tamakatsin xlakata Tamapakgsin. Chu komo lichuwinankgo Tamapakgsin, wankgo pi linaw kkinakujkan (Luc. 17:21). Ni masiyakgo pi xTamapakgsin Dios akgtum tamapakgsin nema wi kʼakgapun, chu ni masiyakgo pi wa Jesús xMapakgsina. Xlakan lichuwinankgo Jesús kNavidad o kSemana Santa. Ni masiyakgo pi Tamapakgsin nalakkaxtlawakgo putum taʼakglhuwit xalak kakilhtamaku chu pi nialh makgas namasputu tuku nitlan kKatiyatni (Apoc. 19:11-21). Tasiya pi ni katsikgo tuku Jesús natlawa la xMapakgsina kxTamapakgsin Dios. Chu komo ni akgatekgskgo tuku Jesús lichuwinalh, na ni akgatekgskgo tuku xlakata xlimakatsininatkan. Kstalaninanin Cristo ni lichuwinankgo xalakwan tamakatsin xlakata natlajakgo tumin chu nalitlawakgo chiki (2 Cor. 2:17). Xlakata lichuwinankgo Dios, kstalaninanin Jesús ni xliskinatkan kakaxokgonika (Hech. 20:33-35). w16.05 2:7, 8

Kalilakpuwaw pi lu lakgatiyaw maktum lhakgat. Pero katsiyaw pi komo nalhakgayaw, max nitlan nakamamakgkatsiniyaw makgapitsi xalak congregación. Biblia ni lichuwinan xlakata uma lhakgat. ¿La nakatsiyaw tuku lakpuwan Jehová? Biblia masta uma tastakyaw: «Lakpuskatin katakaxtayakgolh chuna la xlilat lhakganankan, ni namalakatsalikgo chu ni akglakgwa, ni nataʼakgkgonkgxkgo chu ni namaklakaskinkgo oro o perlas o lu laktapalaxla lhakgat, wata chuna la xlilat natakaxkgo lakpuskatin tiku kakninanikgo Dios» (1 Tim. 2:9, 10). Xlikana, uma tastakyaw kalakgchan lakchixkuwin chu lakpuskatin tiku kstalaninanin Cristo. Komo taktujuyaw, kuenta natlawayaw tuku lakpuwankgo amakgapitsin xlakata la lhakgananaw chu la takaxaw. Chu xlakata kapaxkiyaw kinatalankan, fuerza natlawayaw ni nakamakgasitsiyaw chu nitlan nakamamakgkatsiniyaw (1 Cor. 10:23, 24; Filip. 3:17). w16.05 3:14

Akxni Adán lakatsalalh xlimapakgsin xMalakatsukina, nialh xkgawasa litaxtulh. Pero lhuwa xkamanan tatayakgolh Jehová la xMapakgsinakan (Heb. 12:1). Xatapaxuwan kgalhakgaxmatkgolh xMalakatsukinakan. Chuna lakgmakgankgolh Satanás chu limasiyakgolh pi xlakaskinkgo pi Jehová xTlatkan xlitaxtulh chu wa tiku xkamakgtayalh natalakgpalikgo (Juan 8:44). Xlakata ni makgxtakgkgolh Dios, kinkamalakapastakayan tuku wan texto xala uku. La uku, xaxlikana kskujnin Dios liskujaw xlakata nakgalhiyaw tlan tapuwan, nataktujuyaw chu nakgalhakgaxmataw kiMalakatsukinakan. Lanka talakgalhaman akxilhaw pi Jehová kinTlatkan. Lakaskinaw pi wa kakinkamakgtayan. Wa xlakata kakinkakgalhskinkan: «¿Klitaxtu tiyat nema Dios ni tuwa namaklakaskin xlakata natlawa akgtum stlan tlamank? ¿Kkaliʼakxilha kinatalan la tiyat nema Jehová aku liskujma?». w16.06 1:2, 3

La uku lu lakatsuwa wilaw kxasasti kakilhtamaku, chu liʼakxilhmaka kintakanajlakan. Xlakaskinka naʼakxilhaw komo tliwakga kintakanajlakan. ¿La natlawayaw? Kalilakpuwaw tuku malaknulh Jesús kMateo 6:33 chu kakinkakgalhskinkan: «¿Limasiya tuku klakapastaknit chu tuku ktlawa pi xlikana kkanajla xtamalaknun Jesús? ¿Xakmakgatsankgalh tamakxtumit o nialh xaklichuwinalh Dios kaj xlakata tlakg xaktlajalh tumin? ¿Tuku naktlawa komo kintaskujut tlakg kimakglhtima kilhtamaku chu litliwakga? ¿Nakmasta talakaskin pi nakinpasa xtalakapastakni uma kakilhtamaku chu natlawa pi nialh nakskujnani Jehová?». ¿Kgalhakgaxmataw tuku wan Biblia xlakata tiku nakatalalinaw, xlakata tiku kamaxtukan kcongregación o tuku nalilakgastananaw? Komo ni chuna natlawayaw, kinakujkan napalhan. Komo chuna kinkaʼakgspulaman, xlakaskinka tunkun naʼakxilhaw la wi kintakanajlakan. ¿La natlawayaw xlakata naʼakxilhaw kintakanajlakan? Ni nataʼakgskgawiyaw kiʼakstukan chu namaklakaskinaw Biblia xlakata nalakkaxtlawayaw kintapuwankan. w16.06 2:8, 9

La uku wilakgolh makgapitsi latamanin tiku paxkikgo Dios chu skujnaniputunkgo. Kalilakgapaskan xtatayananin Jehová. Kkata 1914, ni lhuwa tiku xkakninanikgo Jehová. Pero xlakata sikulunatlawanit la talichuwinama xtachuwin, lhuwa millones latamanin lakgapaskgonit xaxlikana nema takilhtinit kBiblia chu xtatayananin Jehová litaxtukgonit. Dios lichuwinalh makgasa xlakata la xʼama staka xkachikin chuna la wan texto xala uku, chu na wa: «Akit, Jehová, nakmalakapali kxkilhtamaku». Liwana katsiyaw pi kgantaxtuma la uku tuku lichuwinalh. Xkachikin Jehová litaxtu la akgtum lanka kachikin nema kgalhi liwaka akgtsayan millón latamanin. Uma wamputun pi tlakg lhuwa akinin nixawa tiku wilakgolh klhuwa países kkatiyatni. w16.06 4:1, 2

Jesús liwana xkatsi pi komo Jehová kakuentajtlawa tsiktsi, na nakakuentajtlawa latamanin (1 Ped. 5:6, 7). Pero xtachuna laktsu tsiktsi, lakskulujwa kiliwanatkan. Talakaskin namakgalayaw kintawaykan o natlajayaw tumin xlakata natamawayaw. Chu Jehová nasikulunatlawa kintaskujutkan. Komo ni lhuwa kgalhiyaw tumin o taway, xla tlan kinkamaxkiyan tuku maklakaskinaw. Akgtum liʼakxilhtit, max amakgapitsin nakinkamaskiwikgoyan tsinu tuku kgalhikgo. Jehová na kamaxki laktsu tsiktsi niku natawilakgo. Kamalakatsukinit chuna la tlan natlawakgo xmasakgakan. Nachuna, tlawanit tuku maklakaskinkgo xlakata natlawakgo xmasakgakan. Wa xlakata, Jehová tlan nakinkamakgtayayan natekgsaw niku tlan natatawilayaw kifamiliajkan. Akxni Jesús kawanilh tachuwin nema min texto xala uku, max xlilakpuwama pi nialh makgas xʼama masta xlatamat xpalakata putum latamanin (katamalakxtupi tuku wan Lucas 12:6, 7). Jesús ni kapalakanilh tsiktsi o atanu animal. Nilh xlakata tlan nalatamayaw putum kilhtamaku (Mat. 20:28). w16.07 1:11-13

¿Tuku xlakata lakgalhinanaw chu niyaw? Biblia wan pi xkuenta Adán anan linin. Xlakata putum akinin xkamanan Adán, putum lakgalhinanaw chu niyaw (Rom. 5:12, 14, 17). Maski chuna, tlan nalaksakaw pi talakgalhin ni napulalin kilatamatkan. ¿La chuna natlawayaw? Nakanajlaniyaw xtamakamastan Cristo. Chuna mastayaw talakaskin pi xtalakgalhaman Dios nema ni kinkamininiyan napulalin kilatamatkan (Rom. 5:20, 21). Maski chuntiya lakgalhinanin akinin, ni kilimastatkan talakaskin pi talakgalhin nakinkapulalinan. Wa xlakata, akxni tlawayaw tuku nitlan, skiniyaw Jehová kakinkatapatin. Komo namastayaw talakaskin pi kapulalilh kilatamatkan xtalakgalhaman Dios nema ni kinkamininiyan, ¿tuku namakglhtinanaw? Pablo wa: «Xlipaxkatsinit Dios [...]. Kinkamasiyuniyan mpi lantla namakgaxtakgaw wa ntu ni maxkiy nkakni Dios, chu wa ntu xtatlawaputu ntu xala katuxawat, wa ntu ntlan talakapastakna nkalilatamaw yunu nkatuxawat, chu wa ntu akgstitum, chu wa ntu nalimaxkiyaw nkakni Dios» (Tito 2:11, 12). w16.07 3:5, 6

Xapulana tamakgaxtokgat Adán chu Eva ni kgalhakgaxmatkgolh Jehová. «Xapulana luwa» akgskgawilh Eva chu wanilh pi komo xwalh xtawakat «kiwi nema lilakgapaskan tuku tlan chu tuku nitlan», xʼamakgo katsikgo tuku lu xlakaskinka. Wanilh pi xʼama makgtaya nakatsi tuku tlan chu tuku nitlan. Eva ni limasiyalh pi xʼakxilha Adán la xʼakgxakga familia, xlakata ni maxkilh kakni chu xakstu laksakli nawa xtawakat kiwi chu ni pulana wanilh. Chu Adán ni kgalhakgaxmatli Dios akxni walh tawakat nema maxkilh xpuskat (Apoc. 12:9; Gén. 2:9, 16, 17; 3:1-6). Akxni Jehová kakgalhskilh Adán chu Eva tuku xtlawakgonit, Adán limawakalh xpuskat. Eva limawakalh luwa xlakata xʼakgskgawinit (Gén. 3:12, 13). Ni xlilat xwanit tuku wankgolh Adán chu Eva. Ni kgalhakgaxmatnankgolh chu lakatsalakgolh xlimapakgsin Dios. ¿Tuku kinkamasiyaniyan uma? Komo tiku tamakgaxtokgkgonit lakaskinkgo tlan kakakitaxtunilh, talakaskin nakgalhakgaxmatkgo Jehová chu nalitayakgo tuku tlawakgo. w16.08 1:1, 4, 5

¿Tuku xlakata lu laklanka taʼakglhuwit kgalhikgo makgapitsi tamakgaxtokgat? Makgapitsi lilipuwankgo o sitsikgo xlakata xtamakgaxtokgatkan ni kitaxtulh la xlakaskinkgo. Anan taʼakglhuwit xlakata tanu la kamakgastakka o tanu la limasiyakgo tuku makgkatsikgo. Min kilhtamaku kgalhikgo taʼakglhuwit xlakata la talalinkgo xfamiliajkan, xlakata la laktlawakgo tumin o la makgastakkgo kamanan. Pero kstalaninanin Cristo tiku tamakgaxtokgkgonit lakkaxtlawakgo xtaʼakglhuwitkan xlakata lipawankgo Jehová. Akxni kgalhikgo taʼakglhuwit, xliskinitkan tamakgtay lakgkgolotsin xalak congregación. Xlakan katsinikgo la nakamakgtayakgo xlakata namakgantaxtikgo xtastakyaw Dios. Komo tiku tamakgaxtokgkgonit skinikgo Jehová xʼespíritu santo, tlan namakgantaxtikgo tastakyaw xalak Biblia chu nalimasiyakgo xtayat Cristo (Gál. 5:22, 23). w16.08 2:11-13

Jesús xkgalhi lhuwa taskujut. Pero limaxtulh kilhtamaku nakamasiyani chu nakatachuwinan latamanin. Akgtum liʼakxilhtit, akgtum kilhtamaku lhuwa latamanin tamakxtumikgolh kxkilhtun pupunu xlakata nakgaxmatnikgo. Chu Jesús tatawakalh Pedro kʼakgtum aktsu barco chu kamasiyanilh latamanin. Alistalh na wi tuku masiyaniputulh Pedro. Tlawalh akgtum milagro akxni makgtayalh nachipa lhuwa skiti. Alistalh wanilh texto xala uku. Biblia wan pi Pedro chu tiku xtawilakgo lakapala «xlipaks timakgaxtakgkolh» chu stalanikgolh Jesús (Luc. 5:1-11). Nicodemo na xlakaskin pi Jesús tlakg xmasiyanilh. Pero xlakata xmakgtapakgsi kSanedrín xpekuan xlakata tuku xwankgolh amakgapitsin komo xʼakxilhkgolh pi xtachuwinama Jesús. Wa xlakata lakgalh Jesús katsisni. Jesús xatapaxuwan makgamakglhtinalh, chu litachuwinalh tuku xaxlikana (Juan 3:1, 2). Jesús ankgalhin limaxtulh xkilhtamaku xlakata nakamasiyani latamanin xaxlikana chu namatliwakglha xtakanajlakan. Nachuna, akinin na xatapaxuwan nakamasiyaniyaw latamanin akxni tlan kinkamakgamakglhtinankgoyan, xlakata nakamakgtayayaw naʼakgatekgskgo tuku wan Biblia. w16.08 4:10, 11

Kilitaktujutkan chu kilikatsitkan pi Jehová nitu lixkajwan chu xaskulunku, chu xlimapakgsin wa tuku tlakg tlan nakinkapulalinan. Komo limasiyayaw pi lakaskinaw xtamakgtay chu taktujuyaw, namakgantaxtiyaw xlimapakgsin kkilatamatkan. Nachuna, uma natlawa pi kuenta natlawayaw tuku makgkatsikgo chu tuku lakpuwankgo amakgapitsin. Kilhakgatkan liwana xlimasiyat pi akinin kskujnin Jehová. Xlimapakgsin Jehová wa tuku tlakg xatlan chu akinin xatapaxuwan makgantaxtiyaw. Lhuwa natalan kuenta tlawakgo la tasiyakgo chu la likatsikgo chu xlilat nakawaniyaw pi tlan tuku tlawamakgo. Xlakan makgtayanankgo pi latamanin tiku tlan likatsikgo nakgaxmatkgo tamakatsin xalak Biblia chu malankikgo Jehová chu makgapaxuwakgo. w16.09 3:18-20

Jacob xlakaskin pi Jehová ksikulunatlawalh (Gén. 32:24-26). Chu chuna lalh. Jehová sikulunatlawalh xlakata lu liskujli. Wa xlakata limapakuwilh Israel, nema wamputun «Xtalachipana Dios». Jehová tlan akxilhli chu sikulunatlawalh. Wa uma tuku akinin na makglhtinamputunaw. Raquel xpuskat xwanit Jacob chu wa tiku tlakg xpaxki. Raquel na xakxilhputun la xʼama makgantaxti Jehová tamalaknun nema xwaninit xchixku pi x’ama kasikulunatlawa xkamanan. Pero Raquel nila xkgalhi kamanan, chu makgasa uma lu xlilipuwankgo lakpuskatin. ¿Tuku tlawalh Raquel xlakata xtalipuwan? Nikxni lakpuwa pi ni xʼama lakkaxla. Makglhuwa xtlawani oración Jehová xlakata chuntiya xtayanilh. Jehová kgaxmatnilh xʼoración chu titaxtulh kilhtamaku sikulunatlawalh, Raquel kgalhilh kamanan (Gén. 30:8, 20-24). w16.09 2:6, 7

Xlakaskinka nakamasiyaniya minkamanan pi tlakg napaxuwakgo komo nakgalhakgaxmatkgo tuku wan Biblia (Sal. 1:1-3). Akgtum liʼakxilhtit, tlan nakawaniya pi kalakpuwankgolh pi nalatamakgo kʼakgtum isla chu xlilaksakatkan makgapitsi latamanin xlakata anta nakatalatamakgo. Alistalh tlan nakakgalhskina: «¿Tiku nakalaksakatit xlakata putum tlan nalatalalin chu xatapaxuwan nalatamakgo?». Alistalh tlan nakalikgalhtawakganiya Gálatas 5:19-23 xlakata naʼakxilhkgo tiku lakaskin Dios nalatamakgo kxasasti kakilhtamaku. Chuna tlan nakamasiyaniya pulaktiy tuku xlakaskinka. Pulana, pi Jehová kinkamasiyaniman xatapaxuwan nalatamayaw chu tlan nakatalalinaw amakgapitsin la uku. Chu xlipulaktiy, pi xla kinkamasiyaniman la nalatamayaw kxasasti kakilhtamaku (Is. 54:13; Juan 17:3). Na tlan nakamasiyaniya minkamanan la kamakgtayanit Biblia amakgapitsi natalan. ¿La chuna natlawaya? Tlan naputsaya akgtum biografía kkilikgalhtawakgakan, ksección nema wanikan «Biblia kalakgpalinilh xlatamatkan», krevista Makatsinina. w16.09 5:13, 14

Maski lhuwa taskujut lakgayaw, kimputumkan kilimaxtutkan kilhtamaku xlakata nakgalhtawakgayaw chu nakakninaniyaw Dios kfamilia (Efes. 5:15). Akxni nalikgalhtawakgayaw Biblia chu atanu likgalhtawakga o akxni nalakkaxwiliyaw kintakgalhtinkan xla tamakxtumit, ni kajwatiya nalakpuwanaw lhuwa páginas nalikgalhtawakgayaw. Wata xTachuwin Dios nachan kkinakujkan chu namatliwakglha kintakanajlakan. Kililakpuwanatkan tuku maklakaskinaw, ni kajwatiya tuku maklakaskinkgo amakgapitsin (Filip. 1:9, 10). ¿Tuku xlakata chuna wanaw? Xlakata akxni lakkaxwiliyaw naʼanaw lichuwinanaw Dios, lakkaxwiliyaw tamakxtumit, akgtum taʼakgchuwin o liʼakxilhtit, min kilhtamaku ni lakpuwanaw la nakinkamakgtayayan tuku likgalhtawakgayaw. Kalichuwinaw tiku tlawa liwat. Maski xlikgalhwanat liwat nema kaxtlawa akxni nina kamaxki amakgapitsin, ni katililatamalh tuku kaj nakgalhwanan. Komo ni tatatlaputun xlikaxtlawat liwat nema nalitatliwakglha. Nachuna, komo talalimputunaw Jehová, kilikgalhtawakgatkan Biblia putum kilhtamaku. w16.10 2:10, 11

Anta kʼHebreos 11:1 Biblia lichuwinan pi pulaktiy tuku kilhchanima takanajla. Pulana wan pi kilhchanima pi «tanks kilikanajlatkan pi namakglhtinanaw wantu kgalhkgalhimaw». Tuku kgalhkgalhimaw na kilhchanima tuku Dios kinkamalaknuninitan natlawa. Akgtum liʼakxilhtit, liwana katsiyaw pi putum tuku nitlan nialhtu katiʼanalh chu natawila xasasti kakilhtamaku. Chu xlipulaktiy, takanajla wa pi «lakatanks kilikatsitkan pi xlikana wi, chu anan wantu lipawanaw maski ni ukxilhmaw». Makgapitsi umakgolh tuku xlikana wilakgo pero ni akxilhaw wa Jehová, Jesucristo, ángeles chu Tamapakgsin kʼakgapun. ¿La limasiyayaw pi xlikana kanajlaniyaw xtamalaknun Dios chu tuku ni akxilhaw? Limasiyayaw la latamayaw, tuku wanaw chu tuku tlawayaw. w16.10 4:6

Jehová chu Jesús lhuwa xtapalh akxilhkgo tuku tlawayaw xpalakatakan maski nila tlawayaw la lakaskinaw (Luc. 21:1-4; 2 Cor. 8:12). Akgtum liʼakxilhtit, kinatalankan tiku linkgoya kata lhuwa liskujkgo xlakata naʼankgo ktamakxtumit chu nalichuwinankgo Dios. ¿Kamakgpuwantiniyaw chu kawaniyaw lakwan tachuwin xlakata tuku tlawakgo? Kakamakgpuwantiniw amakgapitsin akxni matlaniyaw. Komo akxilhaw pi wi tiku tlawalh tuku tlan, kawaniw lakwan tachuwin. Akxni Pablo chu Bernabé xwilakgolh kʼAntioquía xalak Pisidia, lakchixkuwin tiku xpulalinkgo sinagoga xala ama kachikin kawanikgolh: «Chixkuwin natalanin, lapi wi ntu ntachuwin nkgalhiyatit mpala listakyawayatit ntachixkuwitat, kawantit». Wa xlakata Pablo maklakaskilh ama kilhtamaku xlakata nakamakgpuwantini tiku anta xwilakgolh (Hech. 13:13-16, 42-44). Komo nakamakgpuwantiniyaw amakgapitsin, max na nakinkamakgpuwantiniputunkgoyan (Luc. 6:38). w16.11 1:3, 15, 16

Lanka talakgalhaman makgtapakgsikan kxkachikin Jehová chu katsikan tuku lakaskin natlawayaw. Xlakata katsiyaw tuku makgapaxuwa, kilikgalhakgaxmatatkan chu kilitlawatkan tuku xa’akgstitum. Lhuwa latamanin lakgatikgo tlawakgo tuku nitlan. Pero akinin kilixkajnitkan tuku nixatlan, chuna la Jehová xkajni (Sal. 97:10). Ni kililakpuwanatkan la tiku «wankgo pi tuku tlan nitlan chu tuku nitlan xatlan» (Is. 5:20). Makgapaxuwaputunaw Jehová. Wa xlakata liwana lakpuwanitaw nitu nalixkajwananaw kkimaknikan, kkintalakapastaknikan chu kkintakanajlakan (1 Cor. 6:9-11). Katsiyaw pi tuku kinkawaniyan kBiblia kaj xlakata tlan nakinkakitaxtuniyan. Nachuna, paxkiyaw Jehová chu ni makgxtakgputunaw. Wa xlakata kgalhakgaxmataw xlimapakgsin kkinchikkan, kcongregación, ktaskujut, kʼescuela o alakatanu. w16.11 3:13

Tiku xLikgalhtawakgananin Biblia xlitaxtukgo, xlikana xkatsiputunkgo xlakata Dios. Pero lata kata 1914 asta 1919, ni putum liwana xʼakgatekgskgo tuku xkilhchanima Biblia akxni kinkalimapakgsiyan pi nakakgalhakgaxmatkan mapakgsinanin. Wa xlakata milh kilhtamaku makgtanukgolh kʼguerra. Akgtum li’akxilhtit, mapakgsina xalak Estados Unidos kawanilh latamanin pi 30 xla mayo kata 1918 xtlawakgolh oración xlakata x’analh takaksni. Edición xa’inglés xla uma likgalhtawakga kamakgpuwantinilh xLikgalhtawakgananin Biblia nachuna natlawakgo. Makgapitsi natalan limakgtayanankgolh tumin xlakata guerra, chu makgapitsi soldados litaxtukgolh chu stalakgolh kʼguerra. Chuna la akxilhaw, xtalakaskin xkastakyawaka. Pero ni nalakpuwanaw pi wa xlakata xka’akgchipanit Babilonia. Akxni xlama xaPulana Guerra xLikalanka Katiyatni lhuwa talismanin nema xkgalhi nixaxlikana takanajla xmakgxtakgkgonita (Luc. 12:47, 48). w16.11 5:9

¿Tuku xlakata Pablo kawanilh xatalaksakni pi ni xlilatamakgolh «xtatlawaputu nkintiyatliwakan»? Max xlakata kskujni Dios xmastalh talakaskin pi tlakg xlakaskinka xlitaxtulh kxlatamat tuku tlawaputun xmakni. Akgtum liʼakxilhtit, Pablo lichuwinalh pi makgapitsi natalan xalak Roma xmalanakan xlitaxtunit tuku xtlawaputun xmaknikan. Max xwamputun pi tlawakan talakgxtumit, liwat o atanu nema tlan limakgkatsikan wa tuku tlakg xlakaskinka xʼakxilhkgo kxlatamatkan (Rom. 16:17, 18; Filip. 3:18, 19; Jud. 4, 8, 12). Chu kkachikin Corinto, chatum kstalanina Cristo xtatlawa talakgxtumit xalimaxana «xtutsi» (1 Cor. 5:1). Xlikana pi kstalaninanin Cristo tiku xlamakgolh kxapulana siglo xlakaskinkgo xtastakyaw Pablo xlakata ni xlilatamakgolh «xtatlawaputu nkintiyatliwakan» (Rom. 8:5, 6). Chu la uku, na maklakaskinaw. w16.12 2:5, 8, 9

Tlan nawaniyaw tiku lipawanaw tuku lilakgaputsayaw chu la makgkatsiyaw, uma nakinkamakgtayayan natayaniyaw tuku tuwa. Max kinchixkukan o kimpuskatkan, chatum tlan amigo o kgolotsin xalak congregación nakinkamakgtayakgoyan naʼakgatekgsaw tuku titaxtumaw. Nitlan kitaxtu tuku tlawaputunaw akxni ni kawaniyaw amakgapitsin (Prov. 15:22). Ankan ktamakxtumit na tlan nakinkamakgtayayan xlakata ni lu nalakgaputsayaw. Anta makxtum katatawilayaw kinatalankan, tiku kinkalilakgaputsakgoyan chu kinkamatliwakglhputunkgoyan (Heb. 10:24, 25). «Nalamatliwakglhniyaw kintakanajlakan», kinkamakgtayayan natayaniyaw putum taʼakglhuwit (Rom. 1:12). w16.12 3:17, 18

Akxni kgalhiyaw akgtum tajatat o atanu chu nila lakgpaliyaw tuku titaxtumaw. ¿Tuku tlan natlawayaw? Kamakamaxkiw Jehová chu kalipawaw pi xla kinkalilakgaputsayan (1 Ped. 5:6, 7). Nachuna, liwana kalitamakgtayaw kintamakxtumitkan chu atanu tamakgtay nema kinkamaxkiyan Jehová (Heb. 10:24, 25). ¿Tuku tlan natlawakgo natlatni tiku ni makgxtakgkgo Jehová chu kgalhikgo kamanan tiku nialh skujnanikgo Jehová? Xliʼakxilhtit palakachuwina Samuel tlan nakinkamakgtayayan. Samuel nila xkamafuerzajlini xkamanan tiku laklankata xwankgonit xlakata ni xmakgxtakgkgolh Dios (1 Sam. 8:1-3). Wa xlakata makamaxkilh xtaʼakglhuwit Jehová. Pero liskujli xlakata ni namakgxtakga chu namakgapaxuwa Jehová (Prov. 27:11). Lhuwa natlatni nachuna titaxtumakgolh. ¿Tuku tlawakgo? Liwana katsikgo pi Jehová nakamakgamakglhtinan lakgalhinanin tiku lakgpalikgo xtayatkan (Luc. 15:20). Pero chuntiya liskujkgo xlakata ni namakgxtakgkgo Jehová, chu kgalhkgalhikgo pi xliʼakxilhtitkan natlawa pi xkamanankan nataspitparakgo kcongregación. w17.01 1:15, 16

Tiku taktuju ni lakpuwan pi putum tlan tlawa, katsi tuku nila tlawa chu ni atanu tiku limawaka tuku nitlan tlawa. Nachuna, kakgaxmatni tuku lakpuwankgo amakgapitsin chu masta talakaskin namasiyanikan. Jehová tlan kaʼakxilha latamanin tiku taktujukgo. Biblia masiya pi chatum lataman tiku wan pi nila putum tlawa, liwana lakgapaskan chu katsi pi wi tuku nila matlani o ni kgalhi talakaskin chuna natlawa. Uma namakgtaya nakamaxki kakni amakgapitsin chu nakalimasiyani talakgalhaman. Komo ni kuenta natlawayaw, max ni katikatsiw akxni natsukuyaw lankajwananaw. ¿La chuna nala? Max nalakpuwanaw pi akinin tlakg xlakaskinka nixawa amakgapitsin, max xlakata tlakg kinkalakgayawakanitan taskujut kcongregación o max xlakata kiʼamigoskan lakgayakgolh xlakaskinka taskujut (Rom. 12:16). O max kaj akinin akstu nakinkalichuwinankanan (1 Tim. 2:9, 10). Max asta natsukuyaw kawaniyaw amakgapitsin tuku xlitlawatkan chu tuku ni xlitlawatkan (1 Cor. 4:6). w17.01 3:6-8

Nina makgas tlakg tsukulh talhuwi la talichuwinama Dios chu xkachikin limaklakaskima xasasti tecnología xlakata nakalinikan xalakwan xalaksasti lhuwa latamanin. Pero natalan tiku linkgoya kata tuwa makgkatsikgo nakatsinikgo la natlawakgo tuku xasasti (Luc. 5:39). Xlikana, chuna la titaxtutilha kilhtamaku wa latamanin makgatsankgatilhakgo xlitliwakgakan (Prov. 20:29). Wa xlakata natalan tiku linkgoya kata nakamasiyanikgo kamanan xlakata tlakg nalakgatayakgo taskujut (Sal. 71:18). Natalan tiku lakgayakgolh limapakgsin, tuwa makgkatsikgo nakamaxkikgo uma taskujut tiku kajku kamanan. Max nitlan katilimakgkatsilh xlakata nalakpuwan pi namakgatsankga tuku lakgaya nema lakgati. Max lakpuwankgo pi nitlan katitatlawalh komo ni wa naʼakxilhkgo. O max lakpuwankgo pi ni kgalhikgo kilhtamaku xlakata nakamasiyanikgo amakgapitsin. Nachuna, tiku kamananku talakaskin nakgalhkgalhinankgo komo ni lhuwa taskujut nakalakgayawakan. w17.01 5:3, 4

Dios makamilh xKgawasa unu kKatiyatni (Juan 1:14). Chuna Jesús litaxtulh chatum chixku tiku ni xkgalhi talakgalhin, chuna la xwanit Adán. Pero tlakg tlan litaxtulh nixawa Adán. ¿Tuku xlakata? Xlakata xla kgalhakgaxmatli limapakgsin nema Dios xlakaskin pi xkgalhakgaxmatli chatum chixku tiku ni kgalhi talakgalhin. Maski Jesús tuwa tuku titaxtulh, ankgalhin kgalhakgaxmatli Dios. Xlakata mastalh xlatamat tlan kinkalakgmaxtun ktalakgalhin chu klinin. Xla tlawalh tuku xlitlawat xwanit Adán. Jesús xlitaxtu chatum chixku tiku ni xkgalhi talakgalhin chu nikxni makgxtakgnalh chu kgalhakgaxmatli Dios (1 Tim. 2:6). Xtamakamastan tlawa pi putum latamanin tlan nalatamakgo putum kilhtamaku (Mat. 20:28). Chuna, xtamakamastan Jesús lu xlakaskinka xlakata nakgantaxtu xtalakaskin Dios (2 Cor. 1:19, 20). w17.02 1:15, 16

Max namin kilhtamaku natitaxtuyaw tuku tuwa kkilatamatkan chu lu nalilakgaputsayaw o lu nalilipuwanaw. Max asta Jesús nachuna makgkatsilh. Akxni xtokgowakaka kkiwi, mamaxanika chu lu makgapatinanka. Max nikxni chuna xtitaxtunit kxlatamat (Heb. 12:3). ¿Tuku makgtayalh? Jesús lilakpuwa tuku tlan xʼama kitaxtu komo xtayanilh, chu tuku tlakg xlakaskinka wa pi xʼama maskulunki xtukuwani Jehová chu xʼama tataya xlakata wa xmapakgsinalh. Xkatsi pi xtaʼakglhuwit xʼama sputa pero tamaskiwin nema xʼamaka maxkikan putum kilhtamaku xʼama makgapala kʼakgapun. Akxni natitaxtuyaw tuku tuwa, na tlan chuna natlawayaw la Jesús. ¿La natlawayaw? Kalilakpuwaw tuku tlan nakitaxtu komo natayaniyaw chu nalilakpuwanaw pi nasputa tapatin. w16.04 2:10

La uku, lhuwa latamanin ni lakpuwankgo pi linkgo kuenta akxni lakgalhinankgo, wa xlakata ni akgatekgskgo pi maklakaskinkgo xtamakamastan Jesús. Makgapitsi ni akgatekgskgo tuku kilhchanima talakgalhin, la nitlan katlawani chu ni akgatekgskgo tuku xlitlawatkan xlakata nalakgtaxtunikgo. Komo tlan naku xkgalhikgolh, xpaxtikatsinikgolh Dios akxni xkatsinikgolh pi malakgachalh xKgawasa kkatiyatni xlakata nakinkalakgmaxtuyan ktalakgalhin chu klinin. Jehová chuna tlawalh xlakata kinkapaxkiyan chu xlakata kinkalakgalhamanan (1 Juan 4:9, 10). Xtamakamastan Cristo wa tuku tlakg litasiya pi Jehová lu kinkapaxkiyan chu lu kinkalakgalhamanan maski ni kinkalakgchanan. Lu tlan limakgkatsiyaw akxni katsiniyaw pi komo kanajlaniyaw xtamakamastan Jesús, tlan nakinkatapatikanan kintalakgalhinkan chu tlan talakapastakni nakgalhiyaw (Heb. 9:14). ¿Ni xlikana pi uma lu tlan tamakatsinin nema kalitachuwinamputunaw amakgapitsin? w16.07 4:6, 7

Jehová liwana kinkawaniyan pi xla tlan naxapa kintalakgalhinkan komo kanajlaniyaw talakgmaxtut. Wamputun pi xla putum kilhtamaku nakinkatapatiyan kintalakgalhinkan (Hech. 3:19-21). Talakgmaxtut tlawa pi Jehová nakamakgamakglhtinan la xkaman tiku kalaksakkanit (Rom. 8:15-17). Jehová na kawani kstalaninanin Cristo tiku litaxtukgo xaʼamakgapitsi borregos na namakgtapakgsikgo kxfamilia kKatiyatni. Akxni nialh katikgalhikgolh talakgalhin, natitaxtukgo xaʼawatiya taputsan. Komo ni namakgxtakgkgo Jehová, xla na nakamakgamakglhtinan la xkamanan (Rom. 8:20, 21; Apoc. 20:7-9). Jehová putum kilhtamaku kapaxki xkamanan. Xlakata talakgmaxtut, chuntiyaku namakglhtinanaw tasikulunalin putum kilhtamaku. Jehová kinkamaxkinitan lu tlan tamaskiwin, chu nila tiku nakinkamakglhtiyan. w17.02 2:15, 16

Kalakapastakwi pi akxni xʼamigos Jehová litaxtuw xla xkatsi pi tuku nitlan tayat kgalhiyaw nitlan xʼama tlawa pi xmakglakgalhinaw. Maski chuna, Jehová lakaskilh pi xʼamigos xlitaxtuw. Xlakata Jehová lu kinkapaxkiyan, kinkamaskiwin tuku lu xtapalh. Makamilh xKgawasa kKatiyatni xlakata xmastalh xlatamat chu kxokgolh kintalakgalhinkan (Juan 3:16). Akxni tlawayaw tuku nitlan, tlan skiniyaw Jehová kakinkatapatin. Xlakata xtamakamastan Jesús, Dios kinkatapatiyan chu kinkamaxkiyan talakaskin chuntiya xʼamigos nalitaxtuyaw maski makglakgalhinanin akinin (1 Tim. 1:15). w16.05 4: 6, 7