Julio

Xtsumat Jefté laksakli naskujnani Jehová, ni tamakgaxtokgli chu ni kgalhilh kamanan. ¿La natlawayaw la Jefté chu xtsumat? La uku, miles xTatayananin Jehová lakgkgawasan chu laktsuman ni tunkun tamakgaxtokgkgo chu ni nakgalhikgo kamanan. ¿Tuku xlakata? Xlakata tlakg naskujnanikgo Jehová. Lhuwa natalan tiku linkgoya kata limakgxtakgkgo kilhtamaku nema tlan xkalimaxtunikgolh xkamanan o xnatanatni. ¿Tuku xlakata? Xlakata lakapastakkgonit namaxkikgo Jehová xkilhtamakujkan chu xlitliwakgakan. Makgapitsi makgtlawakgo niku tamakxtumiyaw. Makgapitsi ankgo kʼEscuela xla Tiku lichuwinankgo xTamapakgsin Dios chu ankgo kʼakgtum congregación niku tlakg talakaskin tiku nalichuwinankgo Dios. Chu amakgapitsin lakkaxwilikgo tlakg nalichuwinankgo Dios. Jehová putum kilhtamaku nalakapastaka tuku umakgolh natalan tlawakgo xlakata lu paxkikgo (Heb. 6:10-12). ¿Chu wix? ¿Tuku tlawaputuna xlakata tlakg naskujnaniya Jehová? w16.04 1:16, 17

Jesús wa pi xla litaxtu la tiku kakuentajtlawa borregos chu kstalaninanin litaxtukgo la kgamputum xborregos. Borregos putum kilhtamaku akxtum wilakgolh chu stalanikgo xkuentajtlawanakan. Komo tantiy borregos wilakgolh kʼakgtum kgastin, tantiy borregos wilakgolh niku kaxtum chu tantum borrego alakatanu wi, nila nawanaw pi umakgolh tankitsis borregos watiya kgamputum. Nachuna, komo kaj kgamputum wamputunaw chu stalaniputunaw kaj chatum mapuchwayanina, putum kilhtamaku kiliʼanatkan ktamakxtumit xlakata makxtum nakatatawilayaw kinatalankan. Tamakxtumit kinkamakgtayayan makxtum natawilayaw chu nalitaxtuyaw la akgtum familia tiku lapaxkikgo (Sal. 133:1). Makgapitsi natalan, xnatlatnikan o xnatalankan nialh xtatayananin Jehová litaxtuputunkgo. Pero Jesús kawanilh pi xʼama kamaxki akgtum familia nema xʼama kapaxki chu xʼama kakuentajtlawa (Mar. 10:29, 30). Komo chuntiya na’anaw ktamakxtumit, umakgolh natalan tlan nakinkaʼakxilhkgoyan la xnatlatnikan o xnatalankan chu natatliwakglhkgo. Komo nalilakpuwanaw uma, fuerza natlawayaw naʼanaw kputum kintamakxtumitkan. w16.04 3:9, 10

La uku kakninaniyaw Jehová akxni tlawayaw oración, lichuwinanaw xalakwan xalaksasti chu anaw ktamakxtumit. Pero komo katakgalhiyaw taʼakglhuwit kinatalankan, Dios ni katimakglhtinalh kintakakninkan. Komo xʼamigos Jehová wamputunaw, talakaskin nakatapatiyaw amakgapitsin (Luc. 11:4 chu Efes. 4:32). Jehová lakaskin pi nakatapatiyaw amakgapitsi chu ni nakatakgalhiyaw taʼakglhuwit. Wa xlakata lu tlan komo nakinkakgalhskinkanan: «¿Tuwa kmakgkatsi nakkatapati kinatalan? ¿Klakgati akxtum kkatatawila?». Komo akxilhaw pi tuwa makgkatsiyaw natapatinanaw, kataktujuw chu kaskiniw Jehová kakinkamakgtayan, xla nakgalhti kiʼoracioneskan (1 Juan 5:14, 15). w16.05 1:6, 7

¿La xlimakgas namakgapala taskujut nema lichuwinalh Jesús? Xla wa pi namakgapala asta akxni namin lisputni (Mat. 24:14). Xtatayananin Jehová chuntiya lichuwinamaw xalakwan tamakatsin kʼuma xaʼawatiya kilhtamaku xlakata kgalhiyaw xʼespíritu santo Dios (Hech. 1:8; 1 Ped. 4:14). Makgapitsi tiku xala atanu takanajla wankgo pi na kgalhikgo espíritu santo. Pero ¿na tlan tlawakgo tuku tlawamakgo xtatayananin Jehová kʼuma xaʼawatiya kakilhtamaku? Makgapitsi litsakgsakgonit nalichuwinankgo Dios la akinin, pero nila chuna tlawakgonit. Amakgapitsi lichuwinankgonit Dios, pero ni makgas. Chu amakgapitsi ankgo kʼakgatunu chiki, pero ni lichuwinankgo xTamapakgsin Dios. Wa xlakata ni tlawamakgolh taskujut nema Jesús matsukilh. w16.05 2:13, 16

Apóstol Pablo mastalh uma tastakyaw: «Milimakgaxtakgatkan wa ntu xamakgan mintayatkan, chu lantla xamakgan chixku xwanitantit ntu xmakgtsankganit ntu ni tlan lantla ntlaway wa ntu xtatlawaputu wa ntu akgskgawiy». Chu wampa: «Kalakgpalitit mintapuwankan lantla mintayatkan. Na kalilakgpalinantit xasasti chixku wa ntu litatlawanit xtachuna Dios xtapuwan, lantla ntu lu[...] wa talulokgtat ntu ntlaway, chu xasantujlani kxlatamat» (Efes. 4:22-24). Uma wamputun pi chuntiya kiliskujatkan xlakata natalakgpaliyaw chu nalilhakgananaw xasasti tayat. Wa xlakata, maski akglhuwata kata skujnanimaw Jehová, tlan tlakg nakatsiniyaw xlakata xtayat. Chu Biblia tlan kinkamakgtayayan xlakata tlakg nalimasiyayaw xtayat Jehová. w16.05 4:8, 9

La uku, xlakata Jehová nakinkastakyawayan chu nakinkamasiyaniyan, limaklakaskima paraíso xaʼespiritual (Is. 64:8). Kʼuma paraíso lu tlan makgkatsiyaw maski lamaw kkakilhtamaku niku nitlan likatsikgokan. Tuku tlakg xlakaskinka wa pi lakgapasaw kinTlatkan xalak akgapun chu lipaxuwayaw xtapaxkit (Sant. 4:8). Kxasasti kakilhtamaku nalipaxuwayaw putum tasikulunalin nema nalimin paraíso xaʼespiritual. Na nalipaxuwayaw nalatamayaw kparaíso niku namapakgsinan xTamapakgsin Dios. Ama kilhtamaku Jehová chuntiya nakinkamakgtayayan natalakgpaliyaw chu nakinkastakyawayan chuna la akinin nipara tsinu lakpuwanaw (Is. 11:9). Dios na natlawa pi kintalakapastaknikan chu kimaknikan nialh nakgalhi talakgalhin. Tlakg ni tuwa katikatsiniw xpalakata chu liwana nakgalhakgaxmataw. Wa xlakata chuntiya kamastaw talakaskin pi Jehová kakinkamakgtayan natalakgpaliyaw. Kalimasiyaniw pi paxtikatsiniyaw la kinkalimasiyaniyan xtapaxkit. w16.06 1:8, 9

Umakgolh tachuwin kawanilh Moisés akxni xʼamaja niy, kkata 1473 akxni nina xmin Jesús. Xwilakgolh kxtiyat Moab, akxni xʼamakgolha patakutkgo kgalhtuchokgo Jordán chu xʼamakgolh makgamakglhtinankgo Tiyat nema xKawanikanit pi Nakamaxkikan (Deut. 6:1). Moisés xkapulalinit 40 kata. Tachuwin nema kawanilh xkalimatliwakglhtuputun xlakata ni xpekuankgolh, xlipawankgolh Jehová chu nikxni xmakgxtakgkgolh. ¿Tuku xlakata? Xlakata xkatsi pi xʼamakgolh kgalhikgo lhuwa taʼakglhuwit. Wa xlakata akxni xkalitachuwinanita Pulakkaw Limapakgsin chu amakgapitsi xlimapakgsin Jehová, Moisés kamalakapastakalh lu xlakaskinka limapakgsin nema likgalhtawakgayaw kDeuteronomio 6:4, 5. Israelitas xkatsikgo pi kaj chatum xDioskan xwanit, «Jehová». Chu tiku ni xmakgxtakgnankgo kaj chatum Dios xkakninanikgo, chuna la xnatlatnikan. w16.06 3:2, 3

Akxni Jesús xlamajku kkatiyatni wa tachuwin xla texto xala uku, pero Cristo makgamakglhtinanit litliwakga kʼakgapun. Xlakata wa tiku napulalin guerra xla Armagedón, xlilat nalakpuwanaw pi la uku katsi tuku kilhtamaku natsuku (Apoc. 19:11-16). Pero akinin chuntiya ni katsiyaw tuku kilhtamaku chu tuku hora nachin lisputni. Wa xlakata xlakaskinka skgalalh natawilayaw. Jehová liwana lakkaxwilinit tuku hora natsuku lanka takatsanajwat. Chu uma kilhtamaku tlakg talakatsuwima. Chuna la wan Biblia: «Ni katimakgapalalh» (Hab. 2:1-3). ¿Tuku xlakata liwana katsiyaw? Liwana katsiyaw pi Jehová namakgantaxti tuku malaknunit. Xla kamalaknuninit kskujnanin pi nakalakgmaxtu akxni natawila lanka takatsanajwat chu putum kilhtamaku nalatamakgo kxasasti katiyatni. Wa xlakata, komo latamaputunaw kxasasti katiyatni, skgalalh kilitawilatkan. w16.07 2:4-6

Pedro malaknulh pi nikxni xʼama makgxtakga Jesús maski amakgapitsin xmakgxtakgkgolh pero ni chuna tlawalh (Mar. 14:27-31, 50). Akxni xchipakanita Jesús, putum apóstoles makgxtakgkgolh, asta Pedro. Chu makgtutu wa pi ni xlakgapasa Jesús (Mar. 14:53, 54, 66-72). Pero nitlan limakgkatsilh tuku xtlawanit. Wa xlakata Jehová tapatilh chu chuntiya lakgayawalh taskujut. Komo kstalaninanin Cristo xlitaxtuw amacha kilhtamaku chu xkgaxmatwi tuku tlawalh Pedro, ¿chuntiya xlipawaw Jehová? La uku, ¿nalakapastakaw pi Jehová xalakgalhamana chu max maxkima kilhtamaku chatum lataman nalakgpali xtayat? Pero komo ni namakgxtakga lanka talakgalhin nema tlawanit, ¿nalipawanaw pi Jehová katsi tuku lama chu nalakkaxtlawa akxni xlilat? Xla tlan namaxtu lataman kcongregación komo natalakaskin. Pero putum kilhtamaku nalipawanaw pi Jehová natlawa tuku xaʼakgstitum chu tuku tlan. w16.06 4:8, 9

Atanu lanka tasikulunalin nema makglhtinanaw xlakata xtalakgalhaman Jehová wa akxni tlan kinkamamakgkatsiniyan akxni wi tuku lilipuwanaw. Akxni kstalaninanin Cristo xalak Tesalónica xkaputsastalanimaka, Pablo katsokgnanilh tuku wan texto xala uku. ¿Ni xlikana pi tlan limakgkatsiyaw akxni katsiniyaw pi Jehová kinkapaxkiyan chu kinkalilakgaputsayan xlakata xtalakgalhaman nema ni kinkamininiyan? Xlakata lakgalhinanin akinin, komo Jehová ni xkinkamakgtayan ni xkgalhiw takgalhkgalhin (Sal. 49:7, 8). Pero Jehová kinkamaxkinitan akgtum lu stlan takgalhkgalhin. Jesús wa: «Wa yuma xtalakaskin wa nti nkimalakgachanit; mpi xlipaks wa nti naukxilha xaKam, chu na nakanajlaniy, nakgalhiy latamat wa ntu xaliʼankgalhin» (Juan 6:40). Xlakata xtalakgalhaman Jehová nema ni kinkamininiyan tlan kgalhkgalhiyaw pi xliputum kilhtamaku nalatamayaw. Pablo wa: «Tasiyunit xlipaxkatsinit Dios wa ntu liminikgoy akgaputaxtut xlipaks nchixkuwin» (Tito 2:11). w16.07 3:14, 15

Lu nitlan pi komo skujni Jehová naʼakgskgawi xpuskat o xchixku. Pero kalakpuwanti pi chatum tiku tamununit chu tamakgaxtokgnit tatlawa talakgxtumit achatum, makgxtakga xpuskat o xchixku chu tatamakgaxtokga tiku tatlawalh talakgxtumit. Komo ni makgxtakga tuku nitlan tlawama, xlilat namaxtukan kcongregación xlakata ni nataxkajwani xkachikin Dios (1 Cor. 5:11-13). Xlilat namakgxtakga tuku nitlan tlawama komo taspitputun kcongregación (Luc. 3:8; 2 Cor. 2:5-10). ¿La xlilhuwa kilhtamaku xlititaxtut xlakata tlan namakgamakglhtinamparakan kcongregación? Ni talakkaxwilinit la xlimakgas, pero max natitaxtu akgtum o akglhuwa kata asta akxni tiku lakgalhinanit nalimasiya pi xlikana makgxtakgnit tuku nitlan xtlawama chu namakgamakglhtinamparakan kcongregación. Chu maski namakgamakglhtinamparakan, wa Dios tiku lakgchan natalakkaxla (Rom. 14:10-12). w16.08 1:12, 13

Apóstol Pablo kawanilh lu tlan tachuwin natalan tiku xlakgatayaputunkgo taskujut kcongregación. Tuku wa Pablo kinkamalakapastakayan tiku lu liskuja o tiku tamakgxpastonkga xlakata namakachani tuku makgat wi. Kalilakapastakwi pi chatum tala makgatsiputun tuku talakaskin xlakata siervo ministerial nalitaxtu. Akxilha pi talakaskin tlakg naliskuja xlakata nalimasiya xtayat Cristo. Alistalh, akxni liskujmaja la siervo ministerial, chuntiya lu liskuja xlakata namakgatsi tuku talakaskin xlakata kgolotsin xalak congregación nalitaxtu. Makgapitsi natalan lakgpalimakgo xlatamatkan xlakata tlakg skujnaniputunkgo Jehová. Akgtum liʼakxilhtit, max precursores litaxtuputunkgo, amputunkgo kBetel o makgtlawaputunkgo Pukgalhtawakga xla xTatayananin Jehová. w16.08 3:3, 4

¿Tuku tekgsli Nehemías akxni alh kJerusalén? Lhuwa xtalamakgasitsin israelitas tiku xalak alakatanu países xkawanimakgolh pi nialh xtlawakgolh xpatsaps Jerusalén. Jerusalén ni xkgalhi xpatsaps, chu judíos lu nitlan xlimakgkatsikgo. ¿La makgkatsilh Nehemías? ¿Lilakgaputsalh chu tamakaxlajwanilh? Ni. Xlismaninit naskini tamakgtay Jehová, chuna la tlawakgolh Moisés, Asá chu atanu kskujnin Dios. Akxni chuna titaxtulh Nehemías, na putsalh xtamakgtay Dios. Tlawanilh oración chu Jehová kgalhtilh (Éx. 17:8-13; 2 Crón. 14:8-13). ¿La kgalhtilh? Limaklakaskilh xlimakgatliwakga xlakata xkamatliwakglhli judíos (Neh. 2:17-20; 6:9). ¿Kanajlayaw pi Jehová limaklakaskin la uku xlimakgatliwakga xlakata nakinkamatliwakglhan? w16.09 1:9

Maktum periódico holandés lichuwinalh la klhakganankgonit xpulalinanin takanajla akxni kgalhikgolh akgtum xtamakxtumitkan. Wa pi lhuwa xpulalinanin takanajla xwilikgonit lhakgat nema ni xlitasiya pi xpulalinanin takanajla. Uma periódico na kalichuwinalh xtatayananin Jehová tiku kilakgolh xalanka xtamakxtumitkan, chu wa pi tanu la lhakganankgo. Periódico lichuwinalh pi laktsu kamanan chu lakchixkuwin xlinkgo corbata chu saco. Xtatayananin Jehová tlan kalichuwinankan xlakata la lhakganankgo. Apóstol Pablo wa pi kstalaninanin Cristo «ni namalakatsalikgo chu ni akglakgwa» nalhakganankgo, xlakata kalilakgapaskan pi kskujnin Dios (1 Tim. 2:9, 10, Traducción del Nuevo Mundo). Maski Pablo kawanilh lakpuskatin, na xlimakgantaxtitkan lakchixkuwin. Kskujnin Dios lu xlakaskinka akxilhaw la lhakgananaw xlakata kiDioskan na xlakaskinka akxilha (Gén. 3:21). Biblia liwana lichuwinan xlakata la xlilhakganatkan kskujnin. Wa xlakata, akxni nalaksakaw lhakgat, kililakapastakatkan pi tuku tlakg xlakaskinka wa pi nalakgati Jehová, kiDioskan chu kiMapakgsinakan. w16.09 3:1,2

Makgapitsi lakgatikgo likgalhtawakgakgo tuku Biblia lichuwinan pi xʼama la. Amakgapitsi lakgatikgo tamalakxtumikgo tuku wan Biblia chu tuku wankgo tiku lu katsikgo xlakata tuku latilhanit, tiku katsikgo tuku xla ciencia o arqueología. Akgtum liʼakxilhtit, kalakpuwanti tuku wan Génesis 3:15. Jehová lichuwinalh tuku xʼama la akxni Adán chu Eva nialh kgalhakgaxmatkgolh chu lakgmakgankgolh xtamapakgsin. Tuku lichuwinankanit pi xʼama la, wa uma nakinkamakgtayayan naʼakgatekgsaw pi Tamapakgsin limasiya pi Jehová lakgchan namapakgsinan. ¿La tlan nalikgalhtawakgaya tuku wan Génesis 3:15 pi xʼama la? Kalimatsuki akgtum lista xla versículos nema tlakg lichuwinankgo la xʼama kgantaxtu uma tuku xlichuwinankanit. Alistalh kaputsa tukuya kilhtamaku katsokgka umakgolh versículos chu kakawili chuna la katsokgtilhaka. Naʼakxilha pi tiku tsokgkgolh umakgolh versículos tanu tanu kilhtamaku latamakgolh, pero xchatunukan makgtayanankgolh tsinu tsinu nataʼakgatekgstilha tuku xlichuwinankanit pi xʼama la. Uma namakgtayayan nalimasiyaya pi Jehová kalipulalilh xʼespíritu santo tiku tsokgkgolh Biblia. w16.09 4:8

Milh kilhtamaku apóstol Pedro limasiyalh pi xkalakgmakgan tiku ni judíos xwankgonit. Pero chuna la titaxtulh kilhtamaku makgatlajalh uma nitlan talakpuwan (Hech. 10:28, 34, 35; Gál. 2:11-14). ¿Chu akinin? ¿Tuku kilitlawatkan komo naʼakxilhaw pi tlakg lanka kinkamakgkatsikanan o lakgmakgananaw? Lu kiliskujatkan ni chuna nalakpuwanaw (1 Ped. 1:22). Nalakapastakaw pi putum makglakgalhinanin akinin chu ni kinkalakgchanan lakgtaxtut (Rom. 3:9, 10, 21-24). Wa xlakata ni xlilat nalakpuwanaw pi tlakg xlakaskinka akinin nixawa amakgapitsin. Kililakpuwanatkan la apóstol Pablo. Xla kawanilh kstalaninanin Cristo pi nialh xalak alakatanu xwankgonit, wata «[x]tapakgsikgoy kxchik Dios» (Efes. 2:19). Putum kiliskujatkan ni nalakgmakgananaw. Chuna tlan nalilhakgananaw xasasti tayat (Col. 3:10, 11). w16.10 1:9

¿Tuku nakinkamakgtayayan tliwakga nakgalhiyaw kintakanajlakan? Jehová kinkamaxkinitan Biblia. Anta kinkamasiyaniyan tuku wanit natlawa chu tuku kilitlawatkan xlakata napaxuwayaw. Wa xlakata kilikgalhtawakgatkan Biblia chali chali chu natlawayaw xtastakyaw (Sal. 1:1-3; Hech. 17:11). Jehová limaklakaskin «skujni xalipaw chu xaskgalala» xlakata nakinkamaxkiyan taway kilhtamaku akxni maklakaskinaw (Mat. 24:45). Chuna la tlawakgolh kskujnin Dios xala makgasa, chali chali nalikgalhtawakgayaw xtamalaknun Dios chu liwana nalilakpuwanaw. Uma nakinkamakgtayayan ni namakgxtakgaw chu chuntiya nakgalhkgalhiyaw akxni xTamapakgsin namapakgsinan kKatiyatni (Heb. 11:1). ¿Tuku atanu na kamakgtayalh kskujnin Dios xala makgasa namatliwakglhkgo xtakanajlakan? Kskinikgo xtamakgtay Jehová k’oración chu xʼakxilhkgo pi xla xkakgalhti (Neh. 1:4, 11; Sal. 34:4, 15, 17; Dan. 9:19-21). w16.10 3:7, 8

Jesús wa pi napaxkiyaw Dios wa «limapakgsin ntlakg xatlanka» (Mat. 22:35-40). Biblia masiya pi takanajla chu tapaxkit lu xlakaskinka. Wa xlakata xtsokgnanin Biblia makglhuwa lichuwinankgo. Akgtum liʼakxilhtit, Pablo kamakgpuwantinilh kstalaninanin Cristo nalilhakganankgo «ntakanajla, chu ntapaxkit» (1 Tes. 5:8). Juan wa pi Dios kinkalimapakgsiyan «nakanajlaniyaw kxtukuwini Jesucristo xKam, chu nalapaxkiyaw nchatunu amakgapitsin» (1 Juan 3:23). Pero Pablo na wa pi kkinkilhtamakujkan «namakgapalay ntakanajla, chu ntakgalhkgalhitin, chu ntapaxkit, wa yuma ntipatutu; wampi wa ntu ntlakg kgalhiy xkakni lantla xlipaks, wa ntapaxkit» (1 Cor. 13:13). ¿Tuku xlakata Pablo wa pi tapaxkit tlakg xlakaskinka? Xlakata kilhtamaku nema aku mima nialh katitalakaskilh nakgalhiniyaw takanajla tuku Dios malaknunit xlakata xasasti kakilhtamaku. Pero putum kilhtamaku natalakaskin napaxkiyaw Dios chu latamanin. Tapaxkit nema kakgalhiniyaw chuntiya nastaktilha. w16.10 4:15-17

Kxapulana siglo, makgapitsi natalan xkalakgapaxiʼalhnankgo congregaciones xlakata xkamakatsinikgolh tuku xlakkaxwilikgonit apóstoles «chu mpuxkunanin lakgkgolun nti xwilakgo kJerusalén» (Hech. 16:4). Xlakata congregaciones tlawakgolh tuku xkawanikgonit lakgkgolotsin, «xtakgatanksakgoy kxtakanajlakan nkgamputunu nkanajlanin, na chali chali xtaliwakatilhama». ¿Tuku kilitlawatkan akxni kinkamaxkikanan akgtum tastakyaw? Biblia wan pi kilikgalhakgaxmatatkan tiku kinkapulalinkgoyan (Deut. 30:16; Heb. 13:7, 17). Komo ni namakgxtakgaw Jehová, ni katitalatlawanaw chu natlawayaw tastakyaw nema namakgamakglhtinanaw. Ni litaxtuputunaw la Diótrefes, tiku ni xkamaxki kakni natalan tiku xpulalinkgo congregación (3 Juan 9, 10). Akxni tlawayaw tuku kinkawanikanan, makgtayananaw natawila takaksni chu tlan nalatalalin congregación. Wa xlakata kakinkakgalhskinkan: «¿Kkamatliwakglha natalan xlakata tlan natalalinkgo Jehová? ¿Lakapala ktlawa tuku kiwani xkachikin Dios?». w16.11 2:10, 11

Judíos tiku kachilinka chu kgalhakgaxmatkgolh Jehová tlan latamat kgalhikgolh maski ni kxkachikinkan xlamakgolh. Babilonios atsinu ni putum kamaxkikgolh talakaskin judíos pi xakstukan xlakkaxtlawakgolh xtaʼakglhuwitkan chu tlan xlatapulikgolh xlikalanka país. Anta kBabilonia lu kstanankan chu natamawanankan. Lichuwinankan pi judíos lu tlan stananin xwankgonit chu lu xkatsinikgo tlawakgo xtaskujutkan. Asta wi tiku lhuwa tumin kgalhikgo. Xlatamatkan judíos ni chuna xwanit la xlatamatkan israelitas tiku skujnin xlitaxtukgonit kʼEgipto akglhuwa ciento kata (Éx. 2:23-25). Pero ¿xtawilapa kilhtamaku akxni israelitas tlan xkakninaniparakgolh Jehová chuna la xwan Limapakgsin? Ama kilhtamaku lu tuwa xtasiya, xlakata babilonios nikxni xkamakgxtakga tiku xkachilin. Xlikana, tuku xkamalaknuninit Jehová makgantaxtilh, chuna la makgantaxti putum tuku wan pi natlawa (Is. 55:11). w16.11 4:3, 5

Komo kstalaninanin Cristo xlamakgojku kkatiyatni ama kilhtamaku, ¿tuku xlakata chuna kawanika? Xlakata talakgmaxtut, Dios tapatilh xtalakgalhin Pablo chu amakgapitsi kstalaninanin Cristo kxapulana siglo. Jehová kalilaksakli espíritu santo xlakata xkamanan xlitaxtukgolh. Komo ni xmakgxtakgkgolh, k’akgapun xlatamakgolh chu xtamapakgsinankgolh Cristo. Pero ama kilhtamaku, xlamakgolhku kkatiyatni. ¿Tuku xlakata Pablo wa pi «nininitaw ntalakgalhin»? Xlakata putum xlakgpalinit xlatamat. Pablo limaklakaskilh xli’akxilhtit Jesús xlakata nalichuwinan uma. Wa pi linin nialh xmalana xlitaxtuni Jesús xlakata xlakastakwananit la chatum espíritu tiku nikxni xnilh. Nachuna, xkitaxtu la xnikgonit kstalaninanin Cristo, pero xkgalhikgo latamat xpalakata Dios chu xlakata Cristo Jesús (Rom. 6:9, 11). Putum xtalakgpalinit xlatamatkan, xlakata nialh xmastakgo talakaskin pi nakamatlawi tuku nitlan xtapuwankan. La uku lu xliskujkgo namakgapaxuwakgo Dios. w16.12 1:9, 10

Uma ni wamputun pi putum kilhtamaku kililakapastakatkan Jehová, Biblia, chu kajwatiya uma nalichuwinanaw. Kstalaninanin Cristo nachuna kgalhiyaw kilatamatkan la amakgapitsin. Akgtum liʼakxilhtit, xapulana kstalaninanin Cristo xwayankgo, xkgotnankgo, xtamakgaxtokgkgo, xkgalhikgo xfamiliajkan chu kskujkgo (Mar. 6:3; 1 Tes. 2:9). Nipara Pablo chu amakgapitsin xapulana kstalaninanin Cristo mastakgolh talakaskin pi xlakaskinka xlitaxtulh uma kxlatamatkan. Akgtum li’akxilhtit, katsiyaw pi Pablo xliskuja natlawa laktsu chiki xla xuwa o carpas. Pero ni wa tlakg xlakaskinka xakxilha xtaskujut. Tlakg xlakaskinka xakxilha naskujnani Dios. Kaj watiya xlakpuwan nalichuwinan Dios chu namasiya (Hech. 18:2-4; 20:20, 21, 34, 35). Natalan xalak Roma nachuna xtlawakgolh la Pablo, nachuna akinin (Rom. 15:15, 16). w16.12 2:5, 15, 16

Liwana katsiyaw pi Jehová lhuwa xtapalh akxilha tuku tlawayaw xpalakata. Kinkaʼakgatekgsniyan akxni ni liwana katsiyaw tuku natlawayaw o akxni lakpuwanaw pi wi tuku nila katitlawaw. Na kinkalakgalhamanan akxni tlakgwanitaw xlakata taskujut o max ni katsiyaw la nakuentajtlawayaw kifamiliajkan. Chu kinkaʼakgatekgsniyan komo kgalhiyaw tajatat xla talipuwan o wi atanu tuku tlawa pi ni lhuwa natlawayaw xlakata xtaskujut Dios la xapulana. Liwana katsiyaw pi Jehová lhuwa xtapalh akxilha xlakata ni makgxtakgaw maski kgalhiyaw taʼakglhuwit (Heb. 6:10, 11). Na kalakapastakwi pi Jehová xkgaxmatna «oración». Liwana katsiyaw pi kinkakgaxmatniyan akxni tlawaniyaw oración (Sal. 65:2). Jehová tiku «xmakilhtsukina talakgalhaman, chu xmastana xlipaks ntakgtsiyajni» nakinkamaxkiyan putum tuku lakaskinaw xlakata xatapaxuwan nalatamayaw. Max nakalimaklakaskin kinatalankan xlakata nakinkalimakgtayayan (2 Cor. 1:3). Jehová paxuwa akxni kalakgalhamanaw amakgapitsin chu kamakgtayayaw (Mat. 6:3, 4). w16.12 4:13, 14

Akxni Jesús milh kKatiyatni, lakgmakgalh Satanás (Mat. 4:10). Nachuna, awatiya katsisni akxni nina xniy tlawanilh oración xTlat chu wanilh pi xtlawaputun xtalakaskin. Wanilh: «Tlati Dios, lapi wix chuna lakaskina, pus wata katlawa litlan kakimapanuni yuma tapatin wantu kit nakiakgspulay. Wampi ni wa kalalh kintalakaskin, wata xatlan wa kakgantaxtulh mintalakaskin» (Luc. 22:42). ¿Tlan natlawayaw la Jesús chu namalankiyaw Jehová chu natlawayaw xtalakaskin? Xlikana, tlan natlawayaw la Jesús xlakata nachuna kinkatlawakanitan la xtayat Dios (Gén. 1:26). Pero akinin nila tlan laksakaw tuku lakaskinaw chuna la Jehová. Anta kBiblia lichuwinan pi wilinit tuku kaj tlan akstu nalaksakaw chu xlilat nakgalhakgaxmataw. Akgtum liʼakxilhtit, lakpuskatin tiku makgaxtokgkgo namaxki kakni xchixku, chu kamanan nakgalhakgaxmatkgo xtlatkan (Efes. 5:22; 6:1). w17.01 2:4, 5

Xkachikin Dios nema wi kKatiyatni pulaklhuwa la stakma. Uma wamputun pi chuntiya na’anan talakgpalit, chu tuwa namakgkatsiyaw. ¿Tuku tlan natlawayaw? Kataktujuw chu kamakgtayanaw kxtaskujut xTamapakgsin Dios. Komo chuna natlawayaw, makxtum natawilayaw. Pablo kawanilh kstalaninanin Cristo xalak Roma pi tuku likgatsiyaw kkimaknikan putum xlakaskinka, kcongregación nachuna kinchatunukan kgalhiyaw xlakaskinka taskujut (Rom. 12:4, 5). Putum xlakskujni Jehová makgtayanamputunaw kTamapakgsin chu natlawayaw tuku nakinkaskinikanan. Natalan tiku linkgoya kata tlan nakamasiyanikgo kamanan. Kamanan tlan nalakgatayakgo taskujut chu nalimasiyakgo kakni chu pi nila putum tlan tlawakgo. Chu natalan tiku tamakgaxtokgkgonit paxtikatsininankgo pi xlakpuskatin nakamakgtayakgo akxni wi tuku talakgpali. Xlakan stalanikgo xliʼakxilhtit Priscila, kstalanina Cristo tiku ni makgxtakgnalh, putum kilhtamaku makgtayalh xchixku tiku xwanikan Áquila (Hech. 18:2). w17.01 5:15, 16

Gedeón lu tlan liʼakxilhtit xlakata xkatsi pi nila putum xtlawa. Akgtum kilhtamaku Jehová wanilh pi xkalakgmaxtulh israelitas kxmakan madianitas. ¿Tuku tlawalh Gedeón? Wa pi xfamilia tlakg aktsu xwanit xliputum xtribu chu wa pi ni xlakaskinka xwanit kxchik xtlat. Pero, Gedeón lipawa Dios chu makgamakglhtinalh taskujut. Liwana lakputsalh tuku xlakaskin Jehová pi xtlawalh chu skinilh xtamakgtay (Juec. 6:36-40). Xlikana, Gedeón lu tliwakga xwanit, skgalala chu ni xpekuan chu liwana xlakpuwan tuku xtlawa (Juec. 6:11, 27). Akxni wanikgolh pi xmapakgsinakan xlitaxtulh, xla ni lakaskilh. Akxni xmakgantaxtinita tuku xlakgayawanit Jehová taspitpa kxchik (Juec. 8:22, 23, 29). Komo xmakglhtinaw xasasti taskujut o tlakg makgtayanamputunaw kcongregación, ¿wamputun pi tlankajwa akinin? Ni. Biblia wan pi tlan komo tlakg skujnaniputunaw Jehová chu kinatalankan chu na wan pi kiliskujatkan wi tuku nalakgchanaw (1 Tim. 4:13-15). Kimputumkan tlan chuntiya naliskujaw xlakata nakgalhiyaw tlan tayat la kstalaninanin Cristo chu tuku katsiniyaw tlawayaw nema Jehová kinkamaxkinitan. Chuna tlakg tlan naskujnaniyaw Jehová chu amakgapitsin. w17.01 3:15, 16

Jehová lanka xtapalh tuku mastalh xlakata nakinkalakgmaxtuyan (1 Ped. 1:19). Xlakaskinka kinka’akxilhan asta mastalh xlatamat xKgawasa tiku tlakg paxki xlakata xkinkapalakanin. Tlan nawanaw pi Jesús xlakgxokgo Adán chu litaxtulh kintlatkan (1 Cor. 15:45). Xlakata xtamakamastan Jesús, tlan nalatamayaw putum kilhtamaku. Na kinkamaxkiyan talakaskin namakgtapakgsiyaw kxfamilia Dios. Xlakata xtamakamastan nialh katikgalhiw talakgalhin kkilhtamaku nema aku mima, chu Jehová tlan nakinkamakgamakglhtinanan kxfamilia. Lu tlan nawan akxni latamanin tiku ni makgxtakgkgo Dios nialh katikgalhikgolh talakgalhin. Chuna putum tiku wilakgolh kʼakgapun chu kKatiyatni akgtum familia nawan. Putum xkamanan Dios nalitaxtuyaw (Rom. 8:21). Komo paxtikatsiniyaw xtalakgmaxtut Jesús, nakalitachuwinanaw amakgapitsin xlakata uma tamaskiwin nema lu lhuwa xtapalh. w17.02 1:17, 19

Makatsinina 15 xla julio kata 2013 lichuwinalh pi «skujni xalipaw chu xaskgalala» kaj ni xalhuwa natalan tiku xatalaksakni tiku litaxtukgo Lakgkgolotsin tiku Pulalinankgo. Lakgkgolotsin tiku Pulalinankgo makxtum laksakkgo tuku lu xlakaskinka akgatunu semana. Uma tlawa pi tlan nalalikatsini chu makxtum nalakgo (Prov. 20:18). Ni chatum tlakg xlakaskinka litaxtu nixawa amakgapitsin. Wa xlakata tiku pulalin uma tamakxtumit akgatunu kata talakgpalitilhakgo (1 Ped. 5:1). Nachuna tlawakgo kgalhchaxan comités xla Lakgkgolotsin tiku Pulalinankgo. Ni chatum tiku makgtapakgsi la Lakgkgolotsin tiku Pulalinankgo lakpuwan pi wa kapulalin xnatalan. Chatunu xlakan na makgtapakgsikgo «amakgapitsi skujnin». Na makglhtinankgo taway xa’espiritual, chu mastakgo talakaskin pi nakapulalin skujni xatalipaw. Lakgkgolotsin tiku Pulalinankgo ni katachuwinan Dios, chu na makglakgalhinanin. Wa xlakata, min kilhtamaku akgtsankgakgo akxni wi tuku masiyakgo xlakata Biblia o akxni masta akgtum tastakyaw. w17.02 4:10-12

Pulaktum nema lu xlakaskinka la nalimasiyayaw pi paxtikatsiniyaw talakgmaxtut, wa natamakamastaniyaw Jehová chu natamunuyaw. Chuna nalimasiyayaw pi kanajlaniyaw talakgmaxtut chu «tapakgsiniyaw Jehová» (Rom. 14:8). Jehová lakaskin pi tiku kakninanikgo kalikatsikgolh la xla, chu kalapaxkikgolh (1 Juan 4:8-11). Akxni kapaxkiyaw latamanin, limasiyayaw pi litaxtuputunaw xkamanan «[k]inTlatkan nti wi kʼakgapun» (Mat. 5:43-48). Biblia, wan pi limapakgsin nema tlakg xlakaskinka wa napaxkiya Jehová. Pero xlipulaktiy tuku tlakg xlakaskinka, wa nakapaxkiyaw amakgapitsin (Mat. 22:37-40). Tlan limasiyayaw pi kapaxkiyaw latamanin akxni kalitachuwinanaw xalakwan tamakatsinin xla Tamapakgsin. Komo kgalhakgaxmataw xlimapakgsin Dios pi nakapaxkiyaw amakgapitsin chu liwaka kinatalankan, tapaxkit nema kgalhiniyaw Jehová, tlakg staka (1 Juan 4:12, 20). w17.02 2:13, 14

Max nalakpuwanaw pi uma ni tuwa xwanit, xlakata katsiyaw pi skujnikan Jehová tlakg tlan kitaxtu. Tiku skgalala ni katiskujnilh dios tiku ni staknan. Pero israelitas lu tuwa xmakgkatsikgo. Biblia wan pi xlakan «pulaktiy talakapastakni» kstalanimakgolh. Elías limasiyalh liskgalala chu kamakgpuwantinilh nakakninanikgo xaxlikana Dios, Jehová. ¿Tuku xlakata israelitas lu tuwa makgkatsikgolh nalaksakkgo tuku tlan? Pulana, xlakata ni xkgalhinikgo takanajla Jehová chu ni xkgaxmatniputunkgo. Ni xlipawankgo chu ni xlimaxtukgo kilhtamaku xlakata nalakgapaskgo xtastakyaw. Komo chuna xtlawakgolh xkatsinikgolh la nalaksakkgo tuku tlan (Sal. 25:12). Nachuna nitlan tuku laksakkgolh xlakata tuku xlakpuwankgo chu xwankgo latamanin xalak atanu kachikin. Tuku kitaxtulh wa pi israelitas tsukukgolh tlawakgo la xlakan chu tsukukgolh kakninanikgo nixaxlikana dioses. Akglhuwata kata lata makgasa, Jehová xkawaninit pi chuna xʼama kaʼakgspula (Éx. 23:2). w17.03 2:6, 7

Xliʼakxilhtit Ezequías nakinkamasiyaniyan komo talakaskin namakgxtakgaw tuku tlawa pi natamakgatliniyaw Jehová chu komo kinkamakglhtiman kilhtamaku xlakata la naskujnaniyaw. Akgtum liʼakxilhtit, lhuwa latamanin maklakaskinkgo redes sociales o atanu xlakata nalatachuwinankgo. Lhuwa tiku la xʼídolos kaliʼakxilhkgo. Lu lakgatikgo la likatsikgo tiku lu kalakgapaskan chu atanu latamanin, maski ni kalakgapaskgo. Lhuwa kilhtamaku limaxtukgo nalikgalhtawakgakgo xlakata xlatamatkan ama latamanin chu akxilhkgo xfotos. Pero uma ni wamputun pi ni nalimaklakaskinaw xlakata nakatachuwinanaw kifamiliajkan o tiku tlan kiʼamigoskan. Pero redes sociales max nakinkamakglhtiyan lhuwa kilhtamaku. Asta max xlakaskinka nakinkamakgkatsikanan xlakata lhuwa tiku nakinkawanikgoyan pi lu stlan tuku wiliyaw o wanaw anta kʼinternet. O max nalisitsiyaw akxni naʼakxilhaw pi nialhti kuenta tlawa tuku anta wiliya. Tlan nakinkakgalhskinkanan: «¿Kuenta ktlawa xlakata ni chuna la ídolos nakkalimaxtu amakgapitsin? ¿Ni lhuwa kilhtamaku klimaxtu xlakata nema tu kaj ni xlakaskinka?» (Efes. 5:15, 16). w17.03 3:14, 17