Febrero

Jesús xkalakgalhaman latamanin chu xlakan makgkatsikgolh pi xkapaxki, chu makgamakglhtinankgolh tamakatsinin xla Tamapakgsin. Akxni tlakg nastalaniyaw xliʼakxilhtit Jesús, tlakg tlan nakinkakitaxtuniyan akxni nalichuwinanaw Dios. Xlakata nalimasiyayaw pi makgkatsiyaw tuku makgkatsikgo latamanin, talakaskin nakatsiyaw tuku max lakpuwankgo chu tuku makgkatsikgo, chu lu tlan nakalikatsiniyaw (Mat. 7:12). Kalilakpuwaw tuku lilakgaputsakgo. Akinin ni watiya tachuwin kawaniyaw tiku kalitachuwinanaw Dios, wata kuenta tlawayaw tuku maklakaskinkgo chu tuku lakpuwankgo. Tlakg tlan nakatlawaniyaw takgalhskinin xlakata nakatsiyaw tuku titaxtumakgolh (Prov. 20:5). Akxni nakinkawanikgoyan, tlan nakamakgtayayaw chuna la tlawalh Jesús (katamalakxtupi 1 Corintios 9:19-23). w19.03 20:2; 22:8, 9

Adán chu Eva limasiyakgolh pi ni xpaxtikatsinikgo Jehová xlakata tuku xtlawanit xpalakatakan. Akinin tlan nalimasiyayaw pi ni tatayayaw tuku laksakkgolh Adán chu Eva. Akxni tamunuyaw, limasiyaniyaw Jehová pi kanajlayaw pi xla kgalhi limapakgsin nalaksaka tuku tlan chu tuku nitlan. Nachuna limasiyaniyaw pi paxkiyaw chu lipawanaw. Akxni tamununitawa, talakaskin pi chali chali nastalaniyaw xtastakyaw Jehová. Xlikana pi tuwa, pero lhuwa latamanin chuna tlawakgo akgatunu kata. Xlakata na tlan chuna natlawaya, chuntiya kalikgalhtawakga Biblia, akxtum kakatatawila natalan chu xatapaxuwan kakalitachuwinanti amakgapitsin tuku katsininita xlakata Jehová (Heb. 10:24, 25). Chu akxni wi tuku nalaksaka natlawaya, kakgaxpatti tastakyaw nema maxkiyan Jehová kxTachuwin chu kxkachikin (Is. 30:21). Chuna tlan nakitaxtuniyan kmilatamat (Prov. 16:20). w19.03 7:17, 18

Jehová, xalakgalhamana kiDioskan, kinkamaxkiyan lhuwa taway xaʼespiritual. Kinkamaxkiyan tastakyaw ktamakxtumit, krevistas chu kpágina xla Internet. ¿Ni xlikana pi lu lipaxuwanitaw akgtum taʼakgchuwin, akgtum artículo o programa xla JW Broadcasting chu lilakpuwanitaw pi wa tuku xmaklakaskimaw? Wa xlakata, ¿la nalimasiyaniyaw pi paxtikatsiniyaw uma tamaskiwin? (Col. 3:15). Pulaktum la natlawayaw wa pi ankgalhin namaxkiyaw tapaxtikatsinit akxni tlawayaw oración, nakuentajtlawayaw niku tamakxtumiyaw. Wa xlakata, ankgalhin makgtayananaw akxni kaxakakan kPukgalhtawakga. Nachuna, tiku maklakaskinkgo tuku xla audio chu video kcongregación kuentajtlawakgo. Akxni kuentajtlawayaw kimPukgalhtawakgakan, tlakg makgapala. Chu chuna, tlakg kgalhiyaw tumin xlakata natlawakan o nakaxtlawakan atanu pukgalhtawakga xlikalanka katiyatni. w19.02 18:17, 18

Job limaxtulh kilhtamaku xlakata naʼakxilha xtamalakatsukin Jehová (Job 26:7, 8). Lu kaks lilakawa akxni lilakpuwa Katiyatni, akgapun, puklhni chu jilina, maski xkatsi pi kaj tsinu xlakgapasa tuku Jehová xmalakatsukinit. Nachuna lhuwa xtapalh xliʼakxilha tuku Jehová xmasiyaninit, wa xlakata wa: «Kmakinit mintachuwin» (Job 23:12). Chuna la Job, talakaskin nalimaxtuyaw kilhtamaku xlakata nalilakpuwanaw xtamalakatsukin Jehová. La uku, latamanin lhuwa tuku katsinikgo xlakata tamalakatsukin, nixtachuna la kxkilhtamaku Job. Nachuna kgalhiyaw xatakgatsin Biblia, nema nakinkamakgtayayan liwana nalakgapasaw Dios. Putum tuku nakatsiniyaw nakinkamakgtayayan namaxkiyaw kakni Jehová. Chu uma nachuna nakinkamakgtayayan napaxkiyaw, nakgalhakgaxmataw chu nikxni katimakgxtakgwi (Job 28:28). w19.02 5:12

Lhuwa mapakgsinanin kaputsastalanikgonit xkachikin Jehová. ¿Tuku xlakata? Xlakata akinin laksaknitaw nakgalhakgaxmataw «Dios la kimapakgsinakan nixawa lakchixkuwin» (Hech. 5:29). Max nakinkalikgalhkgamanankanan, nakinkatamaknukanan kpulachin o asta nakinkawilinikanan. Pero akinin ni makgaxokgonanaw. Kalilakpuwaw xliʼakxilhtitkan kamanan hebreos tiku kachilinka kBabilonia: Hananías, Misael chu Azarías. Xlakan liwana wanikgolh mapakgsina pi ni x’amakgo kakninanikgo imagen (Dan. 3:1, 8-28). ¿La tlan nastalaniyaw xliʼakxilhtitkan akxni kinkaputsastalanikanan? Kilitaktujutkan chu nalipawanaw pi Jehová nakinkamakgtayayan (Sal. 118:7). Chu akxni wi tiku kinkalimawakayan tuku nitlan, liwana kakgalhtiw chu kamaxkiw kakni (1 Ped. 3:15). Nachuna, ni katlawaw tuku nalaktlawa la talalinaw Jehová. w19.02 10, 11:11-13

Komo nalilakpuwanaw kintakgalhkgalhinkan nakinkamakgtayayan ni napekuanaw (Juan 3:16; Efes. 1:7). Tlan nalimasiyayaw tapaxtikatsinit xlakata talakgmaxtut akxni tsankga makgapitsi semanas akxni natalakapastaka akxni tinilh Cristo. Ama kilhtamaku kalikgalhtawakgaw texto xala chali chali chu liwana kalilakpuwaw tuku xlakata makgnika. Akxni natamakxtumiyaw xlakata nalakapastakaw xTaway kiMalanakan, tlakg liwana naʼakgatekgsaw tuku kilhchanima kaxtalanchu chu vino chu xtamakamastan. Akxni akgatekgsniyaw tuku Jesús chu Jehová tlawakgonit kimpalakatakan, kinkamatliwakglhan (Heb. 12:3). Lu paxtikatsiniyaw Jesús pi chuntiya xalakgalhamana chu ankgalhin taktuju xlakata kinkakgalhmakgtayayan la komo xaPuxku Sacerdote kʼakgapun (Heb. 7:24, 25). Xlakata nalimasiyayaw pi paxtikatsiniyaw, talakaskin nakgalhakgaxmataw limapakgsin xlakata nalakapastakaw akxni tinilh (Luc. 22:19, 20). w19.01 22:8; 23, 24:10, 11

Jehová kinkamaxkinitan talakgalhaman pi tlan nakakninaniyaw. Takgalhtin nema mastayaw ktamakxtumit limasiya pi paxtikatsiniyaw Dios (Heb. 13:15). ¿Kinkawaniyan Jehová pi chuna la mastakgo xtakgalhtinkan amakgapitsin nachuna natlawayaw? Ni. Tamakxtumit nema tlawakan kcongregación tatalakxtumi la akgtum liwat nema katawayaw kiʼamigoskan. Komo natalan nakinkawanikgoyan pi naʼanaw katawayanaw chu kinkawanikgoyan pi wi tuku nalinaw, ¿tuku natlawayaw? Max nalinaw maski kaj aktsu tuku nalakgatikgo natalan. Anta ktamakxtumit, tiku pulalinan wa Jehová, xla lakkaxwilinit akgtum mesa niku lhuwa tuku anan (Sal. 23:5; Mat. 24:45). Xla lakgati pi wi tuku namastayaw, maski kaj aktsu pero xatapaxuwan. Wa xlakata, liwana kalakkaxwiliw chu kamastaw kintakgalhtinkan. Chuna, ni kajwatiya akinin nalitamakgtayayaw nachuna nakamakgtayayaw amakgapitsin chuna natlawakgo. w19.01 8:3; 13:20

Makgasa kilhtamaku, ankgalhin xʼanan talakgxtumit xalimaxana niku xkakninanikan nixaxlikana dioses (Os. 4:13, 14). Lhuwa latamanin xmakgtapakgsikgo knixaxlikana takanajla xlakata lu xlakgatikgo xtlawakgo tuku xalixkajni. David lichuwinalh anta kSalmo 16:4 pi kgalhikgolh «lanka talakgaputsit nak xlatamatkan» tiku xkakninanikgo nixaxlikana dioses. Nachuna ama latamanin xmakamastakgo xkamanankan (Is. 57:5). Jehová lu nitlan x’akxilha tuku xtlawakgo (Jer. 7:31). La uku kilhtamaku, nixaxlikana takanajla masta talakaskin natlawakgo talakgxtumit xalimaxana, nachuna tiku lakgati xtachixku o xtapuskat. Pero lu nitlan tuku kitaxtu chuna la makgasa kilhtamaku (1 Cor. 6:18, 19). Wa xlakata kakgalhakgaxpatti minTlat xalak akgapun. Liwana kakatsi pi tlan nakitaxtuniyan komo wa nakgalhakgaxpata. Ankgalhin kuenta katlawa pi komo natlawaya tuku nitlan tlakg nitlan kitaxtu nixawa tuku lipaxuwaya (Gal. 6:8). w18.12 27, 28:16-18

Komo chatum kstalanina Cristo natlawa talakgxtumit xalimaxana, tiku tamakgaxtokga nalaksaka tuku natlawa. Jesús lichuwinalh pi tiku nitu xtlawanit talakgalhin tlan namakgxtakga tiku tamakgaxtokga chu tlan amakgtum natamakgaxtokgpara. Pero nachuna tlan xtapatinalh. Chu ni anan talakgalhin komo natapati. Biblia lichuwinan pi Oseas limpa Gómer kxchik. Ama kilhtamaku nialh xlilat xwanit natatalakgxtumi atanu chixku. Titaxtulh kilhtamaku Oseas ni tatalakgxtumilh Gómer (Os. 3:3). Pero max alistalh tatalakgxtumipa. Uma limasiyalh la Jehová amakgtum makgamakglhtinampa xkachikin chu liwana tsukupa katalalin (Os. 1:11; 3:4, 5). Tuku katsiniyaw wa pi komo tiku nitu tlawanit talakgalhin nalakpuwan pi ni nalakxtlawa xtamakgaxtokgat, chu natatalakgxtumipara, nalimasiya pi tapatilh tiku tamakgaxtokga (1 Cor. 7:3, 5). Akxni chuna la, nialhla nalamakgxtakgkgo. Lata ama kilhtamaku, xchatiykan xliʼakxilhatkan tamakgaxtokgat chuna la akxilha Jehová. w18.12 13:13

Akxni kgalhtawakgayaw, lu tlan kitaxtu komo lilakpuwanaw la kinkamakgtayayan tuku lakpuwan Dios akxni wi tuku nalaksakaw kkilatamatkan. Chuna, komo max natalakaskin pi wi tuku nalaksakaw kkilatamatkan, ni kaj akglakgwa tuku katilaksakwi. Kalilakpuwaw tuku akgspulalh José. Xpuskat Potifar xtatlawaputun talakgxtumit xalimaxana, pero xla lakapala lakgmakgalh. Chuna limasiyalh pi xlilakpuwanit la akxilha Jehová ni nalaʼakgskgawikan ktamakgaxtokgat (Gén. 39:8, 9). Kalilakpuwaw tuku wanilh José uma puskat: «¿La naktlawa uma tuku lu nitlan chu naklakgalhinan kxlakatin Dios?». Uma wamputun pi nachuna xlakpuwan chuna la Dios. Kalilakpuwaw kimpalakatakan. Kalilakpuwaw pi chatum tiku taskujaw limasiya pi kinkalakgatiyan o kkintelefonojkan namakglhtinanaw akgtum mensaje o akgtum foto niku tatlawama talakgxtumit xalimaxana. Tlan lakapala nalakgmakganaw komo lilakpuwanitaw la akxilha Jehová uma, chuna tlawayaw xlakata stakyawanitaw kintalakapastaknikan chu katsiyawa tuku natlawayaw. w18.11 25:13, 14

Tiku lu lakputsananikgo tachuwin, wankgo pi tuku lichuwinan uma texto, xkilhchanima pi Habacuc x’ama paxuwa xlakata la xtalalin xDios. ¿Nixlikana pi lu lipaxuwayaw uma? Jehová ni kajwatiya kinkamalaknuniyan tuku natlawa, wata wi tuku tlawa xlakata nakinkalimasiyaniyan pi xlikana namakgantaxti. Xlikana, tamakatsinin nema lichuwinan libro xla Habacuc lu xlakaskinka: talakaskin nalipawanaw Jehová (Hab. 2:4). ¿Tuku nakinkamakgtayayan chuntiya nalipawanaw? Talakaskin pulaktutu tuku natlawayaw. Pulana, ankgalhin natlawayaw oración chu nawaniyaw putum tuku lilakgaputsayaw. Xlipulaktiy, lu kuenta natlawayaw tuku lichuwinan xTachuwin chu tapulalit nema kinkamaxkiyan xkachikin. Chu xlipulaktutu, talakaskin nalimasiyayaw takanajla chu nakgalhkgalhiyaw. Wa uma tuku tlawalh Habacuc. Maski akxni matsukilh xlibro lu xlipuwama, akxni masputulh lu xpaxuwama chu xlipawan Jehová. Kastalaniw xatlan xliʼakxilhtit chu chuna namakgkatsiyaw la kinkapaxkiyan Jehová. Wa uma tlakg xatlan takgoxamixat nema tlan namakglhtinanaw k’uma xakatuwa kakilhtamaku. w18.11 17:18, 19

Xaxlikana kstalaninanin Cristo wi atanu tuku tlan likatsiyaw pi Jehová kinkapaxkiyan. Juan 3:16 wan: «Dios lu paxkilh kakilhtamaku, wa xlakata mastalh kaj xachastum xKgawasa, xlakata putum tiku nakanajlani ni namalakgsputukan wata nakgalhi latamat nema nikxni sputa». Chu Jesús limasiyalh xtapaxkit akxni mastalh xlatamat kimpalakatakan. Anta kxTachuwin Dios kinkawaniyan pi nipara wa tuku tuwa titaxtuyaw nakinkamamakgatliniyan «kxtapaxkit Cristo» (Rom. 8:35, 38, 39). Komo nalakapastakaw tapaxkit nema Jesús kinkakgalhiniyan, nakinkamaxkiyan litliwakga akxni titaxtuyaw tuku xatuwa nema kinkamakgatlakgwanan (2 Cor. 5:14). Uma tapaxkit kinkamakgpuwantiniyan pi chuntiya nalatamaputunaw chu naskujnaniyaw Jehová. Uma tlan natlawa pi ni nataxlajwaniyaw maski akxni titaxtu tuku masputunan, taputsastalanit, akxni ni kgantaxtu tuku xlakaskinaw o akxni wi tuku lilakgaputsayaw. w18.09 14:8, 9

Xlakata nalilatamayaw tuku xaxlikana talakaskin namakgamakglhtinanaw chu nakgalhakgaxmataw putum tuku Jehová kinkamasiyaniyan. Talakaskin pi tuku xaxlikana wa pulana nawiliyaw kkilatamatkan chu nastalaniyaw xtastakyaw Biblia. Chuna la David, talakaskin liwana nalakpuwanaw pi chuntiya nalilatamayaw tuku xaxlikana. Komo nichuna natlawayaw, max natsukuyaw lilakpuwanaw la xtapalh xokgow xlakata natamawayaw xaxlikana chu asta natsukuyaw makgkatsiyaw pi xkgalhiparaw tuku makgxtakgwi. Pero nikxni chuna kilitlawatkan. Liwana katsiyaw pi ni akinin nalaksakaw tukuya tamasiy namakgamakglhtinanaw chu tuku ni namakgamakglhtinanaw, xlakata talakaskin nalilatamayaw «putum xaxlikana». Xlakata ni natamakgatliniyaw xaxlikana talakaskin liwana namaklakaskinaw kinkilhtamakujkan. Komo ni kuenta natlawayaw max lhuwa kilhtamaku nalimaxtuyaw xlakata talakgastan, tuku lakgatiyaw, Internet o televisión. Maski ni wanaw pi uma nitlan, tlan nakinkamakglhtiyan kilhtamaku nema xmaklakaskinaw xlakata nakgalhtawakgayaw chu atanu tuku xtlawayaw xlakata kintakanajlakan. w18.11 10:7, 8

Akxni wi tuku lakapala talakgpali kkilatamatkan, max lu nalilakgaputsayaw chu namakgkatsiyaw pi tlakgwanaw (Prov. 12:25). Chu asta max tuwa namakgkatsiyaw nalismaniyaw tuku talakgpalilh. ¿Tuku nakinkamakgtayayan tlan namakgkatsiyaw akxni chuna natitaxtuyaw? (Sal. 131:1-3). La uku, max wi tuku tuwa natitaxtuyaw kkilatamatkan. Komo chuna, tlan namakgkatsiyaw la «xtakaksni Dios» kuentajtlawa kintalakapastaknikan (Filip. 4:6, 7). Wa xlakata kaputsaw xtamakgtay Jehová akxni wi tuku nitlan limakgkatsiyaw. Chuna xtakaksni nakinkamakgtayayan ni nataxlajwaniyaw chu chuna tlakg naskujnaniyaw. Espíritu santo ni kajwatiya tlan kinkamamakgkatsiniyan, nachuna tlawa pi natekgsaw textos nema nakinkamakgtayayan pulana nawiliyaw tuku xla kintakanajlakan (Juan 14:26, 27). w18.10 27:2; 28:5, 8

¿Tuku tlakg nitlan katlawaninit latamanin? Wa taʼakgsanin, tuku katsikan pi nixaxlikana pero wankan xlakata nali’akgskgawinankan. Tiku pulana akgskgawinalh wa Satanás, tiku Jesucristo limapakuwilh «xmakilhtsukina taʼakgsanin» (Juan 8:44). ¿Tukuya kilhtamaku wa xapulana taʼakgsanin? Titaxtunita lhuwa mil kata, anta kjardín xa’Edén. Adán chu Eva lu xlipaxuwakgo latamat anta kparaíso niku Dios xkamaxkinit. Pero xla xkalimapakgsinit pi ni xwakgolh «xtawakat kiwi nema lilakgapaskan tuku xatlan chu nixatlan». Komo ni xkgalhakgaxmatnankgolh, xnikgolh. Maski Satanás xkatsi uma, limaklakaskilh tantum luwa xlakata nawani Eva xapulana taʼakgsanin: «Ni katinitit». Chu alistalh wampa: «Xlakata Dios katsi pi kilhtamaku akxni nawayatit natalakki milakgastapukan chu la Dios nawanatit, nalakgapasatit tuku tlan chu tuku nixatlan» (Gén. 2:15-17; 3:1-5). w18.10 6:1, 2

Xlakata kinakujkan xaskulunku nawan, kintalakapastaknikan chu tuku makgkatsiyaw nachuna xliwanat. Uma lu xlakaskinka xlakata Jehová namakgamakglhtinan kintakakninkan (2 Cor. 4:2; 1 Tim. 1:5). ¿Tuku xlakata Jesús wa pi tiku xaskulunku kgalhikgo xnakujkan «naʼakxilhkgo Dios»? (Éx. 33:20). Tachuwin xagriego nema matitaxtikan «akxilhkan» lakgachunin kilhchanima «lilakpuwankan, makgkatsikan pi kinkatawilan chu lakgapaskan». Tiku liʼakxilhkgo Dios xnakujkan wa tiku liwana lakgapaskgo chu lhuwa xtapalh liʼakxilhkgo xtayat (Efes. 1:18). ¿Tuku atanu tlan natlawayaw xlakata naʼakxilhaw Dios chu ni kajwatiya nalakgapasaw xtayat? Xlakaskinka naʼakxilhaw la kinkamakgtayayan (Job 42:5). Na tlan naʼakxilhaw akxni nalilakpuwanaw tasikulunalin nema kalakkaxwilininit tiku liskujkgo xlakata xaskulunku natawilakgo chu ni makgxtakgkgo. w18.09 20:13, 15, 16

Komo natlawayaw tuku katsiyaw pi chuna xlilat, namakglhtinanaw lhuwa tasikulunalin. Tuku limasiya pi lakgskgalalan akinin wa akxni wi tuku laksakaw, ni wa xlakata lhuwa tuku katsiyaw. Biblia wan pi asta chaʼan o chan «lu lakgskgalalan». Pero uma ni wamputun pi lhuwa tuku katsinikgo, wata chuna wan xlakata tuku tlawakgo (Prov. 30:24, 25). Cristo litasiya «[xliskgalala] Dios» chu ankgalhin tlawa tuku makgapaxuwa xTlat (1 Cor. 1:24; Juan 8:29). Dios liwana katsi pi tanu kilhchanima nakatsiya tuku natlawaya chu atanu tuku kilhchanima natlawaya. Xla kasikulunatlawa tiku taktujukgo, tiku tayanikgo chu tiku tlawakgo tuku katsinikgonit pi chuna xlilat (Mat. 7:21-23). Wa xlakata, chuntiya kaliskujwi xlakata namakgtayayaw congregación pi akxtum naskujniyaw Jehová. Xlikana pi talakaskin kilhtamaku chu takgalhkgalhin xlakata nalilatamayaw tuku katsiyaw pi chuna xlilat. Pero, komo chuna natlawayaw nalimasiyayaw pi taktujuyaw chu nakgalhiyaw tapaxuwan la uku chu putum kilhtamaku. w18.09 7:18

Akxni Jehová kinkamalakatsukin, xlakaskin pi xmakgtayanaw xlakata nakgantaxtu xtalakaskin. Maski la uku makglakgalhinanin akinin, putum xlakskujnin Dios tlan nataskujaw chali chali. Akgtum liʼakxilhtit, Biblia wan pi «akinin xtaskujnin Dios» akxni lichuwinanaw xtachuwin chu akxni kamakgalhtawakgeyaw latamanin (1 Cor. 3:5-9). Lu lanka talakgalhaman pi xMalakatsukina putum tuku anan kinkamaxkiyan talakaskin nataskujaw kʼakgtum taskujut nema lu xlakaskinka akxilha. Pero wi atanu la tlan nataskujaw Jehová. Nakamakgtayayaw kifamiliajkan chu natalan, tlan nakamakgamakglhtinanaw amakgapitsin, xatapaxuwan namakgtayananaw kxkachikin Jehová chu akxni tlakg naskujnaniyaw (Col. 3:23). Ni katamalakxtumiw tuku tlan natlawayaw akinin xpalakata Jehová chu tuku tlawakgo amakgapitsin. Kalakapastakwi pi tanu tanu kinkatakan, kintajatatkan, tuku titaxtuyaw chu tuku katsiniyaw tlawayaw. w18.08 23:1, 2

Jehová wanilh Habacuc pi xʼama kgalhti x’oraciones chu wanilh pi xkgalhkgalhilh. Xla liwana xkatsi tuku tuwa xtitaxtuma. Wa xlakata limasiyanilh tapaxkit akxni makgoxamixilh chu kgalhtilh xtakgalhskinin. Ni makgas, putum tuku xlilakgaputsa x’ama lakgsputa. Wanilh umakgolh tachuwin: «Kakgalhkgalhi chu kakilipawanti. Maski tasiya pi makgapalama, kintakgalhtin namin». Jehová malakapastakalh pi xlakkaxwilinita kilhtamaku akxni x’ama makgantaxti xtamalaknun chu wanilh pi chuntiya xkgalhkgalhilh. Alistalh, tlan tuku xkitaxtunilh. Komo xatapaxuwan nakgalhkgalhiyaw asta akxni Jehová wi tuku natlawa chu kuenta natlawayaw tuku nakinkawaniyan, ni katipekuaw chu nakgalhiyaw takaksni maski natitaxtuyaw ta’akglhuwit. Jesús kinkawanin pi ni wa kuenta natlawayaw tuku Dios nina a lichuwinan (Hech. 1:7). Kalipawaw pi Jehová katsi tukuya kilhtamaku nalakkaxwili tuku lilakgaputsamaw. Wa xlakata, ni kataxlajwaniw chu chuntiya kalimasiyaw tataktujut, takanajla chu takgalhkgalhin. Liwana kamaklakaskiw kinkilhtamakujkan xlakata nalakskujnaniyaw Jehová chuna la matlaniyaw (Mar. 13:35-37; Gál. 6:9). w18.11 16:13, 14

Pedro xmakgastakkanit k’akgtum kachikin niku nitlan xkaʼakxilhkan tiku ni judíos xwankgonit. Pero Pedro wi tuku xtitaxtunit kxlatamat nema xlakgpalininit xtapuwan. Jehová wi tuku maʼakxilhnilh (Hech. 10:9-16). Xtachuna la Pedro talakaskin kuenta natlawayaw chu namastayaw talakaskin pi amakgapitsin nakinkamakgtayakgoyan na’akxilhaw komo kkinakujkan wi tuku kinkamatlawiyan pi nalaksakpaxkinanaw. Nachuna, komo namalakkiyaw kinakujkan, tapaxkit natlawa pi nialh nakgalhiyaw talaksakpaxkit (2 Cor. 6:11-13). ¿Lismaninitaw pi kajwatiya nakatachuwinanaw tiku chuwinankgo kintachuwinkan o xalak kinkachikinkan? Komo chuna, na kakatachuwinaw amakgapitsin. ¿Tlan xkawaniyaw pi tlan lakxtum katalichuwinanaw Dios o na’ankgo kkinchikkan xlakata nakatawayanaw o akxtum nakatatawilakgo atanu natalan? (Hech. 16:14, 15). Komo chuna natlawayaw, kinakujkan kajwatiya nakgalhi tapaxkit chu ni katilaksakpaxkinalh. w18.08 9,10:3, 6, 7

Makgapitsi natalan nina lakgmakgankgo tayat xalak kakilhtamaku. Makgapitsi,akxni ankgo kpaskua, tantlikgo chu tlawakgo tuku ni xlitlawat kstalanina Cristo. Mawakakgo xfotoskan kredes sociales chu anta lichuwinankgo tuku ni xliwanat kstalanina Cristo. Nitlan li’akxilhtit kawilinikgo tiku liskujkgo xlakata natlawakgo tuku xatlan (1 Ped. 2:11, 12). Kakilhtamaku ankgalhin matlawinamputun «tuku tlawaputun kimaknikan chu tuku akxilhputun kilakgastapukan, [chu la] lhuwa masiyakan tuku kgalhikan klatamat» (1 Juan 2:16). Pero akinin tapakgsiniyaw Jehová, chu xla kinkawaniyan la nalakgmakganaw «wantu ni maxkiy nkakni Dios, chu wantu [xalak kakilhtamaku]» chu kinkawaniyan pi nalilatamayaw «wantu ntlan talakapastakna [...] chu wantu akgstitum, chu wantu nalimaxkiyaw nkakni» (Tito 2:12). Putum kkilatamatkan, kintachuwinkan, tuku wayaw chu tuku likgotnanaw, lhakgat, la takaxtayayaw chu la skujaw, nakalimasiyaniyaw tiku kinka’akxilhkgoyan pi kajwatiya tapakgsiniyaw Jehová. w18.07 25:13, 14

Komo kajwatiya nalakglakanaw Jehová, ni katimastaw talakaskin pi tuku tlawakgo amakgapitsin nakinkamakgatlakgwanan o nakinkamatlawikgoyan tuku nalaktlawa la talalinaw Jehová. Uma tlakg kuenta xlitlawatkan tiku wi tuku lakgayakgo kxkachikin Dios, chuna la Moisés. Xlikana pi chatunu akinin naliskujaw xlakata tlan nalakgtaxtuyaw. Kililakapastakatkan pi Dios ni kinkaliputsananiyan tuku tlawayaw (Filip. 2:12). Komo tlakg lhuwa tuku lakgayaw, tlakg lhuwa tuku nakinkaskiniyan Jehová (Luc. 12:48). Komo xlikana paxkiyaw Jehová, ni katiʼanalh tuku nakinkamamakgatliniyan xtapaxkit (Sal. 119:165; Rom. 8:37-39). Kʼuma xakatuwa kilhtamaku, kajwatiya kaʼakxilhwi Jehová xlakata nakatsiyaw tuku xtalakaskin (Sal. 123:1). Nikxni kamastaw talakaskin pi tuku tlawakgo amakgapitsin nalaktlawa la talalinaw Dios. w18.07 16:19, 20

Lu lipaxuwayaw pi xkachikin Dios lu stakma. Uma masiya pi makaxkgakgema xmakgskgotkan xlakskujnin Dios. Kata 2017, kamakgalhtawakgew liwaka akgkaw millones latamanin. Nachuna lhuwa millones atanu latamanin kilakgolh Akxni lakapastakka akxni tinilh Cristo chu katsinikgolh xlakata tapaxkit nema Dios limasiyalh akxni malakgachalh xKgawasa xlakata nakinkalakgmaxtuyan (1 Juan 4:9). Kxkachikin Jehová chuwinankan tipalhuwa tachuwin. Pero uma ni tlawa pi nila namaxkiyaw kakni Jehová (Rev. 7:9). Maski tanu tachuwin chuwinanaw chu tanu niku lamaw, kimputumkan litaxtuyaw «xkgakganat kkakilhtamaku» (Filip. 2:15). Xlakata tuku katsinitilhayaw, xlakata akxtum wilaw chu xlakata lakapala tlawayaw uma taskujut, malankiyaw Jehová. w18.06 21:1-3

Xlakata Jesús xtachuwinama puskat samaritana ni wa xlakaskinka akxilhli komo nawayan o ni. Xla xtaway xliʼakxilha natlawa xtalakaskin xTlat chu nalichuwinan, maski chatum samaritana tiku xtachuwinama (Juan 4:31-34). Santiago chu Juan ni akgatekgskgolh tuku Jesús xkamasiyaniputun. Akxni taʼankgolh Jesús kSamaria, kstalaninanin xputsamakgolh niku nalhtatakgo. Pero samaritanos ni kamakgamakglhtinankgolh, wa xlakata Santiago chu Juan wanikgolh Jesús pi kskilh xtaktalh lhkuyat kʼakgapun xlakata xmasputulh ama kachikin. Pero xla tliwakga kastakyawalh (Luc. 9:51-56). ¿Xlisitsikgolh Santiago chu Juan komo chuna xlalh anta k’Galilea, niku xkachikinkan xwanit? Max chuna lakpuwankgolh xlakata xlaksakpaxkinankgo. Alistalh, apóstol Juan kalitachuwinalh samaritanos xlakata Dios, chu lhuwa kgaxmatnikgolh. Max lu maxanalh akxni lakapastakli tuku xwanit makgasata (Hech. 8:14, 25). w18.06 10, 11:12, 13

Komo liwana wilinitaw «litampachit xaxlikana» xalak Biblia, nalilatamayaw tuku masiya chu ankgalhin nawanaw tuku xaxlikana. ¿Tuku xlakata nalakgmakganaw takgsanin? Xlakata uma wa tuku maklakaskin Satanás chu lu tlan kitaxtuninit. Tiku akgskgawinan nitlan tuku tlawanikan chu na nitlan tuku katlawani amakgapitsin (Juan 8:44). Wa xlakata, maski makglakgalhinanin akinin, lu liskujaw xlakata nikxni naʼakgsaninanaw (Efes. 4:25). Abigail, tiku kgalhi akgkutsayan kata, wan: «Max min kilhtamaku nalakpuwanaw pi ni lu xlakaskinka nawanaw tuku xaxlikana, chu max akgsaninamputunaw xlakata tlan nakinkakitaxtuniyan». Komo chuna ¿tuku xlakata lu liskuja ni na’akgsaninan? Xla wan: «Xlakata kintalakapastakni tlan tawila kxlakatin Jehová chu kinatlatni chu kiʼamigos tlan nakilipawankgo». Victoria, tiku kgalhi 23 kata, wan: «Akxni wana chu tatayaya tuku xaxlikana max nitlan nalikatsinikana. Pero lu tlan tuku kitaxtu: ni katipekuanti, tlakg lakatsu natawilaniya Jehová chu amakgapitsin tlan nalipawankgoyan». Wa xlakata, lu tlan nakitaxtuniyan komo liwana nalitatampulakgchiya litampachit xaxlikana. w18.05 28:3, 5

Chuna la talhuwitilhama tuku nitlan, tlakg talakaskin pi skgalalh natawilayaw. Jehová namakgantaxti tuku lakpuwanit kkilhtamaku nema xla lakkaxwilinit (Mat. 24:42-44). Xlakata nina min ama kilhtamaku, talakaskin pi akinin xakgalhkgalhinanin nawanaw chu ankgalhin skgalalh natawilayaw. Chali chali kalikgalhtawakgaw xTachuwin Dios chu ankgalhin skgalalh «natawilayaw xpalakata oración» (1 Ped. 4:7). Ankgalhin katlawaw tuku tlan xpalakatakan amakgapitsin chu akxtum kakatalaw kinatalankan. Chuna tlakg napaxuwayaw chu naʼakxilhaw pi kilhtamaku lakapala titaxtu (Efes. 5:16). Maski min kilhtamaku tlawayaw tuku nitlan, Jehová chuntiyaku kinkamaxkiyan talakaskin naskujnaniyaw. Chu xlakata nakinkamakgtayayan skgalalh natawilayaw «kinkamaxkinitan lakchixkuwin» tiku lakgkgolotsin xalak congregación (Efes. 4:8, 11, 12). Wa xlakata, akxni nakinkalakgapaxialhnanan chatum kgolotsin skgalalh katawila xlakata nakgaxmata xatlan xtastakyaw. w18.06 24, 25:15-18

Jesús ni kajwatiya kawanilh kstalaninanin natawilakgo kxtapaxkit, wata anta natamakgxtakgkgo. ¿Tuku xlakata? Xlakata xaxlikana kstalanina Cristo nalitaxtuya, talakaskin ankgalhin natayaniya. Jesús lichuwinalh pi xlakaskinka natayaniyaw akxni makglhuwa maklakaskilh tachuwin natamakgxtakgatit kJuan 15:4-10. ¿La tlan nalimasiyayaw pi lakaskinaw chuntiya natawilayaw kxtapaxkit Cristo chu chuntiya tlan nakinkaʼakxilhan? Kuenta natlawayaw xlimapakgsin. Wamputun pi natlawayaw tuku kinkaskiniyan Jesús. Xlikana, ni kinkaskiniyan tuku xla ni tlawa, wa xlakata lichuwinalh: «Kit ktlawanit ntu wan xlimapakgsin nkinTlat, na kxtapaxkit klilama». Xla kinkawilinin xaliʼakxilhtit. Akxni tlawayaw tuku wan xlimapakgsin Jesús xlakata nalichuwinanaw Dios, na limasiyaniyaw tapaxkit Dios. ¿Tuku xlakata? Xlakata tuku kinkalimapakgsiyan Cristo na wa tuku lakpuwan xTlat (Mat. 17:5; Juan 8:28). Akxni chuna tlawayaw, Jehová chu Jesús kinkapaxkikgoyan. w18.05 18:5-7

Kgawasa, talakaskin nalaksaka komo tlakg nakgalhtawakgaya, niku naskuja chu atanu tuku nalilakgaputsaya. Akxni wi tuku nalaksaka xtachuna la komo nalaksaka tiji niku napina. Pero komo wix katsiya niku napina ni tuwa katimakgkatsi nalaksaka niku napina. Nachuna, komo wix liwana lakapastaknita tuku natlawaya, tlakg ni tuwa katimakgkatsi nalaksaka tuku natlawaya. Komo la uku nalakkaxwiliya tuku natlawaya chu xatlan tuku nalaksaka, kaj ni makgas natsukuya litamakgtayaya. Kcongregaciones xlikalanka Katiyatni, wilakgolh lhuwa kamanan tiku talakaskin nakawaniyaw lakwan tachuwin xlakata xliputum xnakujkan skujnanimakgolh Jehová. Chu tlawakgo tuku kinkawaniyan Jehová, la komo xlakata takgalhtawakga, taskujut chu familia. Mapakgsina Salomón mastalh tastakyaw pi xliputum kinakujkan nalipawanaw Jehová. Nachuna lichuwinalh: «Xliputum mintiji kuentajkatlawani, chu xla napulalin mintiji» (Prov. 3:5, 6). Jehová, lhuwa xtapalh kali’akxilha kamanan tiku kstalaninanin Cristo. Xla lu kapaxki, wa xlakata kakuentajtlawa, kapulalin chu kasikulunatlawa. w18.04 26, 27:9

Apóstol Juan lu kamakgtayalh congregación xalak pulana siglo. Xlakata tuku tsokgwililh xlakata xtaskujut Jesús, kamaʼakgpuwantininit lhuwa kstalaninanin asta la uku. Esvangelio nema tsokgli kaj xman anta lichuwinan pi Jesús lichuwinalh pi kstalaninanin x’amakgolh litalakgapaskgo tapaxkit (Juan 13:35). Kmaktutu xcarta lichuwinan lhuwa laktlan xtamasiy. Akgtum li’akxilhtit, akxni lu nitlan limakgkatsiyaw kintalakgalhinkan, ¿nixlikana pi tlan limakgkatsiyaw akxni likgalhtawakgayaw pi xkgalhni Jesús «nkinkalichakganiyan xlipaks nkintalakgalhinkan»? (1 Juan 1:7). Chu komo chuntiya nitlan limakgkatsiyaw tuku nitlan tlawanitaw, ¿nixlikana pi tlan limakgkatsiyaw akxni likgalhtawakgayaw pi tlakg «ntlanka Dios, nixawa nkintapuwankan»? (1 Juan 3:20). Kaj xman wa Juan tiku tsokgli pi «Dios tapaxkit» (1 Juan 4:8, 16). Xlipulaktiy chu xlipulaktutu xcartas, kawani lakwan tachuwin natalan tiku «stalanimakgo [xaxlikana]» (2 Juan 4; 3 Juan 3, 4). w18.04 18:14, 15