Diciembre

Jesús wa xlakata liwana akgatekgsa taʼakglhuwit nema titaxtuyaw. Akxni xlama kKatiyatni, katapaxuwalh tiku xpaxuwakgo chu katatasalh tiku xtasamakgo (Rom. 12:15). Akgtum liʼakxilhtit, akxni 70 kstalaninanin xatapaxuwan kitaspitkgolh xlakata lu tlan kakitaxtunilh akxni kilichuwinankgolh Dios chu «espíritu santo maxkilh Jesús akgtum tlanka tapaxuwan» (Luc. 10:17-21). Chu atanu kilhtamaku, akxni akxilhli la xlipuwamakgolh latamanin xlakata nilh Lázaro, «jalhpanilh kxnaku chu lu lilipuwa» (Juan 11:33). Maski Jesús ni xkgalhi talakgalhin, lu xkalakgalhaman chu xkalakgkatsan latamanin. ¿Tuku makgtayalh chuna nalikatsi? Wa tapaxkit nema xkakgalhini latamanin (Prov. 8:31). Uma makgtayalh tlakg liwana nalakgapasa la lakpuwankgo latamanin. Apóstol Juan lichuwinalh: «Stalanka xkatsi xla wa ntu xʼananiy nchixku» (Juan 2:25). w19.03 20:1, 2

Satanás makglhtilh Job putum tuku xkgalhi: xtumin, xlakskujnin chu la tlan xlilakgapaskan. Nachuna, makgnilh kgalhkaw xkamanan tiku lu xkapaxki. Alistalh, tlawalh pi xchipalh akgtum xalixkajni tajatat nema litatsamalh tsitsi lata kxtantun asta kxʼakgxakga. Xpuskat lu xlilakgaputsama chu nitlan xlimakgkatsi, asta wanilh pi nitlan xlichuwinalh Dios chu xnilh. Job xniputun, pero nikxni makgxtakgli Dios. Wa xlakata, Satanás atanu tuku liputsananipa. Limaklakaskilh kgalhtutu xʼamigos Job, tiku akglhuwa kilhtamaku lakgapaxialhnankgolh pero ni makgtayakgolh. Wata nitlan tuku wanikgolh chu lixkajni lichuwinankgolh. Wanikgolh pi wa Dios tiku chuna xmapatinima chu xla ni kuenta xtlawa komo xla ni xmakgxtakga. Asta ma’akgatekgsnikgolh pi xla nitlan xlikatsi chu xlakgchan putum tuku xpatima (Job 1:13-22; 2:7-11; 15:4, 5; 22:3-6; 25:4-6). w19.02 4:7, 8

Ni putum tuku pekuaniya nitlan. Akgtum liʼakxilhtit, tlan pekuankan akxni tlawaputunaw tuku namakgalipuwan Jehová. Komo Adán chu Eva xtikgalhikgolh uma xatlan tapekua, ni xtitalalakatawakakgolh Dios. Pero akxni chuna tlawakgolh «talakinikgolh xlakgastapukan», uma kilhchanima pi liwana akgatekgskgolh pi xmakglakgalhinankgonit. Chu xkamatitaxtininit talakgalhin chu linin xkamanan. Akgatekgskgolh pi lu nitlan tuku xtlawakgonit, maxanankgolh xlakata nitu klhakganankgonit chu tamakgtlapakgolh (Gén. 3:7, 21). Tlan nakgalhiniyaw xatlan tapekua Jehová. Xlakata ni makgalipuwamputunaw. Tuku ni napekuaniyaw wa linin. ¿Tuku xlakata? Xlakata Dios kinkamaxkinitan takgalhkgalhin xlakata tlan putum kilhtamaku nalatamayaw. Komo nialh natlawayaw lanka talakgalhin, xla nakinkatapatiyan xlakata kanajlaniyaw xtamakamastan xKgawasa. Chu pulaktum la nalimasiyayaw pi kanajlaniyaw wa pi namakamaxkiyaw kilatamatkan chu natamunuyaw (1 Ped. 3:21). w19.03 5, 6:12, 13

Israelitas lhuwa tuku xlakata tlan xlimasiyakgolh tapaxtikatsinit. Jehová kamalakgachanilh Egipto pulakkaw tuku nitlan xlakata nakalakgmaxtu. Ni makgas kilhtamaku titaxtulh, lakgmaxtulh xlatamatkan akxni kamalakgsputulh soldados egipcios kxaspinini Pupunu. Wa xlakata paxtikatsinikgolh chu asta kilhtlinikgolh Dios akgtum takilhtlin. Pero, ¿la xlilhuwa makgapalalh uma? Akxni kgalhikgolh atanu taʼakglhuwit, nialh lakapastakkgolh tuku xtlawanit Jehová xpalakatakan chu ni limasiyakgolh tapaxtikatsinit (Sal. 106:7). Biblia wan pi «putum xkamanan Israel tsukukgolh katataʼakglhuwikgo Moisés chu Aarón», uma xkilhchanima pi wa Jehová tiku xlichuwinamakgolh (Éx. 16:2, 8). Xla lu nitlan limakgkatsilh, wa xlakata wa pi putum xʼamakgolh nikgo kxakaskakni tiyat, kajwatiya xʼama lakgtaxtu Josué chu Caleb (Núm. 14:22-24). w19.02 17:12, 13

Jesús ni lakpuwa natlawa akgtum lanka paskua xlakata nalilakapastakkan akxni tinilh. Wata kawanilh kstalaninanin pi xlakapastakkgolh makgtum akgatunu kata chu ni tuwa la xtlawakgolh (Juan 13:15; 1 Cor. 11:23-25). Chuna limasiyalh pi ni xtlankajwanan. Lu lipaxuwayaw kiMapakgsinakan xalak akgapun lu taktuju (Filip. 2:5-8). Pulaktum la tlan nastalaniyaw xliʼakxilhtit Jesús xlakata la xtataktuju wa pi pulana nakalilakgaputsayaw amakgapitsin (Filip. 2:3, 4). Kalilakpuwaw tuku tlawalh xaʼawatiya katsisni akxni nina xniy. Maski xkatsi pi kaj atsinu xtsankga namakgnikan, tlakg lilakgaputsalh la xʼamakgolh makgkatsikgo kstalaninanin. Wa xlakata ama katsisni chuntiya kamasiyanilh, kamakgpuwantinilh chu kamakgoxamixilh (Juan 14:25-31). Limasiyalh pi tlakg xkalilakgaputsa amakgapitsin nixawa tuku xla xʼakstu xlilakgaputsa. Lu tlan liʼakxilhtit wililh xlakata taktujukan. w19.01 21:5, 6

¿Lu lhpipiya akxni lakpuwana pi natamakayawaya ktamakxtumit? Komo chuna, ni kaj mi akstu chuna akgspulayan. Max kimputumkan chuna makgkatsiyaw akxni mastaputunaw kintakgalhtinkan. Komo uma tlawa pi nila namastaya mintakgalhtin, tlan nalakputsananiya tuku xlakata chuna makgkatsiya. ¿Tapekua tlawa pi nialh nakatsiya tuku nawana? ¿Lilakgaputsaya xlakata mintakgalhtin nixtachuna la xla amakgapitsin? Xlikana, uma tuku makgkatsiya limasiya pi taktujuya chu katsiya pi amakgapitsi tlakg xlakaskinka litaxtukgo nixawa wix. Jehová tlan akxilha tiku taktuju (Sal. 138:6; Filip. 2:3). Pero nachuna xla lakaskin pi namalankiya chu nakamakgpuwantiniya natalan ktamakxtumit (1 Tes. 5:11). Xla paxkiyan chu namakgtayayan xlakata ni napekuana. Anta kxTachuwin Dios kinkamalakapastakayan pi kimputumkan akgtsankgatayayaw akxni chuwinanaw (Sant. 3:2). Jehová chu natalan ni kinkaskinikgoyan pi putum tlan tuku natlawayaw (Sal. 103:12-14). Kifamiliajkan litaxtukgo chu kinkapaxkikgoyan (Mar. 10:29, 30; Juan 13:35). Kinkaʼakgatekgsnikgoyan pi lakgachunin ni chuna chuwinanaw la lakaskinaw. w19.01 8:3; 10, 11:10, 11

La uku, max tuwa namakgkatsiya nakgalhakgaxpata Dios pero namatlaniya. Jehová nakinkamakgtayayan tlan nakinkakitaxtuniyan, ni kaj xman akxni kajku kgawasa wix, nachuna xliputum milatamat. Xlakata tlakg tlan naʼakgatekgsaw uma, kaʼakxilhwi tuku kamakgtayalh israelitas xlakata naʼakgchipakgo Tiyat nema xkamalaknunikanit chu tuku maxkilh litliwakga David xlakata tlan natlaja Goliat. Akxni israelitas atsinu xtsankga natanukgo kTiyat nema xkawanikanit nakamaxkikan, Dios ni kawanilh pi xlitsakgsakgolh xlakata tlakg tlan soldados xlitaxtukgolh ni para naʼankgo kʼguerra (Deut. 28:1, 2). Wata kawanilh pi xkgalhakgaxmatkgolh xtastakyaw chu xlipawankgolh (Jos. 1:7-9). Max kxpalakatakan latamanin uma kaj nitu xlitaxtu. Pero uma tlakg xatlan tastakyaw nema makglhtinankgolh, xlakata xtamakgtay Jehová tlan katlajakgolh cananeos (Jos. 24:11-13). Xlikana, xlakata nakgalhakgaxpata Dios talakaskin nakgalhiyaw takanajla. Komo nakgalhiyaw takanajla, ankgalhin tlan nakinkakitaxtuniyan. Uma lu xlikana la uku chuna la xamakgasa kilhtamaku. w18.12 25:3, 4

La uku, makgapitsi liʼakgchakgxkgonit akgtum tamasiy xalak Biblia, amakgapitsi max katatayakgolh apóstatas o latamanin tiku ni makgamakglhtinankgo kintakanajlakan. Maski lata tuku limakgxtakgkgonit, xputumkan laksakkgonit «natamakgatlinikgo» Jehová chu congregación (Heb. 3:12-14). Tlakg tlan xtiwa pi chuntiyaku xkgalhinikgolh takanajla chu xlipawankgolh Jesús, chuna la tlawalh apóstol Pedro. Makgapitsin tsinu tsinu makgxtakgkgonit xaxlikana, chu max ni xkuentajtlawakgo pi chuna xkaʼakgspulama. Biblia katamalakxtumi akgtum barco nema lakatanu an chu tsinu tsinu tamakgatlini xkilhtun pupunu (Heb. 2:1). Maski ni xlakpuwankgonit namakgxtakgkgo xaxlikana, mastakgolh talakaskin pi nataxlajwani la xtalalinkgo Jehová chu asta makgxtakgkgolh. w18.11 9:5, 6

Komo tlakg katsiniputunaw la naskujnaniyaw Jehová, max makgatsiyaw tuku talakaskin xlakata tlan naʼanaw kʼEscuela xla Tiku lichuwinankgo xTamapakgsin Dios. Kʼuma Escuela kamasiyanikan natalan tiku skujnikgo Dios xliputum kilhtamaku, xlakata nakamalakgachakan niku tlakg talakaskin tamakgtay. Tiku naʼankgo kʼuma Escuela makgamakglhtinankgo tukuya taskujut nakamaxkikan. ¿Tlan xʼaw kʼuma Escuela chu tlan xmakglhtinaw taskujut nema nakinkalakgayawakanan? (1 Cor. 9:23). Xlakskujnin Jehová limasiyaputunaw kintalakgalhamankan, kintapaxkitkan chu putum kilhtamaku limasiyaputunaw pi kalilakgaputsayaw amakgapitsin. Akxni chuna tlawayaw kinkaliminiyan lhuwa tapaxuwan chu takaksni (Gál. 5:22, 23). Maski lata tuku titaxtumaw, tlan nalipaxuwayaw xlakata stalaniyaw xliʼakxilhtit Jehová akxni lakgalhamananaw chu xlakata kskujnin kinkaliʼakxilhan (Prov. 3:9, 10). w18.08 27:16-18

Max wi tiku nalakpuwan: «¿Wi pulaktum tuku xlakata chatum kstalanina Cristo nalakxtlawa xtamakgaxtokgat chu alistalh natamakgaxtokgpara?». Jesús liwana lichuwinalh tuku lakpuwan xlakata tiku lakxtlawa xtamakgaxtokgat: «Kaxatikawa nti [namakgxtakga] xpuskat, na natatawilay achatum, lakgalhinan kxlakatin xpuskat. Usu lapi wa mpuskat [namakgxtakga] xchixku, na natatawilay achatum, [na lakgalhinan]» (Mar. 10:11, 12; Luc. 16:18). Jesús xmaxki kakni tamakgaxtokgat chu xlakaskin pi amakgapitsin nachuna xtlawakgolh. Tiku xmakgxtakga tiku xtamakgaxtokga maski nitu xtlawanit tuku nitlan chu xtatamakgaxtokga atanu x’akgskgawima tiku tamakgaxtokga. Kxlakatin Dios tiku lakxtlawa xtamakgaxtokgat ni kilhchanima pi lamakgxtakga. Dios akxilha pi chuntiya «akgtum makni litaxtukgoy». Nachuna, Jesús lichuwinalh pi tiku makgxtakga xpuskat max natlawa talakgxtumit xalimaxana. ¿Tuku xlakata? Xlakata ama kilhtamaku puskat tiku xmakgxtakgkan max xtalakaskin wi tiku natatamakgaxtokga xlakata nakgalhi tuku maklakaskin. Chu uma xliʼakgtiy tamakgaxtokgat xkitaxtu la komo xakgskgawilh xchixku. w18.12 11:8, 9

Takgalhchuwin nema Habacuc takgalhilh Jehová makgtayalh xlakata nakgalhi takaksni. Wa xlakata lakpuwa chuntiya nakgalhkgalhi asta akxni Jehová wi tuku xtlawalh. Uma nichuna tlawalh kaj xlakata wi tuku lakapala makgkatsilh, xlakata alistalh lichuwinampa pi x’ama kgalhkgalhi «kilhtamaku akxni natsuku talakgaputsit» (Hab. 3:16). ¿Tuku katsiniyaw xlakata xtayat Habacuc? Pulana, pi chuntiya natlawaniyaw oración Jehová maski natitaxtuyaw tuku tuwa. Xlipulaktiy, pi talakaskin chuntiya nakgaxmataw tuku kinkawaniyan kxTachuwin chu kxkachikin. Chu xlipulaktutu, pi chuntiya nakgalhkgalhiyaw asta akxni Jehová wi tuku natlawa, chu nalipawanaw pi xla namasputu tapatin akxni nalakgchan xkilhtamaku. Komo natlawayaw putum uma, chuna la Habacuc, nachuna nakgalhiyaw takaksni chu tlan natayaniyaw. Takgalhkgalhin nakinkamakgtayayan ni natlakgwanaw maski nakgalhiyaw ta’akglhuwit. Nachuna nakinkamakgtayayan nalipawanaw kinTlatkan xalak akgapun asta akxni wi tuku natlawa (Rom. 12:12). w18.11 15,16:11, 12

¿Tuku lakpuwan Dios xlakata kamaʼakgchakgxnikan amakgapitsin? Jesús lichuwinalh: «Putum tiku namaʼakgchakgxni kistalaninanin tiku xtachuna laktsu kamanan litaxtukgo, tlakg tlan xwa komo xpixchiwakaka akgtum chiwix xla molino nema makgalhchokgo tantum burro chu xmakanka kpupunu» (Mar. 9:42). Xlikana pi Jesús lu nitlan xʼakxilha uma. Chu xlakata xla liwana xlimasiya xtayat xTlat, liwana katsiyaw pi Jehová nachuna nitlan akxilha akxni wi tiku maʼakgchakgxni xtala (Juan 14:9). ¿Nachuna lakpuwanaw la Jehová chu Jesús? ¿Tuku masiya tuku tlawayaw? Kalilakpuwaw pi lakgatiyaw lhakgananaw chu takaxtayayaw chuna la akinin lakaskinaw, pero max katsiyaw pi makgapitsi natalan nitlan akxilhkgo. ¿Tuku natlawayaw? Xlakata kapaxkiyaw kinatalankan, ¿namakgxtakgaw tuku lakgatiyaw? w18.11 25:9, 10

¿Tuku xlakata xlakaskinka pi kinchatunukan ni namakgxtakgnanaw? Xlakata Satanás lakatakima Jehová chu nachuna akinin. Anta kjardín xa’Edén, uma ángel tiku nitlan xtayat litaxtulh Satanás. Xla maxkajwanilh stlan xtukuwani Jehová akxni wa pi nitlan mapakgsina chu lixkajni likatsi. Lu nitlan, Adán chu Eva tatayakgolh Satanás chu lakatakikgolh Dios (Gén. 3:1-6). Akxni xlamakgolh kʼEdén, lhuwa tuku xkgalhikgo xlakata tlakg xpaxkikgolh Jehová. Pero akxni Satanás lakatakinalh, tapaxkit nema xkgalhinikgo Jehová ni xatakgatsin xwanit. Alistalh, kxkilhtamaku Job, tawilapa atanu taʼakglhuwit: ¿Xʼama tawilakgo latamanin tiku xlikana xpaxkikgolh Jehová chu ni xmakgxtakgkgolh? O ¿latamanin xlikana tlan ni makgxtakgnankgo? (Job 1:8-11). Xkgalhi talakgalhin chu tlawalh tuku nitlan chuna la akinin. Pero Dios lu xpaxki xlakata ni xmakgxtakga. w19.02 3, 4:6, 7

Jesús lichuwinalh chatum chixku tiku xputsa perlas xlakata nalimasiya la xlilhuwa xtapalh akxilhkgo xTamapakgsin Dios putum tiku tekgskgo. Akxni tekgsli tuku lu lhuwa xtapalh, lakapala «stalh wantu xkgalhi» xlakata natamawa (Mat. 13:45, 46). Nachuna, xaxlikana xla xTamapakgsin Dios chu amakgapitsi tamasiy xalak Biblia lu lhuwa xtapalh liʼakxilhaw chu lakapala tlawayaw talakgpalit nema talakaskin xlakata tlan nakgalhiyaw. Komo lhuwa xtapalh liʼakxilhaw nikxni katistaw (Prov. 23:23). Lu nitlan, pero makgapitsi xlakskujnin Dios nialh lhuwa xtapalh liʼakxilhkgo tuku xaxlikana chu asta stakgonit. Nikxni chuna katlawaw. Wata kastalaniw xtastakyaw Biblia xlakata chuntiya «[nastalaniyaw] xatalulokgtat» (3 Juan 2-4). Uma wamputun pi wa pulana nawiliyaw kkilatamatkan chu chuna nalilatamayaw. w18.11 9:3

Jehová kawanilh israelitas pi ni xtalatlawakgolh Jericó. Kajwatiya xtalakaskin natlawankgo kxmakni kachikin makgtum akgtum kilhtamaku lata akgchaxan kilhtamaku chu makgtujun xliʼakgtujun kilhtamaku. Max makgapitsi soldados xlakpuwankgolh pi uma kaj xkamamakgapali chu xkamakgatlakgwan. Pero xPulalina Israel, Jehová, liwana xkatsi tuku xtlawama. Uma tuku tlawakgolh matliwakglhli xtakanajlakan chu kalakgmaxtulh xlakata ni nakatalatlawakgo lakgtliwakgan soldados xalak Jericó (Jos. 6:2-5). ¿Tuku kinkamasiyaniyan uma? Max namin kilhtamaku ni lu liwana katiʼakgatekgswi tuku xlakata xkachikin Jehová wi tuku laksaka. Akgtum liʼakxilhtit, makgasata max ni lu tlan x’akxilhaw namaklakaskinaw dispositivos electrónicos akxni xkgalhtawakgayaw, akxni xlichuwinanaw Dios chu ktamakxtumit. Pero max la uku akxilhaw pi lu tlan kitaxtu akxni maklakaskinaw. Wa xlakata, maski ni lu liwana akgatekgsaw tuku kinkawanikanan, talakaskin nastalaniyaw tuku kinkawaniyan xkachikin Jehová. Akxni akxilhaw tuku tlan kitaxtu xlakata tuku lakgpalikan, kintakanajlakan chu la makxtum wilaw tlakg tatliwakglha. w18.10 23:8, 9

Galileos xmapakgsinakan xtlawaputunkgo Jesús xlakata tuku xkgaxmatkgonit xpalakata. Xlikana pi x’akxilhkgo la komo chatum tlan mapakgsina: tlan x’akgchuwinan, xkgalhi litliwakga xlakata nakamapaksa tiku xtatatlakgo chu xkamaxki liwat tiku xtsinksmakgolh. Akxni kamawilh 5,000 latamanin, akxilhli pi «xʼamakgolh minkgo chu xafuerza mapakgsina xʼamakgolh tlawakgo», wa xlakata «amakgtum xʼakstu ampa kkasipijni» (Juan 6:10-15). Atanu kilhtamaku, alh xʼalakgaputu pupunu xla Galilea, pero latamanin max xtaxlajwanikgonit. Wa xlakata Jesús kawanilh latamanin pi xla xminit kKatiyatni xlakata nakamakgtaya kxtakanajlakan, ni wa xlakata nakamakgtaya lhuwa tuku nakgalhikgo. Kawanilh: «Kaliskujtit, ni wa taway nema lakgsputa, wata taway nema makgapala putum kilhtamaku» (Juan 6:25-27). w18.06 4:4, 5

Jesús lu xkapaxki latamanin chu xmakgkatsi tuku xmakgkatsikgo. Xʼakgatekgsa la xmakgkatsikgo tiku xlitaxtukgo la kgantum kiwi nema tatukxma o la tiku akgtum mecha xla lino nema mixmaja. Wa xlakata, lu xkaʼakgatekgsni latamanin chu xkalimasiyani takgalhkgalhin (Mar. 10:14). Xlikana, akinin nila liwana kamasiyaniyaw chu kaʼakgatekgsniyaw latamanin chuna la xtlawa Jesús. Pero tlan nakalimasiyaniyaw taʼakgatekgsni latamanin akxni kalitachuwinanaw xlakata Dios. Liwana ka’akxilhwi la katachuwinanaw, tukuya kilhtamaku chu la xlilhuwa kilhtamaku. La uku lhuwa latamanin makgkatsikgo pi nitlan kalikatsinikan chu kalakgmakgankan, xlakata tiku pulalinkgo política chu takanajla lu nitlan kalikatsinikgo (Mat. 9:36). Niti kalipawankgo chu ni kgalhikgo takgalhkgalhin. Wa xlakata lu xlakaskinka pi kintachuwinkan chu chuna la chuwinanaw nakalimasiyaniyaw pi kapaxkiyaw chu kalakgalhamanaw. Min kilhtamaku, lhuwa latamanin liwana kgaxmatkgo tamakatsinin xalak Biblia pero ni wa xlakata akinin lu lakgskgalalan o liwana kakgalhtiyaw xtakgalhskininkan, wata kgaxmatkgo xlakata tlan kalikatsiniyaw chu kamaxkiyaw kakni. w18.09 31, 32:13, 14

¿La limasiyayaw pi xlakaskinka akxilhaw nalakgapasaw Dios chu nastalaniyaw xtapulalit? Nalikgalhtawakgayaw Biblia, nakgalhakgaxmataw xlimapakgsin chu pulana nawiliyaw kkilatamatkan la skujnaniyaw. Komo chuna natlawayaw, tlakg napaxuwayaw chu namatliwakglhaw kintakanajlakan (Tito 2:13). Xlakata ankgalhin nakgalhiyaw tapaxuwan xlakaskinka nikxni namakgatsankgayaw la natalalinaw Jehová. Apóstol Pablo tsokgli: «Xaliʼankgalhin kapaxuwatit xpalakata kimPuchinakan, na amakgtum kkawaniyan mpi: ¡Kapaxuwatit!» (Filip. 4:4). Xlakata tlan natalalinaw Jehová xlakaskinka nakgalhiyaw xliskgalala. (Prov. 3:13, 18). Chu xlakata ankgalhin napaxuwayaw, lu xlakaskinka pi chuntiya nakgalhakgaxmataw tuku nakatsiniyaw kBiblia. Jesús wa: «Lapi katsiyatit yuma [...] nakgalhiyatit tapaxuwan komo natlawayatit» (Juan 13:17; Sant. 1:25). Uma lu xlakaskinka xlakata kintakanajlakan chu xlakata putum kilhtamaku napaxuwayaw. w18.09 18:4-6

Epafras liwana xkalakgapasa chu xkalilakgaputsa natalan. Akxni Pablo xtanuma kpulachin anta kRoma, katsokgnanilh kstalaninanin Cristo xalak Colosas pi Epafras ankgalhin xtlawa oración xpalakatakan (Filem. 23). Xkamakgtaya chu chuna xkalimasiyani tapaxkit xnatalan. Oración nema tlawayaw xpalakatakan natalan lu tlan kitaxtu, liwaka akxni kamapakuwiyaw (2 Cor. 1:11; Sant. 5:16). Kalakapastakwi xtukuwanikan makgapitsi natalan. Chuna la Epafras, lhuwa natalan tlawakgo oración kxpalakatakan natalan xalak congregación o xlakata familias tiku titaxtumakgo tuku tuwa o wi tuku xlakaskinka xlilaksakatkan kxlatamatkan. Nachuna nakalakapastakaw natalan tiku chatum xalak xfamilia ninita, tiku lakgtaxtukgonit akxni la tuku masputunan chu guerras, chu tiku lipatinamakgolh xlakata ni anan tumin. Xlikana pi anan lhuwa natalan tiku talakaskin nakapalakaskinaw kkiʼoracioneskan. w18.09 5, 6:12, 13

Pablo ni kajwatiya xkilhchanima pi nakamaxkiyaw tuku maklakaskinkgo amakgapitsin wata na xkilhchanima pi nakamakgpuwantiniyaw chu nakamakgtayayaw tiku maklakaskin (Hech. 20:31-35). Apóstol Pablo kinkamasiyanin la nalimasiyayaw talakgalhaman: nalimaxtuyaw kilhtamaku, kilitliwakgakan, nakakgaxmatniyaw chu nakalimasiyaniyaw tapaxkit amakgapitsin. Luwa latamanin akxilhkgonit pi anan tapaxuwan akxni wi tuku mastayaw. Maktum revista xlichuwinan pi latamanin wankgo pi tlakg paxuwakgo akxni wi tuku mastakgo. Chuna, akxni kamakgtayayaw amakgapitsin lu tlan makgkatsiyaw. Nachuna tiku lu katsinikgo wankgo pi mastakan tamakgtay lu tlan kitaxtu, ni lu tatatlakan chu tlakg limin tapaxuwan. Tiku katsiyaw pi Biblia wa xTachuwin Dios, ni kaks lilakawanaw uma (2 Tim. 3:16, 17). w18.08 22:17, 18

Isaías lichuwinalh xlakata Jesús: «Ni katiputsananinalh kaj xlakata tuku akxilha, chu ni katistakyawanalh kaj xlakata tuku kgaxmatnit. Xalakatitum nakaputsanani tiku lakglimaxkgen» (Is. 11:3, 4). Umakgolh tachuwin lu kinkamatliwakglhan. ¿Tuku xlakata? Xlakata lamaw kkakilhtamaku niku lhuwa anan talaksakpaxkit. Putum akinin lakaskinaw pi xchilha kilhtamaku akxni Jesús nakinkaputsananiyan, Juez tiku xa’akgstitum chu ni kintikaputsananin kaj xlakata la tasiyayaw. Chali chali, wi tuku kalakpuwaniyaw latamanin akxni kaʼakxilhaw. Xlakata makglakgalhinanin akinin, ni xa’akgstitum tuku kalakpuwaniyaw amakgapitsin, ni chuna la tlawa Jesús. Lismaninitaw pi kajwatiya lichuwinanaw tuku akxilhaw. Maski chuna, akxni Jesús xlama kKatiyatni, kinkamaxkin uma tastakyaw: «Ni kaj [akglakgwa] kaputsanantit, wampi kaputsanantit wa ntu lakatitum» (Juan 7:24). Chuna la akxilhaw, xla lakaskin pi kastalaniw xliʼakxilhtit chu ni kaj wa kaʼakxilhwi la tasiyakgo amakgapitsin. w18.08 8:1, 2

Xlikana pi ni kgaxmataw xtachuwin Jehová k’akgapun. Pero kinkamaxkiyan tastakyaw kxTachuwin, kBiblia. Nachuna espíritu santo makgpuwantini «skujni xatalipaw» xlakata chuntiya nakinkamaxkiyan tuku maklakaskin kintakanajlakan, la komo likgalhtawakga, likgalhtawakga k’Internet, kvideo chu k’audio (Luc. 12:42). Ankgalhin kalakapastakwi pi xlakata xtachuwin Jehová nema talhkatawilanit kBiblia, tlan nalipawanaw pi xla ankgalhin nakinkamakgtayayan chu xla nalakkaxtlawa tuku nitlan nakinkatlawaniyan Satanás chu xkakilhtamaku. Kuenta katlawaw nakgaxmataw xtachuwin Jehová. Komo chuna natlawayaw, tlan natayaniyaw taʼakglhuwit nema kgalhiyaw o nema aku mima. Biblia kinkamalakapastakayan: «Wa mintapaxuwanaliyankan, lu[...] xlakaskinka, lakimpi wa lantla natlawayatit xtalakaskin Dios nalikgalhiyatit ntamalaknun» (Heb. 10:36). w19.03 13:17, 18

Akglhuwa kata wa Moisés xpulalina Israel xlitaxtunit, wa xlakata max Josué xkgalhskinkan tuku x’ama wan kachikin xlakata la uku wa xʼama kapulalin (Deut. 34:8, 10-12). Maktum libro lichuwinan xlakata Josué 1:1, 2: «Xtachuna la makgasa asta la uku, akxni talakgpali chatum mapakgsina kachikin lu tuwa kakitaxtuni». Ni xʼanan tuku xlakata Josué napekuan, wa xlakata lakapala tuku tlawalh chu lipawa Jehová (Jos. 1:9-11). Chu tlan tuku tlawalh. Chuna la wan Biblia, Jehová kalipulalilh chatum ángel Josué chu kachikin Israel. Tlan nalakpuwanaw pi uma ángel wa «Tachuwin», xapulana xKgawasa Dios (Juan 1:1; Éx. 23:20-23). Xlakata Jehová xkamakgtayama, Israel ni tuwa makgkatsikgolh pi wa Josué nakapulalin. w18.10 22, 23:1-4

Jehová katsi tiku xatapaxuwan skujnanimakgo chu tsokgwili xtukuwanikan anta «kxlibro xla talakapastakni». Xlakata kintukuwanikan natawila anta «kxlibro xla talakapastakni» xla Jehová wi tuku talakaskin natlawayaw. Malaquías lichuwinalh pi talakaskin napekuaniyaw Dios chu nalilakpuwanaw xtukuwani. Komo wi tuku o wi tiku nakakninaniyaw nema ni wa Jehová, xla naxapa kintukuwanikan kxlibro (Éx. 32:33; Sal. 69:28). Wa xlakata, tamakamastanikan Jehová ni kaj xman wa nawanaw pi natlawayaw xtalakaskin chu natamunuyaw. Kaj makgtum tamakamastayaw chu tamunuyaw kkilatamatkan chu kaj lakapala makgtum titaxtu. Natatayayaw Jehová chu xlakskujni nalitaxtuyaw kilhchanima nalimasiyayaw tuku natlawayaw kkilatamatkan pi xlikana kgalhakgaxmataw (1 Ped. 4:1, 2). w18.07 23, 24:7-9

Uma ni kaj akglakgwa chuna la. Talakaskin ankgalhin naliskujaw. Xlakata namatliwakglhaw kintakanajlakan, talakaskin tlakg nakatsiniyaw chu kgalhiyaw liskgalala. Wa xlakata ankgalhin kinkawanikanan nalikgalhtawakgayaw Biblia chali chali (Sal. 1:1-3). ¿Wa uma tuku lakpuwanitaw natlawayaw? Komo nalikgalhtawakgayaw Biblia chali chali nakinkamakgtayayan liwana naʼakgatekgsaw xlimapakgsin chu xtastakyaw Dios. Limapakgsin nema tlakg xlakaskinka xlikgalhitkan kstalaninanin Cristo wa xla tapaxkit. Jesús kawanilh kstalaninanin: «Wa yuma nakalilakgapaskgoyan xlipaks amakgapitsin mpi wixin, nkilimakgalhtawakgat lapi xlakgalhinitit ntapaxkit nchatunu chatunu» (Juan 13:35). Santiago, xtutala Jesús, limapakuwilh pi wa «xlimapakgsin Dios wantu tlakg [...] kilimakgantaxtitkan» (Sant. 2:8). Chu Pablo lichuwinalh: «Lapi kgalhiya ntapaxkit, limakgantaxtiya xlipaks limapakgsin» (Rom. 13:10). Xlikana pi Biblia lu xlakaskinka li’akxilha tapaxkit, xlakata «Dios, tapaxkit» (1 Juan 4:8). w18.06 19:14, 15

Maski israelitas wa tiku makgasitsikgolh Jehová, wa Moisés tiku nitlan limakgkatsilh. Xlakata ni machokgolh tuku xmakgkatsi, tlawalh pi xwa tuku nitu xlakpuwanit. Moisés mastalh talakaskin pi tuku tlawakgolh amakgapitsin xlaktlawalh, chu nialh wa Jehová xlakglakalh. Xapulana akxni israelitas lisitsikgolh xlakata ni xʼanan chuchut, Moisés tlan tuku tlawalh (Éx. 7:6). Max la uku xtlakgwanit chu ksitsinit xlakata akglhuwa kata xkakuentajtlawama uma kachikin nema xtlankajwanankgonit. Max tlakg lilakgaputsalh la xtlakgwanit chu ni wa namalanki Jehová. Komo chatum palakachuwina tiku ni xmakgxtakga Jehová, chuna la Moisés, nialh kuentajtlawalh chu tlawalh tuku nitlan, akinin max nachuna nakinkaʼakgspulayan. Chuna la xla, akinin nachuna atsinu tsankga xlakata natanuyaw kxasasti kakilhtamaku nema Dios kinkamalaknuninitan (2 Ped. 3:13). Niti makgatsankgaputun uma tuku lu xlakaskinka. Pero, komo makgamakglhtinamputunaw uma, talakaskin pi ankgalhin nalakglakanaw Jehová chu natlawayaw xtalakaskin (1 Juan 2:17). w18.07 15:14-16

Satanás nila fuerza kinkamatlawiyan tuku ni lakaskinaw (Sant. 1:14). Lhuwa latamanin ni katsikgo pero tlawakgo tuku lakaskin Satanás. Chu akxni katsikgo tuku xaxlikana, talakaskin nalaksakkgo tiku naskujnanikgo (Hech. 3:17; 17:30). Komo kgalhakgaxmatputunaw Dios, Satanás nila tuku natlawa xlakata namakgxtakgaw Jehová (Job 2:3; 27:5). Wi atanu tuku Satanás chu xdemonios nila tlawakgo. Akgtum li’akxilhtit, Biblia ni lichuwinan pi Satanás katsi tuku wi kkintalakapastaknikan o kkinakujkan. Kajwatiya Jehová chu Jesús tlan chuna tlawakgo (1 Sam. 16:7; Mar. 2:8). Komo naliskujaw xlakata nalichuwinanaw chu natlawayaw xtalakaskin Dios, tlan nalipawanaw pi Jehová ni katimaxkilh talakaskin akgskgawini wi tuku nakinkatlawaniyan (Sal. 34:7). Talakaskin nalakgapasaw kintalatlawanakan, pero ni lu napekuaniyaw. Maski makglakgalhinanin akinin tlan natlajayaw komo nalipawanaw Jehová. Komo nalakatakiyaw Satanás, xla nakinkatapanuniyan (Sant. 4:7; 1 Ped. 5:9). w18.05 26:15-17

Kalilakpuwaw pi makgat niku napina k’autobús xlakata wi tuku xlakaskinka nalakgpina. Pero akxni nachipina niku taxtukgo putlaw max lilakgaputsaya la xlilhuwa autobuses chu latamanin wilakgo. Pero, wix liwana lakpuwana niku napina chu tawakaya k’autobús nema nalinan niku pimpat. Xlikana, ni katitawaka k’autobús nema alakatanu nalinan. Kilatamatkan xtachuna la komo wi niku amaw, chu kamanan xtachuna la latamanin tiku wilakgo niku kgalhkgalhikan autobuses. Max lakgachunin lu lilakgaputsakgo tuku talakaskin nalaksakkgo kxlatamatkan. Pero komo xlikana lilakpuwankgonit tuku tlawaputunkgo, tlakg ni tuwa natlawakgo tuku lakpuwankgo. Kamanan kajwatiya xliskujatkan namakgapaxuwakgo Jehová. Uma kilhchanima pi nalilakpuwankgo tuku lakpuwan Jehová xlakata xlatamatkan, la komo takgalhtawakga, taskujut chu familia. Nachuna, kilhchanima naliskujaw tlakg naskujnaniyaw Jehová. Kamanan tiku skujnanimakgo Jehová tlan liwana nakatsikgo pi nakasikulunatlawakan chu tlan nakakitaxtuni kxlatamatkan. w18.04 25:1-3

Jefté makgantaxtilh xtachuwin chu malakgachalh xtsumat kSiló xlakata nalakskuja ktabernáculo xliputum xlatamat. Jefté lu tuwa makgkatsilh uma , pero xtsumat max tlakg tuwa makgkatsilh. Maski chuna, xla tlawalh tuku xtlat xmalaknunit (Juec. 11:36, 37). Nila x’ama tamakgaxtokga, ni kgalhilh kamanan chu x’ama lakgsputa xtukuwani chu tuku xkgalhi xtlat. Xlikana pi lu xtalakaskin pi xmakgpuwantinika. Biblia lichuwinan: «Chu xla xatapaxuwan alh lakskuja k’Israel: Akgatunu kata laktsuman xalak Israel x’ankgo makgpuwantinikgo xtsumat Jefté tiku galaadita, makgtati akgatunu kata» (Juec. 11:39, 40). La uku kilhtamaku, kstalaninanin Cristo tiku nina tamakgaxtokgkgo chu lilakgaputsakgo tuku xla Jehová na talakaskin nakamakgpuwantiniyaw chu nakawaniyaw lakwan tachuwin (1 Cor. 7:32-35). w18.04 17:10, 11

Lhuwa ángeles tatayakgolh Satanás. Akxni nina xmin munkaklat, tlawalh pi makgapitsi ángeles xkatatlawakgolh talakgxtumit xalimaxana lakpuskatin. Biblia lichuwinan pi uma talatlawana kalilh lhuwa ángeles xlakata wa natatayakgo (Gén. 6:1-4; Rev. 12:3, 4). Akxni umakgolh ángeles makgxtakgkgolh xfamilia Jehová, mastakgolh talakaskin pi Satanás nakapulalin. Pero ni nalakpuwanaw pi kajwatiya tlawakgo tuku nitlan. Satanás nachuna lakkaxwilinit xkachikin chuna la xTamapakgsin Dios chu xla x’akstu limaxtukan la mapakgsina. Liwana kalakkaxwilinit demonios la komo mapakgsinanin, kamaxkinit limapakgsin chu kamaxkinit talakaskin namapakgsinankgo xlikalanka kakilhtamaku (Efes. 6:12). Satanás limaklakaskin uma tuku lakkaxwilinit xlakata wa nakapulalin putum mapakgsinanin xalak kkatiyatni. w18.05 23:5, 6

Xlakata Jehová chatum xatlan Tlat chu kinkapaxkiyan, lakgachunin kinkastakyawayan. David lu lanka xtapalh xʼakxilha uma tastakyaw. Xlikana, xlilakpuwan xtastakyaw Dios chu xliskuja xlakata nakatsini la xla lakpuwan. Xmasta talakaskin pi uma tastakyaw xlakgpalinilh xlatamat chu tlan tayat xkgalhilh. Komo wix nachuna natlawaya, tlakg napaxkiya Jehová. Nachuna tliwakga nakgalhiya mintakanajla. Chatum tala wanikan Christin, lichuwinalh: «Akxni kkgalhtawakga chu klilakpuwan, liwana kkatsi pi wa Jehová matsokgninalh kimpalakata». Komo wix matliwakglha mintakanajla, Jehová namaxkiyan liskgalala chu taʼakgatekgsni xlakata nachuna nalakpuwana la xla. Namakgtayayan xlakata lakaskin pi nakatsiya tuku tlakg xlakaskinka kmilatamat, pi liwana nalaksaka tuku natlawaya chu ni napekuaniya kilhtamaku nema aku mima (Is. 26:3). w18.12 26:9, 10