Enero

Jesús ni pekualh akxni wa tuku nitlan xtlawamakgolh xpulalinanin takanajla. Akgtum liʼakxilhtit, kawanilh fariseos pi xlakgaputiyunankgo xlakata tlakg xlilakgaputsakgo namakgachakgankgo nixawa nakakuentajtlawakgo xnatlatnikan (Mat. 15:1-11). Maski lu sitsinikgolh Jesús, xla chuntiya lichuwinalh tuku xaxlikana. Wa pi ni xaxlikana tuku xmasiyamakgo. Xla ni wa pi Dios makgamakglhtinan putum takanajla. Wata wa pi lhuwa xʼamakgo ankgo kxatilanka tiji nema linan kpulakgsputni chu ni lhuwa xʼamakgo ankgo kxatitsu tiji nema linan klatamat (Mat. 7:13, 14). Wa pi wi tiku xwankgolh pi kskujnanikgo Dios, pero ni xlikana. Wa xlakata wa: «Kuentajkatlawatit xpalakatakan ni xaxlikana palakachuwinanin tiku kalakgminkgoyan chu tasiyakgo chuna la borregos pero kxpulaknikan xtachuna la xalaktsinksnin lobos. Tuku tlawakgo nakalilakgapasatit» (Mat. 7:15-20). w21.05 9:7, 8

Ana xtamakgaxtokga chatum levita tiku xwanikan Elcaná, tiku lu xpaxki. Pero Elcaná xkgalhi achatum xpuskat tiku xwanikan Peniná. Maski Elcaná tlakg xpaxki Ana, «Peniná xkgalhi xkamanan, pero Ana nipara chatum xkgalhi». Peniná «ankgalhin xlikgalhkgamanan xlakata nitlan xmamakgkatsiniputun», chu wa xlakata «Ana lu xtasa chu ni xwayamputun». Maski chuna, Biblia ni wan pi Ana xmakgaxokgoputulh. Wata wanilh Jehová tuku xmakgkatsi chu lipawa pi xʼama makgtaya (1 Sam. 1:2, 6, 7, 10). ¿Tuku kinkamasiyaniyan uma? Komo wi tiku limasiyaputun pi tlakg xlakaskinka nixawa akinin, kalakapastakwi pi akinin kinkalakgchanan namalakgachokgoyaw kintasitsikan. Ni katamakgapuspitniw tiku kinkatlawanin tuku nitlan, wata katachuwinaw xlakata tlan natalalimparayaw (Rom. 12:17-21). Asta maski tiku chuna kinkalikatsinin ni natalakgpali, akinin tlan namakgkatsiyaw chu nakgalhiyaw tapaxuwan. w21.07 17, 18:13, 14

Katsiyaw pi Judas Iscariote stamakgana litaxtulh, pero ni putum kilhtamaku chuna xlikatsi (Luc. 6:13, 16). Jesús xlipawan xlakata lakgayawalh namaki caja niku xmujukan tumin. Jesús makglhuwa xkawaninita pi kuenta xtlawakgolh xlakata ni lhuwa tuku xkgalhiputunkgolh (Mar. 7:22, 23; Luc. 11:39). Pero Judas ni kgaxmatli chu tsukulh kgalhanan. Akxni nina xniy Jesús, Judas limasiyalh pi tlakg lhuwa tuku xkgalhiputun. Simón tiku xkgalhi lepra katawayalh Jesús chu kstalaninanin kxchik, na anta xwilakgo María chu xtala, Marta. Akxni xwayamakgo, María tayalh chu akmawakalh Jesús akgtum xamuksun chu xatapalaxla aceite. Judas chu amakgapitsi kstalaninanin Jesús lisitsikgolh. Max makgapitsi lakpuwankgolh pi uma tumin tlan xmaklakaskinka akxni xlichuwinanka Dios. Pero Judas atanu tuku xlisitsima: «kgalhana xwanit» chu xkgalhamputun tumin nema xmamakinikanit (Juan 12:2-6; Mat. 26:6-16; Luc. 22:3-6). w21.06 18:12, 13

¿Lhuwa talakgatay kgalhiyaw chu min kilhtamaku makgkatsiyaw pi nialhla makgantaxtiyaw? Nachuna makgkatsilh apóstol Pablo. Xla wa pi ni kaj akgtum congregación xlilakgaputsama, wata putum congregaciones (2 Cor. 11:23-28). ¿Kgalhiyaw akgtum tajatat nema ni kgalhi xalikuchun chu tlawa pi nialh napaxuwayaw? Pablo lu xlakgaputsama xlakata nila xmapanu “lhtukun kxmakni”, max akgtum tajatat (2 Cor. 12:7-10). ¿Makgkatsiyaw pi taxlajwaniyaw xlakata makglakgalhinanin akinin chu tlawayaw tuku nitlan? Milh kilhtamaku, Pablo nachuna makgkatsilh. Wa pi lu nitlan xmakgkatsi xlakata ankgalhin lu xliskujat xwanit namakgantaxti tuku xatlan (Rom. 7:21-24). Maski lhuwa tuku nitlan titaxtulh, Pablo chuntiya skujnanilh Jehová. ¿Niku tiyalh litliwakga? Maski liwana xkatsi tuku nitlan xtlawa, lu xkanajlani talakgmaxtut. w21.04 21, 22:7, 8

Akxni Adán makglakgalhinalh, ni kajwatiya xla makgatsankgalh takgalhkgalhin pi tlan xlatamalh putum kilhtamaku, nachuna xkamanan. Adán nila wi tuku xlikilhalh, xlakata liwana xkatsi pi tuku tlawalh akgtum talakgalhin xlitaxtu. Xlakgchan nani, pero ¿tuku tlan nawanaw xpalakata xkamanan? Xlakan ni xlinkgo kuenta (Rom. 5:12, 14). ¿Wi tuku tlan xtlawaka xlakata xkalakgmaxtuka kkalinin? Chuna, Jehová tsinu tsinu masiyalh la xʼama kalakgmaxtu lhuwa millones xkamanan Adán ktalakgalhin chu klinin (Gén. 3:15). Talakgmaxtut kinkamaxkiyan talakaskin tlan natalalinaw Jehová maski makglakgalhinanin akinin, chu namasta talakaskin nalakxtlawakan putum tuku tlawanit Akgskgawini (1 Juan 3:8). Chu kkilhtamaku nema aku mima, nakgantaxtu xtalakaskin Jehová: pi Katiyatni akgtum paraíso nawan. w21.04 14:1; 19:17

Lhuwa lakchixkuwin chu lakpuskatin xʼankgonit kJerusalén, klakalhuwa países xminkgonitancha chu tanu tanu xtachuwinkan xwanit. Uma kilhtamaku lalh tuku kaks malakawaninan, kaj xalan makgapitsi judíos, tsukukgolh chuwinankgo kxtachuwinkan latamanin. Pero tuku tlakg xlakaskinka kitaxtulh ni wa pi chuwinankgolh kʼumakgolh tachuwin, wata tuku wankgolh chu tuku kawanilh apóstol Pedro. Kawanilh pi tlan xlakgtaxtukgolh komo xkanajlanikgolh Jesucristo. Umakgolh tachuwin lakgchalh xnakujkan chu wankgolh: «¿Tuku kilitlawatkan?». Pedro kawanilh: «Katamunutit minchatunukan» (Hech. 2:37, 38). Tuku lalh alistalh kaks malakawaninan: ama kilhtamaku tamunukgolh max 3,000 latamanin chu chuna kstalaninanin Cristo litaxtukgolh. Chuna tsukulh lanka taskujut nema Jesús kalakgayawalh kstalaninanin. Chu uma taskujut tlawakan asta la uku. w21.06 2:1, 2

Max lakpuwanaw pi niku lichuwinanaw Dios tuwa namatsukiyaw akgtum takgalhtawakga. Latamanin max ni kgaxmatputunkgo. ¿Tuku nakinkamakgtayayan chuntiya nakalitachuwinanaw Dios? Kalakapastakwi pi max lakapala natalakgpali xlatamatkan chu tiku ni xkgaxmatputunkgo tuku lichuwinanaw alistalh nakgaxmatputunkgo (Mat. 5:3). Makgapitsi tiku xlakgmakgankgo kilikgalhtawakgakan, titaxtulh kilhtamaku lakaskinkgolh pi xkalimakgalhtawakgeka Biblia. Nachuna, katsiyaw pi Jehová wa xmalana tachanan (Mat. 9:38). Xla lakaskin pi chuntiya kachananaw chu kamunuwilinaw, pero wa lakgchan namastaka talhtsi. Chu lu kinkamatliwakglhan akxni lakapastakaw pi maski la uku niti limakgalhtawakgemaw Biblia, Jehová kinkasikulunatlawayan xlakata skujmaw, ni xlakata la kitaxtuma kintaskujutkan. w21.07 6:14

Jehová kinkamaxkinitan talakgalhaman nakgalhiyaw kamanan chu nakamasiyaniyaw napaxkikgo chu naskujnanikgo. Maski Jehová kamaxkinit ángeles litliwakga xlakata natlawakgo tuku kaks malakawaninan, ni kamaxkinit talakaskin nakgalhikgo kamanan. Wa xlakata, natlatni xlipaxtikatsinitkan Jehová xlakata kgalhikgo uma lu tlan talakgalhaman. Dios kamaxkinit natlatni talakgalhaman pi nakakuentajtlawakgo xkamanankan «chuna la wi xtastakyaw chu xlimapakgsin» (Efes. 6:4; Deut. 6:5-7). Xlakata tlan nakamakgtayakgo, xkachikin Dios tlawanit lhuwa likgalhtawakga, videos chu takilhtlin nema takilhtikgonit kBiblia. Uma masiya pi kinTlatkan chu xKgawasa, kapaxkikgo kinkamanankan (Luc. 18:15-17). Jehová makgapaxuwa akxni natlatni lipawankgo chu lu liskujkgo nakuentajtlawakgo xkamanankan. Umakgolh natlatni kamakgtayakgo xkamanankan xlakata tlan namakgtapakgsikgo kxfamilia Jehová putum kilhtamaku. w21.08 5:9

Makgapitsi lakpuwankgo pi takanajla kilhchanima kanajlakan tuku nila limasiyakan pi anan. Pero Biblia wan pi kanajlaniyaw tuku ni tasiya, chuna la Jehová, Jesús chu Tamapakgsin xlakata wi tuku limasiya pi anankgo (Heb. 11:3). Chatum científico tiku na xtatayana Jehová litaxtu wa: «Ni akglakgwa kintakanajlakan, na kanajlayaw tuku lakputsananikgonit científicos». Komo wi tuku limasiya pi anan chatum Malakatsukina, ¿tuku xlakata lhuwa ni kanajlakgo pi Dios malakatsukinalh? Xlakata nikxni lakputsananikgonit tuku limasiya pi uma xlikana. Robert, tiku la uku xtatayana Jehová, wan: «Xlakata kʼescuela nikxni lichuwinanka tamalakatsukin, klakpuwa pi ni xlikana xwanit. Asta akxni kmakgatsilh 22 kata, kkatsinilh pi Biblia kinkalitachuwinanan tuku xlakata tlan nakanajlayaw pi Dios malakatsukilh putum tuku anan». w21.08 15:4, 5

Akxni likgalhtawakgayaw Biblia chu kakgaxmatniyaw amakgapitsin la Jehová kasikulunatlawanit, katsiniyaw tsinu pi Jehová tlan likatsi. Pero akxni laksakaw naskujniyaw, kiʼakstukan akxilhaw kkilatamatkan pi xlikana tlan likatsi. Kawiliw akgtum liʼakxilhtit. Kalilakpuwaw pi skujnaniputunaw Jehová xliputum kilhtamaku, pero xlakata namatlaniyaw, talakaskin ni lhuwa tuku nakgalhiyaw. Max lakgapasaw xtamalaknun Jesús, pi komo pulana nawiliyaw xTamapakgsin Dios, Jehová nakinkamaxkiyan tuku maklakaskinaw, pero max nikxni akxilhnitaw la kgantaxtunit kkilatamatkan uma tachuwin (Mat. 6:33). Maski chuna, xlakata kanajlayaw tuku malaknulh Jesús, nalakkaxwiliyaw xlakata ni lhuwa tumin nalaktlawayaw chu ni lhuwa kilhtamaku naskujaw, chu kajwatiya nalichuwinanaw Dios. Akxni chuna tlawayaw, liwana akxilhaw la Jehová kinkakuentajtlawayan. Chu chuna “akxilhaw” pi Jehová tlan likatsi. w21.08 26:2

¿Nachuna la kkinkilhtamakujkan? Chuna. Lhuwa xpulalinanin takanajla lakgatikgo kamakgamakglhtinankgo tiku kgalhikgo tumin, tiku lakgskgalalan chu xlakaskinka litaxtukgo kʼakgtum kachikin, maski ni linkgo xlatamatkan chuna la wan Biblia. Kalakgmakgankgo xlakskujnin Jehová, tiku xatapaxuwan skujnanikgo chu ni xataxkajwani linkgo xlatamatkan. Chuna la wa Pablo, Dios kalaksakli tiku kalakgmakgankan (1 Cor. 1:26-29). Pero Jehová lanka xtapalh kaliʼakxilha putum xlakskujnin tiku ni makgxtakgkgo. ¿Tuku namakgtayayan ni naʼakgskgawiyan xtalakpuwankan latamanin? (Mat. 11:25, 26). Ni kamasta talakaskin pi nalaktlawa mintapuwan tuku lakpuwankgo latamanin xlakata xlakskujnin Dios. Jehová kajwatiya kamaklakaskin tiku taktujukgo xlakata natlawakgo xtalakaskin (Sal. 138:6). Kalilakpuwanti la kamaklakaskinit tiku kakilhtamaku kaliʼakxilha la tiku ni lakgskgalalan. w21.05 8:1; 9:5, 6

Apóstol Pablo paxtikatsininalh tamakgtay nema maxkika. Ni mastalh talakaskin pi tatlankit xtlawalh ni namakgamakglhtinan (Filip. 2:19-22). Natalan tiku lipinatita kata, lhuwa la tlan nalimasiyayatit pi paxtikatsiniyatit tuku tlawakgo tiku lakgkgawasanku kmincongregacionkan. Komo nakawanikgoyan pi nakalinkgoyan akxni napinatit tamawananatit, o akxni napinatit tlawayatit atanu tuku maklakaskinatit, kapaxtikatsinitit xtamakgtaykan chu kamakgamakglhtinantit. Chuna Jehová kalimasiyaniman xtapaxkit. Uma max natlawa pi tlan amigos nalitaxtuyatit. Kakamakgtayatit tlakg natalakatsuwinikgo Jehová. Kakawanitit pi lu lipaxuwayatit pi anankgo lakgkgawasan tiku lu liskujmakgo tlakg namakgtayanankgo kcongregación. Kakalitachuwinantit tuku titaxtunitantit. Chuna nalimasiyayatit pi paxtikatsiniyatit Jehová xlakata kaliminit kcongregación lakgkgawasan chu laktsuman (Col. 3:15; Juan 6:44; 1 Tes. 5:18). w21.09 12:12, 13

Jehová kapaxki kinatalankan. Pero min kilhtamaku akinin tuwa makgkatsiyaw nakawaniyaw chu nakalimasiyaniyaw tapaxkit. Max chuna makgkatsiyaw xlakata tanu kintalismaninkan o tanu la kinkamakgastakkan. Maski chuna, kimputumkan tlan namakgtayananaw nastaka tapaxkit kkifamiliajkan xaʼespiritual, komo nakapaxkiyaw putum kinatalankan chuna la Jehová (Efes. 5:1, 2; 1 Juan 4:19). Lataman tiku lakgalhamaninan lakputsa la nakamakgtaya chu tlan nakamamakgkatsini amakgapitsin. Chuna la Jesús kalikatsinilh latamanin limasiyalh pi Jehová lu kalilakgaputsa (Juan 5:19). «Akxni kaʼakxilhli lhuwa latamanin, lu kalakgalhamalh, xlakata xtamakxutapuxtukgonit chu niti xkakuentajtlawama chuna la borregos nema ni kgalhikgo xmapuchwayaninakan» (Mat. 9:36). Jesús limasiyalh pi xpaxkinan akxni kamapaksalh tiku xtatatlakgo chu kamakgtayalh tiku palha kskujkgo chu xlinkgo tsinka takuka (Mat. 11:28-30; 14:14). w21.09 22:10, 11

Jehová xalakgalhamana. Apóstol Pablo tsokgwililh pi Dios «lu lakgalhamanan». Xla xlichuwinama pi Dios xalakgalhamanina xlakata kamaxki talakaskin xatalaksakni kstalaninanin Cristo nakgalhikgo takgalhkgalhin nalatamakgo kʼakgapun (Efes. 2:4-7). Pero Dios ni kajwatiya kalimasiyani talakgalhaman xatalaksakni. David wa kʼakgtum salmo: «Jehová putum tlan kalikatsini latamanin chu xtalakgalhaman litasiya putum tuku tlawanit» (Sal. 145:9). Xlakata Jehová kapaxki latamanin, xla ankgalhin kalimasiyani talakgalhaman akxni akxilha pi lakgchan chuna natlawa. Jesús liwana xkatsi uma. Akglhuwa mil kata, akxtum xtawi xTlat kʼakgapun akxni nina xmin kKatiyatni (Prov. 8:30, 31). Makglhuwa, akxilhli la Jehová xkalimasiyani talakgalhaman latamanin tiku kgalhikgo talakgalhin (Sal. 78:37-42). Akxni xmasiya, Jesús makglhuwa lichuwinalh uma lu stlan tayat nema kgalhi xTlat. w21.10 8, 9:4, 5

Jehová pixlanka kgalhticha kʼakgapun xʼoración Jesús chu malaknunilh pi xʼama malanki xtukuwani. Akxni Jesús lichuwinalh Dios kKatiyatni, ankgalhin malankilh xtukuwani xTlat (Juan 17:26). Wa xlakata xlilat pi xaxlikana kstalaninanin Cristo xatapaxuwan nalimaklakaskinkgo xtukuwani Dios chu nakamasiyanikgo amakgapitsin. Kxapulana siglo, ni lhuwa kilhtamaku alistalh lata xlakkaxwilikanit congregación xla kstalaninanin Cristo, Jehová “kamakgamakglhtinalh tiku ni judíos, xlakata anta tlan xkalaksakli [...] tiku [...] xlinkgolh xtukuwani” (Hech. 15:14). Umakgolh kstalaninanin Cristo lu xatapaxuwan maklakaskinkgolh xtukuwani Dios. Ni matsekgkgolh, maklakaskinkgolh akxni lichuwinankgolh Dios chu akxni tsokgwilikgolh Biblia. Chuna limasiyakgolh pi xlitaxtukgo akgtum kachikin nema xlin xtukuwani Dios (Hech. 2:14, 21). La uku xtatayananin Jehová akgtum kachikin nema lin xtukuwani Dios. w21.10 20, 21:8-10

Xtapaxkit Dios nema ni makgxtakgnan putum kilhtamaku makgapala. Salmo capítulo 136, lichuwinan 26 la xlimakglit uma tayat. Xapulana versículo wan: «Kapaxtikatsinitit Jehová xlakata tlan likatsi; xtapaxkit nema ni makgxtakgnan putum kilhtamaku makgapala» (Sal. 136:1). Kversículos 2 asta 26, wiliparakan tachuwin «xtapaxkit nema ni makgxtakgnan putum kilhtamaku makgapala». Jehová ankgalhin chu pulaklhuwa la kinkalimasiyaniyan xtapaxkit. Tachuwin «xtapaxkit nema ni makgxtakgnan putum kilhtamaku makgapala» liwana masiya pi tapaxkit nema Dios kgalhini xkachikin ni talakgpali. ¡Lu kinkamatliwakglhan akxni katsiyaw pi Jehová ni kamakgxtakga xlakskujnin! Lakatsu katawilani tiku skujnanikgo, liwaka akxni titaxtukgo tuku tuwa. Uma kinkamakgapaxuwayan chu kinkamaxkiyan litliwakga nema maklakaskinaw xlakata chuntiya natlawanaw ktiji nema linan klatamat (Sal. 31:7). w21.11 4:9, 10

¿Pekuana akxni lilakpuwana tuku lu nitlan nala nialh makgas kilhtamaku, la akxni namalakgsputukan nixaxlikana takanajla, akxni nakinkatlawaniputunan tuku nitlan Gog xalak Magog chu akxni nala guerra xla Armagedón? ¿Min kilhtamaku lilakpuwana komo ni namakgatsankgananiya Dios akxni nakgantaxtu putum uma? Komo chuna, lu namakgtayayan tuku wa Jesús ktexto xala uku: «Ni kalipuwantit. Kalimasiyatit pi kanajlaniyatit Dios». Komo tliwakga kgalhiyaw kintakanajlakan, ni katipekuaniw tuku aku nala. Pulaktum la tlan namatliwakglhaw kintakanajlakan xlakata natayaniyaw tuku nala kkilhtamaku nema aku mima wa naʼakxilhaw la tayaniyaw taputsan nema kgalhiyaw la uku. Makgatunu akxni tayaniyaw taputsan tlakg tatliwakglha kintakanajlakan. Chu uma nakinkamakgtayayan natayaniyaw tuku aku mima. w21.11 20:1, 2

Apóstol Pablo makgpuwantinilh Timoteo liwana namakgantaxti taskujut nema xlakgayawakanit, chu putum kstalaninanin Cristo nachuna kilitlawatkan (2 Tim. 4:5). Pero min kilhtamaku tuwa tamakgkatsi. Akgtum liʼakxilhtit, kakalilakpuwaw natalan tiku lamakgo niku ni mastakan talakaskin natlawayaw kintaskujutkan. Lhuwa tuku tuwa titaxtukgo nema max tlan xkamaxlajwanilh. Lhuwa tiku tantaku skujkgo xlakata nakamaxkikgo xfamiliajkan tuku maklakaskinkgo. Tlakg skujnaniputunkgo Dios, pero akxni sputa semana nialh kgalhikgo litliwakga. Amakgapitsin nialh lhuwa skujnanikgo Jehová xlakata kgalhikgo tajatat nema ni kgalhi xalikuchun o linkgoya kata. Chu wi tiku putum kilhtamaku makgkatsikgo pi nitu litaxtukgo. Kaxatukawa taʼakglhuwit nema kgalhiyaw, Jehová tlan nakinkamaxkiyan litliwakga xlakata natayaniyaw chu chuntiya naskujnaniyaw. w21.05 20:1-3

Lakgachunin amakgapitsin kinkamatlawiputunkgoyan tuku nalaktlawa chuna la skujnaniyaw Jehová. Akxni chuna la, wi tuku lu xlakaskinka kililaksakatkan. Kaʼakxilhwi akgtum tastakyaw nema kaks kinkamalakawaniyan. Levítico 19:19, wan: «Ni kalhakgatit lhakgat nema litatlawanit pulaktiy hilos». Uma limapakgsin xtlawa pi Israel xlitasiyalh pi nichuna xwanit la amakgapitsi kachikinin. La uku, nitu wamputun nawiliyaw lhakgat nema kgalhi algodón chu poliéster, o lana chu rayón. Pero nitlan xkitaxtulh komo xlitaxtuw chuna la tiku kanajlakgo chu tlawakgo tuku lakatsala Biblia. Xlikana, kapaxkiyaw kifamiliajkan chu latamanin. Pero akxni kililaksakatkan tuku lu xlakaskinka, limasiyayaw pi nichuna likatsiyaw la amakgapitsin. Uma lu xlakaskinka komo xaskulunku wamputunaw (2 Cor. 6:14-16; 1 Ped. 4:3, 4). w21.12 5:14; 6:16

Tlan natekgsaw tiji nema linan klatamat. Jesús wa: «Komo kgalhakgaxpatatit kintachuwin, xlikana kistalaninanin litaxtuyatit, chu nalakgapasatit xaxlikana, chu xaxlikana nakalakgmaxtuyan» (Juan 8:31, 32). Lu tlan pi wix ni kastalani amakgapitsin, wata putsa xaxlikana. Limatsuki akxni tsuku lakputsananiya xTachuwin Dios xlakata nakatsiya tuku xlimapakgsin chu kgaxpatni xtamasiy Jesús. Katsini pi Jehová kgalhkgalhi nalakgmakganaw tuku masiyakgo ni xaxlikana takanajla chu pi nialh xmakgtlawaw talismanin nema ni kBiblia takilhtikgonit. Na katsi pi min kilhtamaku tuwa tamakgkatsi tlawakan tuku Jehová kinkawaniyan chu nalakgmakganaw tuku xla ni lakgati (Mat. 10:34-36). Max wix tuwa makgkatsi natlawaya umakgolh talakgpalit, pero xlakata xpaxkiya minTlat xalak akgapun ni taxlajwani. Xlakata chuna tlawa, lu makgapaxuwanita Jehová (Prov. 27:11). w21.12 22:3; 23:5

Moisés lu tlan liʼakxilhtit xlakata makgamakglhtinalh xtastakyaw Jehová akxni tlawalh tuku lu nitlan. Akgtum kilhtamaku, mastalh talakaskin pi xtasitsi xtlawalh pi ni xmalankilh Jehová. Wa xlakata, ni tanulh ktiyat nema xkamalaknunikanit (Núm. 20:1-13). Akxni Moisés wanilh Jehová pi nitlan xlimakgkatsi tuku xlaksaknit, Jehová wanilh: «Nialh amakgtum kakilitakgalhchuwinanti uma» (Deut. 3:23-27). Moisés ni sitsilh, wata makgamakglhtinalh tuku xlaksaknit Jehová, chu Jehová chuntiya maklakaskilh xlakata xpulalilh xkachikin (Deut. 4:1). Moisés tlan liʼakxilhtit litaxtulh kimpalakatakan. Limasiyalh pi xmakgamakglhtinan xtastakyaw Jehová chu ni makgxtakgli maski makgatsankgalh tuku lu xtapalh xliʼakxilha. Komo nakastalaniyaw xliʼakxilhtitkan tiku ni makgxtakgkgolh Dios chuna la Moisés, tlan nakinkakitaxtuniyan (Prov. 4:11-13). Lhuwa natalan chuna tlawakgonit. w22.02 11:9, 10

Akxni ksputmaja kata 32, chatum xʼamigo Jesús tiku xwanikan Lázaro, tatatlalh chu nilh (Juan 11:3, 14). Jesús lu xpaxki Lázaro chu chatiy xnatalan, María chu Marta. Akxni Marta katsilh pi Jesús xʼama kBetania, alh lakgapaxtokga. Kalilakpuwaw la xlilipuwama akxni wanilh Jesús: «Malana, komo unu xtitawila, kintala ni xtinilh» (Juan 11:21, 32, 33). Max Jesús tasalh akxni akxilhli pi María chu Marta xlilipuwamakgo xlakata nilh xtalakan. Komo wix na makgatsankganita kkalinin chatum tiku lu xpaxkiya, Jehová akgatekgsa tuku makgkatsiya. Jesús «litasiya xlilanka Dios» (Heb. 1:3). Akxni tasalh limasiyalh tuku makgkatsi xTlat (Juan 14:9). Komo wix patipat xlakata nilh chatum tiku lu xpaxkiya, tlan liwana nakatsiya pi Jehová ni kajwatiya katsi tuku patipat, wata na makgkatsi mintakatsanajwat. Chu maskayajputun minaku (Sal. 34:18; 147:3). w22.01 15:5-7

Komo nalimaxtuniyaw kilhtamaku natachuwinanaw Jehová, nakgaxmatniyaw chu wa nalilakpuwanaw, lhuwa tuku tlan nakitaxtu. Pulana, tlan tuku nalaksakaw. Biblia wan: «Tiku katalalin xalakgskgalalan latamanin skgalala nawan» (Prov. 13:20). Xlipulaktiy, tlakg tlan makgalhtawakgenanin nawanaw. Akxni limakgalhtawakgenanaw Biblia, kamakgtayaputunaw latamanin natalakatsuwinikgo Jehová. Akxni tlakg natachuwinanaw Jehová, tlakg napaxkiyaw chu nakamasiyaniyaw kintamakgalhtawakgenkan na napaxkikgo. Jesús chuna tlawalh. Akxni xtachuwinan xTlat, xlimasiya pi lu xpaxki, chu uma tlawalh pi kstalaninanin na xpaxkikgolh Jehová (Juan 17:25, 26). Xlipulaktutu, kintakanajlakan tlakg natatliwakglha. Kalilakpuwaw tuku kitaxtu akxni skiniyaw Dios pi kakinkapulalin chu kakinkamakgtayan. Akxni kgalhti kiʼoracionkan, kintakanajlakan tlakg tatliwakglha (1 Juan 5:15). w22.01 30:15-17

Jehová wan pi kalakgmakgaw ni xatlan kintalakapastaknikan chu kintalismaninkan xlakata lu kinkapaxkiyan chu lakaskin pi tlan kakinkakitaxtunin (Is. 48:17, 18). Katsi pi komo natlawayaw tuku nitlan, nitlan kintikakitaxtunin chu nitlan nakamamakgkatsiniyaw amakgapitsin. Xla nitlan limakgkatsi akxni akxilha pi chuna la. Max lakgachunin tiku xalak kifamiliajkan chu kiʼamigoskan nakinkalikgalhkgamanankgoyan xlakata liskujmaw natalakgpaliyaw (1 Ped. 4:3, 4). Max nakinkawanikgoyan pi kalatamaw chuna la lakaskinaw chu niti kakinkawanin tuku kilitlawatkan. Pero tiku lakgmakgankgo xlimapakgsin Jehová, mastakgo talakaskin pi xkakilhtamaku Satanás wi tuku nakamatlawi (Rom. 12:1, 2). Kililaksakatkan komo natatamakgxtakgaw xamakgan kintayatkan nema lilakatsukunit talakgalhin, o namastayaw talakaskin pi Jehová nakinkapulalinan xlakata tlakg tlan nalikatsiyaw (Is. 64:8). w22.03 3:6, 7

Akxni lilakpuwanaw xTachuwin Dios, kinkamakgtayayan naʼakxilhaw kintaʼakglhuwitkan chuna la xlilat. Kalichuwinaw xliʼakxilhtit chatum tala puskat tiku nilh xchixku. Chatum kgolotsin wanilh pi xlikgalhtawakgalh libro xla Job. Akxni chuna tlawalh, tunkun lakpuwan pi Job xkgalhi nixatlan talakapastakni. Xwani kxtalakapastakni: «Job, ¡nitlan tuku lakpuwampat!». Pero alistalh akxilhli pi xlakpuwan chuna la Job, uma makgtayalh nalakgpali xtapuwan chu maxkilh litliwakga xlakata xtayanilh xtakatsanajwat xlakata nilh xchixku. Jehová na kamaklakaskin kinatalankan xlakata nakinkamatliwakglhan. Pablo tsokgwililh pi lu xkaʼakxilhputun natalan xalak congregación xlakata xlamaʼakgpuwantinikgolh (Rom. 1:11, 12). w21.05 22:10, 11; 24:12

Israelitas xalamakgasa kawanika: «Makgtutu akgatunu kata, putum lakchixkuwin xliʼanatkan kxlakatin Jehová miDios anta niku xla nalaksaka» (Deut. 16:16). Xlimakgxtakgatkan xwanit xchikkan chu xkakiwinkan. Pero Jehová kamalaknunilh: «Niti katiʼakgchipaputulh mintiyat akxni […] napina kxlakatin miDios» (Éx. 34:24). Xlakata israelitas xlipawankgo Jehová, xʼankgo kfiestas nema xtlawakan. Chuna xmakgamakglhtinankgo lhuwa tasikulunalin: tlakg liwana xʼakgatekgskgo xLimapakgsin Dios, xlilakpuwankgo xtalakgalhaman chu xlipaxuwakgo la akxtum xkatatawilakgo amakgapitsi xlakskujnin Jehová. Akinin na makgamakglhtinanaw tasikulunalin akxni wi tuku limakgxtakgaw xlakata naʼanaw ktamakxtumit. Chu lu makgapaxuwa Jehová akxni liwana lakkaxwiliyaw tuku nakgalhtinanaw. w22.03 22:9

Jehová mastalh talakaskin pi xKgawasa xpatinalh xlakata tlan xmakgantaxtilh tuku xʼama lakgayawa. Jesús makgkatsilh pi lu tuwa kgalhakgaxmatkan Dios akxni kgalhikan lhuwa taputsan. Akxni skilh tamakgtay kxoración, lu nitlan xmakgkatsima chu asta «tasalh». Xlakata Jesús titaxtulh tuku lu tuwa, kinkaʼakgatekgsniyan. Chu xlakata putum tuku titaxtulh, «tlan nakamakgtaya tiku kaliʼakxilhmaka». Lu paxtikatsiniyaw Jehová pi laksaknit chatum sacerdote tiku «kinkaʼakgatekgsniyan akxni xlajwananaw» (Heb. 2:17; 4:14-16; 5:7-10). Jehová mastalh talakaskin pi Jesús xpatinalh xlakata nalimasiya pi latamanin ni namakgatsankgananikgo asta maski napatikgo tuku lu tuwa. Satanás wan pi skujnaniyaw Jehová xlakata wi tuku lakaskinaw. Na lakpuwan pi xtachuna la Adán, ni paxkiyaw Jehová (Job 1:9-11; 2:4, 5). Xlakata ni makgatsankgananilh Dios, Jesús limasiyalh pi Satanás xaʼakgsanina. w21.04 16, 17:7, 8

Akxni nina tamunu, xlakaskinka pi tamakgalhtawakgen nalilatama tuku masiya Biblia. Akxni chuna tlawa, litaxtu la «skgalala chixku» tiku Jesús lichuwinalh pi tlawalh xchik kʼakgtum lanka chiwix (Mat. 7:24, 25; Luc. 6:47, 48). Kamakgtayaw kintamakgalhtawakgenkan natlawa talakgpalit kxlatamat (Mar. 10:17-22). Jesús wanilh chatum chixku tiku lhuwa tumin xkgalhi pi kstalh putum tuku xkgalhi, maski xkatsi pi uma tuwa xkitaxtunilh (Mar. 10:23). ¿Tuku xlakata chuna wanilh? Xlakata xlakgalhaman. Lakgachunin max ni waniputunaw tamakgalhtawakgen pi xlilatamat tuku katsinima, xlakata lakpuwanaw pi nina lakgchan chuna nawaniyaw (Col. 3:9, 10). Komo tunkun nawaniyaw tuku xlitlawat, max tunkun natsuku liskuja. Uma tuku nalitakgalhchuwinanaw nalimasiyani pi paxkiyaw (Sal. 141:5; Prov. 27:17). w21.06 3, 4:3, 5

Apóstol Pedro lichuwinalh xliʼakxilhtit Jesús xlakata la tayanilh tapatin. Pero pulaklhuwa la tlan nastalaniyaw xliʼakxilhtit Jesús (1 Ped. 2:18-25). Putum tuku tlawalh chu tuku wa, akgtum liʼakxilhtit kimpalakatakan. Tlan nastalaniyaw xliʼakxilhtit maski makglakgalhinanin akinin. Kalakapastakwi pi Pedro ni wa pi «nipara tsinu xʼakgtsankgaw» akxni kstalaniw xtatukit Jesús, wata wa pi «liwana» chuna xtlawaw. Komo liwana nastalaniyaw xtatukit chu natlawayaw putum tuku matlaniyaw, tlawamaw nawan xtastakyaw apóstol Juan akxni wa pi “chuntiya nalatamayaw chuna la Jesús latamalh” (1 Juan 2:6). Komo nastalaniyaw xtatukit Jesús, natalakatsuwiyaw Jehová. ¿Tuku xlakata? Jesús kinkawilinin lu xatlan liʼakxilhtit xlakata tuku kilhchanima latamakan chuna la lakaskin Dios (Juan 8:29). Komo nastalaniyaw, Jehová napaxuwa. Liwana katsiyaw pi kinTlatkan xalak akgapun nakatalakatsuwini tiku lu liskujkgo xlakata xʼamigos nalitaxtukgo (Sant. 4:8). w21.04 2, 3:4-6

Jehová akxilha xalaktlan kintayatkan, akxilha tuku tlan tlawayaw chu xʼamigos kinkalimaxtuyan. Komo ni namakgatsankgananiyaw, lakatsu nakinkatawilaniyan (Juan 6:44). Komo kanajlayaw pi Jehová kinkapaxkiyan, naskujnaniyaw chuna la matlaniyaw maski tuwa tuku natitaxtuyaw. Pero komo ni kanajlayaw pi kinkapaxkiyan, “ni katikgalhiw litliwakga” (Prov. 24:10). Komo nataxlajwaniyaw, Satanás lakapala wi tuku nakinkatlawaniyan (Efes. 6:16). Makgapitsi natalan tsukukgonit lakpuwankgo pi Jehová ni kapaxki chu xtakanajlakan taxlajwaninit. ¿Tuku tlan natlawayaw komo lakpuwanaw pi Dios ni kinkapaxkiyan? Tunkun katamakxtuw uma kkintalakapastaknikan. Kaskiniw Jehová pi kakinkamaxkin takaksni chu kakuentajtlawalh kinakujkan chu kintalakapastaknikan (Sal. 139:23; nota; Filip. 4:6, 7). Ni kapatsankgaw pi lhuwa natalan nachuna titaxtumakgo. w21.04 20:1, 4; 21:5, 6

Kalilakpuwaw la xtatayana Jehová litaxtuw. Pulana, wi tiku kinkalitachuwinan «xatlan tamakatsinin», max kinatlatnikan, tiku xtaskujaw o tiku xtaʼanaw kʼescuela, o chatum tala tiku xlichuwinama Dios (Mar. 13:10). Alistalh, wi tiku limaklakaskilh lhuwa kilhtamaku chu litliwakga xlakata xkinkalimakgalhtawakgen Biblia. Xlakata kinkamakgalhtawakgekan, katsiniw pi Jehová kinkapaxkiyan chu na tsukuw paxkiyaw. Jehová kinkalimin kxaxlikana. Xlakata uku kstalaninanin Cristo litaxtuyaw, kgalhiyaw takgalhkgalhin nalatamayaw putum kilhtamaku (Juan 6:44). Lu paxtikatsiniyaw Jehová pi wi tiku maklakaskilh xlakata nakinkamasiyaniyan xaxlikana, chu kinkamaxkin talakaskin naskujnaniyaw. Xlakata uku lakgapasaw xaxlikana, tlan nakamakgtayayaw amakgapitsin naʼankgo ktiji nema linan klatamat. w21.07 2:1, 2