Febrero

Jehová lakaskin tlan katawilakgolh xlakskujnin. Lakatsu kinkawilanin chu katsi akxni xlajwananaw (Sal. 145:18, 19). Kaʼakxilhwi la kuentajtlawalh palakachuwina Elías. Xla latamalh akxni lu tuwa tuku xtitaxtuma xkachikin Dios, Israel. Xtalamakgasitsin Dios xkaputsastalanikgo xlakskujnin chu xmakgniputunkgo Elías (1 Rey. 19:1, 2). Elías xlakpuwan pi xʼakstu xpalakachuwina Jehová xtamakgxtakgnit, chu uma lu xlilakgaputsa (1 Rey. 19:10). Pero Jehová lakapala makgtayalh Elías: malakgachanilh chatum ángel xlakata nalimasiyani pi ni xʼakstu xwi, pi xwilakgolhku lhuwa israelitas tiku ni xmakgxtakgkgo Dios (1 Rey. 19:5, 18). Jesús kawanilh kstalaninanin pi xʼamakgolh makgtapakgsikgo kʼakgtum familia xaʼespiritual (Mar. 10:29, 30). Chu Jehová kamalaknuni pi nakamakgtaya tiku skujnanikgo (Sal. 9:10). w21.06 8, 9:3, 4

Lhuwa latamanin akgchakgxkgo xlakata limasiyayaw Biblia pi tuku masiyakgo atanu takanajla nixaxlikana. Xpulalinanin takanajla masiyakgo pi Dios kamapatini tiku nitlan likatsikgo chu pi kgalhiyaw akgtum espíritu nema ni niy. Komo uma xlikana xwa, ni xtalakaskilh pi xʼanalh talakastakwanat, pero akinin masiyayaw pi uma ni xaxlikana. Nachuna, ni masiyayaw pi laklhkawilikanit tuku nakinkaʼakgspulayan kkilatamatkan. Wata tlan kiʼakstukan nalaksakaw tuku natlawayaw chu tlan nalaksakaw komo nalakskujnaniyaw Dios. Xpulalinanin takanajla lisitsikgo. Komo wix paxkiya xaxlikana, militlawat tuku wan Dios (Juan 8:45, 46). Ni katlawa chuna la Satanás, ni kamakgxtakgti xaxlikana chu nikxni kalakgmakganti tuku kanajlaya (Juan 8:44). Dios lakaskin pi kskujnin, kastalanikgolh xliʼakxilhtit Jesús. Wa xlakata kawani: «Kaxkajnitit tuku nitlan; kapaxkitit tuku tlan» (Rom. 12:9; Heb. 1:9). w21.05 10:10, 11

¿Tuku kilitlawatkan komo akxilhaw pi tlankajwa kinkamakgkatsikanan chu tlakg lhuwa tuku kgalhiputunaw? Tlan nalakgpaliyaw kintayatkan. Apóstol Pablo lichuwinalh pi tiku xastakna kaʼakgsiyakanit, tlan natsalanikgo xliʼakgsiyat Akgskgawini (2 Tim. 2:26). Ni kapatsankgaw pi Jehová tliwakga nixawa Satanás, komo namakglhtinanaw xtamakgtay, tlan natsalaniyaw kaxatukawa liʼakgsiyat. Xlikana pi tlakg tlan nawan komo nikxni tlankajwa nawanaw chu nikxni tlakg lhuwa tuku nakgalhiputunaw. Dios tlan nakinkamakgtayayan. Katasaskiniw Jehová pi kakinkamakgtayan naʼakxilhaw komo umakgolh nixatlan tayat lakgpalima kintalakapastaknikan (Sal. 139:23, 24). Kaliskujwi xlakata nalakgmakganaw umakgolh tayat. Satanás akglhuwata mil kata la chatum talatna litaxtu, pero nialh makgas nachiwilikan chu namasputukan (Apoc. 20:1-3, 10). ¡Lu lakaskinaw pi xchilha uma kilhtamaku! Xlakata nina chin, skgalalh katawilaw chu kalakkaxwiliw nastalaniyaw uma tastakyaw: «Kalakatayanitit Akgskgawini, chu xla nakatsalaniyan». w21.06 19:15, 17

Jehová lu paxuwa akxni wi tiku makgamakglhtinan xtamasiy Biblia chu kalitachuwinan amakgapitsin (Prov. 23:15, 16). Lu paxuwa akxni akxilha tuku kitaxtuma la uku. Akgtum liʼakxilhtit, maski analh tajatat xla COVID-19 kkata 2020, kapulalinka 7,705,765 takgalhtawakga xalak Biblia, nema kamakgtayakgolh 241,994 latamanin xmakamaxkikgolh Jehová xlatamatkan chu xtamunukgolh. Umakgolh xalaksasti kstalaninanin Cristo na nakamakgtayakgo amakgapitsin kstalaninanin Cristo nawankgo (Luc. 6:40). Akxni makgtlawayaw uma taskujut makgapaxuwayaw xnaku Jehová. Talakaskin lu naliskujaw, pero Jehová nakinkamakgtayayan tlan nakamakgtayayaw amakgapitsin kstalaninanin Cristo nawankgo. ¿Tlan xlakkaxwiliw nalimakgalhtawakgenanaw Biblia? Max kaks nalilakawanaw tuku nakitaxtu komo nakakgalhskinaw latamanin tiku nakatachuwinanaw komo lakaskinkgo nakalimakgalhtawakgeyaw Biblia. w21.07 6, 7:14-16

Mapakgsina David xatapaxuwan mastalh tuku xtapalh xkgalhi xlakata xtlawaka templo (1 Crón. 22:11-16). Maski xkatsi pi wa Salomón, xkgawasa, wa tiku xʼamaka maxkikan kakni xlakata uma taskujut. Komo wix lipinata kata chu nialh kgalhiya litliwakga namakgtlawaya Pukgalhtawakga, chuntiya tlan nalimakgtayanana mintumin. Chu kakamasiyani tiku lakgkgawasanku tuku katsininita. Apóstol Pablo na lu tlan liʼakxilhtit, xatapaxuwan mastalh tuku xkgalhi. Wanilh Timoteo pi akxtum xtaʼalh akxni makgat xʼalh lichuwinan Dios chu masiyanilh la tlan xlichuwinalh chu la xmasiyalh (Hech. 16:1-3). Tastakyaw nema maxkilh Pablo, makgtayalh Timoteo tlan makgalhtawakgena xlitaxtulh (1 Cor. 4:17). Chu xla, na limaklakaskilh tuku Pablo xmasiyaninit xlakata xkamasiyanilh amakgapitsin. w21.09 12:14, 15

¿Tuku kinkamasiyaniyan xliʼakxilhtit Apolos chu apóstol Pablo? Xchatiykan liwana xlakgapaskgo xaSanto Tatsokgni, chu tlan makgalhtawakgenanin xlitaxtukgo. Nachuna, xchatiykan xmakgtayanankgonit xlakata lhuwa latamanin kstalaninanin Cristo xlitaxtukgolh. Pero nikxni lakpuwankgolh pi chatum tlakg xlakaskinka xwanit nixawa achatum (Hech. 18:24). Akgtum kilhtamaku, akxni Apolos nialh anta xwi kCorinto, Pablo makglhuwa wanilh pi xtaspitpa (1 Cor. 16:12). Apolos liwana xmaklakaskima tuku xkatsini: xlichuwinama xalaktlan tamakatsinin chu xkamatliwakglhma xnatalan. Chu Apolos na xtaʼaktuju. Akgtum liʼakxilhtit, ni sitsilh akxni Áquila chu Priscila «tlakg aktanks maʼakgatekgsnikgolh xtiji Dios» (Hech. 18:24-28). Pablo liwana xkatsi xatlan taskujut nema xtlawama Apolos. Pero ni lakgaputsalh pi xlakpuwanka pi Apolos tlakg xlakaskinka xlitaxtu. Tastakyaw nema tsokgnanilh congregación xalak Corinto limasiya pi Pablo chatum chixku tiku xtaʼaktuju, ni xlakpuwan pi putum tlan xtlawa chu tlan talakapastakni xkgalhi (1 Cor. 3:4-6). w21.07 18, 19:15-17

Xlakata Adán chu Eva ni kgalhakgaxmatkgolh Jehová, xkatamakxtuka kxfamilia Dios. Pero ¿tuku xʼama kaʼakgspula xkamanankan? Xlakata xtapaxkit, Jehová tlawalh tuku xtalakaskin xlakata tiku xkgalhakgaxmatkgolh tlan xmakgtapakgsikgolh kxfamilia. ¿La tlawalh? Maklakaskilh xtamakamastan xKgawasa (Juan 3:16). Uma tamakamastan tlawalh pi Dios xkatamawaxtulh chuna la xkamanan 144,000 latamanin (Rom. 8:15-17; Apoc. 14:1). Na anan amakgapitsi latamanin tiku tlawamakgo xtalakaskin Dios. Kgalhikgo takgalhkgalhin xlakata tlan namakgtapakgsikgo kxfamilia Dios akxni titaxtukgonita nawan 1,000 kata chu xaʼawatiya taputsan (Sal. 25:14; Rom. 8:20, 21). Pero la uku tachuwinankgo Jehová chuna la “xTlatkan” (Mat. 6:9). Tiku nalakastakwanankgo na nakgalhikgo talakgalhaman nakatsikgo tuku lakaskin Jehová xpalakatakan. Tiku nakgalhakgaxmatkgo tlan namakgtapakgsikgo kxfamilia Jehová. w21.08 5:10, 11

Apóstol Pablo lakgayawaka nalichuwinan Dios chu lu xlakaskinka liʼakxilhli uma kxlatamat. Lichuwinalh Dios «kxlakatinkan latamanin chu kʼakgatunu akgatunu chiki» (Hech. 20:20). Kaxanikawa xlichuwinan Dios. Akgtum liʼakxilhtit, akgtum kilhtamaku akxni xkakgalhkgalhima xnatalan kʼAtenas, kalitachuwinalh Dios latamanin tiku lu xlakaskinka xlitaxtukgo, chu lu tlan kitaxtunilh (Hech. 17:16, 17, 34). Akxni xchiwilikanit kʼakgtum chiki, kalitachuwinalh Dios tiku xlakgminkgo (Hech. 28:16-24; Filip. 1:13, 14). Liwana xmaklakaskin kilhtamaku chu xlismani akxtum xkatalichuwinan Dios amakgapitsin. Akgtum liʼakxilhtit, akxni xlipulana alh lichuwinantapuli Dios taʼalh Juan Marcos chu akxni xlimakgtiy alh, taʼalh Timoteo (Hech. 12:25; 16:1-4). Lu liskujli nakamasiyani umakgolh lakchixkuwin la nakakaxwilikgo congregaciones, la napulalinankgo chu tlan makgalhtawakgenanin nalitaxtukgo (1 Cor. 4:17). w22.03 27:5, 6

Makgapitsi ni kanajlanikgo chatum Malakatsukina xlakata wankgo pi kajwatiya kanajlanikgo tuku akxilhkgo. Pero uma ni xlikana. Kanajlanikgo gravedad xlakata anan tuku limasiya pi xlikana anan. Takanajla nema lichuwinan Biblia na makgtanuma tuku limasiya pi tuku kanajlayaw «xlikana, maski ni tasiya» (Heb. 11:1). Chu xlakata tlan nalakputsananikan, talakaskin kilhtamaku chu litliwakga, chu lhuwa latamanin nichuna natlawakgo. Wa xlakata wankgo pi ni anan chatum Dios. Makgapitsi científicos, akxni lakputsananikgolh tuku limasiya pi Dios malakatsukinalh, liwana katsikgolh pi anan chatum Malakatsukina. Xapulana max makgapitsi ni kanajlakgo pi anan chatum Malakatsukina xlakata kʼuniversidades ni lichuwinankan tamalakatsukin. Pero lakgapaskgonit Jehová chu tsukukgonit paxkikgo. Kimputumkan na kilimatliwakglhatkan kintakanajlakan, maski kilanitaw kʼescuela o ni. w21.08 14:1; 15, 16:6, 7

Jesús lichuwinalh liʼakxilhtit xlakata kgawasa tiku laktlawamilh tuku xkgalhi, xlakata nalimasiya pi Jehová lu lakgati talakgalhaman. Kgawasa tiku lichuwinalh taxtulh kxchik chu «laktlawamilh tuku makglhtinalh, akglakgwa lilh xlatamat» (Luc. 15:13). Titaxtulh kilhtamaku, nitlan limakgkatsilh tuku xtlawanit, tataktujulh chu taspitli kxchik. ¿Tuku tlawalh xtlat? Jesús wa: «Akxni lakgamakgatku xminacha, xtlat akxilhli chu lakgalhamalh, tokgosun lakgalh chu akgpixtilh chu lakatsukli». Xtlat ni mamaxanilh, wata limasiyanilh talakgalhaman, tapatilh chu makgamakglhtinampa kxfamilia. Kgawasa lhuwa talakgalhin xtlawanit, pero xtlat tapatilh xlakata xlikana nitlan limakgkatsilh xtalakgalhin. Xalakgalhamanina tlat tiku lichuwinalh Jesús wa kilhchanima Jehová. Kʼuma lu tlan liʼakxilhtit, Jesús masiyalh pi xTlat xlikana katapatiputun tiku nitlan limakgkatsikgo xtalakgalhinkan (Luc. 15:17-24). w21.10 8:4; 9:6

La uku lhuwa xpulalinanin takanajla matsekgputunkgonit xtukuwani Dios. Mapanukgonit kxbibliaskan chu minit kilhtamaku asta wankgonit pi ni xlitamaklakaskinat akxni kakninanikgo Dios. Liwana tasiya pi kajwatiya xtatayananin Jehová malankikgo xtukuwani Dios chu maxkikgo kakni nema lakgchan. Ni anan atanu takanajla nema kamasiyani latamanin xtukuwani Dios chuna la akinin tlawayaw. Lu liskujaw xlakata nalitaxtuyaw tuku kintukuwanikan wan pi litaxtuyaw: xtatayananin Jehová (Is. 43:10-12). Katlawanitaw liwaka 240 millones biblias xla Traducción del Nuevo Mundo, nema limaklakaskin xtukuwani Jehová anta niku amakgapitsi tiku matitaxtikgo Biblia mapanukgonit. Chu katlawayaw kliwaka 1,000 tachuwin likgalhtawakga niku min xtukuwani Jehová. w21.10 20, 21:9, 10

Kakninaniyaw Jehová akxni kamakgtayayaw kinatalankan. Jehová kamalaknunilh israelitas pi xʼama kasikulunatlawa tiku xkamakgtayakgo lakglimaxkgenin (Deut. 15:10). Akxni makgtayayaw chatum tala, Jehová liʼakxilha xtachuna la wa maxkimaw tamaskiwin (Prov. 19:17). Akxni natalan xalak Filipos malakgachanikgolh Pablo akgtum tamaskiwin, xla wa pi Dios xmakgamakglhtinan uma la akgtum tamakamastan nema xmakgapaxuwa (Filip. 4:18). Kakalilakpuwaw natalan xalak kincongregacionkan chu kakinkakgalhskinkan: «¿Wi tiku tlan xakmakgtayalh?». Jehová lakgati akxni akxilha pi wi tuku tlawayaw xlakata nakamakgtayayaw amakgapitsin. Xla wan pi uma makgtanuma kkintakakninkan (Sant. 1:27). Xlakata nakakninaniyaw Jehová la xla lakgati, talakaskin kilhtamaku chu litliwakga. Pero uma ni akgtum takuka (1 Juan 5:3). ¿Tuku xlakata? Xlakata paxkiyaw Jehová chu kinatalankan. w22.03 24:14, 15

Komo kalimasiyaniputunaw pi kalakgalhamanaw chu kalilakgaputsayaw kinatalankan kililakapastakatkan tuku titaxtumakgo. Akgtum liʼakxilhtit, max chatum tala puskat kgalhi akgtum xatuwa tajatat. Xla nikxni lichuwinan xtaʼakglhuwit, pero max namakgapaxuwa komo wi tiku namakgtaya. ¿Tlan xlimakgkatsilh komo xmakgtayaw nalakkaxtlawa xliwat o nakaxaka kxchik? O chatum tala makgatsankgalh xtaskujut. Max tlan xmaskiwiw tsinu tumin, maski ni xkatsilh pi akinin makgtayaw, chu chuna xmakgtayaw asta akxni xtekgsli taskujut. Komo limasiyaputunaw talakgalhaman, ni kilikgalhkgalhitkan pi kinatalankan nakinkaskinikgoyan tamakgtay. Chuna la tlawa Jehová. Chali chali tamakxtu chichini maski nitu skinimaw, chu klhkakna chichini kamakgtaya putum latamanin, ni kajwatiya tiku mastakgo tapaxtikatsinit. ¿Ni xlikana pi Jehová kinkalimasiyaniyan pi kinkapaxkiyan akxni kinkamaxkiyan tuku maklakaskinaw? Jehová lu tlan likatsi chu lu lhuwa maskiwinan, chu xlakata uma lu paxkiyaw. w21.09 22, 23:12, 13

Xtapaxkit Dios nema ni makgxtakgnan tlawa pi natapatinan. Akxni akxilha pi wi tiku nitlan limakgkatsi xtalakgalhin chu liskuja natalakgpali, xtapaxkit tlawa pi natapati. David wa xpalakata Jehová: «Ni kinkalikatsininitan chuna la makglakgalhinanaw chu ni kinkamalakgaxokgenitan chuna la kinkalakgchanan xlakata tuku nitlan tlawayaw» (Sal. 103:8-11). David xkatsi pi lu nitlan litamakgkatsi akxni sakgalinan talakapastakni. Pero na katsinilh pi Jehová xlikana «tapatinamputun». Lichuwinalh tuku tlawa pi Jehová natapatinamputun. Tapatinan xlakata xtapaxkit nema ni makgxtakgnan lu lanka. Komo tlawayaw akgtum talakgalhin, xlilat nitlan nalimakgkatsiyaw. Uma natlawa pi namakgxtakgaw kintalakgalhinkan chu natlawayaw tuku natalakaskin xlakata nalakkaxtlawayaw tuku nitlan tlawaw. w21.11 5:11, 12

Jehová paxki xtukuwani chu lakaskin pi putum xmaxkikgolh kakni (Is. 42:8). Pero lata 6,000 kata maxkajwikanit xtukuwani (Sal. 74:10, 18, 23). Putum kilhtsukulh akxni Akgskgawini (nema wamputun «tiku wan taʼakgsanin») limawakalh Dios pi ni xkamaxkiputun Adán chu Eva tuku xmaklakaskinkgo (Gén. 3:1-5). Lata ama kilhtamaku limawakakanit taʼakgsanin Jehová. Wankanit pi ni kamaxki latamanin tuku maklakaskinkgo. Jesús lu xlilakgaputsa komo tlakg xmaxkajwika xtukuwani xTlat. Kajwatiya Jehová lakgchan namapakgsinan kʼakgapun chu kKatiyatni, chu wa tlakg xatlan mapakgsina (Apoc. 4:11). Akgskgawini tlawaputunit pi ángeles chu latamanin nalakpuwankgo pi Dios ni lakgchan namapakgsinan. Nialh makgas niti katiwa pi Jehová ni lakgchan mapakgsinan kʼakgapun chu kKatiyatni. Liwana natasiya pi xla tlakg xatlan mapakgsina chu kajwatiya xTamapakgsin nalimin xaxlikana takaksni kKatiyatni. w21.07 9:5, 6

Xlilat pi tiku pulalin familia nakamaxkiputun liwat, lhakgat chu niku natawilakgo mifamilia. ¿Titaxtupat taʼakglhuwit xlakata tumin? Komo chuna, lu tuwa tuku titaxtupat. Maski titaxtupat tuku lu tuwa, tlan nalimaklakaskina uma kilhtamaku xlakata namatliwakglha mintakanajla. Katlawani oración Jehová, kalikgalhtawakga xtachuwin Jesús nema min kMateo 6:25-34 chu kalilakpuwanti. Kalilakpuwanti liʼakxilhtit xala uku nema limasiyakgo pi Jehová kakuentajtlawa tiku lu skujnanikgo (1 Cor. 15:58). Komo chuna natlawaya, tlakg nakanajlaya pi Jehová na namakgtayayan chuna la kamakgtayalh tiku xkgalhikgo taʼakglhuwit chuna la tuku wix titaxtupat. Xla katsi tuku maklakaskina chu katsi la namaxkiyan. Akxni naʼakxilha xtamakgtay Jehová, mintakanajla natatliwakglha chu tlan natayaniya tlakg laktuwa taputsan kkilhtamaku nema aku mima. w21.11 20:3; 21:6

Tamasiy xlakata talakgmaxtut kamatliwakglhninit xtakanajlakan lhuwa kstalaninanin Cristo. Chuntiya lichuwinankgo Dios maski kaputsastalanikan, chu putum kxlatamatkan tayanikgonit maski titaxtukgo tuku tuwa. Kaʼakxilhwi xliʼakxilhtit apóstol Juan, max liwaka 60 kata xla lichuwinalh xaxlikana xlakata Cristo chu talakgmaxtut. Max atsinu ni 100 kata xkgalhi akxni latamanin xalak Roma limawakakgolh pi nitlan tuku xtlawa chu makanka kʼisla de Patmos. ¿Tuku xtlawanit? Xlichuwinanit Dios chu Jesús (Apoc. 1:9). Juan limasiyalh lanka takanajla chu ankgalhin tayanilh. Klibros nema tsokgwililh, Juan lichuwinan tapaxkit nema kgalhini Jesús chu limasiya pi lu paxtikatsini xlakata talakgmaxtut. Max liwaka akgtum ciento xlimakglit lichuwinalh xlakata talakgmaxtut, o xlakata la litamakgtayayaw (1 Juan 2:2). Liwana tasiya pi Juan lu xpaxtikatsini Jehová xlakata talakgmaxtut. w21.04 17:9, 10.

Jehová xlakaskin pi xlakskujnin tlan xkalikatsinikgolh tiku xkgalhikgo tajatat. Akgtum liʼakxilhtit, kawanilh israelitas pi ni lixkajni xwanikgolh chatum akgatapa, chu ni xlakpuwanikgolh pi xʼakgspulalh tuku nitlan. ¡Komo chuna xtlawakgolh, xlimasiyakgolh pi lu lixkajni xlikatsikgo! Xlakata chatum akgatapa nila xkgaxmata la xlichuwinanka, nila xtakgalhmakgtayalh. Nachuna, kLevítico 19:14 akxilhaw pi Dios kawanilh xkachikin pi ni xwilikgolh «tuku naliʼakgchakgxa chatum lakgatsin». Maktum libro lichuwinan: «Anta kxamakgan Oriente Medio, latamanin lixkajni xkalikatsinikgo chu nitlan tuku xkatlawanikgo». Max chatum lataman xwililh tuku xliʼakgchakgxli chatum lakgatsin xlakata xtlawanilh tuku nitlan o xlilitsilh. Jehová maklakaskilh uma limapakgsin, xlakata nakamakgtaya xkachikin naʼakxilhkgo la nakalikatsinikgo tiku kgalhikgo akgtum tajatat. w21.12 8, 9:3, 4

Jacob xlakgaputsama xlakata xlakpuwan pi xtala chuntiya max lu ksitsinima. Wa xlakata tlawanilh oración Jehová xliputum xnaku. Alistalh malakgachanilh Esaú lhuwa tamaskiwin (Gén. 32:9-15). Chu, akxni latatanokglhkgolh, Jacob maxkilh kakni Esaú. Lakgtakilhputalh, ni kaj makgtum o makgtiy, wata makgtujun chuna tlawalh. Jacob limasiyalh kakni chu tataktujut akxni talakkaxtlawalh taʼakglhuwit xtala (Gén. 33:3, 4). Tlan wi tuku nakatsiniyaw xlakata la Jacob lakkaxwililh tuku xʼama tlawa akxni xʼama tatanokglha xtala chu tuku xʼama wani. Pulana, xataktujun skinilh Jehová pi xmakgtayalh. Alistalh, tlawalh chuna la skilh kʼoración, liskujli xlakata akxni xtatanokglhli Esaú tlan xmakgamakglhtinalh. Chu, akxni tachuwinalh, ni lichuwinalh xlakata tiku xlin kuenta. Tuku xlakaskin wa natalakkaxtlawa taʼakglhuwit xtala. ¿Tlan nastalaniyaw xliʼakxilhtit? (Mat. 5:23, 24). w21.12 25:11, 12

Kinakujkan tlan nakinkaʼakgskgawiyan chu nakinkamamakgkatsiniyan pi nitu litaxtuyaw o ni kinkalakgchanan nakinkapaxkikanan (1 Juan 3:19). Max lakgachunin lakpuwanaw pi xtamakamastan Jesús nila tlawa pi nakinkatapatikanan kintalakgalhinkan. Akxni chuna makgkatsiyaw, kalakapastakwi pi «Dios tlakg lanka nixawa kinakujkan». Ni xlikana pi kinTlatkan xalak akgapun ni kinkapaxkiyan chu ni kinkatapatiyan, xla lu kinkapaxkiyan chu kinkatapatiyan. Kilimakanajlitkan uma kinakujkan. Xlakata tlan chuna natlawayaw kilikgalhtawakgatkan Biblia, kilitlawatkan oración chu kilimaxtutkan kilhtamaku akxtum nakatatawilayaw kinatalankan. Komo chuna natlawayaw tlakg liwana nalakgapasaw xalakstlan xtayat Jehová chu naʼakxilhaw la xlilhuwa kinkapaxkiyan. Komo nalilakpuwanaw Biblia chali chali, nakinkamakgtayayan tlakg liwana nalakapastaknanaw (2 Tim. 3:16). w21.04 23, 24:12, 13

Xlakata namatliwakglhaw kintakanajlakan, ni kajwatiya lhuwa tuku kilikatsitkan. Talakaskin nalilakpuwanaw tuku katsinimaw. Kalilakpuwaw tiku tsokgli Salmo 77. Lu xlakgaputsama xlakata xlakpuwan pi xla chu amakgapitsi israelitas nialh xmakgapaxuwakgo Jehová. Lu xlakgaputsa chu asta nila klhtata (versículos 2-8). ¿Tuku tlawalh? Wanilh Jehová: «Naklilakpuwan putum tuku tlawanita chu naklilakpuwan tuku tlawaya» (versículo 12). Xla xkatsi tuku xtlawanit Jehová makgasa xpalakata xkachikin. Pero, xlilakpuwan: «¿Patsankganita Jehová xlakata nakinkamakgtayayan o xtasitsi natlawa pi nialh nakinkalakgalhamanan?» (versículo 9). Uma salmista lilakpuwa tuku xtlawanit Jehová chu talakgalhaman nema xlimasiyanit (versículo 11). Uma makgtayalh, chu liwana katsilh pi Jehová ni xʼama makgxtakga xkachikin (versículo 15). w22.01 30, 31:17, 18

¿Tuku makgkatsi Jehová akxni kalakapastaka tiku ni makgxtakgkgolh chu nikgonita? Lu kaʼakxilhputumpara (Job 14:15). ¿Tlan lilakpuwanaw pi lu akxilhputumpara Abrahán, xʼamigo? (Sant. 2:23) ¿O Moisés, tiku lakaʼakxilhli akxni xtachuwinan? (Éx. 33:11). Chu lu kgaxmatniputumpara David chu amakgapitsi salmistas chuna la xkilhtlinikgo (Sal. 104:33). Maski umakgolh xʼamigos nikgonita, xla chuntiya kalakapastaka (Is. 49:15). Jehová liwana lakapastaka chuna la xlikatsikgo. Nachin kilhtamaku nakamaxkipara xlatamatkan chu namakgamakglhtinampara xʼoracioneskan nema xtlawakgo chu xatapaxuwan namakgamakglhtinan xtakakninkan. ¿Ni xlikana pi uma lu tlan kinkamamakgkatsiniyan putum tiku makgatsankganitaw kkalinin tiku xkapaxkiyaw? Akxni lakatakika Jehová kjardín xla Edén, xla xkatsi pi tlakg xʼama anan taʼakglhuwit. Xla xkajni tuku nitlan chu tuku ni xaʼakgstitum. w21.07 10:11; 12:12

Akxni kapaxkiyaw kinatalankan, na limasiyamaw pi paxtikatsiniyaw Jehová xlakata talakgmaxtut. Jesús ni mastalh xlatamat kaj kimpalakatakan, nachuna xpalakatakan kinatalankan. Xla nilh xlakata lu kapaxkilh (1 Juan 3:16-18). Chuna la kalikatsiniyaw limasiya komo kapaxkiyaw (Efes. 4:29, 31–5:2). Tlan kamakgtayayaw akxni tatatlakgo o akxni titaxtumakgolh tuku tuwa, chuna la akxni wi tuku masputunan. Pero ¿tuku kilitlawatkan akxni chatum tala wi tuku tlawa o wan tuku nitlan kinkamamakgkatsiniyan? ¿Chuntiya lakapastakaw tuku nitlan kinkatlawanikanan? (Lev. 19:18). Komo chuna, kastalaniw uma tastakyaw: «Chuntiya kalatatayanitit chu lu kalatapatiputuntit, maski wi tuku nakalimakgasitsikanatit. Chuna la Jehová lu katapatin wixin, nachuna wixin militlawatkan» (Col. 3:13). Akxni tapatiyaw chatum tala, limasiyaniyaw kinTlatkan xalak akgapun pi xlikana paxtikatsiniyaw talakgmaxtut. w21.04 18:12, 13.

Putum taskujut nema tlawayaw xpalakata Jehová chu la tlan kinkakitaxtuniyan, kajwatiya tlan chuna tlawayaw xlakata xtasikulunalin Jehová. Xliʼakxilhtit Apolos chu apóstol Pablo kinkamasiyaniyan pi akxni tlakg lhuwa talakgatay kgalhiyaw kcongregación, tlakg lhuwa tuku tlan natlawayaw xlakata namakgtayananaw naʼanan takaksni. Lakgkgolotsin chu siervos ministeriales chuna tlawakgo akxni kBiblia kilhtiyakgo tastakyaw nema mastakgo chu ni lakpuwankgo pi tlakg xlakaskinka litaxtukgo. Wata kamakgtayakgo xalak congregación nastalanikgo xliʼakxilhtit Cristo Jesús. ¡Lu paxtikatsiniyaw xlakata akxtum kinkataskujmakgon! (1 Cor 4:6, 7). Dios kinkamaxkinitan kimputumkan tuku tlan natlawayaw. Tuku tlawayaw xlakata makxtum natawila congregación maski ni lu xlakaskinka tasiya, xtachuna la akgatunu ladrillo nema litlawakan akgtum chiki. Kimputumkan kiliskujatkan xlakata nikxni nalimasiyayaw pi tlakg xlakaskinka litaxtuyaw. Katlawaw putum tuku matlaniyaw xlakata naʼanan takaksni chu makxtum natawila congregación (Efes. 4:3). w21.07 19:18, 19

Tiku xkapaxkiya nalakastakwanankgo. Akxni Jesús xkamakgoxamixima xʼamigos chu tasalh, kinkamasiyaniyan pi kamalakastakwaniputun tiku nikgonita (Juan 11:35). Na tlan nakamakgtayaya tiku lipuwamakgo. Jesús ni xman akxtum katatasalh Marta chu María, wata na kakgaxmatnilh chu kawanilh laktlan tachuwin (Juan 11:25-27). Na tlan chuna natlawayaw xpalakata tiku nikgolh tiku xkapaxkikgo. Dan, chatum kgolotsin xalak Australia, wan: «Akxni nilh kimpuskat, xakmaklakaskin tamakgtay. Makgapitsi natalan kinkgaxmatnikgolh akxni xakmaklakaskin. Xakkalitachuwinan tuku xakmakgkatsi chu ni xlakpuwankgo pi nitlan komo xaktasalh. Akxni ni xakkgalhi litliwakga, kimakgtayakgolh, kxakakgo kimputlaw, xʼankgo tamawanakgo chu xtlawakgo liwat. Akxtum xkintatlawakgo oración. Limasiyakgolh pi xlikana amigos chu natalan litaxtukgo akxni “anan talakgaputsit”» (Prov. 17:17). w22.01 16:8, 9

Jehová lakaskin tuku tlan kimpalakatakan (Prov. 4:20-22). Akxni kinkalistakyawayan xTachuwin, maktum likgalhtawakga o chatum tala tiku tliwakga wi xtakanajla, kinkalimasiyaniyan pi kinkapaxkiyan (Heb. 12:9, 10). Kuenta katlawaw tuku kinkawanikanan chu ni wa la kinkawanikanan. Max namin kilhtamaku nalakpuwanaw pi tiku kinkastakyawan ni tlawalh chuna la xlilat. Xlikana, tiku namasta tastakyaw xlimastat chuna la ni tuwa namakgamakglhtinankan (Gál. 6:1). Pero komo nakinkamaxkikanan akgtum tastakyaw, wa kuenta kilitlawatkan tuku nakinkawanikanan. Tlan nalilakpuwanaw: «Maski ni klakgati chuna la kimaxkilh tastakyaw, ¿xlikana tuku kiwanima? ¿Tlan naklitamakgtaya tuku kiwanilh?». Lu tlan xwa komo xlakputsaw la tlan nalitamakgtayayaw kaxatukawa tastakyaw nema nakinkamaxkikanan. w22.02 12:13, 14

Jehová katsi pi lin kilhtamaku chu kiliskujatkan nalakgmakganaw ni xatlan talakapastakni chu talismanin (Sal. 103:13, 14). Pero limaklakaskin xTachuwin, xʼespíritu santo chu xkachikin xlakata nakinkamaxkiyan liskgalala, litliwakga chu tamakgtay xlakata natalakgpaliyaw. Kalimaklakaskinti Biblia xlakata miʼakstu nalakputsananikana. Xtachuwin Dios xtachuna la akgtum espejo, tlan namakgtayayan nalakputsananiya mintalakapastakni, mintachuwin chu la likatsiya (Sant. 1:22-25). Jehová makgtayaputunan. Xlakata xla lakgapasa minaku, tlan namakgtayayan (Prov. 14:10; 15:11). Wa xlakata, kalismani natlawaya oración chu kalikgalhtawakga xTachuwin. Liwana kakanajla pi xlimapakgsin Jehová wa tlakg xatlan. Putum tuku kinkawaniyan Jehová kaj kilitlankan. Tiku maxkikgo kakni xlimapakgsin tlan makgkatsikgo chu kgalhikgo tapaxuwan (Sal. 19:8-11). w22.03 4:8-10

Maxkiyaw kakni Jehová akxni makgtlawayaw Pukgalhtawakga. Biblia wan pi taskujut nema tlawaka ktabernáculo litaxtulh akgtum «xasanto taskujut» (Éx. 36:1, 4). La uku, Jehová na xasanto liʼakxilha la katlawakan kimPukgalhtawakgakan chu amakgapitsi chiki niku kakninanikan. Makgapitsi natalan limaxtukgo lhuwa kilhtamaku xlakata namakgtlawakgo uma taskujut. Xlikana pi lu paxtikatsiniyaw xtaskujutkan. Umakgolh natalan na limaxtukgo kilhtamaku xlakata nalichuwinankgo Dios. Makgapitsi asta max precursores litaxtuputunkgo. Lakgkgolotsin limasiyakgo pi makgtayanankgo la katlawakan Pukgalhtawakga akxni mastakgo talakaskin pi umakgolh natalan precursores nalitaxtukgo komo makgatsikgo tuku talakaskin. Maski katsiniyaw o ni la katlawakan kimPukgalhtawakgakan, kimputumkan tlan namakgtayananaw xlakata tlan natasiya. w22.03 22:11, 12