Abril

Kskujnin Jehová xalamakgasa titaxtukgolh tuku nitlan nema nikxni xlakpuwankgonit. Kalilakpuwaw Jacob. Xtlat limapakgsilh pi xtatamakgaxtokgli chatum xtsumat Labán, chatum tiku xalak xfamilia xwanit tiku na xkakninani Jehová. Chu wanilh pi Jehová xʼama sikulunatlawa (Gén. 28:​1-4). Jacob makgxtakgli Canaán chu alh niku xlama Labán, tiku xkgalhi chatiy xlaktsuman, Lea chu Raquel. Jacob lakgatilh Raquel chu xlakata xtatamakgaxtokgli, xatapaxuwan taskujli Labán akgtujun kata (Gén. 29:18). Pero nichuna kitaxtulh la Jacob xlakpuwan. Labán akgskgawilh chu tamamakgaxtokgli Lea. Akgtum semana alistalh, maxkilh talakaskin pi xtatamakgaxtokgli Raquel, pero wanilh pi xtaskujpa aʼakgtujun kata (Gén. 29:​26, 27). Labán na nitlan likatsinilh Jacob kxtaskujut. ¡Ni lakatitum maxkilh xtaskgaw akgpuxam kata! (Gén. 31:​41, 42). w23.04 15:5

¿Tiku tlan nakinkapulalinan chu tlan nakinkamamakgkatsiniyan? Tlan naskiniyaw k’oración Jehová pi kakinkamakgtayan. Xla wan pi chuna katlawaw, kinkawaniyan: «Ankgalhin katlawatit oración» (1 Tes. 5:17). Tlan naskiniyaw pi kakinkapulalin xliputum tuku natlawayaw (Prov. 3:​5, 6). Jehová kinkawaniyan pi katlawaniw oración chuna la xlimakglhuwa nalakaskinaw. Jesús xkatsi pi Jehová xlakaskinka liʼakxilha natlawaniyaw oración. Akxni xwi k’akgapun akxilhli la xTlat xkakgalhti xʼoracioneskan xlakskujnin. Akgtum liʼakxilhtit, Jesús xtawi xTlat akxni kgalhtilh xʼoracioneskan Ana, David, Elías chu amakgapitsin (1 Sam. 1:​10, 11, 20; 1 Rey. 19:​4-6; Sal. 32:5). Wa xlakata Jesús kawanilh xtamakgalhtawakgen pi ankgalhin xtlawanikgolh oración Jehová chu xlipawankgolh pi xla xʼama kakgalhti (Mat. 7:​7-11). w23.05 2:​1, 3

Sacerdote Jehoiadá, xpekuani Jehová. Akxni Atalía, xtsumat Jezabel, mapakgsina litaxtulh kJudá maski ni xlakgchan, Jehoiadá limasiyalh pi xkgalhini tapekua Dios. Atalía lu lixkajni xlikatsi, chu xlakata xmapakgsinamputun, asta kamakgnilh xnatanatni, xkamanan mapakgsina, tiku xkalakgchan namapakgsinankgo (2 Crón. 22:​10, 11). Pero Jehosabeat, xpuskat Jehoiadá, lakgmaxtulh chatum xkgawasa mapakgsina, Jehoás. Xlakan kuentajtlawakgolh chu matsekgkgolh. Chuna ni lakgsputtayalh mapakgsinanin tiku xminkgoyacha kxfamilia David. Jehoiadá ni makgxtakgli Jehová, chu ni pekuanilh Atalía. Akxni Jehoás xkgalhi 7 kata, Jehoiadá limasiyapa pi ni xmakgxtakga Jehová. Lakkaxwililh la mapakgsina xwa Jehoás. Komo tlan xkitaxtulh, Jehoás mapakgsina xlitaxtulh. Pero komo nichuna, Jehoiadá xʼamaka makgnikan. Jehová tlawalh pi tlan xkitaxtunilh. w23.06 17:​12, 13

Nabucodonosor tlan xtilakpuwa pi Daniel xlakatakima chu xlimapakgsinalh pi xmakgnika. Pero Daniel ni pekualh chu wanilh putum tuku xkilhchanima xtamanixnat. ¿Tuku max makgtayalh Daniel ni napekuan? Akxni kgawasaku xwanit lhuwa tuku katsinilh xlakata xliʼakxilhtitkan xnatlatni (Deut. 6:​6-9). Daniel ni kajwatiya xlakgapasa Akgkaw Limapakgsin, wata na liwana xkatsi tuku liwat tlan xwakgo israelitas chu tuku ni xliwatkan xwanit (Lev. 11:​4-8; Dan. 1:​8, 11-13). Nachuna, liwana xkatsi tuku xtitaxtukgonit xkachikin Dios chu xkatsi pi akxni ni xkgalhakgaxmatkgo xLimapakgsin Jehová nitlan xkakitaxtuni (Dan. 9:​10, 11). Putum tuku titaxtulh kxlatamat limasiyanilh pi Jehová chu xʼángeles xʼamakgo makgtayakgo putum kilhtamaku (Dan. 2:​19-24; 10:​12, 18, 19). w23.08 3, 4:​5, 6

Rebeca lu skgalala xwanit chu ni xpekuan akxni wi tuku xlitlawat xwanit (Gén. 24:58; 27:​5-17). Pero na xmasta kakni chu xkgalhakgaxmatnan (Gén. 24:​17, 18, 65). Komo na nataktujuya chuna la xla chu nakakgalhakgaxpata tiku kgalhikgo limapakgsin, lu tlan liʼakxilhtit nakawiliniya mifamilia chu congregación. Pulaktum xatlan tayat nema milikgalhit wa pi nalitayaya pi nila putum tlan tlawaya. Ester limasiyalh uma tayat. Akxni mapakgsina limaxtuka, ni tatlankilh. Xkgaxmata chu xtlawa tuku xwani xtapuxnimat, Mardoqueo (Est. 2:​10, 20, 22). Kastalani xliʼakxilhtit Ester chu kakaskini tastakyaw amakgapitsin, chu katlawa tuku nawanikgoyan (Tito 2:​3-5). Ester na kamaxkilh kakni amakgapitsin. Maski xla «lu lilakgatit xwanit chu stlan xtasiya», ni xlakaskin pi kajwatiya xla xʼakxilhka (Est. 2:​7, 15). w23.12 19, 20:​6-8

Jehová ni lakaskin pi chuntiya kakukaliw talakgalhin nema tlawaw makgasa. Komo kawaninitawa lakgkgolotsin kintalakgalhinkan, nitlan limakgkatsiw chu lu liskujmaw nialh natlawayaw, liwana kakatsiw pi Jehová kinkatapatinitan (Hech. 3:19). Komo tlawanitawa putum uma, Jehová lakaskin pi nialh kalilakgaputsaw, xlakata uma tapuwan nitlan tuku nakinkatlawaniyan (Sal. 31:10). Komo namastayaw talakaskin pi talipuwan nakinkamakgatlajayan, max nataxlajwaniyaw chu nialh katiliskujwi nalakgchanaw latamat (2 Cor. 2:7). Komo lu lilakgaputsaya tuku nitlan tlawanita, kalilakpuwanti pi Jehová xlikana tapatinan (Sal. 130:4). Akxni Jehová wi tiku tapati, malaknuni pi “nialh katilakapastakli xtalakgalhin” (Jer. 31:34). Xla nialh kinkalilakawaniyan tuku tlawanitaw. Chu komo la uku nialh lakgayat taskujut kcongregación, ni kalilakgaputsa. Jehová nialh lakapastaka tuku tlawanita, wix na nialh kalakapastakti. w23.08 30, 31:​14, 15

Kpandemia xla COVID-19 malakgatumika lhuwa ni xaxlikana tamakatsinin. Xlakskujnin Jehová ni kinkaʼakgskgawikan xlakata stalaniw xtastakyaw xkachikin chu ni lu lakgaputsaw (Mat. 24:45). Ankgalhin kililakapastakatkan «tuku tlakg xlakaskinka» (Filip. 1:​9, 10). Tuku kinkamakglhtiyan kilhtamaku tlawa pi nialh kuenta natlawayaw tuku tlakg xlakaskinka. Max wa pulana natsukuyaw wiliyaw kkilatamatkan tuku tlawayaw chali chali chuna la akxni wayanaw, kgotnanaw, wi tuku lipaxuwayaw chu akxni skujaw (Luc. 21:​34, 35). Na lu talakgatuminit tuku lakpuwankgo latamanin chu tuku xla política. Ni kilimastatkan talakaskin pi umakgolh tapuwan nakinkamakglhtiyan kilhtamaku. Komo ni kuenta natlawayaw, max natsukuyaw makgtanuyaw kʼumakgolh taʼakglhuwit maski kaj kkintalakapastaknikan. Satanás tipalhuwa tuku maklakaskin xlakata nakinkamaxlajwaniyan. w23.07 16, 17:​12, 13

Kilhtamaku nema tlakg xlakaskinka liʼakxilhaw xlakskujnin Jehová, wa Akxni lakapastakkan akxni tinilh Cristo. Jesús limapakgsinalh pi xtlawaw uma lu xlakaskinka tamakxtumit (Luc. 22:​19, 20). Uma kilhtamaku kinkamalakapastakayan la tlan napaxtikatsininanaw Jesús xlakata xtamakamastan (2 Cor. 5:​14, 15). Na tlan makxtum katatawilayaw kinatalankan chu lamaʼakgpuwantiniyaw (Rom. 1:12). Lhuwa latamanin lu kaks lilakawankgo tuku akxilhkgo chu tuku kgaxmatkgo anta, chu tsukukgo likgalhtawakgakgo Biblia. Uma kilhtamaku na kinkamakgtayayan naʼakxilhaw la makxtum wi xkachikin Jehová. w24.01 8:​1-3

Akxni tlakg lilakpuwanaw la xlilhuwa xtapalh tuku lixokgonankgolh Jehová chu Jesús, tlakg liwana akgatekgsaw la xlilhuwa kinkapaxkikgoyan (Gál. 2:20). Jehová mastalh talakgmaxtut xlakata kinkapaxkiyan. Makamastalh xKgawasa, tuku tlakg lhuwa xtapalh xkgalhi, chu mastalh talakaskin pi xmakgapatinanka chu xmakgnika kimpalakatakan. Jehová ni kajwatiya wan pi kinkapaxkiyan, wata limasiya (Jer. 31:3). Xla tlawanit pi natalakatsuwiniyaw xlakata kinkapaxkiyan (katamalakxtupi Deuteronomio 7:​7, 8). Ni anan tuku natlawa pi Dios nialh nakinkapaxkiyan (Rom. 8:​38, 39). ¿La makgkatsiya wix akxni lilakpuwana uma? w24.01 28:​10, 11

Tiku xatalaksakni lu xtapalh liʼakxilhkgo xtakgalhkgalhinkan. Akgtum liʼakxilhtit, kkata 1991 tala Frederick Franz, wa: «Kintakgalhkgalhinkan nakgantaxtu, chu 144,000 tiku ni xalhuwa borregos namakgamakglhtinanaw tuku ni xlakpuwanitaw». Maski akglhuwata kata kskujnaninit Jehová, tala Franz wa: «Ni klakpuwanaw pi kintakgalhkgalhinkan nialh lhuwa xtapalh. Wata [...] tlakg xtapalh kliʼakxilhaw. [...] Ni kaj paxkat katiwa kinkilhtamakujkan. La uku tlakg xtapalh kliʼakxilha kintakgalhkgalhinkan nixawa xapulana». Kintakgalhkgalhinkan lu kinkamakgapaxuwayan, tiku nalatamayaw putum kilhtamaku kʼakgapun o kKatiyatni. Chu tlan tlakg nakanajlayaw pi nakgantaxtu. w23.12 9:6; 10:8

Kkilhtin tabernáculo xwi akgtum pumakamastan xacobre niku xmakamaxkikan Jehová animales (Éx. 27:​1, 2; 40:29). Pero umakgolh tamakamastan nila putuminika kxapa xtalakgalhin kachikin (Heb. 10:​1-3). Animales nema xmakamastakan xkilhchanima tamakamastan nema putuminika xʼama xapa talakgalhin. Jesús xkatsi pi Jehová xmalakgachanit xlakata xmakamastalh xlatamat (Mat. 20:28). Akxni tamunulh, Jesús litayalh pi xʼama tlawa tuku Jehová lakaskin (Juan 6:38; Gál. 1:4). Jesús «kaj xman makgtum makamastalh [xlatamat] xliputum kilhtamaku» xlakata makgtuminika kxapalh xtalakgalhinkan putum tiku xkanajlanikgolh (Heb. 10:​5-7, 10). w23.10 26:​10, 11

Kiʼakstukan nila xlakgtaxtuniw talakgalhin chu linin (Sal. 49:​7, 8). Wa xlakata Jehová makamilh xKgawasa xlakata xnilh kimpalakatakan, chu lhuwa xtapalh xokgokgolh xlakata xkinkalakgmaxtukgon. Akxni tlakg lilakpuwanaw tuku tlawakgolh kimpalakatakan, tlakg xtapalh liʼakxilhaw talakgmaxtut. Akxni Adán makglakgalhinalh, xla chu xkamanan nialhla latamakgolh putum kilhtamaku. Xlakata Jesús tlan xtamawaxtulh tuku Adán xmakgatsankganit, mastalh xlatamat nema ni xkgalhi talakgalhin. Jesús «nipara akgtum talakgalhin tlawalh na nipara akgsaninalh» (1 Ped. 2:22). Ni xkgalhi talakgalhin akxni nilh, wa xlakata xlatamat xtachuna xwanit la tuku makgatsankgalh Adán (1 Cor. 15:45; 1 Tim. 2:6). w24.01 10:​5, 6

Akxni Jesús lakastakwanalh, tanulh niku Tlakg xaSanto nema wi ktemplo xaʼespiritual. Jehová limaklakaskilh talakgmaxtut xlakata nalakkaxwili la nakakninanikan, chu Sacerdote limaxtulh Jesucristo. Niku Tlakg xaSanto niku xtanu sacerdote tiku tlakg xkgalhi limapakgsin wa latamanin xtlawakgonit, chu xla xtanu anta chu xlin xkgalhni animales. Pero Jesús tanulh niku tlakg xasanto: «Kʼakgapun», niku wi Jehová. Anta makamaxkilh Jehová xtapalh xlatamat «xlakata xtamakamastan nalimalakgsputu talakgalhin» (Heb. 9:​24-26). Putum akinin, tiku nalatamayaw kʼakgapun o tiku nalatamayaw kKatiyatni, tlan nakakninaniyaw Jehová kxtemplo xaʼespiritual. w23.10 28:​13, 14

Kalilakpuwaw taskujut nema tlawama Jesús kʼakgapun chuna la Mapakgsina chu xalakgalhamana Sacerdote tiku tlakg kgalhi limapakgsin. Kxtukuwani katlawaniw oración Jehová chu katalakatsuwiw «kxpumapakgsin Dios nema masta talakgalhaman nema ni anan xtachuna» chu kaskiniw xtalakgalhaman «kilhtamaku akxni xlilat» (Heb. 4:​14, 15). Ankgalhin kalilakpuwaw tuku tlawakgonit Jehová chu Jesús kimpalakatakan. Uma xlitlawat pi xatapaxuwan naskujniyaw Jehová (2 Cor. 5:​14, 15). Kapaxtikatsiniyaw Jehová chu xKgawasa akxni kamakgtayayaw latamanin xtatayananin Jehová nalitaxtukgo chu nastalanikgo Jesús (Mat. 28:​19, 20). Apóstol Pablo xkatsi pi Jehová lakaskin pi «putum latamanin liwana kalakgapaskgolh xaxlikana chu kalakgtaxtukgolh» (1 Tim. 2:​3, 4). w23.10 22, 23:​13, 14

Lu limaklakaskinaw uma texto xlakata nakawaniyaw latamanin la nawan latamat kParaíso. ¿La tlan nakamakgtayayaw amakgapitsin nakanajlakgo pi tasikulunalin nema lichuwinan Apocalipsis 21:​3, 4 xlikana nakgantaxtu? Jehová ni kajwatiya kinkatlawaniyan uma tamalaknun, wata na wi tuku limasiya pi tlan nalipawanaw. Versículos nema stalakgo kinkamakgtayayan nalipawanaw pi Jehová namakgantaxti. Umakgolh versículos wankgo: «Tiku xwi kpumapakgsin wa: “¡Kaʼakxilhti! Kmasastima putum tuku anan”. Chu wampa: “Katsokgwili uma, xlakata umakgolh tachuwin tlan lipawankan chu xaxlikana”. Chu kiwanilh: “¡Kgantaxtukgonita! Akit Kilhtsukut chu Lisputni”» (Apoc. 21:​5, 6a). w23.11 2, 3:​3-5

Chatum kgawasa limasiya pi lakpuwan chuna la Jehová, akxni liwana lhakganan chu la akxkita. Tiku tlawakgo lhakgat chu tiku masiyakgo la xlitalhakganat ni maxkikgo kakni Jehová. Wa xlakata lhakgat nema tlawakgo lu lhtank kachipa lakchixkuwin chu kamasiya chuna la lakpuskatin. Chatum kgawasa tiku liskujma xlakata tlakg tlan kstalanina Cristo nalitaxtu, kuentajtlawa tastakyaw xalak Biblia chu xatlan liʼakxilhtit nema kgalhi kcongregación akxni laksaka la nalhakganan chu la natakaxtaya. Tlan nalakpuwan: «¿Klimasiya chuna la klhakganan pi kkgalhi tlan talakapastakni chu kmaxki kakni tuku makgkatsikgo amakgapitsin? ¿Limasiya kintalhakgan pi kskujnani Dios?» (1 Cor. 10:​31-33). Akxni lakgkgawasan liwana lakapastaknankgo, tlawa pi amakgapitsin natalan nakamaxkikgo kakni chu Jehová tlan kaʼakxilha. w23.12 26:7

Makgasa, «mapakgsina xalak sur» na xkaputsastalani xkachikin Jehová (Dan. 11:40). Ksiglo 20, lhuwa natalan katamaknuka kpulachin xlakata ni xmakgtanukgo kkakilhtamaku, chu laktsu kamanan katamakxtuka kʼescuela xlakata ni ksaludarlikgo bandera. Pero la uku xlakskujnin Jehová chuntiya titaxtukgo tuku tuwa niku talakaskinit nalimasiyakgo komo xlikana tatayakgo xTamapakgsin Dios. Akgtum liʼakxilhtit, akxni kalaksakkan tiku mapakgsinanin nawankgo, max chatum kstalanina Cristo natatayaputun akgtum partido político o chatum candidato. Max ni kativotarlinalh, pero max nalakpuwan pi wi tiku xlakgchalh tamapakgsin. Xlakata ni namakgtanuyaw kkakilhtamaku, ni kajwatiya kuenta kilitlawatkan tuku tlawayaw, wata nachuna tuku lakpuwanaw chu tuku makgkatsiyaw (Juan 15:​18, 19). w23.08 12:17

Xlakata nakgalhiyaw latamat, talakaskin nastalaniyaw uma tastakyaw: «Kakgosnantit xlakata natlajananatit» (1 Cor. 9:24). Jesús wa pi komo ni kuenta natlawayaw max wa tlakg nalilakgaputsayaw lhuwa nawayanaw, lhuwa nakgotnanaw chu lu nalilakgaputsayaw tuku maklakaskinaw (Luc. 21:34). Uma chu amakgapitsin textos xalak Biblia nakinkamakgtayayan nakatsiyaw tuku kililakgpalitkan xlakata chuntiya naliskujaw natlajayaw latamat. Jehová nakinkamaxkiyan litliwakga xlakata chuna natlawayaw (Is. 40:​29-31). Ni kataxlajwani. Kastalani xliʼakxilhtit Pablo, tiku tlawalh putum tuku matlanilh xlakata natlajanan (Filip. 3:​13, 14). Nitila kgosnan mimpalakata, pero Jehová namakgtayayan chuntiya nakgosnana. Namakgtayayan nalipina mintakuka chu namakgxtakga tuku ni milikukalit. Wix tlan chuntiya nakgosnana chu natlajanana. w23.08 31:​16, 17

Akxni Jesús xkgalhi 12 kata, kataʼalh xfamilia kJerusalén xlakata namakgtlawakgo paskua (Luc. 2:​46-52). Akxni José chu María xtaspitmakgo kxchikkan, ni akxilhkgolh pi Jesús ni xkatataspitma. Xlikana pi wa José chu María xkalakgchan nakakuentajtlawakgo xkamanankan, pero akxni tekgskgolh Jesús, ¡María wa limawakalh kuenta! Maski Jesús tlan xtikawanilh pi ni xlakgchan tuku xwanimakgo, nichuna tlawalh, wata ni xatasitsi kakgalhtilh. Pero José chu María ni «akgatekgskgolh». Chu maski chuna, Jesús «chuntiya xkakgalhakgaxmata». Kgawasa o tsumat, ¿tuwa makgkatsiya nakakgalhakgaxpata minatlatni akxni wi tuku nitlan kakitaxtuni o akxni ni akgatekgsnikgoyan? ¿Tuku namakgtayayan nakakgalhakgaxpata? Kalilakpuwanti la makgkatsi Jehová. Biblia wan pi komo kamanan kakgalhakgaxmatkgo xnatlatnikan, lu «makgapaxuwa Malana» (Col. 3:20). Jehová katsi akxni minatlatni ni akgatekgsnikgoyan o wanikgoyan pi katlawa tuku lakpuwana pi ni lu xlilat. Pero komo nakakgalhakgaxpata, lu namakgapaxuwaya Jehová. w23.10 7:​5, 6

Max tiku taʼanaw kʼescuela nakinkawaniyan pi kililakgpalitkan tuku lakpuwanaw xlakata tiku lakgati xtachixku o xtapuskat. Natalakaskin nawaniyaw pi maxkiyaw kakni tuku laksakkgo latamanin (1 Ped. 2:17). Kawaniw tuku xlakata lu tlan kitaxtu akxni kgalhakgaxmataw xtastakyaw Biblia. Komo wi tiku kinkawaniyan pi ni kanajla tuku akinin kanajlayaw, ni tunkun kalakpuwaw pi katsiyawa tuku xla kanajla. Kalilakpuwanti pi tiku tapina kʼescuela nawaniyan pi tiku kanajlanikgo Dios xatontos. ¿Wamputun uma pi xla kanajlani evolución chu lhuwa tuku katsi xlakata uma? Max kaj kilhwama tuku kgaxmatnit. Tlan xmalakgachani akgtum enlace nema linan k’akgtum artículo o video xla jw.org nema lichuwinan tamalakatsukin. Max alistalh nalakaskiniyan akxtum nata’akxilha atanu artículo o video. Komo ni xatasitsi nakgalhtiya, max nalakgpali xtapuwan. w23.09 17:​12, 13

Maski tlawanitaw tuku nitlan, Jehová tlan chuntiya nakinkamaklakaskinan chu nakinkasikulunatlawayan komo nalakgpaliyaw kintayatkan chu nalipawanaw (Prov. 28:13). Maski Sansón makglakgalhina xwanit chu nitlan tuku laksakli akxni lakgatilh Dalila, ni anta tamakgxtakgli, chuntiya skujnanilh Jehová. Chu Jehová maklakaskimpa, chuntiya xliʼakxilha la chatum chixku tiku xkgalhi takanajla. Wa xlakata matsokgwilininalh xtukuwani kʼHebreos capítulo 11, niku kalichuwinankan amakgapitsi kskujnin tiku ni makgxtakgkgolh. Lu kinkamakgpuwantiniyan pi Jehová kinkamaxkiputunan litliwakga, liwaka akxni titaxtuyaw tuku tuwa. Wa xlakata, chuna la Sansón, kaskiniw Jehová: «Katlawa litlan, kakilakapastakti. [...] Kakimaxki litliwakga» (Juec. 16:28). w23.09 6, 7:​18, 19

Kamakgtayaputunaw latamanin nalakgapaskgo xalaktlan tamakatsinin, xlakata xkilhtamaku Jehová lakatsu wi. Pero max tuwa namakgkatsiyaw nakatachuwinanaw xlakata max kapekuaniyaw. Wa uma tuku akgspulalh Pedro katsisni akxni Jesús xlakputsananimaka. Wa pi ni kstalanina Jesús xwanit chu makglhuwa wa pi ni xlakgapasa (Mat. 26:​69-75). Pero makgatlajalh xtapekua, chu alistalh tlan wa: «Ni kapekuanitit tuku xlakan pekuanikgo chu nipara kalilakgaputsatit» (1 Ped. 3:14). Uma kinkamasiyaniyan pi tlan nialh nakapekuaniyaw latamanin. Pedro kinkamaxkin uma tastakyaw: «Kamaxkitit kakni Cristo tiku Malana kminakujkan» (1 Ped. 3:15). Uma na kilhchanima pi kililakpuwanatkan tuku lakgayawakanit kiMalanakan chu kiMapakgsinakan, Jesucristo, chu litliwakga nema xla kgalhi. w23.09 27, 28:​6-8

Lu xlakaskinka kuenta natlawayaw xlakata nitu nakinkamatlawiyan «tuku ni kgalhi xtapalh» (Efes. 5:11). Akxni chatum lataman chuntiya akxilha, kgaxmata o chuntiya lichuwinan talakgxtumit nema ni xlitatlawat, max namatlawi talakgalhin (Gén. 3:6; Sant. 1:​14, 15). Pulaktum tuku maklakaskin Satanás xlakata nakaʼakgskgawi latamanin wa pi nila akxilhkgo pi tuku tlawamakgo nitlan (Is. 5:20; 2 Cor. 4:4). Kakilhtamaku kinkamalakpuwaniputunan pi nitu wamputun maski natlawayaw tuku Jehová wan pi nitlan (2 Ped. 2:19). Wa xlakata lhuwa películas, programas nema taxtu ktelevisión chu tuku tasiya kʼinternet masiyakgo tapuwan nema lakatsala xlimapakgsin Jehová. Satanás lakaskin nalakpuwanaw pi talismanin chu la linkan latamat kʼuma kakilhtamaku ni talakgalhin chu nitu kintikaʼakgspulan maski natlawayaw (Efes. 5:6). w24.03 22:​8-10

Israelitas xtamakxtumikgo ktabernáculo xlakata xtlawanikgolh Dios tamakamastan (Éx. 29:​43-46). Xlinkgo kaxanikawa niku xʼankgo akxni xlamakgo kdesierto (Éx. 25:​8, 9; Núm. 9:22). Maklakaskinkgolh max 500 kata asta akxni tlawaka templo xalak Jerusalén. Pero tabernáculo na xkilhchanima tuku tlakg tlan. Kaj xmastilenkg xwanit «tuku xalak akgapun» chu xkilhchanima lanka xtemplo Jehová xaʼespiritual. Apóstol Pablo wa: «Uma tabernáculo kilhchanima tuku anan uku» (Heb. 9:9). Wa xlakata, akxni Pablo katsokgnanilh hebreos, templo xaʼespiritual xwija. Tsukulh kkata 29 kkinkilhtamakujkan. Uma kata tamunulh Jesús, chu tsukulh skuja chuna la «sacerdote tiku tlakg kgalhi limapakgsin» anta ktemplo xaʼespiritual (Heb. 4:14; Hech. 10:​37, 38). w23.10 25, 26:​6, 7

Xlakata tliwakga nakgalhiyaw kintakanajlakan, talakaskin nalitaxtuyaw chuna la kiwi nema taxmuta, ni tsakat natayayaw. Uma wamputun pi talakaskin nalismaniyaw akxni wi tuku natalakgpali chu namaxkiyaw kakni tuku lakpuwankgo chu tuku laksakkgo amakgapitsin. Akinin ni xatsakatwa wamputunaw, taktujuputunaw chu lakgalhamaninamputunaw. Biblia wan pi Jehová xtachuna la «lanka Chiwix» xlakata tliwekglh wi chu nitila malakxija (Deut. 32:4). Pero na ni xatsakatwa. KiDioskan lakgpalinit tuku talakaskinit xlakata tlan namakgantaxti xtalakaskin. Xlakata Jehová kinkatlawan chuna la xla, akinin na tlan lismaniyaw tuku talakgpali. Kinkamaxkinitan tastakyaw xalak Biblia nema nakinkamakgtayayan tlan tuku nalaksakaw. Tuku tlawa chu xtastakyaw limasiya pi xla chatum Dios tiku tliwakglh wi pero na ni xatsakatwa. w23.07 20:​1-3

Biblia tamalakxtumi Jehová la chatum xapaxkina tse (Is. 66:​12, 13). Kalilakpuwanti chatum tse tiku kuentajtlawa chu paxki kskgata chu maxki tuku maklakaskin. Xtachuna la uma tse, Jehová nakinkamakgtayayan akxni lakgaputsamaw. Xla chuntiya kinkapaxkiyan maski tlawayaw tuku nitlan (Sal. 103:8). Israelitas makglhuwa nitlan mamakgkatsinikgolh Jehová; pero akxni nitlan xlimakgkatsikgo xtalakgalhinkan, xla chuntiya xkapaxki. Makgtum, Jehová wanilh xkachikin: «Lu xlakaskinka kakxilhni, makglhtinanti kakni, chu akit kpaxkiyan» (Is. 43:​4, 5). Chu Jehová ni talakgpalinit. Asta maski natlawayaw akgtum lanka talakgalhin, komo nitlan nalimakgkatsiyaw chu naputsayaw xtamakgtay, chuntiya nakinkapaxkiyan. Xatapaxuwan nakinkatapatiyan (Is. 55:7). Biblia wan pi akxni Jehová tapatinan, tlawa pi nakgalhiyaw takaksni (Hech. 3:19). w24.01 26, 27:​4, 5

Jehová nakinkamakgtayayan akxni titaxtuyaw tuku tuwa. Kalilakpuwaw, max kiliskinitkan nawan kimalanakan pi kakinkamaxkin talakaskin naʼanaw kʼasamblea o kalakgpalilh hora nema skujaw xlakata naʼanaw ktamakxtumit. Akxni chuna titaxtuyaw, akxilhaw la kinkamakgtayayan Jehová. Max kaks lilakawanaw tuku kitaxtu, chu tlakg nalipawanaw Jehová. Esdras taktujulh chu skinilh tamakgtay Jehová akxni tuwa xmakgkatsi namakgantaxti xtaskujut, ankgalhin xtlawani oración (Esd. 8:​21-23; 9:​3-5). Akxni amakgapitsin akxilhkgolh pi xla lu xlipawan Dios, makgtayakgolh chu stalanikgolh xliʼakxilhtit (Esd. 10:​1-4). Akxni akinin lu lilakgaputsamaw xlakata ni anan tumin, o la nakuentajtlawayaw kifamiliajkan, katlawaniw oración Jehová chu kalipawaw pi nakinkamakgtayayan. w23.11 18:​15-17

Jehová ni wan pi kilitlawatkan watiya tuku tlawalh Abrahán xlakata xaʼakgstitum nakinkaliʼakxilhan. Anan tipalhuwa la nalimasiyayaw pi kgalhiyaw takanajla. Tlan xatapaxuwan nakamakgamakglhtinanaw tiku minkgo kcongregación, nakamakgtayayaw natalan tiku titaxtumakgo tuku tuwa chu natlawayaw tuku tlan xpalakata kifamiliajkan. Putum uma makgapaxuwa Jehová (Rom. 15:7; 1 Tim. 5:​4, 8; 1 Juan 3:18). Pulaktum tuku lu xlakaskinka nema nalimasiya pi kgalhiyaw takanajla, wa pi xatapaxuwan nalichuwinanaw Dios (1 Tim. 4:16). Kimputumkan tlan nalimasiyayaw pi kanajlayaw pi xtamalaknun Jehová nakgantaxtu chu pi tuku xla tlawa wa tuku tlakg tlan. Komo chuna natlawayaw tlan nalipawanaw pi Dios xaʼakgstitum nakinkaliʼakxilhan chu xʼamigos nakinkalimaxtuyan. w23.12 2:3; 6:15

Mapakgsina David wanilh Salomón tuku wan ktexto xala uku (1 Rey. 2:​1,3). Putum natalan lakchixkuwin xlikgalhakgaxmatatkan uma tastakyaw. Xlikgalhakgaxmatatkan xtastakyaw Jehová (Luc. 2:52). ¿Tuku xlakata lu xlakaskinka pi lakgkgawasan lu naliskujkgo tlakg tlan kstalaninanin Cristo nalitaxtukgo? Natalan lakchixkuwin kgalhikgo lu xlakaskinka talakgatay kxfamiliajkan chu kcongregación. Komo wix kgawasaku, max lilakpuwanita talakgatay nema nakgalhiya alistalh. Max lakpuwanita precursor regular nalitaxtuya, naskuja la siervo ministerial chu alistalh kgolotsin nalitaxtuya. Max na tamakgaxtokgputuna chu kgalhiputuna kamanan (Efes. 6:4; 1 Tim. 3:1). Xlakata tlan namakgantaxtiya chu tlan nakitaxtuniyan, talakaskin lu naliskuja tlakg tlan kstalanina Cristo nalitaxtuya. w23.12 24:​1, 2

Jehová kalakgayawanit lakgkgolotsin nakakuentajtlawakgo xlakskujnin. Xlakan lu xtapalh liʼakxilhkgo nakamakgtayakgo xnatalankan chu lu liskujkgo nakapulalinkgo (Jer. 23:4; 1 Ped. 5:2). ¡Lu tlan limakgkatsiyaw pi kcongregaciones wilakgo natalan tiku lu skujkgo! Lakgkgolotsin lhuwa tuku tlan nakatsinikgo xlakata xliʼakxilhtit Gedeón (Heb. 6:12). Xla xkuentajtlawa chu xpulalin xkachikin Dios (Juec. 2:16; 1 Crón. 17:6). Xtachuna la Gedeón, lakgkgolotsin kalakgayawakanit nakuentajtlawakgo xkachikin Dios kʼuma lu xatuwa kilhtamaku (Hech. 20:28; 2 Tim. 3:1). Lhuwa tuku nakatsinikgo xlakata la xtayani Gedeón, xtaktuju, xkgalhakgaxmatnan chu xlitaya pi ni putum xmatlani. Xliʼakxilhtit Gedeón na tlan nakamakgtaya putum congregación xlakata xtapalh naliʼakxilhkgo xtaskujutkan lakgkgolotsin chu xatapaxuwan nakamakgtayakgo (Heb. 13:17). w23.06 2:1; 3:3