Junio

Jehová kasikulunatlawalh natalan kxapulana siglo xlakata ni litaʼakglhuwikgolh tuku xtitaxtumakgo. Lu kaputsastalanika, chu nipara tsinu xlakpuwankgo pi chuna xʼama kaʼakgspula. Akxni Bernabé chu Pablo xlichuwinamakgo Dios kListra, xapulana, latamanin lu xatapaxuwan kamakgamakglhtinankgolh. Pero alistalh makgapitsi xtalamakgasitsinkan tlawakgolh pi latamanin lu ksitsikgolh, chu aktalamikgolh Pablo (Hech. 14:19). Pero xlakan chuntiya lichuwinankgolh Dios kʼalakatanu kachikinin. Chu kamakgtayakgolh «latamanin xlakata tamakgalhtawakgen xlitaxtukgolh» chu kalimatliwakglhkgolh natalan xtachuwinkan chu xliʼakxilhtitkan (Hech. 14:​21, 22). Bernabé chu Pablo ni taxlajwanikgolh maski kaputsastalanika, chu uma kamakgtayalh lhuwa latamanin. Komo akinin na ni nataxlajwaniyaw chu chuntiya naskujnaniyaw Jehová, namakglhtinanaw lhuwa tasikulunalin. w23.04 16:​13, 14

Mapakgsina David xkgalhi lhuwa xtalamakgasitsin, wa xlakata makglhuwa tlawanilh oración Jehová. Liwana xkatsi pi Jehová xkgaxmata chu xkgalhti xʼoraciones. Biblia wan pi Jehová nakinkamaxkiyan liskgalala chu litliwakga nema maklakaskinaw xlakata natayaniyaw. Jehová wi tiku tlan namaklakaskin xlakata nakinkamakgtayayan. Maski Jehová ni ankgalhin kintikakgalhtin chuna la akinin xlakpuwanitaw, xla nakgalhti kiʼoracioneskan. Nakinkamaxkiyan tuku namaklakaskinaw akxni xlilat. Wa xlakata chuntiya katlawaniw oración Jehová, kalimasiyaw takanajla, kalipawaw pi tlan nakinkakuentajtlawayan la uku chu pi kxasasti kakilhtamaku nakinkamaxkiyan putum tuku namaklakaskinaw (Sal. 145:16). w23.05 8:4; 13:​17, 18

Lu makgtayanan akxni nalilakpuwana tuku tlan kitaxtu komo namakgantaxtiya tuku xtlawaputuna. ¿Wix lilakpuwanita tuku tlan nakitaxtuniyan? Komo lakkaxwilinita tlakg nalikgalhtawakgaya Biblia o natlawaya oración, kalilakpuwanti la namatliwakglha chuna la talalipina Jehová (Sal. 145:​18, 19). Komo lakkaxwilinita nakgalhiya akgtum tlan tayat, kalilakpuwanti la namakgtayayan tlakg tlan nakatalalipina amakgapitsin (Col. 3:14). Na katsokgwili tuku xlakata lakgchipimputuna, chu ni xmakgasni kaʼakxilhpara. Kakatalalipi tiku namakgpuwantinikgoyan (Prov. 13:20). Min kilhtamaku ni tlawaputunaw tuku lakkaxwilinitaw, pero ni wamputun pi anta natamakgxtakgaw chu nialh katiliskujwi. Tlan nalakgchanaw asta maski ni lu xtlawaputunaw. Xlikana, talakaskin lu naliskujaw, pero tlan nakitaxtu. w23.05 27, 28:​5-8

Komo laksakwi tuku nitlan chu nitlan kinkakitaxtuniman, kawaw tuku nitlan tlawanitaw, kalakgpaliw kintayatkan chu kaliskujwi nialh natlawayaw. Putum uma nakinkamakgtayayan chuntiya naliskujaw nalakgchanaw latamat. Ni wa kalilakpuwantawila tuku nitlan tlawa chu nialh lu kalilakgaputsa, ni kakalimawaka amakgapitsin chu ni kalakputsa tuku nalikilhpina. Wata kalitaya pi nitlan tuku tlawanita chu katlawa putum tuku namatlaniya xlakata nalakkaxtlawaya. Komo lu nitlan limakgkatsiya tuku tlawanita, kataktuju, kalitaya tuku tlawa chu kaskini Jehová pi katapatin (Sal. 25:11; 51:​3, 4). Komo wi tiku nitlan mamakgkatsini, kaskini pi katapatin. Chu komo talakaskin, kakatachuwinanti lakgkgolotsin (Sant. 5:​14, 15). Kalistaktaya tuku nitlan tlawa chu kaliskujti xlakata nialh natlawaparaya. Liwana kakatsi pi Jehová namakgtayayan chu nalimasiyaniyan xtalakgalhaman (Sal. 103:​8-13). w23.08 28, 29:​8, 9

Akxni kgawasaku xwanit, mapakgsina Jehoás liskujli natlawa tuku Jehová lakgati xlakata wa Jehoiadá tiku xmakgpuwantini. Pero akxni nilh, Jehoás kakgalhakgaxmatli príncipes xalak Judá tiku xmakgxtakgkgonit Jehová (2 Crón. 24:​4, 17, 18). Jehová «chuntiya xkamalakgachani palakachuwinanin xlakata xlakgtaspitkgolh», pero «xlakan ni xkgaxmatputunkgo». Nipara wa Zacarías kgaxmatnikgolh, xkgawasa Jehoiadá, tiku palakachuwina chu sacerdote xlitaxtu, chu xtapuxnimat xwanit Jehoás; wata mamakgnininalh (2 Crón. 22:11; 24:​19-22). Jehoás nialhtu lakapuwanilh Jehová chu akgspulalh chuna la xla wa: «Tiku kilakgmakgankgo na nakalakgmakgankan» (1 Sam. 2:30). Alh kilhtamaku, ni lhuwa soldados kamakgatlajakgolh ksoldados Jehoás, chu lu nitlan tuku tlawanikgolh (2 Crón. 24:​24, 25). Alistalh kskujnin Jehoás makgnikgolh xlakata xmakgninit Zacarías. w23.06 18:​16, 17

Apóstol Pablo xlichuwinanit xalaktlan tamakatsinin kʼÉfeso (Hech. 19:​1, 8-10; 20:​20, 21). Xla lu xkapaxki xnatalan chu xkamakgtayaputun xlakata ni xmakgxtakgkgolh Jehová. Kstalaninanin Cristo xalak Éfeso, xapulana lhuwa tuku xkanajlakgo nema ni xlikana xwanit chu tuku xla taskuwan. Latamanin xalak Éfeso xtlawakgo talakgxtumit nema ni xlitatlawat chu nipara tsinu xlimaxanankgo. Tuku xlimalakgastaninankgo chu talismanin nema xtlawakan, xmasiyakan talakgxtumit nema ni xlitatlawat (Efes. 5:3). Latamanin nialh «akgtum talakgalhin» xliʼakxilhkgo tuku nitlan. Uma tachuwin kilhchanima pi nialh xkakatsani xnakujkan akxni xtlawakgo tuku nitlan (Efes. 4:​17-19). Xlakata ni xʼakxilhkgo tuku tlan chu tuku nitlan, Pablo kawanilh pi “kapukswa xwilakgo chu ni xmakglhtinankgo latamat nema Dios malaknu”. Pero makgapitsi tiku xalak Éfeso xtaxtukgonit niku kxakapukswa. w24.03 20:​2, 4; 21:​5, 6

Gedeón juez xalak Israel litaxtulh chu lu lhuwa skujli. Akxni madianitas tsalakgolh katsisni akxni xkatalatlawama, xla kaputsastalalh lata kJezreel asta kkgalhtuchokgo Jordán (Juec. 7:22). Maski xla chu 300 ksoldados xtlakgwankgonit, ni talakgachokgolh. Patakutkgolh kgalhtuchokgo chu chuntiya kaʼakstalakgolh. Kamataxtukkgolh chu kamakgatlajakgolh (Juec. 8:​4-12). Gedeón lipawa pi Jehová xʼama matliwakglha, chu Jehová makgtayalh (Juec. 6:​14, 34). Makgtum, Gedeón chu ksoldados katantun kaputsaʼakstalakgolh chatiy mapakgsinanin xalak Madián tiku xtsalamakgo kxcamelloskan (Juec. 8:​12, 21). Pero israelitas ni talakgachokgokgolh chu Jehová kamakgtayalh nakamataxtukkgo chu kamakgatlajakgolh. Lakgkgolotsin na tlan nalipawankgo Jehová, Dios tiku «ni tlakgwan». Xla nakamaxki litliwakga akxni namaklakaskinkgo (Is. 40:​28, 29). w23.06 6, 7:14, 16

Kajwatiya talakaskin nalipawanaw Jehová xlakata tliwakga nawanaw akxni natitaxtuyaw taputsan. Kalilakpuwaw xkilhtamaku juez Barac. Israelitas ni xkgalhikgo tuku xtamaklakaskin xlakata xtalatlawanankgolh. Ni xkgalhikgo escudos chu lanzas. Maski chuna, Jehová wanilh Barac pi xʼalh talatlawa Sísara chu ksoldados, tiku xkgalhikgo lhuwa tuku xlimakgninankgo (Juec. 5:8). Palakachuwina Débora wanilh Barac pi xtalatlawalh Sísara, tiku xkgalhi 900 carros nema xlitlawakan guerra. Maski tlakg tlan xʼamaka kamaklakaskinkan carros niku xakaxtum xwanit, Barac kgalhakgaxmatnalh. Akxni soldados xtaktamakgo ksipi, Jehová malakgachalh lanka sen. Carros tamakgxtakgkgolh kputlun, chu Barac tlajanalh (Juec. 4:​1-7, 10, 13-16). Nachuna nala kimpalakatakan: Jehová nakinkamakgtayayan natlajananaw komo nalipawanaw chu natlawayaw tuku nakinkawaniyan xkachikin. w23.07 19:​17, 18

Lu xlakaskinka nakgalhkgalhinanaw xlakata nalakgtaxtuyaw. Xtachuna la kskujnin Dios xalamakgasa, talakaskin nakgalhkgalhiyaw asta akxni Dios namakgantaxti xtamalaknun (Heb. 6:​11, 12). Biblia kinkatamalakxtumiyan chatum chanana (San. 5:​7, 8). Tiku chananan lu palha skuja xlakata wi tuku nachan chu namunuwili, pero ni liwana katsi tuku kilhtamaku namakgala xtachanan. Maski chuna, lu kgalhkgalhinan xlakata liwana katsi pi namin kilhtamaku namakgala. Xtachuna la uma, skujniyaw Jehová maski “ni katsiyaw tukuya kilhtamaku namin kiMalanakan” (Mat. 24:42). Liwana katsiyaw pi Jehová namakgantaxti tuku malaknunit. Komo natlakgwanaw, max nialh katikgalhkgalhiputuw chu tsinu tsinu natamakgatliniyaw xaxlikana. Na max wa natsukuyaw putsayaw tuku kaj puntsu nakinkamakgapaxuwayan. Pero komo ni natlakgwanaw, natayaniyaw asta kxlisputni uma kakilhtamaku chu nalakgtaxtuyaw (Miq. 7:7). w23.08 21:7

Komo natamalakxtumiyaw Daniel 2:​41-43 atanu tuku lichuwinan xlibro Daniel chu Apocalipsis, akgatekgsaw pi uma tamapakgsin wa kilhchanima xtamapakgsinkan Reino Unido chu Estados Unidos. Daniel wa: «Tamapakgsin wi niku tliwakga nawan chu wi niku ni tliwakga katiwa». Ni lu tliwakga x’ama wan xlakata latamanin tiku tapakgsinikgo, nema kilhchanima tiyat, ni xʼamakgo maxkikgo talakaskin nalimasiya xlitliwakga chuna la xlitliwakga hierro. Tuku wan xlibro Daniel xlakata lanka imagen, limasiya pi xtamapakgsinkan Reino Unido chu Estados Unidos lu tliwakga. Akgtum liʼakxilhtit, makgtayananit xlakata xtlajananka kxaPulana chu kxliʼAkgtiy Guerra kxLikalanka Katiyatni. Pero tsinu tsinu taxlajwaninit chu chuntiya nataxlajwani, xlakata latamanin tiku tapakgsinikgo xʼakstukan latalatlawakgo. Na limasiya pi uma lanka tamapakgsin xaʼawatiya nema natawila akxni nina min nawan xTamapakgsin Dios. w23.08 10, 11:​12, 13

David titaxtulh lhuwa tuku tuwa chu wa xlakata xmin kilhtamaku xlakgaputsa (Sal. 18:​4, 5). Pero akxni xʼakxilha la Jehová xmakgtaya chu xlimasiyani tapaxkit, xtatliwakglhpara. Makgkatsilh pi Jehová, xʼamigo, xmajaxa «kxakatlan kasakgatni» chu niku xʼanan «lhuwa chuchut». Uma matliwakglhli chu makgtayalh chuntiya xatapaxuwan naskujnani (Sal. 18:​28-32; 23:2). Akxni titaxtuyaw tuku tuwa, akinin na tlan nawanaw: «Xlakata Jehová limasiyanit tapaxkit nema ni makgxtakgnan, ni sputnitaw» (Lam. 3:22; Col. 1:11). David xkgalhi lhuwa xtalamakgasitsin chu makglhuwa kalipekua tawi xlatamat. Pero tapaxkit nema Jehová xkgalhini xmakgtaya nialh napekuan. Xmakgkatsi pi Jehová ankgalhin xtawi. Wa xlakata tlan wa: «Tlawalh pi nialhtu xakpekuanilh» (Sal. 34:4). Maski xmin kilhtamaku lu xpekuan, tapaxkit nema Jehová xkgalhini tlakg tliwakga xwanit nixawa uma tapekua. w24.01 29, 30:​15-17

Wix nichuna katlawa la Jehoás. Akxni xninita Jehoiadá, sacerdote tiku tlakg xkgalhi limapakgsin, Jehoás laksakli nakatalalin tiku nitlan xlikatsikgo (2 Crón. 24:​17, 18). Kgalhakgaxmatli xtastakyawkan príncipes xalak Judá tiku ni xpaxkikgo Jehová. Nichuna xlitlawat xwanit, pero ni xatlan xʼamigos matlawikgolh tuku nitlan. Chu akxni xtapuxnimat, Zacarías, stakyawaputulh, Jehoás mamakgnininalh (2 Crón. 24:​20, 21; Mat. 23:35). ¡Jehoás xatonto wa! Tlan tuku xtlawanit xapulana, pero alistalh chatum apóstata chu makgnina litaxtulh. Titaxtulh kilhtamaku, xlakskujnin makgnikgolh (2 Crón. 24:​22-25). ¡Nichuna xtiʼakgspulalh komo chuntiya xtikgalhakgaxmatli Jehová chu xlakskujnin! w23.09 9:6

Jesús xkatsi pi Pedro nikxni x’ama makgxtakga Dios. Wa xlakata wanilh: «Nialh kapekuanti». Pedro nikxni patsankgalh pi Jesús lipawa. Alistalh xla chu xtala, Andrés, nialh skitinanin litaxtukgolh xlakata kstalanikgolh Mesías. Uma kaliminilh lhuwa tasikulunalin (Mar. 1:​16-18). Xlakata Pedro stalanilh Jesús, akxilhli tuku kaks malakawaninan. Akxilhli la Jesús kamapaksalh tiku xtatatlakgo, kalaktamakxtulh demonios tiku xkalaktanuma chu asta kamalakastakwanilh tiku xnikgonita (Mat. 8:​14-17; Mar. 5:​37, 41, 42). Na akxilhli tatlankit nema x’ama kgalhi Jesús kxTamapakgsin. Uma lakgpalilh xlatamat (Mar. 9:​1-8; 2 Ped. 1:​16-18). Pedro akxilhli tuku nikxni xlakpuwanit pi x’ama akxilha. ¡Lu tlan pi ni mastalh talakaskin pi xmakgatlajalh tuku nitlan xmakgkatsi! Komo chuna xtitlawalh, ni xtimakglhtinalh putum uma tasikulunalin. w23.09 21:​4, 5

Kxlimaktum xtatsokgni, apóstol Pedro wa: «Lu kalapaxkitit». Uma tapaxkit ni kaj makgtum tapatinan, wata «putum kilhtamaku tapatiputun achatum» (1 Ped. 4:8). Akxni Pedro wa uma, max xlilakpuwama tuku wanilh Jesús akxni litachuwinalh la nakatapatiyaw amakgapitsin. Akxni Pedro wanilh pi xtapatinamputun «asta makgtujun», max lakpuwa pi lu tlan xlikatsi. Pero Jesús masiyanilh pi ni kaj makgtujun xtalakaskin natapatinan, wata «asta tutupuxamakutujun». Uma wamputun pi putum kilhtamaku xtapatinalh. Akinin nachuna kilitlawatkan (Mat. 18:21). ¿Tuwa makgkatsiya? Ni kataxlajwani. Xlakata kimputumkan makglakgalhinanin, min kilhtamaku tuwa makgkatsiyaw natapatinanaw. Pero kaliskujti natapatiya mintala chu tlan katalalipimpara. w23.09 29:12

Akxni Jonás xwi kxpan skiti, liwana xkatsi pi Jehová xʼama kgaxmata xʼoración xlakata nitlan xlimakgkatsi tuku xtlawanit, chu xlipawan pi Jehová xʼama makgtaya. Akxni skiti kilhtaxtulh, Jonás makglhtinalh taskujut nema xmaxkikanit chu makgantaxtilh (Jon. 2:10–3:4). Akxni wix titaxtuya tuku tuwa, ¿makgkatsiya pi nila tlawaya oración? ¿O makgkatsiya pi ni kgalhiya litliwakga xlakata nakgalhtawakgaya? Jehová akgatekgsa tuku titaxtupat. Maski ni lhuwa tuku nawaniya, liwana kakatsi pi nakgaxmatniyan chu namaxkiyan tuku maklakaskina (Efes. 3:20). Komo tuwa makgkatsiya nakgalhtawakgaya xlakata katsanajwapat o lu lipuwampat, kakgaxpatti grabaciones niku likgalhtawakgakanit Biblia o atanu likgalhtawakga. O kakgaxpatti takilhtlin o kaʼakxilhti akgtum video nema min kjw.org. Akxni tlawaniya oración Jehová o maklakaskina tuku tlawanit xkachikin, xtachuna la komo wanipat Jehová «katlawa litlan, kakimaxki litliwakga». w23.10 13:6; 14:9

Xpulakni tabernáculo chu templos xalak Jerusalén, lakxtum xtasiyakgo. Pulaktiy xtapitsikgonit: «XaSanto» chu «Tlakg xaSanto», nema xlitapapitsikgonit akgtum cortina (Heb. 9:​2-5; Éx. 26:​31-33). KxaSanto xwi akgtum limakgskgon xaʼoro, pumakamastan niku klhkuyukan incienso chu mesa niku xwilikan kaxtalanchu xla tamakamastan. Kajwatiya «xatalaksakni sacerdotes» tlan xtanukgo (Núm. 3:​3, 7, 10). Niku Tlakg xaSanto xwi arca xla talakkaxlan xa’oro chu xkilhchanima pi Jehová xkatawi xkachikin (Éx. 25:​21, 22). Kajwatiya sacerdote tiku tlakg xkgalhi limapakgsin tlan xtanu. Kilhtamaku akxni kXapakan Talakgalhin, nema xtlawakan akgatunu kata, sacerdote tiku tlakg xkgalhi limapakgsin xlin xkgalhni animales niku Tlakg xaSanto xlakata xtapatika xtalakgalhin chu xtalakgalhin kachikin (Lev. 16:​2, 17). Jehová masiyatilhalh tuku xkilhchanima tuku xwi chu tuku xtlawakan ktabernáculo (Heb. 9:​6, 7). w23.10 27:12

Biblia kinkalimapakgsiyan: «Kalapaxkitit minchatunukan» (Juan 15:12; Rom. 13:8; 1 Tes. 4:9; 1 Ped. 1:22; 1 Juan 4:11). Pero tapaxkit tsukuyacha kkinakujkan, niku nitila akxilha. Xlakata amakgapitsin naʼakxilhkgo tuku wi kkinakujkan, tlan nalimasiyayaw akxni wi tuku tlawayaw chu wi tuku wanaw. Pulaklhuwa la tlan nalimasiyayaw pi kapaxkiyaw kinatalankan. Biblia wan la natlawayaw: «Nalawaniyatit tuku xaxlikana» (Zac. 8:16). «Kalatalalipitit» (Mar. 9:50). «Wixin pulana kamasiyatit pi kamaxkiyatit kakni amakgapitsin» (Rom. 12:10). «Xatapaxuwan kalamakgamakglhtinantit» (Rom. 15:7). «Chuntiya […] lu kalatapatiputuntit» (Col. 3:13). «Chatunu chatunu chuntiya kalalipinitit mintakukakan» (Gál. 6:2). «Chuntiya tlan kalalimamakgkatsinitit […] tachuwin» (1 Tes. 4:18). «Chuntiya […] kalamakgtayatit» (1 Tes. 5:11). «Kalapalakaskintit kʼoración» (Sant. 5:16). w23.11 9:​7, 8

Chali chali kililaksakatkan tuku nalimasiya pi tliwakga kgalhiyaw kintakanajlakan. Akgtum liʼakxilhtit, laksakaw tiku nakatalalinaw, tuku nalilakgastananaw o asta niku nakichan kintakgalhtawakgakan. Na lhuwa tuku kililaksakatkan xlakata tamakgaxtokgat, kamanan chu xlakata taskujut. Tlan nalilakpuwanaw: «¿Klimasiya pi kkanajla pi uma kakilhtamaku nialh makgas namasputukan chu Dios nalimin xasasti kakilhtamaku? ¿O klaksaka tuku xtachuna laksakkgo tiku kajwatiya lipaxuwaputunkgo xlatamatkan la uku?» (Mat. 6:​19, 20; Luc. 12:​16-21). Atanu niku talakaskin pi nakgalhiyaw tliwakga takanajla wa akxni kinkaputsastalanikanan, akxni kgalhiyaw akgtum tajatat o akxni wi tuku lu kinkamakgalipuwanan. Komo max makgas makgapalama uma, natalakaskin nakgalhiyaw tliwakga takanajla xlakata natayaniyaw chu chuntiya xatapaxuwan naskujniyaw Jehová (1 Ped. 1:​6, 7). w23.04 26, 27:​4, 5

Jehová lakaskin pi kaliskujwi tuku skiniyaw. Kalilakpuwaw pi chatum tala amputun kʼasamblea regional chu skini Jehová pi kamakgtayalh namaxkikan talakaskin kxtaskujut. ¿Tuku natlawa Jehová? Max namakgtaya ni napekuan akxni natachuwinan xmalana. Pero natalakaskin pi wa tala naʼan tachuwinan. Chu asta max nawani pi wi tiku natalalakgpali kilhtamaku akxni skuja xlakata nalakgxokgowili kilhtamaku nema ni katiskujli o max tlan nawani pi maski ni kaxokgonika kilhtamaku nema ni katiskujli. Jehová lakaskin pi makglhuwa kawaniw tuku lilakgaputsamaw. Jesús lichuwinalh pi ni tunkun xʼamaw makglhtinanaw tuku skinaw kkiʼoracioneskan (Luc. 11:9). Pero ni kataxlajwaniw. Katasaskiniw Jehová chu makglhuwa chuna katlawaw (Luc. 18:​1-7). Chuna limasiyaniyaw pi xlikana maklakaskinaw tuku skinimaw chu pi lipawanaw pi xla tlan nakinkamakgtayayan. w23.11 22:​10, 11

Jehová malaknunilh xʼamigo, Abrahán, pi xʼama kamaklakaskin xkamanan xlakata xkasikulunatlawalh putum kachikinin xalak katiyatni (Gén. 15:5; 22:18). Xlakata Abrahán lu xkanajlani Dios, liwana xkatsi pi xʼama kgantaxtu xtamalaknun. Pero akxni Abrahán atsinu ni xmakgatsi 100 kata chu xpuskat xkgalhi 90 kata, nina xkgalhikgo kamanan (Gén. 21:​1-7). Pero Biblia wan pi Abrahán lipawa xtakgalhkgalhin chu «xkanajla pi xʼama litaxtu xtlat lhuwa kachikinin» (Rom. 4:18). Chu xtakgalhkgalhin kgantaxtulh: lakachilh xkgawasa, Isaac. ¿Tuku xlakata Abrahán liwana xkatsi pi Jehová xʼama makgantaxti xtamalaknun? Xlakata liwana xlakgapasa Jehová, «xkanajla» pi xʼama makgantaxti tuku xmalaknuninit (Rom. 4:21). Xlakata xkanajla, Jehová xaʼakgstitum liʼakxilhli Abrahán (Sant. 2:23). w23.12 8:​1, 2

Chatum xatalipaw kgawasa makgantaxti tuku lakgayawakan. Kgawasa, kalilakpuwanti xliʼakxilhtit Jesús. Xla ankgalhin kuentajtlawalh tuku xlakgayawakan. Chu makgantaxtilh tuku xlimapakgsinit Jehová, asta maski tuwa makgkatsilh. Xkapaxki latamanin chu wa xlakata makamastalh xlatamat xpalakatakan (Juan 13:1). Chuna la Jesús, kaliskujti namakgantaxtiya tuku lakgayawakana. Komo ni katsiya la natlawaya, kataktuju chu kaskinti tamakgtay. Talakaskin lu naliskuja uma (Rom. 12:11). Kamakgantaxti tuku lakgayawakana; chuna katlawa xlakata makgapaxuwaputuna «Jehová chu ni wa lakchixkuwin» (Col. 3:23). Xlikana, xlakata na makglakgalhina wix, namin kilhtamaku natalakaskin nalitayaya pi wi tuku nila tlawaya chu nalitayaya tuku nitlan tlawaya (Prov. 11:2). w23.12 26:8

Akxni wi tiku tamunu, makgtapakgsi kxfamilia Jehová. Tiku lu tlan talalinkgo Jehová makgkatsikgo chuna la wa salmista David: «Paxuwa chixku tiku wix laksaka chu litana kmimpaxtun xlakata nalatama kminchik» (Sal. 65:4). Jehová ni kaxatikawa tiku maxki talakaskin namakgtapakgsi kxkachikin. Xla katalakatsuwini tiku limasiyanikgo pi xlikana xʼamigos litaxtuputunkgo (Sant. 4:8). Akxni tamakamastaniya Jehová chu tamunuya, xla malaknuniyan pi “napuxtakgamakganiyan tasikulunalin asta akxni nialhtu natsankganiyan” (Mal. 3:10; Jer. 17:8). Akxni tamunuya aku matsukipat naskujnaniya Jehová. Ankgalhin kamakgantaxti tuku malaknuni, maski natitaxtuya taputsan o namatlawiputunkana tuku nitlan (Ecles. 5:​4, 5). Kaliskujti nastalaniya xliʼakxilhtit Jesús chu namakgantaxtiya xlimapakgsin (Mat. 28:​19, 20; 1 Ped. 2:21). w24.03 8:​1-3

Komo tiku makgaxtokgatit ni lakgatiyatit akxtum tawilayatit, ¿tuku nakamakgtayayan? Kalilakpuwantit lhkuyat. Akxni aku mapasikan, ni lu lhuwa lhkuyat tawila. Xlakata tlakg nalakgpasa, talakaskin tsinu tsinu tlakg xalakchalanka kiwi namapunitilhakan. Xtachuna la uma, chali chali kaliskujtit xlakata tsinu tsinu tlakg lhuwa kilhtamaku akxtum natawilayatit. Katlawatit tuku minchatiykan lakgatiyatit, chu chuna tlakg nalapaxkiyatit (Sant. 3:18). Lu xlakaskinka nalamaxkiyatit kakni. Uma xtachuna la akxni sunukan o makgnekgewilikan lhkuyat. Komo nichuna natlawakan, lakapala nalakgmixa. Nachuna komo ni nalalimasiyanikan kakni ktamakgaxtokgat, tapaxkit lakapala nalakgsputa. Kalakapastaktit pi tuku tlakg xlakaskinka ni wa komo chatum nalakpuwan pi mastama kakni, wata wa pi achatum makgkatsi pi maxkimaka kakni. w23.05 22:9; 24:​14, 15

Biblia kalichuwinan kskujnin Dios tiku pekuankgolh xpalakata xtalatlawanakan o laklanka taʼakglhuwit (Sal. 18:4; 55:​1, 5). ¿Chu wix? ¿Patinampat xlakata nitlan likatsinikan kʼescuela, kmintaskujut, kmifamilia o mapakgsinanin? ¿Lilakgaputsapat xlakata kgalhiya akgtum xasnun tajatat? Komo chuna titaxtupat, max makgkatsiya la aktsu kgawasa tiku ni tliwakga. Pero Jehová matliwakglhan chu skaya mamakgkatsiniyan. Wa xlakata, lu xlakaskinka pi natlawaniyaw oración chu nalikgalhtawakgaya xTachuwin (Sal. 77:​1, 12-14). Komo chuna natlawaya, akxni natitaxtuyaw tuku lu tuwa, lakapala natlawaniyaw oración Jehová. Kalitachuwinanti tuku lilakgaputsapat chu tuku makgapekuanan, kamaxki talakaskin nalimakgoxamixiyan chu nalikgalhtiyan xTachuwin (Sal. 119:28). w24.01 24, 25:​14-16

Xlakata nalakgchanaw tuku lakkaxwilinitaw xlakata kintakanajlakan, lu xlakaskinka pi chuna natlawaputunaw. Akxni lu tlawaputunaw tuku lakkaxwilinitaw, tlakg ni tuwa katimakgantaxtiw. Kaskini Jehová pi kamakgtayan, xla tlan nalimakgtayayan xʼespíritu santo xlakata natlawaputuna tuku lakkaxwilinita nalakgchipina. Min kilhtamaku max lakkaxwiliyaw wi tuku natlawayaw xlakata katsiyaw pi chuna kilitlawatkan, pero max ni lu tlawaputunaw. Kalilakpuwanti tuku Jehová tlawanit mimpalakata (Sal. 143:5). Apóstol Pablo lilakpuwa la xlimasiyaninit Jehová talakgalhaman, chu uma makgpuwantinilh xliputum xnaku naskujnani (1 Cor. 15:​9, 10; 1 Tim. 1:​12-14). Xtachuna la Pablo, komo tlakg nalilakpuwana tuku Jehová tlawanit mimpalakata, namakgpuwantiniyan nalakgchipina tuku lakkaxwilinita (Sal. 116:12). w23.05 26, 27:​3-5

Jehová lu tlan limakgkatsi akxni malankiyaw xtukuwani (Sal. 119:108). ¿Wamputun uma pi Jehová xtachuna la latamanin, tiku kajwatiya putsakgo nakamalankikan xlakata tlan namakgkatsikgo? Nichuna. Satanás wanit akgtum taʼakgsanin kimpalakatakan. Wan pi nipara chatum lataman katikgalhmakgtayalh Dios akxni natitaxtu tuku tuwa chu namakgatsankganani. Wan pi namakgxtakgaw Dios komo namakgkatsiyaw pi chuna tlakg tlan nakinkakitaxtuniyan (Job 1:​9-11; 2:4). Pero Job, tiku ni makgxtakgli Jehová, limasiyalh pi Satanás chatum akgsanina. Chatunu akinin akgtum talakgalhaman liʼakxilhaw nakgalhmakgtayayaw xtukuwani Jehová chu ni namakgatsankgananiyaw xlakata chuna namakgapaxuwayaw (Prov. 27:11). w24.02 8, 9:​3-5

Akxni Moisés xninita, Jehová kalaksakli jueces xlakata xpulalinkgolh xkachikin. Chu akxni xwilakgo mapakgsinanin, kalaksakli palakachuwinanin xlakata xkapulalilh. Makgapitsi kgaxmatkgolh xtastakyawkan palakachuwinanin, chuna la David, tiku taktujulh chu makgamakglhtinalh xtastakyaw Natán (2 Sam. 12:​7, 13; 1 Crón. 17:​3, 4). Jehosafat kgaxmatnilh palakachuwina Jahaziel chu kamaʼakgpuwantinilh tiku xlamakgo kJudá pi xkakanajlanikgolh xpalakachuwinanin Dios (2 Crón. 20:​14, 15). Akxni xtitaxtumakgo tuku tuwa, Ezequías skinilh xtamakgtay palakachuwina Isaías (Is. 37:​1-6). Akxni mapakgsinanin kstalanikgo xtapulalit Jehová, xla xkasikulunatlawa chu xkuentajtlawa kachikin (2 Crón. 20:​29, 30; 32:22). Jehová kalipulalilh xkachikin palakachuwinanin. w24.02 21:8

Satanás lakaskin pi kakatalaliw latamanin tiku natlawakgo pi tuwa namakgkatsiyaw nakgalhakgaxmataw xtastakyaw Jehová. La uku tlakg xlakaskinka kuenta nalayaw, xlakata kkinkilhtamakujkan ni kajwatiya kalakan katachuwinankan latamanin, wata nachuna kredes sociales. Maski kakilhtamaku wan pi tlawakan tuku xalixkajni nitu wamputun, ni kataʼakgskgawiw; liwana katsiyaw pi uma ni xlikana (Efes. 4:​19, 20). Kalilakpuwaw: «¿Kuenta ktlawa xlakata ni lu nakkatalalin kincompañeros xalak escuela, tiku kkataskuja o latamanin tiku ni maxkikgo kakni xlimapakgsin Jehová? ¿Ni kpekuan chu kkgalhmakgtaya xtastakyaw Biblia maski latamanin nakiwanikgo pi kmalakatsali?». Na kuenta kilitlawatkan tiku katalalinaw kcongregación, chuna la wan 2 Timoteo 2:​20-22. Kalakapastakwi pi ni putum kintikamakgtayakgon xlakata ni namakgxtakgaw Jehová. w24.03 22, 23:​11, 12

¿Minit kilhtamaku lilakpuwanita la tasiya Jehová? Maski nila akxilhaw, Biblia tipalhuwa la limapakuwi. Wan pi «chichini chu escudo», chu «lhkuyat nema putum malakgsputu» (Sal. 84:11; Heb. 12:29). Ezequiel wa pi Jehová xtasiya la akgtum chiwix xazafiro, chu la xmakgxkgakganat chamakxkulit (Ezeq. 1:​26-28). Xlakata nila akxilhaw Jehová, max tuwa makgkatsiyaw nakanajlayaw pi kinkapaxkiyan. O max xlakata kintlatkan nikxni kinkapaxkin, lakpuwanaw pi Dios nikxni kintikapaxkin. Pero xla akgatekgsa la makgkatsiyaw chu katsi tuku xlakata tuwa makgkatsiyaw natalakatsuwiniyaw. Chu wa xlakata kBiblia kinkalitachuwinanan la likatsi. Tapaxkit limasiya la likatsi Jehová (1 Juan 4:8). Wa uma tayat nema tlakg lilakgapaskan; putum tuku xla tlawa chuna tlawa xlakata paxkinan. Xtapaxkit lu lanka chu tliwakga, chu asta kapaxki tiku lakmakgankgo (Mat. 5:​44, 45). w24.01 26:​1-3

Puklhni nema israelitas xʼakxilhkgo kakuwani chu lhkuyat nema x’akxilhkgo katsisni xlimasiya pi Jehová xlaksaknit Moisés xlakata xkatamakxtulh israelitas kʼEgipto (Éx. 13:21). Moisés stalanilh puklhni chu lhkuyat, chu chuna tlan chankgolh kxaSpinini Pupunu. Akxni israelitas akxilhkgolh pi kxlakatinkan xwi pupunu chu kxchankgenkan xmimakgo egipcios, lu pekuankgolh. Lakpuwankgolh pi lu nitlan tuku tlawalh Moisés xlakata anta kalilh. Pero wa Jehová tiku xkalinit (Éx. 14:2). Jehová tlawalh akgtum milagro xlakata xkalakgmaxtulh (Éx. 14:​26-28). Moisés stalanilh puklhni 40 kata xlakata tlan xkapulalilh israelitas kdesierto (Éx. 33:​7, 9, 10). Lata kpuklhni, Jehová xtachuwinan Moisés, chu xla xkalitachuwinan kachikin tuku xwanit Jehová. Israelitas xʼakxilhkgo pi Jehová xlimaklakaskima Moisés xlakata xkapulalilh. w24.02 21:​4, 5