Agosto

Uma versículo masiya pulaktiy tuku lu xlakaskinka: 1) tiku xaʼakgstitum titaxtukgo tuku tuwa chu 2) Jehová kamakgtaya natayanikgo. Jehová kinkamakgtayayan nalakpuwanaw pi natitaxtuyaw tuku tuwa kʼuma kakilhtamaku. Maski Jehová kinkawaniyan pi napaxuwayaw komo naskujniyaw, uma ni wamputun pi ni katikgalhiw taʼakglhuwit (Is. 66:14). Xla lakaskin pi kalilakpuwaw tuku kinkamalaknuninitan, latamat nema ni kgalhi xlisputni (2 Cor. 4:​16-18). Chu xlakata nina chin uma kilhtamaku, Jehová kinkamakgtayayan natayaniyaw chali chali (Lam. 3:​22-24). ¿Tuku kinkamasiyaniyan xliʼakxilhtitkan kskujnin Jehová xalamakgasa chu xala uku? Max kaj lakapala nakinkalakgchinan taʼakglhuwit, pero komo lipawanaw Jehová, xla ankgalhin nakinkamakgtayayan (Sal. 55:22). w23.04 14, 15:​3, 4

José chu María tunkun kakgalhakgaxmatkgolh mapakgsinanin asta maski tuwa makgkatsikgolh (Luc. 2:​1-6). Kalilakpuwaw, max tuwa makgkatsikgolh nakgalhakgaxmatkgo mapakgsina akxni María atsinu xtsankgani namalakachini kskgata. Mapakgsina César Augusto limapakgsinalh pi xtlawaka akgtum censo. Xtalakaskin pi José chu María xʼankgolh kBelén xlakata xkgalhakgaxmatkgolh uma limapakgsin. Max lu tuwa xkakitaxtunilh xlakata xtalakaskin pi xtlawankgolh kkasipijni 150 kilómetros xlilakgamakgat. Chu María tlakg tuwa xʼama kitaxtuni. Max xchatiykan xlilakgaputsamakgo pi skgata nitu xʼakgspulalh. ¿Chu komo ktiji xlakachilh skgata? ¡María xʼama malakachini Mesías! José chu María ni likilhankgolh uma xlakata ni nakgalhakgaxmatkgo limapakgsin. Chu Jehová kasikulunatlawalh: María tlan chalh kBelén, tlan lakachilh kskgata chu makgtayanalh nakgantaxtu tuku xlichuwinankanit pi xʼama la (Miq. 5:2). w23.10 8:9; 9:​11, 12

Lhuwa natalan lu pekuankgo maski kaj lilakpuwankgo namastakgo xtakgalhtinkan ktamakxtumit. Pulaktum tuku namakgtayayan wa nalakkaxwiliya tuku naʼakxilhkan ktamakxtumit (Prov. 21:5). Akxni liwana naʼakgatekgsa tuku nataʼakxilha, tlakg ni tuwa katimakgkatsi namastaya mintakgalhtin. Atanu tuku tlan natlawaya wa pi ni lhuwa tuku nakgalhtinana (Prov. 15:23; 17:27). Komo ni lhuwa tuku nawana, ni lu katipekuanti. Komo nawana tuku akgatekgsnita, natalan naʼakxilhkgo pi liwana lakkaxwilinita mintakgalhtin. Komo tlawanitata tuku lichuwinaw pero chuntiya pekuana, kalakapastakti pi Jehová xtapalh liʼakxilha putum tuku tlawaya xlakata nakgalhtinana (Luc. 21:​1-4). Jehová ni lakaskin natlawaya tuku wix nialh matlaniya (Filip. 4:5). Wa xlakata kalilakpuwanti tuku tlan natlawaya, kaliskujti chu kaskini Jehová pi kamakgtayan ni lu napekuana. Max xapulana, tlan namastaya kaj aktsu mintakgalhtin. w23.04 21:​6-8

Apóstol Pablo kinkatamalakxtumin soldados tiku skgalalh wilakgo. Kʼguerra, chatum soldado skgalalh xlitawilat. Limasiyayaw pi skgalalh wilaw chu kgalhkgalhimaw xkilhtamaku Jehová komo kgalhiyaw takanajla chu tapaxkit, chu lilakpuwanaw lakgtaxtut. Xtachuna la tuku xlitakuxmumakgtaya chatum soldado xkuentajtlawa xnaku, takanajla chu tapaxkit kuentajtlawa tuku makgkatsiyaw chu tuku lakpuwanaw. Chuna chuntiya naskujniyaw Jehová chu nastalaniyaw Jesús. Takanajla kinkamakgtayayan nalipawanaw pi Jehová nakinkasikulunatlawayan (Heb. 11:6). Chu kinkamakgtayayan ni namakgxtakgaw kimPulalinakan Jesús. Komo nalilakpuwanaw tuku tlawakgo natalan xlakata ni namakgxtakgkgo Jehová maski kaputsastalanimaka o ni kgalhikgo tumin natatliwakglha kintakanajlakan chu natayaniyaw. Chu ni lhuwa tuku kakgalhiputuw, pulana kawiliw xTamapakgsin Dios. w23.06 10:​8, 9

Espíritu santo nakinkamakgtayayan nakgalhiyaw tayat nema maklakaskinaw xlakata nalakgchanaw tuku lakkaxwilinitaw, liwaka akxni tuwa makgkatsiyaw o ni tlawaputunaw. Kaskini Jehová x’espíritu santo xlakata nakgalhiya tayat nema namakgtayayan nalakgchipina tuku lakkaxwilinita (Luc. 11:13; Gál. 5:​22, 23). Ni kakgalhkgalhi pi putum tlan natawila. Kʼuma kakilhtamaku nikxni putum tlan katitawilalh. Komo kajwatiya nakgalhkgalhitawilayaw chu nitu natlawayaw, nikxni katilakgchaw tuku lakkaxwilinitaw. Tsinu tsinu katlawatilha. Max min kilhtamaku nialh tlawaputuna tuku lakkaxwilinita xlakata makgkatsiya pi lu lhuwa tuku tlawaputuna. Komo chuna akgspulaman, max tlan tsinu tsinu xtlawatilha. Komo kgalhiputuna akgtum xatlan tayat, tlan tsinu tsinu xlimasiyatilha. Komo xamaktuminika likgalhtawakgaputuna Biblia, tsinu tsinu kalikgalhtawakgatilha. w23.05 29:​11-13

Kʼuma xaʼawatiya kilhtamaku, Jehová maklakaskinit xkachikin xlakata namatliwakglha kintakanajlakan, chu chuntiya naʼanaw “kTiji xaSanto” (Is. 35:8; 48:17; 60:17). Akxni wi tiku tsuku likgalhtawakga Biblia, tsuku tlawan “kTiji xaSanto”. Makgapitsin kaj ni lhuwa tlawankgo chu makgxtakgkgo. Pero amakgapitsin liwana lakpuwankgonit chuntiya natlawankgo kʼuma tiji asta nachankgo niku linan. Pero ¿niku linan uma tiji? Xpalakatakan tiku kgalhkgalhimakgo nalatamakgo kʼakgapun, «Tiji xaSanto» kalin «kxparaíso Dios», kʼakgapun (Apoc. 2:7). Chu xpalakatakan tiku kgalhkgalhimakgo nalatamakgo kKatiyatni, kalin akxni naʼakgasputa xTamapakgsin Cristo xa’Akgtum Mil Kata, akxni putum latamanin nialh nakgalhikgo talakgalhin. Komo wix tlawampat kʼuma tiji, ni katalakgaspittaya, chuntiya katlawanti asta nachipina kxasasti kakilhtamaku. w23.05 17:15; 19:​16-18

Komo nalilakpuwana putum tuku Jehová tlawanit mimpalakata, namakgpuwantiniyan natamakamastaniya xlakata paxtikatsiniya (Sal. 116:​12-14). Biblia wan pi «putum xatlan chu nema xalaktlan tamaskiwin» wa Jehová masta (Sant. 1:17). Akgtum lu xlakaskinka tamaskiwin nema kinkamaxkinitan wa xtamakamastan xKgawasa, Jesucristo. Xlakata uma lu xastlan tamaskiwin, wix tlan xʼamigo Dios nawana chu tlan nalatapaya putum kilhtamaku (1 Juan 4:​9, 10). Pulaktum la nalimasiyaniya pi paxtikatsiniya tapaxkit nema limasiyaniyan chu putum tuku tlawanit mimpalakata wa pi namakamaxkiya milatamat (Deut. 16:17; 2 Cor. 5:15). w24.03 5:8

Akxni kaʼakxilhaw latamanin la linkgo xlatamatkan, makgkatsiyaw chuna la Lot. Xla «lu xlilakgaputsa xlakata tiku lixkajni xlikatsikgo xtlawakgo tuku ni xlilat chu ni xlilakamaxanankgo», xlakata xla xkatsi pi Jehová ni kaʼakxilhputun latamanin tiku chuna likatsikgo (2 Ped. 2:​7, 8). Lot xpaxki Jehová chu lu xmaxki kakni, wa xlakata kxkajni chuna la xlikatsikgo latamanin. La uku latamanin nipara tsinu maxkikgo kakni xlimapakgsin Dios. Komo akinin paxkiyaw Dios chu kgalhiniyaw tapekua, xaskulunku nalinaw kilatamatkan. Libro xla Proverbios kinkamakgtayayan chu kinkamakgpuwantiniyan natlawayaw tuku tlan. Kimputumkan lu nalitamakgtayayaw xatlan tastakyaw nema min k’uma libro. Tiku pekuani Jehová ni lakpuwan pi pulaktum tayat ni lu lixkajni chu kuenta tlawa ni nakatalalin tiku lixkajni likatsikgo. w23.06 20:​1, 2; 21:5

Max wix titaxtupat tuku tuwa xlakata mifamilia ni lakaskin pi naskujnaniya Jehová, o max talakaskinit pi wi tuku nalimakgxtakga xlakata wa pulana nawiliya kmilatamat xTamapakgsin Dios (Mat. 6:33). Komo chuna titaxtupat, liwana kakatsi pi Jehová katsi putum tuku tlawanita xlakata naskujnaniya (Heb. 6:10). Max akxilhnita pi xlikana tuku wa Jesús: «Niti makgxtakgnit chiki, o xnatalan lakgkgawasan, o xnatalan laktsuman, o xtse, o xtlat, o xkamanan, o kapukuxtun, kimpalakata chu xpalakata xatlan tamakatsinin, tiku kʼuma kilhtamaku ni namakglhtinan akgtum ciento liwaka, chu kkakilhtamaku nema aku mima namakglhtinan latamat nema ni kgalhi xlisputni» (Mar. 10:​29, 30). Tasikulunalin nema makglhtinanita tlakg lhuwa nixawa tuku makgxtakgnita (Sal. 37:4). w24.03 9:5

Natalan xalak Antioquía lu kalakgalhamankgolh natalan xalak Judea akxni katsikgolh tuku xtitaxtumakgo, chu kamalakgachanikgolh tamakgtay. «Xchatunukan makgtayanankgolh chuna la xmatlanikgo» (Hech. 11:​27-30). Maski natalan tiku xtitaxtumakgo tuku tuwa lu lakgamakgat xwilakgo, natalan xalak Antioquía kamakgtayakgolh (1 Juan 3:​17, 18). Akinin na tlan nalimasiyayaw pi lakgalhamananaw akxni kinatalankan titaxtukgo tuku tuwa. Max tlan nakawaniyaw lakgkgolotsin pi amputunaw makgtayananaw, tlan namastayaw kintuminkan kʼobra mundial chu natlawayaw oración xpalakatakan tiku patinamakgo. Kinatalankan na max namaklakaskinkgo nakamakgtayayaw xlakata nakgalhikgo tuku maklakaskinkgo. Lakaskinaw pi akxni namin kiMapakgsinakan Jesucristo, naʼakxilha pi limasiyamaw talakgalhaman chu nakinkawaniyan: «Kamakglhtinantit Tamapakgsin» (Mat. 25:​34-40). w23.07 4:​9, 10; 6:12

Jesús limasiyalh pi ni xatsakat xwanit akxni xlama kKatiyatni. Maski xmalakgachakanit xlakata nakalitachuwinan Dios israelitas tiku xlitaxtukgo «xtachuna xaʼakgtsankgan borregos», akgtum kilhtamaku makgtayalh chatum puskat tiku ni israelita xwanit. Xla tasaskinilh pi xmapaksalh xtsumat, tiku xlaktanuma demonio chu lu xpatinama. Jesús lakgalhamalh chu mapaksalh (Mat. 15:​21-28). Kalilakpuwaw atanu liʼakxilhtit. Jesús xwanit: «Putum tiku nakilakgmakgan […] na naklakgmakgan» (Mat. 10:33). ¿Pero lakgmakgalh apóstol Pedro xlakata makgtutu wa pi ni xlakgapasa? Nichuna. Jesús xkatsi pi Pedro nitlan xlimakgkatsi tuku xtlawanit chu xlimasiyanit pi ni xmakgxtakgnan. Akxni xlakastakwananita, Jesús tasiyanilh Pedro chu max wanilh pi xtapatinit chu lu xpaxki (Luc. 24:​33, 34). Jehová chu Jesús ni xalaktsakatwa. Akinin na ni xalaktsakatwa kawaw. w23.07 21:​6, 7

¿La nakalimasiyaniyaw latamanin pi Dios namakgantaxti xtamalaknun? Pulana, kakawaniw pi wa Jehová tiku malaknu. Apocalipsis wan: «Tiku xwi kpumapakgsin wa: “¡Kaʼakxilhti! Kmasastima putum tuku anan”». Xla makgantaxtiputun xtamalaknun chu kgalhi liskgalala chu litliwakga xlakata natlawa. Xlipulaktiy, xla liwana katsi pi nakgantaxtu xtamalaknun chu lichuwinan xtachuna la kgantaxtunita. Xla wan: «Umakgolh tachuwin tlan lipawankan chu xaxlikana». Chu wampara: «¡Kgantaxtukgonita!». Xlipulaktutu, akxni Jehová wi tuku matsuki, ankgalhin masputu. Tachuwin «Akit Kilhtsukut chu Lisputni» chuna limasiya (Apoc. 21:6). Jehová nalimasiya pi Satanás chatum akgsanina. Akxni wi tiku nawaniyan: «Lu tlan takgaxmata pero ni xkatsi komo nakgantaxtu», kalikgalhtawakgani Apocalipsis 21:​5, 6. Kamasiyani pi Jehová liwana limasiyanit pi nakgantaxtu xtamalaknun. Xtachuna la komo firmarlinit maktum kapsnat niku litayanit pi chuna natlawa (Is. 65:16). w23.11 7:​18, 19

¿Akxilhli Abrahán la kgantaxtulh uma? Ni putum akxilhli. Abrahán xkgalhi 75 kata chu ni xkgalhi kamanan. Titaxtulh 25 kata lata xpatakutnit kgalhtuchokgo Éufrates akxni lakachilh xkgawasa, Isaac. Chu 60 kata alistalh lakachinkgolh xnatanatni, Esaú chu Jacob (Heb. 6:15). Pero Abrahán ni akxilhli la xkamanan lanka kachikin litaxtukgolh chu tanukgolh kTiyat nema xKawanikanit pi Nakamaxkikan. Maski chuna, lu tlan talalilh Jehová (Sant. 2:23). Kalilakpuwanti la napaxuwa akxni nalakastakwanan. Nakatsi pi xlakata xtakanajla chu kgalhkgalhinalh, putum kachikin makglhtinankgolh lanka tasikulunalin (Gén. 22:18). ¿Tuku kinkamasiyaniyan? Max ni katiʼakxilhwi la nakgantaxtu putum xtamalaknun Jehová kkinkilhtamakujkan. Pero komo nakgalhkgalhinanaw, liwana kakatsiw pi Jehová nakinkasikulunatlawayan la uku chu kkilhtamaku nema aku mima (Mar. 10:​29, 30). w23.08 24:14

Akxni mapakgsina Uzías kgawasaku xwanit, taktujulh chu limasiyalh pi xpekuani «xaxlikana Dios». Latamalh 68 kata, chu akglhuwa kata Jehová sikulunatlawalh (2 Crón. 26:​1-4). Kamakgatlajalh lhuwa kachikinin chu kuentajtlawalh kachikin Jerusalén (2 Crón. 26:​6-15). Max lu tlan xlimakgkatsi putum tuku tlan xkitaxtunima xlakata Jehová xmakgtayama (Ecl. 3:​12, 13). Uzías xlismaninit namasta limapakgsin, chu max uma malakpuwanilh pi tlan xtlawalh tuku xlakaskin. Akgtum kilhtamaku, tanulh kxtemplo Jehová chu xmakamastaputun incienso kpumakamastan, pero ni xkalakgchan mapakgsinanin chuna natlawakgo (2 Crón. 26:​16-18). Azarías, sacerdote tiku tlakg xkgalhi limapakgsin, stakyawalh Uzías chu xla lu sitsilh. Uzías laktlawalh chuna la tlan kskujnanima Jehová chu xla limalakgaxokgelh lepra (2 Crón. 26:​19-21). ¡Nichuna xtikitaxtunilh komo chuntiya xtitaktujulh! w23.09 10:​9, 10

Pedro chuntiya liskujli namakgatlaja tuku xlakpuwan chu tuku xmakgkatsi. Kkata 36, akxilhli akxni Cornelio, tiku ni judío xwanit, makglhtinalh espíritu santo. Uma limasiyalh pi «Dios ni laksakpaxkinan» chu pi latamanin xalak atanu kachikinin tlan xmakgtapakgsikgolh kcongregación (Hech. 10:​34, 44, 45). Lata uma kilhtamaku, tsukulh katawayan tiku ni judíos xwankgonit. Pero makgapitsi natalan tiku judíos xwankgonit xlakpuwankgo pi judíos chu tiku ni judíos ni akxtum xliwayanatkan xwanit. Akxni tiku chuna xlakpuwankgo chankgolh k’Antioquía, Pedro nialh katawayalh tiku ni judíos xwankgonit max xlakata pekualh. Apóstol Pablo akxilhli tuku xtlawama Pedro chu stakyawalh kxlakatin putum natalan (Gál. 2:​13, 14). Maski nitlan tuku tlawalh, ni taxlajwanilh chu chuntiya liskujli natalakgpali. w23.09 22:8

Komo naʼakxilha pi wi tuku nitlan tlawapat, ni kalitaxlajwani. Kalakapastakti «xtalakgalhaman Malana» chu pi xla namakgtayayan (1 Ped. 2:3). Apóstol Pedro wa: «Dios […] nakamalakgtawakgeyan xlakata tlan naskujnaniyatit. Xla tliwakglh nakayawayan». Akgtum kilhtamaku, Pedro wa pi ni xlakgchan nataya kxlakatin xKgawasa Dios (Luc. 5:8). Pero xlakata Jehová chu Jesús lu makgtayakgolh chu limasiyanikgolh tapaxkit, Pedro ni makgxtakgli Cristo. Wa xlakata, tanulh kxTamapakgsin «kiMalanakan chu kiLakgmaxtunakan Jesucristo» (2 Ped. 1:11). Komo wix ni nataxlajwaniya chu namaxkiya talakaskin Jehová namalakgtawakgeyan, na tlan namakglhtinana latamat nema ni kgalhi xlisputni. Nalakgchipina tuku mataxtukputun mintakanajla: lakgtaxtut (1 Ped. 1:9). w23.09 31:​16, 17

Tabernáculo xkgalhi xkilhtin: kalakgwan xwanit chu wi tuku xlistiliwilikanit, chu anta kskujkgo sacerdotes. Xwi akgtum lanka pumakamastan xacobre niku klhkuyukan tamakamastan. Xwi niku xmujukan chuchut nema xlitatlawanit cobre niku xmakgachakgankgo sacerdotes akxni nina xmatsukikgo xtaskujutkan (Éx. 30:​17-20; 40:​6-8). La uku, tiku xatalaksakni skujnimakgo Jehová kxapulana kxkilhtin xtemplo xaʼespiritual. Xputawilh chuchut nema xwi ktabernáculo chu kxkilhtin templo kamalakapastaka xatalaksakni, chu putum kstalaninanin Cristo, pi lu xlakaskinka nitu nalixkajwanankgo. ¿Pero niku kakninanikgo Dios «lhuwa latamanin»? Apóstol Juan akxilhli pi «xyakgolh kxlakatin pumapakgsin» nema kilhchanima Katiyatni, kxliʼakgtiy kxkilhtin templo xaʼespiritual, chu xmaxkimakgo Dios «xasanto xtaskujutkan kxtemplo tantaku chu tantaskaka» (Apoc. 7:​9, 13-15). ¡Lanka talakgalhaman pi kgalhiyaw niku tlan nakakninaniyaw Jehová! w23.10 28:​15, 16

Jehová kamaklakaskin lakgkgolotsin xlakata nakinkamatliwakglhan (Is. 32:​1, 2). Kakatachuwinanti akxni wi tuku lilakgaputsaya. Komo nawanikgoyan pi namakgtayakgoyan, kamakgamakglhtinanti xtamakgtaykan. Kintakgalhkgalhinkan na lu kinkamatliwakglhan (Rom. 4:​3, 18, 19). Kinkamaxkiyan litliwakga xlakata natayaniyaw tuku tuwa, kinkamakgtayayan nalichuwinanaw xalaktlan tamakatsinin chu namakgantaxtiyaw tuku kinkalakgayawakanitan kcongregación (1 Tes. 1:3). Xtakgalhkgalhin apóstol Pablo lu matliwakglhli. Xla wa pi xmakgapatinankanit, xputsastalanikanit, chu xmin kilhtamaku ni xkatsi tuku natlawa. Asta milh kilhtamaku atsinu ni nilh (2 Cor. 4:​8-10). Pablo kgalhilh litliwakga xlakata lilakpuwa xtakgalhkgalhin (2 Cor. 4:​16-18). Lilakpuwa latamat nema xʼama kgalhi, chu uma makgtayalh nakgalhi litliwakga xlakata natayani. w23.10 15, 16:​14-17

Akxni tlawaniyaw oración Jehová, ¿lilakpuwanaw komo xkilhtamaku nakinkamaxkiyan tuku skimaw? Xla liwana katsi tuku kilhtamaku tlakg tlan nakinkamaxki tuku skiniyaw (Heb. 4:16). Akxni Jehová ni tunkun kinkakgalhtiyan, max nalakpuwanaw pi «ni» katitlawalh tuku skiniw. Pero Jehová max wata lakpuwan pi «nina» xkilhtamaku. Kalilakpuwaw pi chatum kgawasa skini Jehová pi kamapaksalh xlakata tatatla, pero ni paksa. Komo Jehová xtlawalh akgtum milagro xlakata xmapaksalh, max Satanás tlan xlilakawanilh Jehová pi kgawasa kskujnanima kaj xlakata xmapaksanit (Job 1:​9-11; 2:4). Kalakapastakwi pi Jehová laklhkawilinit kilhtamaku akxni namasputu putum tajatat (Is. 33:24; Apoc. 21:​3, 4). Jehová ni katitlawalh akgtum milagro la uku xlakata nakinkamapaksayan. Wa xlakata, uma kgawasa max tlan naskini Jehová pi kamaxkilh litliwakga chu takaksni xlakata chuntiya naskujnani. w23.11 23:13

Sansón tlawalh tuku nitlan, pero nichuna tamakgxtakgli. Chuntiya xmakgantaxtiputun tuku xlakgayawanit Jehová (Juec. 16:​28-30). Sansón tasaskinilh Jehová pi xmaxkilh talakaskin nakamasputu filisteos. Dios kgaxmatnilh chu maxkipa xlitliwakga. Ama kilhtamaku, tlakg lhuwa filisteos kamakgnilh nixawa tiku xkamakgninit putuminika kxlatamat. Maski Sansón lipatinalh tuku nitlan laksakli, chuntiya liskujli namakgantaxti xtalakaskin Jehová. Uma kinkamasiyaniyan pi ni kilitaxlajwanitkan akxni natlawayaw tuku nitlan chu max natalakaskin nakinkastakyawakanan o namakgatsankgayaw akgtum talakgatay. Jehová ni lakpuwan pi nialhla tuku katitlawaw (Sal. 103:​8, 9). Maski naʼakgtsankgatayayaw, Jehová tlan chuntiya nakinkamaklakaskinan chuna la maklakaskilh Sansón. w23.09 6:​15, 16

Akxni tayaniyaw, Dios tlan kinkaʼakxilhan. Uma ni wamputun pi Jehová paxuwa akxni titaxtuyaw tuku tuwa, wata paxuwa xlakata tayaniyaw. Lu tlan limakgkatsiyaw pi makgapaxuwayaw Jehová xlakata tayaniyaw chu ni makgatsankgananiyaw (Sal. 5:12). Jehová tlan akxilhli Abrahán xlakata tayanilh tuku tuwa. Xʼamigo limaxtulh chu xaʼakgstitum liʼakxilhli (Gén. 15:6; Rom. 4:​13, 22). Tuku natlawa pi Dios xaʼakgstitum nakinkaliʼakxilhan ni wa komo lhuwa tuku tlawayaw o tuku lakgayaw kcongregación, wata wa akxilha komo ni makgatsankgananiyaw chu tayaniyaw. Chu kimputumkan tlan chuna natlawayaw maski tanu tanu kinkatakan, tuku titaxtumaw o tuku tlan tlawayaw. ¿Titaxtupat tuku tuwa la uku? Komo ni namakgatsankgananiya Jehová, xaʼakgstitum naliʼakxilhan. Akxni katsiyaw pi makgapaxuwamaw Jehová, kinkamakgtayayan tlakg liwana nakanajlayaw pi xlikana nakgantaxtu tuku kgalhkgalhimaw. w23.12 11:​13, 14

Natalan lakchixkuwin xlikatsinitkan liwana nakgalhchuwinankgo. Wa xlakata liwana xkalikgaxmatnitkan amakgapitsin chu xliʼakgatekgsatkan tuku lakpuwankgo chu tuku makgkatsikgo (Prov. 20:5). Komo kuenta natlawaya la takgaxmata xtachuwin chu la matsuwi xlakan tiku tachuwinampat, nakatsiya tuku waniputunan. Komo ankgalhin kteléfono katachuwinana, chu kajwatiya kamalakgachaniya correos electrónicos chu mensajes, tuwa namakgkatsiya kalakan nakatachuwinana. Wa xlakata kaliskujti kalakan nakatachuwinana amakgapitsin (2 Juan 12). Putum kstalaninanin Cristo xlikatsinitkan namakgskujkgo xlakata nakgalhikgo tuku maklakaskinkgo chu namakgskujwikgo xfamiliajkan (1 Tim. 5:8). Lu xlakaskinka pi nakatsiniya makgskuja (Hech. 18:​2, 3; 20:34; Efes. 4:28). Palha kaskujti chu kamasputu tuku matlawikana. Chuna amakgapitsin naʼakxilhkgo pi skulujwa wix, chu tlakg ni tuwa nawan natekgsa taskujut. w23.12 27:​12, 13

Akxni Biblia lichuwinan «xkilhtamaku Jehová» kilhchanima akxni nakamasputu xtalamakgasitsin chu nakalakgmaxtu xkachikin. Makgasa, Jehová kamalakgaxokgelh makgapitsi kachikinin (Is. 13:​1, 6; Ezeq. 13:5; Sof. 1:8). «Xkilhtamaku Jehová» nalitsuku akxni namasputukan xaLanka Babilonia chu nakikgalhsputa kʼArmagedón. Xlakata tlan nalakgtaxtuyaw, lata uku skgalalh kilitawilatkan. Jesús ni kajwatiya kinkawanin pi “skgalalh kilitawilatkan” xlakata namin «lhuwa tapatin», wata ankgalhin chuna kilitawilatkan (Luc. 12:40; Mat. 24:21). Kxlimaktum tuku Pablo katsokgnanilh Tesalonicenses, maklakaskilh lhuwa liʼakxilhtit xlakata xkamakgtayalh xnatalan skgalalh xtawilakgolh chu xkgalhkgalhikgolh xkilhtamaku Jehová. Pablo xkatsi pi xtsankgaku xlakata xchilh ama kilhtamaku (2 Tes. 2:​1-3). Pero kawanilh pi lu xlakaskinka skgalalh xtawilakgolh xtachuna la komo xchimaja. w23.06 8:​1, 2

Kkata 1978, tsukuka tlawakan akgtum lanka edificio kTokio (Japón) nema xʼama kgalhi 60 pisos. ¿Tuku tlawakgolh ingenieros xlakata tlan xtayanilh akxni xtachikilh tiyat? Akxni tlawaka lakkaxwilika xlakata palha xwa chu tlan xtaxmutli tsinu. Kstalaninanin Cristo litaxtuyaw chuna la uma lanka edificio. ¿Tuku xlakata? Tiku skujnani Jehová tliwakglh xlitayat, pero namin kilhtamaku natalakaskin “nataxmuta tsinu”, uma wamputun pi max natalakaskin nalakgpali tuku lakpuwan. Tliwakglh xlitayat xlakata natataya xlimapakgsin Jehová, nakgalhakgaxmata xlimapakgsin chu nikxni nalakatsala xtastakyaw. Pero na talakaskin «tlan nalakapastaknan», uma wamputun pi ni namalakatsali tuku lakpuwan (Sant. 3:17). Ni katilakpuwa pi wi tuku nipara tsinu xlitatlawat pero na ni katilakpuwa pi tlan natlawa putum tuku lakaskin. w23.07 14:​1, 2

Satanás wilinilh taputsan Jesús xlakata xmakgatsankgananilh Jehová (Mat. 4:​1-11). Tlawalh putum tuku matlanilh xlakata Jesús xtlawalh talakgalhin chu nila kxokgolh talakgmaxtut. Akxni xlichuwinama Dios, Jesús wi tuku atanu tuwa titaxtulh. Xtalamakgasitsin putsastalanikgolh chu wanikgolh pi xʼamakgo makgnikgo (Luc. 4:​28, 29; 13:31). Tayanilh tuku nitlan xtlawakgo xtamakgalhtawakgen (Mar. 9:​33, 34). Akxni mapakgsinanin xlakputsananimakgo, lu makgapatinankgolh chu likgalhkgamanankgolh. Makgnikgolh chuna la xmakgnikan tiku xtlawanit tuku lu nitlan (Heb. 12:​1-3). Akxni xʼamaja niy, Jehová nialh makgtayalh, wa xlakata talakaskilh pi xʼakstu xtayanilh tuku xaʼawatiya xliputsananimaka (Mat. 27:46). Akxni lilakpuwanaw putum tuku tlawalh Jesús kimpalakatakan, tlawa pi tlakg napaxkiyaw. w24.01 10, 11:​7-9

Akxni kgalhkgalhinanaw, tlan katalalinaw amakgapitsin. Tlawa pi kaks nakgaxmataw akxni amakgapitsin chuwinankgo (Sant. 1:19). Tlawa pi kaʼanalh takaksni. Ni katiwaw tuku nitlan nalimakgkatsi achatum maski tuwa tuku titaxtumaw. Nachuna, komo wi tiku nakinkatlawaniyan tuku nitlan, ni lakapala katisitsiw chu ni katitamakgapuspitniw, wata chuntiya natayaniyaw chu natapatiyaw (Col. 3:​12, 13). Na kinkamakgtayayan tlan tuku nalaksakaw. Wata nalimaxtuyaw kilhtamaku nalakputsananiyaw tuku tlan xtlawaw chu tuku tlakg tlan xkinkakitaxtunin. Akgtum liʼakxilhtit, komo putsamaw akgtum taskujut, max namakglhtinamputunaw nema kinkamalaknunimakan. Pero komo kgalhkgalhinanaw, ni tunkun katimakglhtinaw. Wata pulana naʼakxilhaw la nakitaxtuni kifamiliajkan komo namakglhtinanaw chu komo ni katilaktlawalh kintakanajlakan. Komo kgalhkgalhinanaw, ni katilaksakwi tuku nitlan. w23.08 22:​8, 9

Komo namin kilhtamaku lu tuwa namakgkatsiya nalakgmakgana tuku nitlan tlawaputuna, kalilakpuwanti tamalaknun nema tlawani Jehová. ¿La namakgtayayan uma? Akxni chatum lataman makamaxki xlatamat Jehová, akstu lakgmakgankan. Uma kilhchanima pi nialh wa katiliskujli nakgalhi tuku kgalhiputun nema ni makgapaxuwa Jehová (Mat. 16:24). Wa xlakata, akxni natitaxtuyaw akgtum taputsan ni aku katililakpuwaw tuku natlawayaw. Liwana katsiyawa nawan pi kaj pulaktum tuku kilitlawatkan: ni namakgatsankgananiyaw Jehová. Akxni makamaxkiw kilatamatkan Jehová litayaw pi xʼamaw lakgmakganaw tuku tlawaputunaw. Nalitaxtuyaw chuna la Job, tiku maski lhuwa tuku lu nitlan titaxtulh, wa: «Nikxni ktimakgatsankgananilh Dios» (Job 27:5). w24.03 9:​6, 7

Jehová chatum «Dios tiku paxkinan» (2 Cor. 13:11). Kinkalilakgaputsayan chatunu akinin chu kinkamaxkiyan «xtapaxkit nema ni makgxtakgnan» (Sal. 32:10). Komo nalilakpuwanaw la kinkapaxkiyan, tlakg nakanajlayaw pi xla kinkakuentajtlawayan chu tlakg natalakatsuwiniyaw. Tlan natlawaniyaw oración chu tlan nawaniyaw pi lu maklakaskinaw xtapaxkit. Tlan nawaniyaw putum tuku lilakgaputsayaw chu tlan nalipawanaw pi xla kinkaʼakgatekgsniyan chu kinkamakgtayaputunan (Sal. 145:19). Chuna la lhkuyat kinkamatsitsijwiyan akxni lonkgnan, xtapaxkit Jehová tlan kinkamamakgkatsiniyan akxni titaxtuyaw tuku tuwa. Wa xlakata kamakgamakglhtinanti xtapaxkit Jehová. Chu na kalimasiyani pi paxkiya chu kawani: «Lu kpaxkiyan» (Sal. 116:1). w24.01 31:​19, 20

Jesús ni kajwatiya kawanilh latamanin pi xtukuwani Dios wa Jehová. Judíos xkatsikgoya uma. Wata kamasiyanilh la xlikatsi (Juan 1:​17, 18). Akgtum liʼakxilhtit, Tatsokgni xa’Hebreo xwan pi Jehová xalakgalhamanina chu tapatinan (Éx. 34:​5-7). Pero Jesús kamakgtayalh liwana naʼakgatekgskgo uma akxni kalitachuwinalh parábola xla kgawasa tiku laktlawamilh xʼherencia. Akxni likgalhtawakgayaw kBiblia pi xatlat lakapala lakgalh xkgawasa maski «lakgamakgatku xminacha», akgpixtilh chu tapatilh, liwana akxilhaw pi Jehová xalakgalhamana chu tapatinan (Luc. 15:​11-32). Xlikana pi Jesús kamakgtayalh latamanin naʼakgatekgskgo la likatsi Jehová. w24.02 10:​8, 9

Jehová makaksa chu tlan kamamakgkatsini xnakujkan tiku patinamakgo. ¿Tuku nakinkamakgtayayan nakalakgalhamanaw chu tlan nakamamakgkatsiniyaw amakgapitsin chuna la tlawa Jehová? Kilikgalhitkan tayat nema nakinkamakgtayayan. ¿Tuku tayat nakinkamakgtayayan chuntiya nalapaxkiyaw chu tlan nakamamakgkatsiniyaw amakgapitsin? (1 Tes. 4:18). Kalimasiyaw pi makgkatsiyaw tuku makgkatsikgo amakgapitsin, kakapaxkiw xtachuna la kapaxkiyaw kifamiliajkan, chu tlan kakalikatsiniw (Col. 3:12; 1 Ped. 3:8). Akxni lismaniyaw kalakgalhamanaw amakgapitsin chu kgalhiyaw laktlan tayat, tlan kamamakgkatsiniputunaw tiku titaxtukgo tuku tuwa. Jesús lichuwinalh: «Xlakata tuku litsama naku wa tuku taxtuyacha kkilhni. Chixku tiku tlan likatsi lichuwinan tuku laktlan, xlakata xnaku litsama tuku laktlan» (Mat. 12:​34, 35). Akxni tlan kamamakgkatsiniyaw kinatalankan kalimasiyaniyaw pi kapaxkiyaw. w23.11 10:​10, 11

Xlakata tlan naʼakgatekgsaw tuku xwanit Biblia pi xʼama la, talakaskin naskinaw tamakgtay. Kalilakpuwaw uma liʼakxilhtit: kalilakpuwanti pi pinita paxiʼalhnana kʼakgtum kachikin niku ni lakgapasnana, pero tapina chatum miʼamigo tiku liwana lakgapasa uma kachikin. Miʼamigo liwana katsi niku wilatit chu liwana kalakgapasa akgatunu tiji. Xtachuna la uma, Jehová katsi tuku kilhtamaku wilaw chu tuku aku nala. Wa xlakata, kilitaktujutkan chu kiliskinitkan pi kakinkamakgtayan naʼakgatekgsaw tuku xwanit Biblia pi xʼama la (Dan. 2:28; 2 Ped. 1:​19, 20). Chuna la chatum tlat tiku tlan likatsi, Jehová lakaskin pi xkamanan tlan kakakitaxtunilh (Jer. 29:11). Pero Jehová katsi putum tuku aku nala, ni xtachuna la amakgapitsin natlatni. Matsokgninalh kxTachuwin tuku aku xʼama la xlakata akinin alisokg xkatsiw. w23.08 8:​3, 4