Septiembre

Dios maxkinit litliwakga Jesús xlakata namasputu putum tuku nitlan anan. Akxni Jesús tlawalh milagros, limasiyalh pi tlan namapanu. Xla kgalhi litliwakga xlakata namasputu tuku kinkamakgapatinanan: talakgalhin chu tuku nitlan liminit, chuna la tajatat chu linin (Mat. 9:​1-6; Rom. 5:​12, 18, 19). Xmilagros Jesús, limasiya pi xla tlan namapanu «putum tajatat» chu asta tlan nakamalakastakwani tiku nikgonita (Mat. 4:23; Juan 11:​43, 44). Na limasiyalh pi tlan malakgachokgo tliwakga un chu asta tlan kamakgatlaja ni xatlan espíritus (Mar. 4:​37-39; Luc. 8:2). ¡Lu tlan limakgkatsiyaw akxni lilakpuwanaw pi Jehová maxkinit xKgawasa lhuwa litliwakga! Tlan nalipawanaw pi tuku Dios malaknunit nakgantaxtu. Xmilagros Jesús, kaj tsinu limasiya tuku natlawa akxni namapakgsinan kKatiyatni. w23.04 3, 4:​5-7

Komo kmincongregación anankgo lhuwa publicadores, max ni maxkikana takgalhtin, chu wa xlakata max lakpuwanita pi tlakg tlan nialh nachaxa mimakan. Pero nichuna kalakpuwanti. Ni kajwatiya kʼakgtum párrafo kalakkaxwili tuku nakgalhtinana. Chuna, komo ni namaxkikana takgalhtin kʼakgtum párrafo, max tlan nakgalhtinana kʼatanu párrafo. Akxni lakalhtitpat Makatsinina, kalilakpuwanti la akgatunu párrafo kinkamakgtayayan tlakg naʼakgatekgsaw tuku talichuwinama kputuminika artículo. Komo chuna natlawaya, wi tuku tlan nakgalhtinana. Atanu tuku tlan natlawaya wa pi nalakkaxwiliya nakgalhtinana kpárrafos nema tlakg tuwa tuku lichuwinan. Kʼumakgolh párrafos niti lu chaxa xmakan. Pero komo chuntiya ni maxkikana mintakgalhtin, ¿tuku atanu tlan xtlawa? Kawani tala tiku napulalin takgalhtawakga xla Makatsinina tuku párrafo kgalhtinamputuna. w23.04 21, 22:​9, 10

José ankgalhin stalanilh xtapulalit Jehová. Uma tlawalh pi tlan chixku xlitaxtulh. Max makgtutu, Dios liwana wanilh la nakuentajtlawa xfamilia. Chu xla tunkun tlawalh maski tuwa makgkatsilh (Mat. 1:20; 2:​13-15, 19-21). Xlakata kgalhakgaxmatli Jehová, José tlan kuentajtlawalh María. Chu uma tlawalh pi María tlakg xpaxkilh chu xmaxkilh kakni. Lakchixkuwin, tlan nastalaniyatit xliʼakxilhtit José. Kaputsatit xtastakyaw Biblia nema nakamakgtayayan nakuentajtlawayatit mifamiliajkan. Akxni lilatapayatit umakgolh tastakyaw, limasiyayatit pi kapaxkiyatit milakpuskatinkan. Chu uma natlawa pi tliwakglh natawila mintamakgaxtokgatkan. Chatum tala puskat xalak Vanuatu tiku liwaka 20 kata lata makgaxtokga, wan: «Akxni kakxilha pi kinchixku putsa xtapulalit Jehová chu stalani xtastakyaw, tlakg kmaxki kakni. Klipawan pi tuku laksaka tlan nakitaxtu». w23.05 21:5

Judíos tiku xʼamakgo taspitkgo, akgtum «xasanto kachikin» xʼamakgo litaxtukgo (Deut. 7:6). Pero uma ni xwamputun pi tiku taxtukgolh kBabilonia putum tlan tuku xtlawamakgo. Xtalakaskin pi xtalakgpalikgolh xlakata xmakgapaxuwakgolh Jehová. Lhuwa judíos tiku xlakachinkgonit kBabilonia, xkapasanit xtapuwankan babilonios chu xlinkgo xlatamatkan la xlakan. Akxni xtitaxtunita akglhuwa kata lata xapulana judíos xtaspitkgonit kʼIsrael, Nehemías lu kaks lilakawa pi xkamanankan umakgolh judíos ni xkatsinikgo chuwinankgo hebreo (Deut. 6:​6, 7; Neh. 13:​23, 24). ¿La xʼamakgo paxkikgo chu kakninanikgo Jehová komo ni xʼakgatekgskgo xTachuwin? (Esd. 10:​3, 44). Lhuwa tuku xlilakgpalitkan xwanit, pero tlakg ni tuwa xmakgkatsikgolh komo anta xlatamakgolh kʼIsrael, niku xlakkaxwilimaparaka xaskulunku takaknin (Neh. 8:​8, 9). w23.05 15:​6, 7

Maski lu makgantaxtiputunaw tuku lakkaxwilinitaw natlawayaw, max wi tuku tuwa natitaxtuyaw. Wi «tuku kaj xalan lay» chu nialh kgalhiyaw kilhtamaku naliskujaw (Ecl. 9:11). O max nakgalhiyaw akgtum taʼakglhuwit nema nakinkamaxlajwaniyan (Prov. 24:10). Chu xlakata makglakgalhinanin akinin, wi tuku nitlan tlawayaw chu nialhla makgantaxtiyaw tuku xlakpuwanitaw (Rom. 7:23). O max kaj lu tlakgwanitaw (Mat. 26:43). ¿Tuku nakinkamakgtayayan? Kalakapastakti pi komo wi tuku malakgachokgoputunan ni kilhchanima pi nialhla katitlawa. Biblia wan pi max lhuwa tuku tuwa nakinkalakgchinan, pero tlan ni nataxlajwaniyaw chu namakgantaxtiyaw tuku lakgchamputunaw. Komo chuntiya naliskujaw maski tuwa tuku titaxtuyaw, limasiyaniyaw Jehová pi makgapaxuwaputunaw. Xla lu lipaxuwa akxni akxilha pi lu liskujmaw namakgantaxtiyaw tuku lakgchamputunaw. w23.05 30:​14, 15

Kgawasa, komo wix precursor nawana, nakatsiniya la akxtum nakataskuja amakgapitsin chu nakatsiniya kuenta natlawaya mintumin (Filip. 4:​11-13). Max tlan xlimatsuki precursorado auxiliar. Uma namakgtayayan precursor regular nawana alistalh. Chu uma namakgtayayan tipalhuwa la tlan naskujnaniya Jehová putum kilhtamaku, chuna la siervo de construcción o betelita nalitaxtuya. Putum natalan lakchixkuwin xliskujatkan namakgatsikgo tuku talakaskin xlakata lakgkgolotsin xalak congregación nalitaxtukgo. Biblia wan pi natalan tiku lakgchamputunkgo uma, tlawaputunkgo «akgtum xatlan taskujut» (1 Tim. 3:1). Xlakata namakgantaxtiya, pulana siervo ministerial miliwanat. Siervos ministeriales tipalhuwa la kamakgtayakgo lakgkgolotsin. Chu lakgkgolotsin chu siervos ministeriales lu kamakgtayakgo natalan chu xatapaxuwan lichuwinankgo Dios. w23.12 28:​14-16

Mapakgsina Josías putsalh xtamakgtay Jehová akxni aku kstakma. Tlakg xlakgapasputun Dios chu xtlawaputun xtalakaskin. Pero tuwa kitaxtunilh xlakata lhuwa latamanin xkakninanikgo ni xaxlikana dioses. Xtalakaskin pi ni xpekualh xlakata xtatayalh xaxlikana takaknin. ¡Chu chuna tlawalh! Nina xmakgatsi 20 kata akxni tsukulh mapanu ni xaxlikana takaknin (2 Crón. 34:​1, 2). Maski wix aku stakpat, ¿la tlan nastalaniya xliʼakxilhtit Josías? Kaputsa Jehová chu tlakg kalakgapasti. Uma namakgpuwantiniyan namakamaxkiya milatamat. ¿Chu tuku natlawaya alistalh? Luke, tiku tamunulh akxni xkgalhi 14 kata, wa: «Lata uma kilhtamaku, tuku tlakg xlakaskinka nawan kkilatamat wa pi nakskujnani Jehová chu nakliskuja nakmakgapaxuwa» (Mar. 12:30). Komo nachuna natlawaya, Jehová namaxkiyan lhuwa tasikulunalin. w23.09 11:​12, 13

Akxni Pablo katsokgnanilh congregación xalak Tesalónica, nina xchan akgtum kata lata xlakatsukunit. Lakgkgolotsin aku xkatsinimakgo tlawakgo xtaskujutkan, pero xtalakaskin xkamaxkika kakni. Chuna la natalakatsuwi lhuwa tapatin, tlakg natalakaskin nakalipawanaw lakgkgolotsin xalak congregación, xlakata max niku pulalinkan kintaskujutkan o sucursales nialhla kintikatachuwinankgon. Wa xlakata kakapaxkiw chu kakamaxkiw kakni. Ni wa kuenta katlawaw tuku nitlan tlawakgo. Kalipawaw pi Jehová maklakaskima Cristo xlakata nakapulalin umakgolh natalan. Xtachuna la takgnu xalikan xmakgtaya xʼakgxakga chatum soldado, takgalhkgalhin kuentajtlawa kintalakapastaknikan. Kinkamakgtayayan naʼakxilhaw pi tuku malaknu uma kakilhtamaku nitu kxtapalh (Filip. 3:8). Chu kinkamakgtayayan ni lu nalakgaputsayaw. w23.06 11, 12:​11, 12

Tiku kgaxmatnikgo «puskat tiku xatonta» xlilaksakatkan komo natunukgo kxchik. Kililakgmakganatkan talakgxtumit nema ni xlitatlawat. Proverbios lichuwinan pi «puskat tiku xatonta» wan: «Chuchut nema kaj kgalhankanit lu sakgsi» (Prov. 9:17). ¿Tuku kilhchanima «chuchut nema kaj kgalhankanit»? Anta kBiblia tamalakxtumikan talakgxtumit nema tlawakgo tiku makgaxtokgkgo xtachuna la xaskgawiwi chuchut (Prov. 5:​15-18). Puskat chu chixku tiku makgaxtokgkgo kxlakatinkan mapakgsinanin tlan nalipaxuwakgo talakgxtumit. Pero «chuchut nema kaj kgalhankanit» kilhchanima talakgxtumit nema ni xlitatlawat. Tiku tlawakgo, kaj xatsekg tlawakgo, xtachuna la tiku kgalhanan, chu lakpuwankgo pi niti katsi. Lakpuwankgo pi «chuchut nema kaj kgalhankanit» lu sakgsi. Pero Jehová putum akxilha, chu nila akgskgawikan. Uma ni sakgsi kitaxtu xlakata laktlawa la talalinaw Jehová (1 Cor. 6:​9, 10). w23.06 22:​7-9

¿Tuku militlawat komo akxilha pi nialh tlawaniya oraciones Jehová xliputum minaku o komo makgkatsiya pi skujnanipat kaj xlakata chuna militlawat? Xlakata makglakgalhinanin akinin, min kilhtamaku taxlajwaniyaw. Komo naʼakxilha pi wix nialh lu lipaxuwaya chuna la skujnanipat Jehová, kalilakpuwanti apóstol Pablo. Liwana xkatsi pi xʼama min kilhtamaku max nialh lu xʼama lipaxuwa natlawa tuku xlilat. Maski chuna, Pablo liwana xlakkaxwilinit chuntiya naskujnani Jehová. Ni kamasta talakaskin pi tuku nitlan makgkatsiya namatlawiyan tuku ni xlilat, liwana kalakkaxwili natlawaya tuku tlan asta maski nichuna tlawaputuna. Uma namakgtayayan nalipaxuwaya tuku tlawaya chuna la natitaxtu kilhtamaku (1 Cor. 9:16). w24.03 11, 12:​12, 13.

Nakalimasiyaniyaw tapaxkit kinatalankan komo nakamakgamakglhtinanaw chuna la kiʼamigoskan (2 Cor. 6:​11-13). Klhuwa congregaciones wilakgolh natalan tiku tanu tanu likatsikgo chu tanu tanu xkachikinkan. Tlakg nakapaxkiyaw komo nalilakpuwanaw xatlan xtayatkan. Akxni kaʼakxilhaw kinatalankan chuna la Jehová kaʼakxilha, limasiyayaw pi kapaxkiyaw. Akxni lama nawan lhuwa tapatin, lu xlakaskinka nawan nakapaxkiyaw kinatalankan. ¿La nakinkakuentajtlawayan Jehová akxni natsuku lhuwa tapatin? Kalilakpuwaw tuku kawanilh xkachikin xlakata xlakgtaxtukgolh akxni xʼamaka malakgsputukan Babilonia: «Kapit, kinkachikin, katanu niku tlakg xatsekg kminchik chu kamalakchuwa mimalakcha. Kaj tsinu katatsekgti asta akxni nasputa tasitsi» (Is. 26:20). Max natalakaskin pi akinin na nastalaniyaw umakgolh tastakyaw akxni lama nawan lhuwa tapatin. w23.07 6, 7:​14-16

Kaliskujwi ni xatsakat nawanaw. Kalilakpuwaw: «¿Lakpuwankgo amakgapitsin pi akit ni xatsakat, ni lakapala ksitsi chu kmasta talakaskin wi tuku kalakgpalika akxni chuna talakaskin? ¿O kililakgapaskan pi xatsakat akit chu xafuerza kwan tuku xlitatlawat? ¿O kkakgaxmatni amakgapitsin chu xatapaxuwan kmakgtayanan akxni wi tuku lakkaxwilikan?». Katlawaw chuna la Jehová chu Jesús. Akxni wi tuku talakgpali kkilatamatkan, ni xatsakat kawaw chu kalakgpaliw tuku natalakaskin. Max wi tuku kaj xalan nala o natitaxtuyaw tuku tuwa xlakata ni anan tumin o xlakata tuku tlawakgo mapakgsinanin (Ecl. 9:11). Max na tuwa nawan komo nalakgpalikan tuku lakgayaw kxkachikin Jehová. Tlakg ni tuwa katimakgkatsiw komo: 1) namakgamakglhtinanaw tuku talakgpali, 2) nalilakpuwanaw kilhtamaku nema aku mima, 3) na’akxilhaw tuku tlan kgalhiyaw chu 4) wi tuku natlawayaw xpalakatakan amakgapitsin. w23.07 21, 22:​7, 8

Akxni Daniel kgawasaku xwanit, babilonios chilinkgolh chu lu lakgamakgat niku linkgolh. Pero maski Daniel lu kgawasaku xwanit, babilonios “lu kaks lilakawankgolh” akxni akxilhkgolh. Daniel xwanit chatum kgawasa tiku “nitu xtsankgani xmakni chu lu stlan xtasiya”, chu xminacha kʼakgtum familia nema lu xlakaskinka xwanit (1 Sam. 16:7). Wa xlakata babilonios lakkaxwilikgolh lhuwa tuku namasiyanikgo xlakata lu xlakaskinka chixku xlitaxtulh kBabilonia (Dan. 1:​3, 4, 6). Pero Jehová xpaxki Daniel xlakata tuku xlaksaknit natlawa. Liwana katsiyaw uma xlakata akxni Daniel xkgalhi 20 kata o max tlakg aktsujku xwanit, Jehová na lichuwinalh akxni xkalichuwinama Noé chu Job, lakchixkuwin tiku makgasa kskujnanikgonit (Gén. 5:32; 6:​9, 10; Job 42:​16, 17; Ezeq. 14:14). Chu Jehová ankgalhin paxkilh Daniel (Dan. 10:​11, 19). w23.08 2:​1, 2

Kalilakpuwanti pi natamawaya akgtum chiki, ¿ni xlikana pi pulana xpit akxilha xlakata nakatsiya la wi? Nachuna kilitlawatkan akxni nalikgalhtawakgayaw chu nalakputsananiyaw Biblia. Komo kaj lakapala nalikgalhtawakgayaw, kajwatiya nakatsiyaw «tuku pulana» masiya «xtachuwin Dios» (Heb. 5:12). Liwana kaʼakxilhwi putum tuku kgalhi. Kalakputsananiw pulakatunu pulakatunu tuku lichuwinan chu kaʼakxilhwi la latatalakxtumikgo. Ni kajwatiya kilikatsitkan tuku kanajlayaw, xlakaskinka nakatsiyaw tuku xlakata chuna kanajlayaw. Xlakata liwana naʼakgatekgsaw Biblia, kililakputsananitkan tuku tlakg tuwa. Apóstol Pablo kamakgpuwantinilh xnatalan pi liwana xlikgalhtawakgakgolh xTachuwin Dios xlakata xʼakgatekgskgolh «la xlitilanka, xlilhman, xlitalhman chu xlipulhman» tuku xaxlikana. Komo chuna xtlawakgolh «tliwakglh» xkgalhikgolh xtakanajlakan (Efes. 3:​14-19). Akinin nachuna kilitlawatkan. w23.10 18:​1-3

Biblia kalichuwinan tiku kgalhkgalhinankgolh. ¿Tlan xlikgalhtawakgaw xliʼakxilhtitkan? Kalilakpuwaw David, kgawasaku xwanit akxni laksakka la mapakgsina kʼIsrael, pero kalhkgalhilh akglhuwa kata asta akxni tlan xmapakgsinalh. Simeón chu Ana ni makgxtakgkgolh Jehová chu chuntiya skujnanikgolh akxni xkgalhkgalhimakgo pi xmilh Mesías (Luc. 2:​25, 36-38). Akxni nalikgalhtawakgaya xliʼakxilhtitkan, kalilakpuwanti: «¿Tuku makgtayalh nakgalhkgalhinan? ¿Tuku tlan kitaxtunilh xlakata kgalhkgalhinalh? ¿La tlan nakstalani xliʼakxilhtit?». Na lhuwa tuku tlan nakatsiniya xlakata tiku ni kgalhkgalhinankgolh (1 Sam. 13:​8-14). Akxni nalikgalhtawakgaya xliʼakxilhtitkan, tlan nalilakpuwana: «¿Tuku xlakata ni kgalhkgalhinalh? ¿Tuku nitlan kitaxtunilh xlakata ni kgalhkgalhinalh?». w23.08 24:15

Pedro ni xmakgxtakgnan. Nitu tlawalh nialh naskujnani Jehová. Akxni Jesús kalitachuwinalh xtamakgalhtawakgen tuku ni akgatekgskgolh, xla ni makgxtakgli (Juan 6:68). Lhuwa tunkun makgxtakgkgolh Jesús, ni kgalhkgalhikgolh xkawanika tuku xkilhchanima. Pero Pedro wa kxlakatin amakgapitsin pi kajwatiya Jesús xkgalhi «tachuwin nema linan klatamat». Jesús xkatsi pi Pedro chu amakgapitsi apóstoles x’amakgo akgxtakgmakgankgo. Pero wa pi xlipawan pi Pedro x’ama taspitpara chu ni x’ama makgxtakga Dios (Luc. 22:​31, 32). Jesús xa’akgatekgsa pi «lataman tlawaputun tuku xaʼakgstitum, pero xmakni taxlajwani» (Mar. 14:38). Maski Pedro wa pi ni xlakgapasa, Jesús nikxni lakpuwa pi ni x’ama talakgpali. Akxni xlakastakwananita, Jesús tasiyanilh Pedro, max akxni xʼakstu xwi (Mar. 16:7; Luc. 24:34; 1 Cor. 15:5). Uma lu makgpuwantinilh apóstol natatliwakglhpara. w23.09 22:​9, 10

Dios katapati putum xtalakgalhinkan tiku kanajlanikgo chu nialh lakapastaka (Sal. 32:​1, 2). Jehová xaʼakgstitum kaliʼakxilha, chu xlakata kgalhikgo takanajla, nialh linkgo kuenta. Maski Abrahán, David chu amakgapitsi kskujnin Dios xaʼakgstitum kaliʼakxilhka, chuntiya makglakgalhinanin xwankgonit. Pero xlakata xtakanajlakan, Dios kaliʼakxilhli chuna la tiku nialh xlinkgo kuenta, liwaka akxni xkatamalakxtumi latamanin tiku ni xkakninanikgo (Efes. 2:12). Ktatsokgni nema apóstol Pablo kamalakgachanilh Romanos, liwana wa pi xlakata xʼamigos Jehová nalitaxtuyaw talakaskin nakgalhiyaw takanajla. Chuna kitaxtulh xpalakata Abrahán chu David, chu na tlan chuna nakitaxtu kimpalakatakan. w23.12 3:​6, 7

Kgalhiyaw talakgalhaman pi namakamaxkiyaw Jehová tamakamastan. Tlan namaklakaskinaw kinkilhtamakujkan, kilitliwakgakan chu tuku xtapalh kgalhiyaw xlakata natatayayaw xTamapakgsin. Komo naskujnaniyaw Jehová xliputum kinakujkan, nalimasiyayaw pi lu xtapalh liʼakxilhaw pi tlan kakninaniyaw. Ktatsokgni nema kamalakgachanilh hebreos, apóstol Pablo pulaklhuwa tuku lichuwinalh nema kuenta kilitlawatkan (Heb. 10:​22-25). Wa pi lu xlakaskinka natlawayaw oración, nalichuwinanaw kintakgalhkgalhinkan, nakatatamakxtumiyaw kinatalankan chu nalamakgpuwantiniyaw, liwaka xlakata «akxilhmaw pi xkilhtamaku Dios talakatsuwima». Kxaʼawatiya capítulos xla Apocalipsis, chatum xʼángel Jehová wan: «¡Wa Dios kakakninani!» (Apoc. 19:10; 22:9). Ankgalhin kalakapastakwi tuku katsininitaw xlakata xtemplo Jehová xaʼespiritual chu pi tlan kakninaniyaw. w23.10 29:​17, 18

Kimputumkan “chuntiya lapaxkiputunaw”. Pero kililakapastakatkan tuku wa Jesús pi xʼama la: «Tlakg lhuwa tiku nialh katilapaxkikgolh» (Mat. 24:12). Ni xwamputun pi kstalaninanin nialh xʼamakgo lapaxkikgo. Pero kuenta kilitlawatkan pi ni nakinkapasayan xtayat uma kakilhtamaku chu nialh napaxkinanaw. ¿Tuku nakinkamakgtayayan nakatsiyaw komo tapaxkit nema kakgalhiniyaw kinatalankan chuntiya tliwakga? Pulaktum tuku nakinkamakgtayayan wa pi naʼakxilhaw tuku tlawayaw akxni wi tuku titaxtuyaw kkilatamatkan (2 Cor. 8:8). Pulaktum uma wa tuku lichuwinalh apóstol Pedro: «Lu kalapaxkitit chatunu chatunu, xlakata tiku paxkinan putum kilhtamaku tapatiputun achatum» (1 Ped. 4:8). Litasiya la xlilhuwa kapaxkiyaw kinatalankan akxni wi tuku nitlan tlawakgo o akxni nitlan kinkamamakgkatsinikgoyan. w23.11 10, 11:​12, 13

Komo kaj makgapitsi natalan kalimasiyaniyaw tapaxkit, ni kgalhakgaxmatmaw tuku wa Jesús. Max wilakgolh natalan tiku tlakg katalalinaw, chuna la Jesús xwilakgo xtamakgalhtawakgen tiku tlakg xkatalalin (Juan 13:23; 20:2). Pero apóstol Pedro wa pi talakaskin nakalimasiyaniyaw putum kinatalankan «tapaxkit xtachuna nema lakgalhinikan kfamilia» (1 Ped. 2:17). Pedro kinkastakyawan: «Lu kalapaxkitit xliputum minakujkan» (1 Ped. 1:22). “Lapaxkikan xliputum naku” kilhchanima pi nakalimasiyaniyaw tapaxkit asta tiku tuwa makgkatsiyaw nakalimasiyaniyaw. Kalilakpuwaw, ¿tuku xtlawaw komo chatum tala nitlan xkinkamamakgkatsinin? Max xmalakgaxokgeputuw. Pero Jesús masiyanilh Pedro pi uma tayat ni makgapaxuwa Jehová (Juan 18:​10, 11). Apóstol Pedro tsokgwililh: «Ni kalitamakgapuspittit tuku nitlan chu tuku nitlan kawanikantit. Wata kalitamakgapuspittit akgtum tasikulunalin» (1 Ped. 3:9). Ankgalhin kalimasiya tapaxkit. w23.09 28, 29:​9-11

Lu kaks kinkamalakawaniyan la xlilakapala staka chatum aktsu kgawasa. Tasiya pi ni talakaskin naliskuja. Pero xlakata tlakg tlan kstalaninanin Cristo nawanaw, talakaskin lu naliskujaw (1 Cor. 13:11; Heb. 6:1). Xlakata tlakg tlan kstalaninanin Cristo nawanaw, talakaskin namatliwakglhaw chuna la talalinaw Jehová. Chu maklakaskinaw espíritu santo xlakata nakgalhiyaw xalaktlan tayat chu wi tuku nakatsiniyaw tlawayaw (Prov. 1:5). Jehová katlawalh latamanin, tlawalh chixku chu puskat (Gén. 1:27). Pero lakchixkuwin chu lakpuskatin ni lakxtum. Jehová tanu tanu taskujut kalakgayawalh lakchixkuwin chu lakpuskatin, chu xlakata tlan namakgantaxtikgo talakaskin tanu tanu tayat nakgalhikgo chu tanu tanu tuku nakatsinikgo tlawakgo (Gén. 2:18). w23.12 18:​1, 2

Jesús xlakaskin pi latamanin xmaklakaskinkgolh xtukuwani xTlat. Max makgapitsi xpulalinanin takanajla xlakpuwankgo pi xtukuwani Dios lu xasanto xwanit chu ni xlitamapakuwit xwanit. Pero Jesús ni mastalh talakaskin pi ama talismanin nema ni xtakilhtiyanit kTatsokgni xtlawalh pi ni xmalankika xtukuwani xTlat. Kalilakpuwaw akxni mapaksalh chatum chixku tiku xlaktanuma demonio kxkachikinkan gerasenos. Latamanin lu pekuankgolh, wa xlakata wanikgolh Jesús pi xtaxtulh kʼuma kachikin (Mar. 5:​16, 17). Pero xla xlakaskin pi putum xlakgapaskgolh xtukuwani Jehová. Wa xlakata, wanilh ama chixku pi xkawanilh latamanin pi wa Jehová xmapaksanit (Mar. 5:19). La uku, Jesús lakaskin pi akinin na kakamasiyaniw xtukuwani Jehová putum latamanin (Mat. 24:14; 28:20). Akxni chuna tlawayaw, makgapaxuwayaw. w24.02 10:10

¡Lanka talakgalhaman makgtapakgsikan kxkachikin Jehová! Maski k’uma xa’awatiya kilhtamaku tlakg tuwa tuku titaxtuyaw, Jehová kinkamaxkinitan akgtum familia xaʼespiritual xlakata nakinkamakgtayayan (Sal. 133:1). Tapulalit nema Jehová kinkamaxkiyan kinkamakgtayayan xatapaxuwan natawilayaw kkifamiliajkan (Efes. 5:33–6:1). Chu na kinkamaxkiyan liskgalala xlakata namakgatlajayaw tuku nitlan makgkatsiyaw chu napaxuwayaw. Min kilhtamaku, talakaskin ni nataxlajwaniyaw chuna la skujnanimaw Jehová. ¿Tuku xlakata? Xlakata max amakgapitsin nitlan nakinkamamakgkatsinikgoyan, max chatum tala o tiku tamakgaxtokgaw. Nachuna, tuku nitlan tlawayaw na tlan xkinkamaxlajwanin, liwaka akxni makglhuwa chuna tlawayaw. w24.03 14:​1, 2

Namin kilhtamaku nakgaxpata tuku tlawakgonit makgapitsi natalan xlakata tlakg naskujnanikgo Jehová. Max makgapitsin kilakgolh kʼEscuela xla Tiku lichuwinankgo xTamapakgsin Dios o amakgapitsin ankgolh latamakgo niku tlakg xtalakaskin tamakgtay. ¿Na tlan chuna natlawaya? Komo chuna, ¡nitu kamalakgachokgon! Kskujnin Jehová ankgalhin lakputsakgo la tlakg naskujnanikgo (Hech. 16:9). Pero ¿chu komo la uku wix nila chuna tlawaya? Ni kalakpuwanti pi wix ni xtapalh litaxtuya nixawa tiku tlan chuna tlawakgo. Tuku tlakg xlakaskinka wa pi natayaniyaw (Mat. 10:22). Ankgalhin kalakapastakti pi Jehová lu paxuwa komo wix tlawapat putum tuku matlaniya xlakata tlakg naskujnaniya (Sal. 26:1). w24.03 11:11

Jehová malaknu pi nakinkatapatiyan komo namakgxtakgaw kintalakgalhinkan (Sal. 86:5). Wa xlakata, kalipawaw pi nakinkatapatiyan. Kalakapastakwi pi xla kinkaʼakgatekgsniyan chu ni kinkaskiniyan tuku ni matlaniyaw. Komo tlawamaw xpalakata Jehová putum tuku matlaniyaw, xla lu xtapalh akxilha. Na kakalilakpuwaw tiku skujnanikgolh Jehová xliputum xnakujkan. Akgtum li’akxilhtit, apóstol Pablo akglhuwa kata skujnanilh, akglhuwa mil kilómetros tlawalh chu kamalakatsukilh lhuwa congregaciones. Pero milh kilhtamaku talakgpalilh xlatamat chu nialhla lhuwa skujnanilh. ¿Nialh makgapaxuwalh Jehová? Nichuna. Pablo chuntiya tlawalh tuku xmatlani, chu Jehová chuntiya sikulunatlawalh (Hech. 28:​30, 31). Chuna la Pablo, max namin kilhtamaku nialhla katiskujnaniw Jehová chuna la xapulana, pero tuku xla lu xlakaskinka akxilha wa tuku xlakata skujnaniyaw. w24.03 27:​7, 9

Jesús kawilinilh tlan liʼakxilhtit xtamakgalhtawakgen. Xla makglhuwa xtlawani oración xTlat. Maski lhuwa taskujut xkgalhi chu lhuwa latamanin xlakgminkgo, xlimaxtu kilhtamaku xlakata xtlawalh oración (Mar. 6:​31, 45, 46). Tsisa xtaki xlakata xtachuwinalh xTlat. Biblia wan pi makgtum, tantaskaka tlawalh oración xlakata lu xlakaskinka tuku xʼama laksaka (Luc. 6:​12, 13). Chu akxni atsinu xtsankga namakgnikan, makglhuwa tlawanilh oración Jehová xlakata xkatsi pi x’ama titaxtu tuku tlakg tuwa (Mat. 26:​39, 42, 44). Uma kinkamasiyaniyan pi maski lu lhuwa taskujut kgalhiyaw, talakaskin natlawaniyaw oración Jehová. Chuna la Jesús, max natalakaskin nalakkaxwiliyaw tukuya hora natlawayaw kiʼoracioneskan, max tlan tlakg tsisa xtakiw o ni lu sokg xʼaw lhtatayaw xlakata xtlawaw oración. Komo chuna natlawayaw, nalimasiyaniyaw Jehová pi xtapalh liʼakxilhaw uma tamaskiwin. w23.05 3:​4, 5

Tachuwin nema maklakaskinka ktexto xala uku, maʼakgatekgsninan pi tapaxkit nema Jehová kakgalhini tiku xatalaksakni lu tliwakga chu asta tlan tamalakxtumikan la xlitliwakga tlawan akgtum kgalhtuchokgo. Tiku xatalaksakni katsikgo pi “Dios kapaxki” (Jud. 1). Putum tiku xatalaksakni lakpuwankgo la apóstol Juan: «¡Kaʼakxilhtit lu lanka tapaxkit nema kinkakgalhiniyan xaTlat xlakata kinkalimapakuwikanan xkamanan Dios!» (1 Juan 3:1). Pero ¿kajwatiya kapaxki Jehová tiku xatalaksakni? Ni, Jehová limasiyanit pi kapaxki putum kskujnin. ¿Tuku limasiya pi lu kinkapaxkiyan? Talakgmaxtut limasiya pi ni anan atanu tiku tlakg kinkapaxkiyan nixawa Jehová (Juan 3:16; Rom. 5:8). w24.01 28:​9, 10

¿Tuku tlawalh David xlakata nialh xpekualh? Lilakpuwa tuku Jehová xʼama tlawa xpalakata. Xkatsi pi Jehová xʼama lakgmaxtu akxni xlilat. Xmalaknuninit pi xla xlichatiy mapakgsina xalak Israel xʼama litaxtu (1 Sam. 16:​1, 13). Chu xkatsi pi komo wa Jehová tiku xmalaknuninit uma, xlikana xʼama kgantaxtu. Chu akinin, ¿tuku kinkamalaknuninitan Jehová? Xla ni kinkamalaknuninitan pi ni katikgalhiw taʼakglhuwit la uku. Pero maski tuwa tuku natitaxtuyaw, kinkamalaknuninitan pi kxasasti kakilhtamaku namasputu putum taʼakglhuwit (Is. 25:​7-9). Liwana katsiyaw pi xla kgalhi litliwakga xlakata nakamalakastakwani tiku nikgonita, xlakata nakinkamapaksayan chu xlakata nakamasputu kintalamakgasitsinkan (1 Juan 4:4). w24.01 6:​12, 13

¿Tuku xlakata tamakamastaniw Jehová chu tamunuw? Xlakata xtatayaputunaw. Kalakapastakti tuku makgtayan nakanajlaya pi xtekgsnita xaxlikana. Lakgapasti Jehová, tsuku liʼakxilha chuna la minTlat xalak akgapun, maxki kakni chu tsuku paxkiya. Tatliwakglhli mintakanajla chu liskujti namakgxtakga mintalakgalhin. Nialh tlawa tuku Jehová xkajni chu tsuku tlawaya tuku lakgati. Lu tlan makgkatsi akxni akxilhti pi Dios tapatin (Sal. 32:2). Lakkaxwili napina kputum tamakxtumit chu tsuku kalitachuwinana amakgapitsin tuku xkatsinipat. Xlakata la uku wix tamakamastaninita Dios chu tamununita, tlawampat ktiji nema linan klatamat, kalakkaxwili ni namakgxtakga (Mat. 7:​13, 14). Tliwakglh kataya chu ni kamakgxtakgti mintakanajla, kalakkaxwili pi ankgalhin napaxkiya Jehová chu nakgalhakgaxpata xlimapakgsin. w23.07 17:14; 19:19

Akxni lakapastakaw pi malaknuniw Jehová natlawayaw xtalakaskin, lakgmakganaw tuku nitlan. Akgtum liʼakxilhtit, ¿nalakgatiyaw chatum tala tiku makgaxtokga? ¡Nichuna! Akxni makamaxkiw kilatamatkan Jehová, litayaw nalakgmakganaw uma tapuwan. Komo nipara tsinu namastayaw talakaskin nastaka kkinakujkan tuku nitlan, alistalh ni wa lilakgaputsamaw nawan la namakgxtakgaw tuku nitlan nakinkasmanipasayan (Prov. 4:​14, 15). Jesús xlakkaxwilinit namakgapaxuwa xTlat, akinin na tlan tunkun nalakgmakganaw putum tuku katsiyaw pi ni makgapaxuwa Dios (Mat. 4:10; Juan 8:29). Akxni kgalhiyaw taʼakglhuwit chu titaxtuyaw taputsan, kinkamaxkiyan talakaskin nalimasiyayaw pi liwana lakkaxwilinitaw pi chuntiya nastalaniyaw Jesús. Chu katsiyaw pi Jehová nakinkamakgtayayan chuna natlawayaw. w24.03 9, 10:​8-10