Octubre

¿Tuwa makgkatsiya nakgalhakgaxpatnana? Milh kilhtamaku, mapakgsina David chuna makgkatsilh. Wa xlakata skinilh Dios: «Katlawa pi nakkgalhakgaxmatputunan» (Sal. 51:12). David xpaxki Jehová pero milh kilhtamaku tuwa makgkatsilh nakgalhakgaxmata. Akinin nachuna kinkaʼakgspulayan. ¿Tuku xlakata? Pulana, xlakata makglakgalhinanin akinin chu lata akxni lakachinaw ni kgalhakgaxmatnamputunaw. Xlipulaktiy, xlakata Satanás tlawaputun pi ni kakgalhakgaxmatnaw (2 Cor. 11:3). Chu xlipulaktutu, xlakata kkakilhtamaku latamanin ni kgalhakgaxmatnamputunkgo, chu wa uma «un» o talakapastakni nema talakgatuminit (Efes. 2:2). Komo kgalhakgaxmatputunaw Jehová chu tiku kamaxkinit limapakgsin, kiliskujatkan ni nakinkamakgatlajayan kintalakgalhinkan, Satanás chu uma kakilhtamaku. w23.10 6:1

¿Tuku kinkamasiyaniyan xmilagro Jesús akxni chuchut vino tlawalh? Pi kilitaktujutkan. Jesús ni litlankajwanalh xlakata chuchut vino tlawalh. Nikxni xlitlankajwanan tuku xtlawa, wata ankgalhin xmalanki xTlat (Juan 5:​19, 30; 8:28). Komo nastalaniyaw xliʼakxilhtit Jesús, nataktujuyaw chu ni katilitlankajwanaw tuku tlawayaw, wata namalankiyaw kiDioskan (Jer. 9:​23, 24). Kamaxkiw tatlankit nema lakgchan xlakata katsiyaw pi komo ni wa Jehová xkinkamakgtayan, nila tuku xtlawaw (1 Cor. 1:​26-31). Tiku taktuju ni litlankajwanan tuku tlan tlawa xpalakatakan amakgapitsin. Tuku tlakg xlakaskinka akxilha wa pi Jehová katsi chu xtapalh liʼakxilha tuku tlawama (katamalakxtupi Mateo 6:​2-4; Heb. 13:16). Jehová lu paxuwa akxni akxilha pi na taktujuputunaw chuna la Jesús (1 Ped. 5:6). w23.04 4:9; 5:​11, 12

Dios malakpuwanilh apóstol Pablo xlakata xkamakgpuwantinilh xnatalan xlilakpuwankgolh tuku tlan xkakitaxtunilh amakgapitsin. ¿La tlan namakgantaxtiyaw uma tastakyaw ktamakxtumit? Nalakapastakaw pi amakgapitsin na mastaputunkgo xtakgalhtinkan. Kalilakpuwaw uma: akxni wix katachuwinana miʼamigos ni kajwatiya wix chuwinana, wata mastaya talakaskin pi na nachuwinankgo, ¿ni xlikana? Nachuna kitaxtu kkintamakxtumitkan. Kinatalankan tlan limakgkatsikgo akxni mastakgo xtakgalhtinkan, wa xlakata kamastaw talakaskin pi putum nakgalhtinankgo (1 Cor. 10:24). Ni laklhman kamastaw kintakgalhtinkan, chuna amakgapitsin na namastakgo xtakgalhtinkan. Pero na xlakaskinka pi ni pulaklhuwa tuku nalichuwinanaw. Komo nalichuwinana putuminika tuku lichuwinan párrafo, amakgapitsin nialh anan tuku katilichuwinankgolh. w23.04 22, 23:​11-13

Lu xlakaskinka nakamakgtayayaw amakgapitsin, chu chuna tlawayaw akxni lichuwinanaw Dios. Lu xlakaskinka pi ni tsakatwa nawanaw akxni katachuwinanaw latamanin. Katachuwinanaw tiku tanu tanu xtakanajlakan, xkachikinkan chu ni lakxtum la likatsikgo. Apóstol Pablo ni xatsakatwa wa chu litaxtulh tuku xtalakaskin xlakata nakamakgtaya amakgapitsin. Jesús apóstol limaxtulh Pablo xlakata nakalitachuwinan Dios tiku ni judíos xwankgonit (Rom. 11:13). Chu Pablo kalitachuwinalh Dios judíos, griegos, xalakgskgalalan lakchixkuwin, tiku kskujkgo kkapukuxtun, mapakgsinanin chu kskujnin mapakgsinanin. Pablo lu liskujli xlakata tlan xkamakgtayalh «tanu tanu latamanin» (1 Cor. 9:​19-22). Akxni Pablo xkalitachuwinan Dios latamanin, xlilakpuwan talismanin chu xtakanajlakan. Akinin na wa kalilakpuwaw tuku nakamakgtaya latamanin. w23.07 23:​11, 12

Tiku kgalhi tsatata naku ni wamputun pi ni tliwakga. Lu tuwa tamakgkatsi ni nasitsiyaw akxni wi tiku kinkamakgasitsiyan. Espíritu santo kinkamakgtayayan nakgalhiyaw uma tayat (Gál. 5:​22, 23). Tachuwin xagriego «kgalhikan tsatata naku» xmaklakaskinkan akxni xlichuwinankan tantum xaluku kawayu nema xmamansujlikanit. Maski xamanso xwan, chuntiya tliwakga xwanit. ¿La tlan nakgalhiyaw tsatata naku, pero chuntiya tliwakga nawanaw? Nila kiʼakstukan katitlawaw, kiliskinitkan espíritu santo Dios. Tlan nakgalhiyaw uma tayat maski tuwa namakgkatsiyaw. Lhuwa natalan limasiyakgonit uma tayat akxni latamanin kalitalatlawaputunkgonit xtakanajlakan, chu uma makgtayananit tlan nakalichuwinankan Jehová (2 Tim. 2:​24, 25). w23.09 14:3

Kʼakgtum talakawan, apóstol Juan maʼakxilhnika puxamatati lakgkgolotsin tiku xkakninanimakgo Jehová kʼakgapun. Xmalankimakgo chu xwankgo pi wa “lakgchan namakglhtinan kakni, namalankikan chu namakglhtinan litliwakga” (Apoc. 4:​10, 11). Ángeles na malankikgo chu maxkikgo kakni Jehová. Xlakan akxtum tawilakgocha Jehová chu liwana lakgapaskgo. Akxilhkgo la likatsi xlakata tuku tlawa, chu uma kamakgpuwantini namalankikgo (Job 38:​4-7). Akinin na lu kilimalankitkan Jehová akxni tlawaniyaw oración. Chuna tlawayaw akxni waniyaw tuku tayat kgalhi nema lu lakgatiyaw chu tuku xlakata lakgatiyaw. Akxni nalikgalhtawakgayaw Biblia, kaliskujwi naʼakxilhaw tuku xtayat Jehová lichuwinamaka (Job 37:23; Rom. 11:33). Alistalh, kawaniw tuku makgkatsiyaw akxni lilakpuwanaw uma xtayat. Na tlan namalankiyaw Jehová akxni kinkamakgtayayan kinchatunukan o akxni kamakgtaya kinatalankan (1 Sam. 2:​1, 2). w23.05 3, 4:​6, 7

Kkata 1919, xaLanka Babilonia, nialhla akgchipalh xkachikin Dios. Uma kata tsukulh skuja «skujni xatalipaw chu xaskgalala», chu tiku tlan likatsikgo tlan xtsukukgolh tlawankgo “kTiji xaSanto” (Mat. 24:​45-47; Is. 35:8). Xlakata makgapitsin lu xliskujkgonit nalakkaxwilikgo uma tiji, tiku tsukukgolh tlawankgo anta, lhuwa tuku tsukukgolh katsinikgo xlakata Jehová chu tuku lakpuwanit natlawa (Prov. 4:18). Na tlan lakgpalikgolh tuku xtalakaskin xlakata xmakgapaxuwakgolh Dios. Pero Dios ni xkgalhkgalhi pi makgtuminika xtalakgpalikgolh, wata tsinu tsinu kamakgtayanit xkachikin nataskulunki. Kalilakpuwanti la napaxuwayaw akxni putum tuku natlawayaw namakgapaxuwa Dios. Xlakata kgantum tiji skulunku nawan, talakaskin nakuentajtlawakan. Lata kkata 1919 chuntiya lakkaxtlawamaka «Tiji xaSanto» xlakata tlakg lhuwa latamanin nataxtukgo kxaLanka Babilonia. w23.05 17:15; 19:16

Chatunu Lakgkgolotsin tiku Pulalinankgo kamasiyanikgonit xmakgtayananinkan la natlawakgo taskujut. Umakgolh makgtayananin lu tlan tlawamakgo xtaskujutkan. Kamasiyanikanit la chuntiya nakakuentajtlawakgo xborregos Cristo. Akxni tiku xatalaksakni nakalinkan kʼakgapun, akxni sputmaja nawan lhuwa tapatin, kskujnin Dios chuntiya nakakninanikgo. Xlakata Jesús wa nakapulalin, ni katiʼanalh tuku nakamalakgachokgo. Xlikana pi uma kilhtamaku, kachikinin nema Biblia kalimapakuwi Gog xalak Magog nakatalatlawakgo (Ezeq. 38:​18-20). Pero uma ni katimakgapalalh chu nitu katitlawakgolh. Nila katimalakgachokgokgolh takaknin nema maxkikgo Jehová, xla nakalakgmaxtu. Apóstol Juan maʼakxilhnika «lhuwa latamanin» tiku litaxtukgo amakgapitsi xborregos Cristo, chu na wanika pi umakgolh «lhuwa latamanin» wa tiku xlakgtaxtunikgonit «lhuwa tapatin». Uma limasiya pi xkachikin Dios nalakgtaxtu (Apoc. 7:​9, 14). w24.02 5, 6:​13, 14

Xlakata Jehová nakinkamaxkiyan espíritu santo, kiliskinitkan, kilikgalhtawakgatkan xTachuwin chu ni kilitamakgatlinitkan xkachikin. Chuna nakgalhiyaw xalaktlan tayat (Gál. 5:​22, 23). Skulunku xliwanat kintalakapastaknikan chu kintayatkan xlakata Jehová nakinkamaxkiyan xʼespíritu. Komo namastayaw talakaskin pi nixatlan talakapastakni natanu kkinakujkan chu natlawayaw tuku nitlan, ni katikgalhiw xʼespíritu (1 Tes. 4:​7, 8). Pablo wa: «Ni kalakgmakgantit tuku Dios makatsininan» (1 Tes. 5:20). Uma kilhchanima tamakatsinin nema masta Dios akxni maklakaskin xʼespíritu, chuna la xpalakata xkilhtamaku Jehová chu pi lakatsu wi. Ni kalakpuwaw pi lhuwaku tsankga xlakata nachin xkilhtamaku Jehová o pi ni katiʼakxilhwi Armagedón. Wata ankgalhin kalilakpuwaw pi xkilhtamaku Jehová lu lakatsu wi chu kuenta katlawaw kintayatkan, chu kalimasiyaw pi tamakamastaninitaw Dios (2 Ped. 3:​11, 12). w23.06 12:​13, 14

¿Tuku kilitlawatkan komo akxni maklakaskimaw kicelularkan nataxtu pornografía? Talakaskin nipara tsinu na’akxilhaw. Tlan chuna natlawayaw komo nalakapastakaw pi tuku tlakg lhuwa xtapalh wa chuna la talalinaw Jehová. Wilakgo fotos nema makgapitsin lakpuwankgo pi ni pornografía, pero tlawa pi natsukuyaw lakpuwanaw tuku ni xlilat. Na ni kiliʼakxilhatkan umakgo fotos. ¿Tuku xlakata? Xlakata ni tlawaputunaw talakgxtumit nema ni xlitatlawat nipara kkintalakapastaknikan (Mat. 5:​28, 29). David, chatum kgolotsin xalak Tailandia, wan: «Akit ankgalhin klilakpuwan: “¿Nalakgati Jehová pi nakakxilha umakgo fotos maski tasiya pi ni pornografía?”. Uma kimakgtaya naklaksaka tuku tlan». Komo kgalhiniyaw tapekua Jehová ni tuwa katimakgkatsiw nalaksakaw tuku makgapaxuwa. w23.06 23:​12, 13

Tachuwin «niku tlakg xatsekg kminchik» max kilhchanima congregaciones. Akxni lama nawan lhuwa tapatin natalakaskin makxtum nakatalayaw kinatalankan xlakata Jehová nakinkakuentajtlawayan. Wa xlakata, lu xlakaskinka pi lata uku nakapaxkiyaw xliputum kinakujkan. Komo ni chuna natlawayaw max ni katilakgtaxtuw. Latamanin lu nalilakgaputsakgo akxni nachin «lanka xkilhtamaku Jehová» (Sof. 1:​14, 15). Xlakskujnin Jehová na natitaxtuyaw tuku tuwa. Pero komo la uku naliskujaw nakgalhiyaw tayat nema nakinkamakgtayayan natayaniyaw, ni katipekuaw chu tlan nakamakgtayayaw amakgapitsin. Komo nalakgalhamananaw, natlawayaw putum tuku namatlaniyaw xlakata nakamakgtayayaw kinatalankan. Chu tapaxkit, nakinkamakgtayayan makxtum natawilayaw. Komo chuna natlawayaw, Jehová nakinkamaxkiyan latamat nema ni kgalhi xlisputni kʼakgtum kakilhtamaku niku nialh katiʼanalh tapatin chu tuku masputunan (Is. 65:17). w23.07 7:​16, 17

Biblia kalichuwinan kskujnin Dios tiku lu lakgtliwakgan xwankgonit. Pero ni putum kilhtamaku chuna xmakgkatsikgo. Milh kilhtamaku mapakgsina David «tliwakga» xmakgkatsikan «chuna la akgtum lanka sipi», pero atanu kilhtamaku xmakgkatsi pi ni xkgalhi litliwakga chu xpekuan (Sal. 30:7). Sansón na lu tliwakga xwan akxni Jehová xmaxki x’espíritu, pero liwana xkatsi la x’ama kitaxtuni komo Dios nialh xmakgtayalh, wa: «Nialh ktikgalhilh litliwakga chu naklatama chuna la amakgapitsin lakchixkuwin» (Juec. 14:​5, 6; 16:17). Wa Jehová xkamaxki litliwakga. Apóstol Pablo xkatsi pi na xmaklakaskin xlitliwakga Jehová (2 Cor. 12:​9, 10). Chuna la akinin, Pablo na xtatatla (Gál. 4:​13, 14). Chu lu xliskuja natlawa tuku tlan (Rom. 7:​18, 19). Chu xmin kilhtamaku lu xlakgaputsa chu xpekuan namakgnikan (2 Cor. 1:​8, 9). Maski chuna, xla wa: «Akxni ktaxlajwani, lu ktatliwakglha». Wa Jehová xmaxki litliwakga nema xkitsankgani. w23.10 12:​1, 2

Komo makgkatsiyaw pi nitu litaxtuyaw, kalakapastakwi pi wa Jehová tiku kinkalimin kxkachikin (Juan 6:44). Xla akxilha xalaktlan kintayatkan (2 Crón. 6:30). Wa xlakata, akxni kinkawaniyan pi xtapalh litaxtuyaw, kakanajlaniw (1 Juan 3:​19, 20). Makgapitsi max chuntiya nitlan limakgkatsiyaw tuku nitlan tlawaw akxni nina xlakgapasaw xaxlikana (1 Ped. 4:3). Max wi tiku makgasata skujnanimakgo Jehová, pero chuntiya xlilakgmakganatkan nixatlan talismanin. ¿Min kilhtamaku na nitlan mamakgkatsiniyan minaku? Komo chuna, kalilakpuwanti pi kskujnin Jehová nachuna makgkatsikgonit. Apóstol Pablo lu nitlan xlimakgkatsi akxni xlilakpuwan tuku nitlan xtlawa (Rom. 7:24). Maski xmakgxtakgnit xtalakgalhin chu xtamununita, wa: «Xliputum apóstoles akit tlakg ni xlakaskinka klitaxtu». Chu wa pi xla “tlakg xkgalhi talakgalhin” nixawa amakgapitsin (1 Cor. 15:9; 1 Tim. 1:15). w24.03 27:​5, 6

Tuku nitlan laksakli mapakgsina Jehoás kinkamasiyaniyan pi kililaksakatkan amigos tiku nakinkamakgtayakgoyan natlawayaw tuku tlan, amigos tiku paxkikgo Jehová chu makgapaxuwaputunkgo. Tlan nakakgalhiyaw amigos tiku tanu tanu kata kgalhikgo. Kalakapastakti pi Jehoás lu kgawasaku xwanit nixawa Jehoiadá. Kakalilakpuwanti amigos nema kgalhiya chu kalakpuwanti: «¿Kimakgtayakgo tlakg nakkanajlani Jehová? ¿Kimakgpuwantinikgo nakkgalhakgaxmata xlimapakgsin? ¿Lakgatikgo lichuwinankgo Jehová chu tuku katsinikgo kBiblia? ¿Kgalhakgaxmatkgo xlimapakgsin Jehová? ¿Kistakyawakgo akxni wi tuku nitlan ktlawama o kajwatiya kiwanikgo tuku akit kkgaxmatputun?» (Prov. 27:​5, 6, 17). Komo miʼamigos ni paxkikgo Jehová, ni katimakgtayakgon kmilatamat. Pero komo miʼamigos paxkikgo Jehová, kaliskujti xlakata chuntiya natalalinkgoyan. Xlakan lu namakgtayakgoyan (Prov. 13:20). w23.09 9:​6, 7

Alfa xapulana letra xla alfabeto griego, chu omega, wa xaʼawatiya. Akxni Jehová xʼakstu tapakuwi «Kilhtsukut chu Lisputni», kinkamaʼakgatekgsniputunan pi akxni wi tuku matsuki, ankgalhin masputu. Akxni Jehová kamalakatsukilh Adán chu Eva, kawanilh: «Kakgalhitit lhuwa kamanan, kalhuwantit, kamalakgatsamatit katiyatni chu kakuentajtlawatit» (Gén. 1:28). Akxni wa tuku xlakpuwanit xpalakata latamanin chu Katiyatni tsukulh tuku xlakkaxwilinit (Alfa). Chu akxni xkamanan Adán chu Eva tiku nakgalhakgaxmatnankgo namalakgatsamakgo Katiyatni chu akgtum Paraíso natlawakgo, naʼakgasputa tuku Jehová lakkaxwilinit (Omega). Akxni Jehová tlawakgolh «akgapun, katiyatni chu putum tuku anan anta», tlawalh tuku limasiyalh pi xʼama makgantaxti xtalakaskin. Xla namakgantaxti tuku xlakpuwanit xpalakata latamanin chu Katiyatni. Akxni naʼakgasputa xliʼakgtujun kilhtamaku kgantaxtunit nawan xtalakaskin (Gén. 2:​1-3). w23.11 4, 5:​13, 14

Max akgtati papaʼ xʼamakgo lichankgo judíos kʼIsrael, chu tuwa xʼama kakitaxtuni. Pero Jehová kamalaknunilh pi xʼama kamakgtaya xlakata ni tuwa xchankgolh. Judíos tiku ni xmakgxtakgkgo Dios liwana xkatsikgo pi tlakg tlan xʼama kakitaxtuni kʼIsrael nixawa tuku xlimakgxtakgkgolh kBabilonia. Anta, tlan x’amaparakgo kakninanikgo Jehová. Anta kBabilonia ni xʼanan akgtum templo niku xkakninanika Jehová. Xlakata ni xʼanan akgtum pumakamastan chu nipara sacerdotes, israelitas nila xtlawakgo tamakamastan nema kskin Limapakgsin. Nachuna, tlakg lhuwa xʼanankgo tiku xkakninanikgo atanu dioses nixawa tiku ni xmakgxtakgkgo Jehová chu xkgalhakgaxmatkgo xlimapakgsin. Wa xlakata, judíos tiku xmakgapaxuwaputunkgo Jehová lu xtaspitputunkgo kxkachikinkan chu xlakkaxwiliputumparakgo xaskulunku takaknin. w23.05 14, 15:​3, 4

Maklakaskinaw xtamakgtay xʼespíritu santo Dios xlakata lu tuwa kitaxtu nitu nalixkajwananaw kʼuma xakalixkajni kakilhtamaku (1 Tes. 4:​3-5, 7, 8). Espíritu santo nakinkamakgtayayan nalakgmakganaw uma kakilhtamaku, nema lakatsala xlimapakgsin Dios. Na nakinkamakgtayayan “tlan nalikatsiyaw xliputum tuku natlawayaw, xaʼakgstitum nalitaxtuyaw chu lakatitum nalatamayaw” (Efes. 5:9). Jesús wa pi Jehová «nakamaxki espíritu santo tiku skinikgo» (Luc. 11:13). Pulaktum la tlan namakglhtinanaw espíritu santo wa pi naskiniyaw Jehová kʼoración. Atanu wa akxni malankiyaw Jehová ktamakxtumit akxni akxtum katatawilayaw kinatalankan (Efes. 5:​19, 20). Tlan nalinaw kilatamatkan chuna la namakgapaxuwa Jehová xlakata espíritu santo nakinkamakgtayayan. w24.03 23, 24:​13-15

¿Tuwa makgkatsiya nakgalhkgalhinana? Komo chuna, kaskini Jehová xtamakgtay. Kgalhkgalhinankan akgtum tayat nema espíritu santo kinkamakgtayayan nakgalhiyaw (Gál. 5:​22, 23). Wa xlakata kaskini Jehová x’espíritu chu kamakgtayan nakgalhiya xatlan tayat. Komo titaxtupat tuku tuwa chu talakaskin nakgalhkgalhinana, chuntiya kaskini espíritu santo (Luc. 11:13). Kaskini pi kamakgtayan naʼakxilha tuku titaxtupat chuna la xla akxilha. Chu akxni tlawanitata oración, katlawa putum tuku matlaniya xlakata nakgalhkgalhinana. Komo chuntiya naskiniya xtamakgtay Jehová chu naliskuja nalimasiyaya uma tayat, naʼakxilha pi tsinu tsinu namatlaniya. Biblia kalichuwinan lhuwa latamanin tiku limasiyakgolh pi xkgalhkgalhinankgo. Komo nalilakpuwana xliʼakxilhtitkan, na tlan nalimasiyaya uma tayat. w23.08 22:​10, 11

Jesús limasiyanilh Pedro pi Jehová x’ama kuentajtlawa. Akxni xlakastakwananita, Jesús tlawalh akgtum milagro xlakata Pedro chu amakgapitsi apóstoles xchipakgolh lhuwa skiti (Juan 21:​4-6). Uma limasiyanilh Pedro pi Jehová x’ama maxki putum tuku xmaklakaskin. Malakapastaknilh tuku xwanit Jesús, pi Jehová x’ama kakuentajtlawa tiku pulana xputsakgolh xTamapakgsin (Mat. 6:33). Wa xlakata, Pedro tlakg xlakaskinka akxilhli nalichuwinan Dios chu ni wa naskitinan. Kpentecostés kata 33 ni pekualh chu kamakgtayalh lhuwa latamanin namakgamakglhtinankgo xalaktlan tamakatsinin (Hech. 2:​14, 37-41). Chu kamakgtayalh samaritanos chu tiku ni judíos xwankgonit kstalaninanin Cristo nalitaxtukgo (Hech. 8:​14-17; 10:​44-48). Jehová maklakaskilh Pedro xlakata nakamakgtaya lhuwa latamanin namakgtapakgsikgo kcongregación. w23.09 20:1; 22:11

Xliʼakgtiy kata lata xmalakgsputukanit Jerusalén, mapakgsina Nabucodonosor limanixnalh akgtum lanka imagen. Kalimapakgsilh putum lakgskgalalan lakchixkuwin xalak Babilonia chu Daniel pi xwanikgolh tuku xkilhchanima. Komo nichuna, xʼamaka kamakgnikan (Dan. 2:​3-5). Daniel wi tuku lakapala xlitlawat xwanit xlakata niti xmakgnika. «Skinilh mapakgsina pi xmaxkilh kilhtamaku xlakata tlan xwanilh tuku xkilhchanima tamanixnat» (Dan. 2:16). Daniel ni xlipekuanat xwanit chu xlikgalhit xwanit takanajla, xlakata nikxni xlichuwinanit tuku xkilhchanima tamanixnat. Kawanilh kgalhtutu xʼamigos pi «xtasaskinikgolh Dios xalak akgapun pi xkalakgalhamalh chu xkamakatsinilh uma tuku niti xkatsi» (Dan. 2:18). Jehová kakgalhtilh, chu makgtayalh Daniel tlan xwa tuku xkilhchanima tamanixnat. ¡Chuna tlan lakgtaxtukgolh! w23.08 3:4

Akxni kgalhkgalhinanaw, tlakg napaxuwayaw chu ni lu lakgaputsayaw. Chu uma kinkamakgtayayan ni lu natatatlayaw. Na tlawa pi tlakg tlan nakatalalinaw amakgapitsin chu congregación makxtum tawila. Komo ni lakapala sitsiyaw akxni wi tiku tlawa tuku ni lakgatiyaw, makgtayananaw ni nastaka taʼakglhuwit (Sal. 37:​8, nota; Prov. 14:29). Pero tuku tlakg tlan kitaxtu wa pi stalanimaw xliʼakxilhtit Jehová chu uma tlawa pi tlakg natalakatsuwiniyaw. Maski namin kilhtamaku tuwa namakgkatsiyaw nakgalhkgalhinanaw, Jehová nakinkamakgtayayan chuntiya nalimasiyayaw uma tayat. Chu xlakata nina chin xasasti kakilhtamaku, kimputumkan liwana kakatsiw pi «Jehová kaʼakxilhma tiku pekuanikgo, tiku kgalhkgalhimakgo xtapaxkit nema ni makgxtakgnan» (Sal. 33:18). Wa xlakata, kimputumkan lu kaliskujwi xlakata tlakg nakgalhkgalhinanaw. w23.08 21:7; 25:​16, 17

Santiago kamalakapastakalh xnatalan pi maski xwankgo pi xkgalhikgo takanajla, tuku xtlawamakgo xlimasiyama pi ni xlikana xwanit (Sant. 2:​1-5, 9). Santiago na lichuwinalh pi tiku xʼakxilha pi xtala xmaklakaskin lhakgat o liwat pero ni xmakgtaya, maski xwa pi xkgalhi takanajla, nitu xlitaxtu xtakanajla (Sant. 2:​14-16). Santiago lichuwinalh Rahab, tiku limasiyalh pi xkgalhi takanajla (Sant. 2:​25, 26). Uma puskat xkgaxmatnit xpalakata Jehová chu xkatsi pi xla xkamakgtayama israelitas (Jos. 2:​9-11). Limasiyalh pi xkanajlani Jehová akxni kamakgtayalh chatiy skgalananin israelitas xlakata ni xkamakgnika. Chuna la Abrahán, Rahab xaʼakgstitum liʼakxilhka xlakata tuku tlawalh, maski makglakgalhina xwanit chu ni israelita xlitaxtu. Xliʼakxilhtit kinkamasiyaniyan pi lu xlakaskinka nalimasiyayaw pi kgalhiyaw takanajla. w23.12 5, 6:​12, 13

Kstalaninanin Cristo ni kaj tsinu talakaskin nakatsiniyaw tuku masiya Biblia. Wata tlakg katsiniputunaw xlakata «xtakatsin Dios nema tsekg wi», chu espíritu santo nakinkamakgtayayan (1 Cor. 2:​9, 10). Kalakkaxwili tuku miʼakstu nalakputsananiya xlakata tlakg tlan natalalipina Jehová. Max tlan xlakputsanani la kalimasiyanilh Jehová xtapaxkit xlakskujnin xalamakgasa chu la limasiyaniyan uma pi na paxkiyan. Tlan xlakputsanani la xlakkaxwilinit Jehová pi xkakninanika makgasa chu xtamalakxtupi la lakkaxwilinit nakakninanikan la uku. O tlakg xlakputsanani tuku xlichuwinankanit pi xʼama la nema Jesús makgantaxtilh akxni latamalh kKatiyatni chu akxni lichuwinalh Dios. Lu napaxuwaya komo tlakg nalakputsananiya tipalhuwa temas chu namaklakaskina Índice de las publicaciones Watch Tower chu Liputsan xla xtatayananin Jehová. Uma namatliwakglha mintakanajla chu namakgtayayan natekgsa «xtakatsin Dios» (Prov. 2:​4, 5). w23.10 18, 19:​3-5

Tachuwin nema Pedro maklakaskilh akxni wa «lu kalapaxkitit» kilhchanima «pi tlan talhmani». Uma versículo masiya pi akxni lu paxkinanaw, tlawa pi natapatinamputunaw. Tachuwin xagriego nema matitaxtikan «tapatinankan» kilhchanima pi wi tuku litlapanankan. Xlakata tlan naʼakgatekgsaw, kalilakpuwaw pi tlan chipayaw tapaxkit nema kakgalhiniyaw kinatalankan xtachuna la titsu tela nema taxtonkga, chu tlan naxtonkgaw xlakata tlan naliʼakgtlapayaw, ni kaj akgtum o akgtiy talakgalhin, wata lhuwa talakgalhin. Tapaxkit tlan naʼakgtlapa putum tuku nitlan kinkatlawanikgoyan kinatalankan. Kintapaxkitkan lu lanka xliwanat, chu asta xlitlawat pi nakatapatiyaw kinatalankan tuku nitlan kinkatlawanikgoyan maski tuwa namakgkatsiyaw (Col. 3:13). Akxni katapatiyaw, limasiyayaw pi kintapaxkitkan lu tliwakga chu makgapaxuwaputunaw Jehová. w23.11 10, 11:​13-15

Akxni mapakgsina Josías xkgalhi 26 kata, tsukulh makaxtlawinan templo niku tekgska «libro xla xlimapakgsin Jehová nema xtsokgnit Moisés». Akxni kgaxmatli tuku xwan libro, tunkun tlawalh talakgpalit (2 Crón. 34:​14, 19-21). ¿Na likgalhtawakgaputuna Biblia chali chali? Komo liskujpat nalikgalhtawakgaya, ¿lakgatiya? ¿Wi tuku tlawaya xlakata ni napatsankgaya textos nema namakgtayayan? Akxni Josías xkgalhi 39 kata, wi tuku nitlan tlawalh nema limakgatsankgalh xlatamat. Ni skinilh Jehová pi xpulalilh, wata xʼakstu lipawanka (2 Crón. 35:​20-25). Uma kinkamasiyaniyan pi maski linawa kata o akglhuwata kata likgalhtawakgamaw Biblia, chuntiya kiliskinitkan Jehová pi kakinkapulalin, nalikgalhtawakgayaw xTachuwin chu nakgaxmataw xtastakyawkan natalan tiku tliwakga kgalhikgo xtakanajlakan. Uma nakinkamakgtayayan ni natlawayaw tuku nitlan chu tlakg napaxuwayaw (Sant. 1:25). w23.09 12:​15, 16

Biblia lichuwinan lhuwa xliʼakxilhtitkan lakpuskatin tiku skujnanikgolh Jehová chu xpaxkikgo. Ni xmalakatsalikgo tuku xlismanikgo tlawakgo, xliputum tuku xtlawakgo limasiyakgolh xtakanajlakan (1 Tim. 3:11). Kmincongregación max na wilakgo natalan lakpuskatin tiku lu tlan li’akxilhtit litaxtukgo chu lhuwa tuku tlan namasiyanikgoyan. Komo wix tsumatku, kalilakpuwanti makgapitsi natalan tiku wilinikgoyan lu tlan liʼakxilhtit chu katlawa tuku tlawakgo. Kuenta katlawa xalaktlan xtayatkan chu alistalh kalilakpuwanti tuku tlan xtlawa xlakata na nakgalhiya umakgolh tayat. Puskat tiku taktuju, tlan talalin Jehová chu tlan katalalin amakgapitsin. Akgtum liʼakxilhtit, xlakata taktuju chu paxki xTlat xalak akgapun, laksaka nakakgalhakgaxmata tiku Jehová kalakgayawanit napulalinkgo congregación chu familia (1 Cor. 11:3). w23.12 19:​3-5

Jehová lakaskin pi chixku napaxki xpuskat, namaxki tuku maklakaskin, na’akgatekgsa la makgkatsi chu namakgtaya namatliwakglha xtakanajla. Kgawasa, komo naliskuja liwana nalakapastaknana, nakamaxkiya kakni lakpuskatin chu naliskuja xlakata amakgapitsin nalipawankgoyan, namakgtayayan tlan chixku nalitaxtuya akxni natamakgaxtokga. Chu komo natamakgaxtokga, max nakgalhiya kamanan. Xliʼakxilhtit Jehová namakgtayayan tlan tlat nalitaxtuya (Efes. 6:4). Jehová wanilh xKgawasa, Jesús, pi xpaxki chu xmakgapaxuwa (Mat. 3:17). Na xlakaskinka nakawaniya minkamanan pi kapaxkiya chu nakawaniya laktlan tachuwin akxni natlawakgo tuku tlan. Natlatni tiku stalanikgo xliʼakxilhtit Jehová kamakgtayakgo xkamanankan xlakata tlan kstalaninanin Cristo nalitaxtukgo. La uku, kakapaxki natalan xalak congregación chu mifamilia, chu kakawani pi xtapalh kaliʼakxilha (Juan 15:9). w23.12 28, 29:​17, 18

Xtachuna la amakgapitsi latamanin, xlakskujnin Jehová na titaxtuyaw tuku tuwa chu tatatlayaw. Nachuna, kilitayanitkan akxni kinkaputsastalanikgoyan tiku ni akxilhputunkgo xkachikin Dios. Maski Jehová masta talakaskin pi katitaxtuw tuku nitlan, xla malaknunit pi nakinkamakgtayayan (Is. 41:10). Xlakata Jehová kinkatawilan, tlan napaxuwayaw, tlan tuku nalaksakaw chu ni katimakgxtakgwi maski natitaxtuyaw tuku lu tuwa. Jehová malaknu pi nakinkamaxkiyan «takaksni» (Filip. 4:​6, 7). Uma takaksni tlawa pi skayaj namakgkatsiyaw, chu kgalhiyaw uma takaksni kaj xlakata tlan talalinaw Jehová. Uma ni anan tuku xtachuna chu «latamanin nila akgatekgskgo». ¿Minit kilhtamaku tlawaninita oración Jehová chu alistalh kaks lilakawanita xlakata skayaj makgkatsinita? Wa uma «takaksni» nema Dios masta. w24.01 20:2; 21:4

Tiku paxkikgo Jehová malankiputunkgo xtukuwani xliputum xnakujkan. Mapakgsina David xʼakgatekgsa pi akxni malankiyaw xtukuwani Jehová, wa Jehová tiku malankimaw. Nalichuwinanaw xtukuwani kilhchanima nalichuwinanaw tuku tlawa, xalakstlan xtayat chu xtamalakatsukin. David xasanto xliʼakxilhputun xtukuwani xTlat xalak akgapun chu xmalankiputun. Wa pi xmalankiputun xliputum xnaku. Levitas na malankikgolh Jehová. Xlakan wankgolh pi ni akchan tachuwin nema tlan nalimalankikan xasanto xtukuwani Jehová (Neh. 9:5). ¡Xlikana pi Jehová lu paxuwalh akxni kgaxmatli pi xliputum xnakujkan xmalankimakgo! w24.02 9:6

Jehová ni lakpuwan pi nila tuku tlawaya kaj xlakata nila lakgchipi pulaktum tuku xlakkaxwilinita (2 Cor. 8:12). Tuku tuwa titaxtuya kaliʼakxilhti pi namakgtayayan wi tuku nakatsiniya. Kalakapastakti tuku tlawanitata. Biblia wan pi «Dios xaʼakgstitum chu xla nikxni katipatsankgalh» kintaskujutkan (Heb. 6:10). Wix na ni kapatsankga tuku tlawanita. Kalilakpuwanti tuku makgantaxtinitata, chuna la xʼamigo Jehová nalitaxtuya, nalichuwinana xtachuwin o natamunuya. Tuku lakgchipinitata limasiya pi tlan chuntiya namastakaya mintakanajla chu namakgantaxtiya tuku lakkaxwilinita. Jehová namakgtayayan namakgantaxtiya tuku lakgchipimputuna. Komo naʼakxilha la Jehová makgtayatilhayan chu sikulunatlawayan, na nalipaxuwaya chuna la makgantaxtitilhapat tuku lakgchipimputuna (2 Cor. 4:7). Ni kataxlajwani, tlakg lhuwa tasikulunalin namakglhtinana (Gál. 6:9). w23.05 31:​16-18

Jehová kalimasiyani xlakskujnin pi kapaxki chu pi makgapaxuwakgo. Kbiblia makgtiy lichuwinankan pi Jehová wanilh Jesús pi wa xKgawasa tiku tlakg xpaxki chu tlan xmamakgkatsini (Mat. 3:17; 17:5). ¿Na lakaskina pi Jehová chuna xwanin? Xlikana pi xla ni kinkatachuwinanan lata k’akgapun, pero maklakaskin Biblia. Akxni likgalhtawakgayaw tuku Jesús kawanilh xtamakgalhtawakgen, makgkatsiyaw pi Jehová kinkatachuwinaman. Jesús liwana limasiyalh la likatsi xTlat. Wa xlakata, akxni likgalhtawakgayaw tuku Jesús kawanilh xtamakgalhtawakgen maski makglakgalhinanin xwankgonit, kinkamakgtayayan nalilakpuwanaw pi Jehová nachuna kinkawaniman (Juan 15:​9, 15). Komo natitaxtuyaw tuku tuwa, ni kalakpuwaw pi Jehová nialh makgapaxuwa tuku tlawayaw, wata tuku natitaxtuyaw kakinkamakgtayan nalimasiyaniyaw pi lu paxkiyaw chu lipawanaw (Sant. 1:12). w24.03 28:​10, 11