Kalakgmakgaw xtapuwan uma kakilhtamaku

¿NI XLIKANA pi la uku kkakilhtamaku latamanin lakpuwankgo pi lu xlakaskinka litaxtukgo chu kalakgchan wi tuku nakamaxkikan o wi tuku natlawakan xpalakatakan? Pero maski lhuwa tuku nakamaxkikan, ankgalhin nalakpuwankgo pi tlakg lhuwa tuku kalakgchan. Chu uma ni kaks kinkamalakawaniyan xlakata Biblia xlichuwinanita pi kxaʼawatiya kilhtamaku latamanin x’akstu xʼamaka kapaxkikan chu ni xlipaxtikatsininankgolh tuku xtlawaka xpalakatakan (2 Tim. 3:2).

Pero uma nixatlan tayat ni aku lakatsukuma. Adán chu Eva lakpuwankgolh pi xkalakgchan nalaksakkgo tuku tlan chu tuku nitlan, chu la uku patinamaw xlakata tuku nitlan tlawakgolh. Lhuwa kata alistalh, mapakgsina Uzías xalak Judá lakpuwa pi xlakgchan pi xmakamastalh incienso anta ktemplo, pero ni wa xlakgchan chuna natlawa (2 Crón. 26:​18, 19). Fariseos chu saduceos lakpuwankgolh pi xkalakgchan pi Dios tlan xkalikatsinilh kaj xlakata kxfamilia Abrahán xminkgonitancha (Mat. 3:9).

Xlakata lamaw kkakilhtamaku niku latamanin xʼakstu kapaxkikan chu lakpuwankgo pi lu xlakaskinka litaxtukgo, max tlan xkinkapasan xtapuwankan (Gál. 5:26). Max natsukuyaw lakpuwanaw pi kinkalakgchanan wi tuku nakinkalakgayawakanan o pi kinkalakgchanan tlan nakinkalikatsinikanan. ¿Tuku kilitlawatkan xlakata ni nalakpuwanaw chuna la umakgolh latamanin? Pulana kiliʼakgatekgsatkan tuku lakpuwan Jehová xlakata uma. Kaʼakxilhwi akgtiy tastakyaw xalak Biblia.

Jehová wa tiku laksaka tuku kinkalakgchanan. Kalichuwinaw makgapitsi liʼakxilhtit.

• Anta kfamilia, Jehová lakaskin pi xachixku kamaxkika kakni chu pi xapuskat kapaxkika (Efes. 5:33). Chixku o puskat tiku makgaxtokga lakgchan pi tiku tamakgaxtokga kajwatiya xla napaxki (1 Cor. 7:3). Xanatlatni kalakgchan pi xkamanankan nakakgalhakgaxmatkgo chu xakamanan kalakgchan pi xnatlatnikan nakakuentajtlawakgo chu nakalimasiyanikgo tapaxkit (2 Cor. 12:14; Efes. 6:2).

• Anta kcongregación, lakgkgolotsin kalakgchan pi kakamaxkiw kakni xlakata lhuwa skujkgo (1 Tes. 5:12). Pero maski chuna, ni kalakgchan nakawanikgo natalan putuminika tuku xlitlawatkan chu tuku ni xlitlawatkan (1 Ped. 5:​2, 3).

• Dios kamaxkinit talakaskin mapakgsinanin naskinkgo pi kakamaxkiw lilakgaxokgon chu kakni (Rom. 13:​1, 6, 7).

Jehová lu xapaxkina chu lhuwa tuku kinkamaxkiyan nema ni kinkalakgchanan. Xlakata akinin makglakgalhinanin, kajwatiya kinkalakgchanan naniyaw (Rom. 6:23). Pero xlakata Jehová kinkakgalhiniyan tapaxkit nema ni makgxtakgnan, lhuwa tuku kinkamaxkiyan (Sal. 103:​10, 11). Xtasikulunalin chu tuku kinkalakgayawayan kxkachikin, kinkamaxkiyan kaj xlakata xtalakgalhaman nema ni anan xtachuna (Rom. 12:​6-8; Efes. 2:8).

TUKU NAKINKAMAKGTAYAYAN NI KIʼAKSTUKAN NAKINKAPAXKIKANAN CHU NI NATLANKAJWANANAW

Kuenta natlawayaw xlakata ni nalakpuwanaw chuna la uma kakilhtamaku. Komo ni kuenta natlawayaw, max natsukuyaw lakpuwanaw pi tlakg lhuwa tuku kinkalakgchanan nixawa amakgapitsin. Milh kilhtamaku, Jesús wi tuku lichuwinalh nema masiya pi tlan kaj lakapala chuna nalakpuwanaw. Lichuwinalh chatum chixku tiku xchanit uvas, nema kasakwalh lakchixkuwin xlakata tantaku kskujnanikgolh chu xʼama kaxokgoni akgtum denario. Alistalh kasakwapa atanu lakchixkuwin, chu akxni tsiswalh putum kamaxkilh akgtum denario, asta tiku kaj akgtum hora kskujkgonit. Pero tiku tantaku kskujkgonit xlakpuwankgo pi tlakg lhuwa tuku xkalakgchan xlakata tantaku xʼakgchichintapulikgonit (Mat. 20:​1-16). Alistalh, Jesús limaklakaskilh uma liʼakxilhtit xlakata xkamasiyanilh kstalaninanin pi xatapaxuwan xmakgamakglhtinankgolh tuku Dios xkamaxkiputulh.

Kapaxtikatsininaw chu nitu kaskiw (1 Tes. 5:18). Kastalaniw xliʼakxilhtit Pablo, xla ni kaskinilh tuku xmaklakaskin natalan xalak Corinto maski xlakgchan chuna natlawa (1 Cor. 9:​11-14). Talakaskin pi napaxtikatsininanaw xlakata tuku nakinkamaxkikanan chu ni nakgalhkgalhiyaw pi amakgapitsin wi tuku tlakg nakinkamaxkikgoyan.

Kataktujuw. Akxni wi tiku lakpuwan pi lu xlakaskinka litaxtu, lakpuwan pi tlakg lhuwa tuku lakgchan nixawa tuku kgalhiyata. Pero uma xtachuna la akgtum veneno, chu taktujut wa xalikuchun.

Palakachuwina Daniel wililh lu tlan liʼakxilhtit xlakata taktujulh. Daniel xminitancha kʼakgtum xlakaskinka familia, tlan xtasiya, lu skgalala xwanit chu lhuwa tuku xkatsini tlawa. Wa xlakata tlan xlakpuwa pi xlakgchan putum tuku lakgayawaka chu chuna la likatsinika (Dan. 1:​3, 4, 19, 20). Pero nichuna lakpuwa, wata taktujulh chu wa xlakata Jehová lu xtapalh akxilhli (Dan. 2:30; 10:​11, 12).

Ni kamastaw talakaskin pi nakinkapasayan chuna la lakpuwankgo latamanin xalak uma kakilhtamaku, tiku xʼakstukan kapaxkikan chu laktlankajwa. Wata lu kalipaxuwaw tasikulunalin nema kinkamaxkiyan Jehová xlakata xtalakgalhaman nema ni anan xtachuna.