Lu nalitamakgtayayaw komo natalalinaw Dios

1, 2. 1) ¿Tuku kilitlawatkan xlakata nakgalhiyaw chatum tlan amigo? 2) ¿Tuku naʼakxilhaw kʼuma artículo?

KALILAKPUWANTI chatum lu tlan miʼamigo. ¿Tuku talakaskilh xtlawa xlakata lu tlan xtalalipi? Max limaxtu lhuwa kilhtamaku xlakata tlan xlakgapasti. Katsi tuku titaxtunit, tuku lakgati chu tuku ni lakgati. Chu akxilhti laktlan xtayat nema wix na xkgalhiputuna. Chu chuna la titaxtulh kilhtamaku tlakg paxki.

² Talakaskin nalimaxtuyaw lhuwa kilhtamaku chu lu naliskujaw xlakata wi tiku tlan natalalinaw. Na xtachuna kitaxtu xlakata tlan natalalinaw Jehová. Kʼuma artículo naʼakxilhaw tuku kilitlawatkan xlakata tlakg natalakatsuwiniyaw Jehová, tiku tlakg xatlan kiʼamigojkan. Pero pulana kalichuwinaw tuku xlakata tlan kitaxtu natalakatsuwiniyaw Jehová.

3. ¿Tuku xlakata kililakpuwanatkan tuku tlan nakinkakitaxtuniyan komo natalakatsuwiniyaw Jehová? Kalichuwinanti akgtum liʼakxilhtit.

³ Lu xlakaskinka pi nalilakpuwanaw putum tuku tlan kitaxtu akxni talakatsuwiniyaw Jehová (Sal. 63:​6-8). ¿Tuku xlakata? Kalichuwinaw akgtum liʼakxilhtit nema nakinkamakgtayayan naʼakgatekgsaw. Latamanin katsikgo pi lu xlakaskinka liwana nawayankgo, nawakgo lhuwa chuchut, natlawakgo ejercicio chu akchan nalhtatakgo. Maski chuna, lhuwa latamanin nichuna tlawakgo. Pero komo wa ankgalhin xlilakpuwankgolh tuku tlan kitaxtu, uma xkamakgpuwantinilh pi chuna xtlawakgolh. Xtachuna la uma, katsiyaw pi lu tlan kinkakitaxtuniyan akxni talakatsuwiniyaw Jehová. Pero komo nalilakpuwanaw putum tuku tlan nakitaxtu, uma nakinkamakgpuwantiniyan tlakg natalakatsuwinitilhayaw (Sal. 119:​27-30).

4. ¿Tuku wa salmista kSalmo 73:28?

⁴ (Kalikgalhtawakga Salmo 73:28). Tiku tsokgwililh Salmo 73 xmakgtapakgsi kxtribu Leví chu xtlakgnan anta ktemplo. Max lhuwata kata lata kskujnanima Jehová, pero xla akxilhli pi lu xlakaskinka xwanit ankgalhin xlakapastakli pi tlan xkitaxtuni xtalakatsuwini Jehová. Chu xlakaskin pi amakgapitsin na xʼakxilhkgolh pi lu tlan kitaxtu talalinkan Jehová. Kalichuwinaw makgapitsi tuku tlan kitaxtu akxni talalinkan Jehová.

PAXUWAYAW AKXNI TALAKATSUWINIYAW DIOS

5. 1) ¿Tuku xlakata paxuwayaw akxni talakatsuwiniyaw Jehová? 2) ¿La makgtayayan liskgalala nema maxkiyan Jehová kxTachuwin? (Proverbios 2:​6-16).

⁵ Akxni tlakg talakatsuwiniyaw Jehová tlakg paxuwayaw (Sal. 65:4). ¿Tuku xlakata chuna wanaw? Pulaklhuwa tuku xpalakata. Kalilakpuwaw uma, akxni stalaniyaw xtastakyaw nema kinkamaxkiyan kxTachuwin, tlan kinkakitaxtuniyan. Liskgalala nema kinkamaxkiyan kxTachuwin kinkamakgtayayan nalakgmakganaw tuku nitlan nakinkakitaxtuniyan chu kinkamakgtayayan ni natlawayaw laklanka talakgalhin (kalikgalhtawakga Proverbios 2:​6-16). Wa xlakata lu xlikana akxni Biblia wan: «Paxuwa chixku tiku tekgsa liskgalala chu chixku tiku kgalhi taʼakgatekgsni» (Prov. 3:13).

6. ¿Tuku xlakata tsukulh lipuwan tiku tsokgwililh Salmo 73?

⁶ Pero uma ni wamputun pi xʼamigos Jehová nikxni katilipuwankgolh. Tiku tsokgwililh Salmo 73 tsukulh lipuwan akxni tsukulh lilakpuwan pi tiku xlakatakikgo Dios chu xlakatsalakgo xlimapakgsin, tlakg tlan xkakitaxtunima, chu asta kalakgkatsalakanilh tuku xkgalhikgo. Lakpuwa pi tiku lixkajni xlikatsikgo, lakluku xwankgonit chu xtlankajwanankgo tlakg lhuwa tumin xkgalhikgo, ni xtatatlakgo chu nikxni xpatinankgo, pero uma ni xlikana (Sal. 73:​3-7, 12). Xlakata lu xtaxlajwaninit, lakpuwa pi putum tuku xtlawanit xpalakata Jehová nitu xlimakwan. Xlakata lu xlipuwama, wa: «Liwana tasiya pi nitu litaxtunit nakkgalhi xaskulunku naku chu xlakata ktlawa tuku tlan» (Sal. 73:13).

7. ¿Tuku tlan natlawayaw xlakata nialh lu nalipuwanaw? (Kaʼakxilhti dibujo).

⁷ Uma salmista wi tuku tlawalh xlakata nialh lu xlipuwa. Tanulh ktemplo, chu anta Dios makgtayalh nalakgpali xtapuwan (Sal. 73:​17-19). Xlakata Jehová wa tlakg xatlan kiʼamigojkan, katsi akxni lipuwanaw. Talakaskin naskiniyaw pi kakinkapulalin chu namastayaw talakaskin pi nakinkalimakgtayayan xTachuwin chu congregación. Komo chuna natlawayaw, nakgalhiyaw litliwakga xlakata chuntiya naskujnaniyaw maski lipuwamaw. Asta akxni lu lilakgaputsamaw tuku tuwa titaxtumaw, Jehová nakinkamakgoxamixiyan chu nakinkamakgtayayan tlan namakgkatsiyaw (Sal. 94:19).a

PAXUWAYAW LA UKU CHU KATSIYAW PI NAKGANTAXTU TUKU KGALHKGALHIMAW

8. Kalichuwinanti apulaktiy la litamakgtayayaw akxni talakatsuwiniyaw Dios.

⁸ Wi apulaktiy la litamakgtayayaw akxni talakatsuwiniyaw Dios. Pulana, kinkamakgtayayan nalipaxuwayaw kilatamatkan la uku. Chu xlipulaktiy, liwana kanajlayaw pi nakgantaxtu tuku Dios kinkamalaknuninitan (Jer. 29:11). Kalichuwinaw pulakatunu uma.

9. ¿Tuku xlakata lipaxuwayaw kilatamatkan akxni talakatsuwiniyaw Jehová?

⁹ Akxni talakatsuwiniyaw Jehová paxuwayaw. La uku lhuwa latamanin wankgo pi Dios ni xlikana lama. Wa xlakata ni akgatekgskgo tuku xlakata lamaw, chu lakpuwankgo pi namin kilhtamaku putum latamanin chu tuku anan nalakgsputa. Pero xlakata tuku akinin katsininitaw kxTachuwin Dios, liwana katsiyaw pi xla xlikana lama chu nakasikulunatlawa tiku xatapaxuwan tlawaputunkgo xtalakaskin (Heb. 11:6). Akxni Jehová kinkamalakatsukin, wililh kkinakujkan pi nakakninaniputunaw. Wa xlakata lipaxuwayaw kilatamatkan xlakata skujnaniyaw (Deut. 10:​12, 13).

10. Chuna la wan Salmo 37:​29, ¿tuku tasikulunalin namakglhtinankgo tiku nalipawankgo Jehová?

¹⁰ Lhuwa latamanin ni katsikgo pi naʼanan tlakg xatlan latamat. La uku kajwatiya lilakgaputsakgo naskujkgo, nakamakgastakkgo xkamanankan chu namakikgo xtuminkan xlakata nialh naskujkgo akxni nalinkgoya kata. Nipara tsinu lilakpuwankgo naskujnanikgo Dios. Pero xlakskujnin Jehová lu lipawanaw kiDioskan (Sal. 25:​3-5; 1 Tim. 6:17). Liwana katsiyaw pi xla namakgantaxti putum tuku malaknunit. Namakglhtinanaw lhuwa tasikulunalin kkilhtamaku nema aku mima, pulaktum wa pi tlan nakakninaniyaw Jehová kParaíso putum kilhtamaku (kalikgalhtawakga Salmo 37:29).

11. ¿La litamakgtayayaw akxni talakatsuwiniyaw Jehová, chu la limakgkatsi?

¹¹ Anan atipalhuwa tuku tlan kitaxtu akxni talakatsuwiniyaw Dios. Kalilakpuwaw uma, Jehová malaknu pi nakinkamatsankgenaniyan kintalakgalhinkan komo nitlan nalimakgkatsiyaw (Is. 1:18). Uma kinkamakgtayayan nialh nalilipuwanaw tuku nitlan tlawanitaw makgasa (Sal. 32:​1-5). Nachuna, makgapaxuwayaw Jehová chu uma lu tlan kinkamamakgkatsiniyan (Prov. 23:15). Max anan atanu tuku tlan kitaxtuninitan xlakata wix xʼamigo Jehová. ¿Pero tuku tlan natlawayaw la uku xlakata tlakg natalakatsuwiniyaw Jehová?

¿TUKU TLAN NATLAWAYAW XLAKATA TLAKG NATALAKATSUWINIYAW DIOS?

12. ¿Tuku chuntiya militlawat xlakata tlakg natalakatsuwiniya Dios?

¹² Komo wix xtatayana Jehová, lhuwata tuku katsininita xpalakata chu xpalakata Jesucristo, lakgmakganitata mintalakgalhin, limasiyanita pi kanajlaniya Dios chu liskujnita nakgalhakgaxpata xlimapakgsin. Uma limasiya pi wix talakatsuwininita Jehová. Pero xlakata tlakg natalakatsuwiniya, talakaskin chuntiya natlawaya putum uma (Col. 2:6).

13. Kalichuwinanti pulaktutu tuku nakinkamakgtayayan tlakg natalakatsuwiniyaw Jehová.

¹³ ¿Tuku nakinkamakgtayayan natalakatsuwiniyaw Jehová? Pulana, talakaskin chuntiya nalikgalhtawakgayaw chu nalakputsananiyaw tuku wan Biblia. Pero ni kajwatiya kilikatsitkan tuku ni tuwa masiya Biblia xlakata Dios. Na talakaskin naliskujaw naʼakgatekgsaw tuku lakaskin Dios katlawaw chu nalilatamayaw tastakyaw nema tekgsaw kxTachuwin (Efes. 5:​15-17). Xlipulaktiy, talakaskin nalilakpuwanaw putum tuku tlawa Jehová xlakata nakinkalimasiyaniyan pi kinkapaxkiyan chu chuna namatliwakglhaw kintakanajlakan. Chu xlipulaktutu, talakaskin chuntiya naxkajniyaw tuku Jehová xkajni chu ni nakatalalinaw tiku tlawakgo tuku xalixkajni (Sal. 1:1; 101:3).

14. ¿Tuku kilitlawatkan xlakata chali chali namakgapaxuwayaw Jehová? (1 Corintios 10:31; na kaʼakxilhti dibujos).

¹⁴ (Kalikgalhtawakga 1 Corintios 10:31). Lu xlakaskinka natlawayaw putum tuku katsiyaw pi makgapaxuwa Jehová. Ni kajwatiya nalichuwinanaw Dios o naʼanaw ktamakxtumit. Talakaskin pi putum tuku tlawayaw chali chali nalimakgapaxuwayaw Jehová. Kalilakpuwaw uma, katsiyaw pi Jehová ni lakaskin naʼakgskgawinanaw chu pi wi tuku xatapaxuwan namaskiwinanaw (2 Cor. 8:21; 9:7). Na lakaskin pi xtapalh kaliʼakxilhwi latamat nema xla kinkamaskiwinitan. Tlakg talakatsuwiniyaw Jehová akxni ni malakatsaliyaw chuna la wayanaw chu ni malakatsaliyaw la xlilhuwa wayaw kuchu chu akxni tlakg kuenta tlawayaw xlakata ni lu natatatlayaw. Putum tuku tlawayaw xlakata namakgapaxuwayaw Jehová, asta maski lakpuwanaw pi ni lu xlakaskinka, tlawa pi xla tlakg nakinkapaxkiyan (Luc. 16:10).

15. ¿La lakaskin Jehová pi nakalikatsiniyaw amakgapitsin?

¹⁵ Jehová tlan kalikatsini tiku xaʼakgstitum chu tiku ni xaʼakgstitum likatsikgo (Mat. 5:45). Chu lakaskin pi nachuna katlawaw. Jehová lakaskin pi xlakskujnin “ni lixkajni kakalichuwinankgolh amakgapitsin, ni katalatlawanankgolh chu ankgalhin kakalimasiyanikgolh putum latamanin pi kgalhikgo tsatata naku” (Tito 3:2). Wa xlakata ni lakpuwanaw pi tlakg xlakaskinka litaxtuyaw nixawa tiku ni xtatayananin Jehová (2 Tim. 2:​23-25). Komo ankgalhin nakalimasiyaniyaw talakgalhaman amakgapitsin, tlakg natalakatsuwiniyaw Jehová.

AKXNI TAXLAJWANINITAW NA TLAN NATALAKATSUWINIYAW DIOS

16. ¿Tuku makgkatsilh tiku tsokgwililh Salmo 73?

¹⁶ ¿Chu komo namin kilhtamaku nalakpuwanaw pi tamakgatlininitaw Jehová? Kalilakpuwanti tuku titaxtulh tiku tsokgwililh Salmo 73. Xla wa: «Kintantun xʼama ni kxatlan tiji, atsinu ni xaklhtuja» (Sal. 73:2). Wa pi lu xlipuwama, pi nila xlakapastaknan chu kxlakatin Jehová xtachuna xwanit la tantum animal nema ni xlakapastaknan (Sal. 73:21, 22). ¿Lakpuwa pi Jehová nialh xpaxki chu pi nialhla xʼama tapati xlakata makglakgalhina xwanit chu lhuwa tuku nitlan xtlawa?

17. 1) ¿Tuku tlawalh salmista akxni lu nitlan xmakgkatsima? 2) ¿Tuku kinkamasiyaniyan tuku titaxtulh? (Na kaʼakxilhti dibujos).

¹⁷ Salmista lakpuwa pi Jehová xlakgmakganit, pero uma tuku xmakgkatsi ni makgapalalh. Akxni lu nitlan xmakgkatsima, akxilhli pi xlitalakatsuwinit xwanit Jehová. Katsiyaw uma xlakata xla wa: «Pero la uku ankgalhin ktawilan, wix chipanita kimpakgastakat. Kilipulalipina mintastakyaw, chu alistalh nakimaxkiya lilanka» (Sal. 73:​23, 24). Akxni ni lu tlan makgkatsiyaw o taxlajwaninitaw, akinin na talakaskin tliwakglh nalichapaxnanaw Jehová, tiku la akgtum lanka chiwix litaxtu, xlakata natatliwakglhparayaw (Sal. 73:26; 94:18). ¿Chu komo namin kilhtamaku napataxtutayayaw kxatlan tiji? Liwana katsiyaw pi tlan nalakgtaspitparayaw Jehová xlakata xla lu kinkatapatiputunan (Sal. 86:5). Akxni tlakg lu nitlan makgkatsiyaw, tlakg kilitalakatsuwinitkan Jehová (Sal. 103:​13, 14).

TLAN ANKGALHIN NATALAKATSUWINIYAW JEHOVÁ

18. ¿Tuku xlakata wanaw pi tlan ankgalhin natalakatsuwiniyaw Jehová?

¹⁸ Tlan chuntiya natalakatsuwiniyaw Jehová, nikxni katilakgapaskgow kinTlatkan xalak akgapun. Biblia wan pi nila akgatekgskgoyaw xliskgalala chu xtiji Jehová (Rom. 11:33).

19. ¿Tuku kinkawaniyan salmos xlakata kilhtamaku nema aku mima?

¹⁹ Salmo 79:13 wan: «Akinin, minkachikin chu tiku kapulalipina, nakkapaxtikatsiniyan putum kilhtamaku chu nakkalitachuwinanaw mililanka tiku nalatamatilhakgo». Liwana kakatsi, komo chuntiya natalakatsuwiniya Jehová namakglhtinana tasikulunalin putum kilhtamaku chu tlan nawana: «Kimakni chu kinaku max nialh tlan kskujkgolh, pero Dios wa chiwix nema tliwakglh wili kinaku chu xla wa tuku kilakgchan putum kilhtamaku» (Sal. 73:26).