2 Korin
11 Mi laik olsem yupela i no ken les long sampela liklik pasin kranki bilong mi. Na tru tumas, yupela i no les long mi! 2 Mi tingim tru yupela olsem God i save tingim tru yupela. Mi yet i makim yupela long maritim wanpela man, em Krais, na mi laik givim yupela long em olsem wanpela klinpela yangpela meri.* 3 Mi tingim pasin trik bilong snek long giamanim Iv na mi pret, nogut long wankain pasin ol man i bagarapim tingting bilong yupela na yupela i lusim pasin bilong givim bel tru na pasin holi em yupela i mas mekim long Krais. 4 Nau yet sapos wanpela i kam na autim tok long narapela Jisas na i no dispela Jisas mipela i bin autim tok long en, o sapos narapela strong i stiaim tingting bilong yupela na i no dispela strong i bin stiaim tingting bilong yupela long bipo, o sapos wanpela i autim tok long narapela gutnius na i no dispela gutnius yupela i kisim pinis, orait yupela i wanbel tasol long kain samting olsem. 5 Mi skelim olsem ol smatpela aposel bilong yupela i no winim mi liklik long wanpela samting. 6 Maski sapos mi no save tumas long pasin bilong autim ol tok, save bilong mi i no sot liklik. Long olgeta kain rot na long olgeta samting mipela i mekim, mipela i kamapim dispela save long yupela.
7 O, olsem wanem? Ating mi bin mekim sin, long wanem, mi bin amamas long autim gutnius bilong God long yupela i no gat pe long en, na mi bin daunim mi yet bai yupela i ken kisim biknem? 8 Mi bin kisim ol samting bilong ol arapela kongrigesen bilong lukautim mi yet bai mi ken helpim yupela. Long dispela pasin i olsem mi bin stilim ol samting bilong ol. 9 Taim mi bin i kam i stap wantaim yupela na mi sot long sampela samting, mi no putim hevi long wanpela bilong yupela, nogat. Ol brata i kam long Masedonia ol i lukautim mi gut tru long ol samting mi sot long en. Yes, long olgeta samting mi no bin putim hevi long yupela, na mi bai mekim olsem yet. 10 Tok tru bilong Krais i stap long mi, olsem na bai mi no lusim pasin bilong litimapim nem bilong mi long ol hap bilong Akaia.* 11 Bilong wanem mi no putim hevi long yupela? Ating mi no laikim yupela, a? Nogat, God i save olsem mi laikim yupela.
12 Samting nau mi mekim mi bai mekim yet, na bai eskius bilong ol man husat i laik i stap wankain olsem mipela long rot bilong litimapim nem bilong ol long namba ol i holim, dispela eskius bai i no gat as bilong en. 13 Ol kain man olsem ol i giaman aposel, ol i save giamanim ol arapela, na ol i giaman olsem ol i aposel bilong Krais. 14 Mi no kirap nogut long dispela, long wanem, Satan yet i save giaman olsem em i ensel bilong lait. 15 Olsem na mi no kirap nogut sapos ol wokman bilong em tu i giaman olsem ol i wokman bilong stretpela pasin. Samting bai painim ol long bihain bai i stret long wok ol i mekim.
16 Mi tok gen, Man i no ken ting mi mekim pasin kranki. Tasol sapos yupela i ting mi mekim, orait yupela i no ken les long mi maski sapos yupela i ting mi gat pasin kranki, na bai mi tu mi ken litimapim nem bilong mi liklik. 17 Taim mi mekim tok olsem ol man husat i hambak na litimapim nem bilong ol yet, mi no bihainim pasin bilong Bikpela na mekim, nogat. Mi mekim tok olsem man i gat pasin kranki. 18 Planti man i tingim ol samting bilong dispela graun na ol i litimapim nem bilong ol yet, olsem na mi tu bai mi litimapim nem bilong mi yet. 19 Yupela i ting yupela i gat pasin isi, a? Olsem na yupela i save amamas long ol krankiman na yupela i no save les kwik long ol. 20 Tru tumas, yupela i no save les long ol man husat i mekim yupela i kamap wokboi nating bilong ol, na ol man husat i pinisim olgeta samting bilong yupela, na ol man husat i pulim olgeta samting bilong yupela, na ol man husat i ting ol i moa yet winim yupela, na ol man husat i save solapim pes bilong yupela.
21 Mipela i sem long mekim dispela tok, long wanem, sampela i ting olsem mipela i no inap mekim stretpela wok long namba mipela i holim.
Sapos wanpela man i strong long wanpela samting, orait mi tu bai mi strong, maski sapos ol man i lukim mi olsem wanpela krankiman. 22 Ol i bilong lain Hibru, a? Mi tu mi bilong lain Hibru. Ol i man Israel, a? Mi tu mi man Israel. Ol i pikinini bilong Abraham, a? Mi tu mi pikinini bilong em. 23 Ol i wokman bilong Krais, a? Mi bekim tok olsem wanpela longlong man, mi wanpela wokman i winim ol tru: Mi mekim planti wok moa, kalabus planti taim moa, ol man i bin paitim mi planti taim, na planti taim klostu mi dai. 24 Ol Juda i bin paitim mi 39 taim long wip, na ol i bin mekim olsem long mi inap 5-pela taim olgeta. 25 Inap 3-pela taim ol i paitim mi long kanda, wanpela taim ol i stonim mi, 3-pela taim sip mi stap long en i bagarap, na mi trip long solwara inap wanpela nait na wanpela san. 26 Mi raun planti taim, klostu mi lus long ol wara, planti taim mi inap kisim bagarap long han bilong ol raskol, ol wanlain i laik bagarapim mi, ol man bilong ol arapela ples i laik bagarapim mi, mi inap kisim bagarap long ol taun, mi inap kisim bagarap long ol ples nating, mi inap kisim bagarap long solwara, ol giaman brata i laik bagarapim mi, 27 mi hatwok na taitim bun tru, planti taim mi no slip gut, mi hangre na nek i drai, planti taim mi no gat kaikai, kol i bagarapim mi na mi no gat klos.
28 Na i no ol dispela samting tasol, nogat, long olgeta de, samting i putim hevi long mi em mi wari long ol kongrigesen. 29 Sapos wanpela i no gat strong, mi tu mi pilim olsem mi no gat strong. Sapos samting i kamap na i mekim wanpela i pundaun, mi save kros tru.
30 Sapos mi mas litimapim nem bilong mi yet, orait mi bai litimapim nem bilong mi long ol samting i soim olsem mi no gat strong. 31 God na Papa bilong Bikpela Jisas, em Man yumi mas litimapim nem bilong em oltaim oltaim, em i save olsem mi no giaman. 32 Long Damaskus gavana i stap aninit long King Aretas, em i was long taun Damaskus na em i laik holimpasim mi. 33 Tasol ol brata i putim mi long wanpela basket na slekim basket i go daun ausait long windo bilong banis, na mi ranawe long han bilong dispela gavana.