Bipo Haus Bilong Bungim Kaikai, Nau Stediam

Wanpela man long Spen i raitim dispela tok bilong Kirap!

LONG olgeta hap bilong Galisia long Spen, i gat ol liklik haus i stap ol i kolim hórreo. Ol i wokim long plang o long ston na ol i putim kruse antap.

Wok bilong dispela haus, em bilong bungim ol kaikai bilong gaden, olsem kon na patete samting, na bai kaikai i ken i stap gut na kol i no ken holim long taim bilong bikpela kol. Ol i wokim ol pos bilong haus i gat hat long en, kain olsem talinga, na bai ol rat i no ken i go antap long haus na mekim save long ol kaikai.

Tasol 30 yia bipo ol i rausim kruse long wanpela hórreo long liklik ples Xeoane. (Lukim piksa i stap antap.) Em i liklik haus inap olsem 10-pela skwe-mita tasol, tasol ol Witnes Bilong Jehova long Galisia i bung hait long dispela haus long taim tudak na mekim miting bilong ol, na bai ol polis i no ken holim ol (long dispela taim gavman bilong Franco i tambuim wok bilong ol Witnes Bilong Jehova). Sampela taim i gat 23 ol i bung insait long dispela liklik haus.

Bihain gavman i pinisim dispela tambu na nau 20 yia samting i go pinis na ol Witnes Bilong Jehova long Galisia i mekim kibung distrik, na wanpela nius bilong dispela hap (La Voz de Galicia) i tok:

‘Gavman i bin tambuim wok bilong ol Kristen bilong bipo long Rom na ol i mas bung hait na mekim lotu insait long sampela rum i stap insait long graun, olsem ples matmat. Gavman i bin mekim olsem long ol Witnes long Galisia tu, olsem na long 1950 i kam inap long 1960 samting, ol i bin bung hait na mekim miting bilong ol insait long wanpela hórreo, olsem haus bilong bungim kaikai bilong gaden. Long nau i gat 4,000 Witnes long 4-pela provins bilong Galisia, na ol i mekim kibung bilong ol long bikpela stediam.’ Em nau, bikpela senis tru i kamap, a? I no olsem dispela liklik hórreo bipo ol i save bung long en! Nau long Spen i gat olsem 80,000 Witnes i stap, na ol i gat planti kongrigesen, winim 1,000!

[Piksa long pes 29]

Em bikpela kibung long wanpela stediam long Baselona