‘Ol Man i Wetim Jehova i Helpim Ol, Ol i Ken Amamas’

EM STORI BILONG DOMENICK PICCONE

Papamama bilong mi i bin lusim Itali na i go long Amerika long yia 1920 samting, na ol i go sindaun long hap bilong Saut Filadelfia, long dispela taim bipo ol i kolim dispela hap olsem Liklik Itali. Long yia 1927 ol i bung wantaim ol Sumatin Bilong Baibel​—⁠bihain dispela lain i kisim nem Witnes Bilong Jehova.

Mama i karim mi long yia 1929, olsem na taim mi liklik yet mi lain long tok bilong Baibel. Ol Witnes i save kam bung long haus bilong mipela paslain long ol i go autim tok long ol taun long hap bilong Pensilvenia. Ol man bilong ol dispela taun i wok long kisim wanpela kain ston (coal) long graun, na ol i strong long bihainim lotu Katolik, na planti taim polis i holim ol brata. Mi kisim baptais long 1941 long wanpela kibung bilong ol Witnes Bilong Jehova long Sen Lui, long Misuri. Bihain long dispela, ol hevi i wok long painim mi.

Mi kirap poromanim ol manki nogut long hap bilong mipela, na mi kirap long smok na pilai laki. Papamama i lukim olsem ol i no inap bosim mi moa, olsem na mipela i go sindaun long narapela hap bilong dispela biktaun. Mi no amamas, long wanem mi mas lusim ol poroman bilong mi. Tasol long nau, taim mi tingim dispela samting papamama i bin mekim, mi tok tenkyu tru long papa bilong mi. Taim mipela i go sindaun long dispela hap, dispela i givim hevi long papa, long wanem, em i mas lusim bikpela mani long baim rot i go long wok. Bipo em inap wokabaut long lek i go long wok, tasol nau ples wok bilong em i stap longwe na em i mas kalap long tren. Tasol taim mipela i go sindaun long dispela hap, dispela i helpim mi, long wanem, nau mi poromanim gen ol man i stap aninit long God.

Mi Tingting Long Mekim Wok Misineri

Klostu olgeta yia mipela i go long Saut Lansing, long Nu Yok, bilong lukim ol misineri i winim Skul Gileat. Mi lukim ol dispela misineri, em ol i go long ol narapela narapela hap bilong graun, na dispela samting i kirapim bikpela laik long bel bilong mi, na mi tu mi laik mekim wok misineri. Olsem na taim mi pinis long hai-skul, mi kirap mekim wok painia oltaim, em long Me 1947.

I gat narapela yangpela painia i stap long kongrigesen bilong mipela, nem bilong em Elsa Schwarz, na em i givim bel tru long mekim wok autim tok. Papamama bilong em i save tokim em, gutpela sapos em i kamap wanpela misineri, olsem na ating yu inap save wanem samting i bin kamap. Em nau, mitupela i marit long 1951. Mitupela i mekim wok painia long Pensilvenia, na mipela raitim pepa bilong i go long Skul Gileat na lain long mekim wok misineri. Long 1953 ol i singautim mipela i go skul long namba 23 klas bilong Skul Gileat. Mipela skul inap 5-pela mun, na long wanpela kibung i kamap long Toronto, long Kanada, mipela kisim pepa bilong makim olsem mipela i winim skul, na ol i tokaut long hap ol i laik salim mipela i go long en​—⁠mipela bai go long Spen!

Hevi i Painim Mipela Long Spen

Taim mitupela Elsa i redim ol samting bilong i go mekim wok misineri long Spen long 1955, mitupela i gat planti askim. Kantri Spen em i wanem kain ples? Bos bilong dispela kantri em i wanpela Katolik, nem bilong em Komanda Francisco Franco, na dispela gavman em i bosim i tambuim wok bilong ol Witnes Bilong Jehova. Olsem wanem bai mipela inap mekim wok bilong mipela?

Ol brata long namba wan ofis bilong Sosaiti long Bruklin i tokim mipela, polis long Spen i bin holim Frederick Franz, em long dispela taim em i stap namba tu presiden bilong Sosaiti Was Taua, na Alvaro Berecochea, em wanpela misineri bilong Ajentina, na sampela brata moa. Ol i bin wok hait na mekim kibung long bus klostu long biktaun Baselona. Tasol polis i kisim save long dispela na ol i kam holim klostu olgeta manmeri i stap long dispela kibung.a

Sosaiti i tokim mipela, ating i no gat wanpela bai kam bungim mipela taim mipela kamap long Baselona. Sosaiti i tok: “Yupela i mas painim ples slip long wanpela haus pasindia, na bihain toksave long Sosaiti long Nu Yok long atres bilong dispela haus pasindia.” Mipela tingim tok bilong Aisaia, em i tok: “Ol manmeri i bilip long [Jehova] na i wetim em i helpim ol, ol i ken amamas. Na taim yupela i wokabaut . . . em bai i stap baksait long yupela na em bai i tokim yupela long rot yupela i mas bihainim.” (Aisaia 30⁠:​18, 21) Mipela save, mipela i mas wetim Jehova i helpim mipela, na mipela i mas bihainim tok bilong oganaisesen bilong em.

Mipela tok gutbai long papamama bilong mipela na ol pren bilong mipela, em ol i bin i kam long Nu Yok bilong gutbai long mipela, na nau sip mipela i stap long en (Saturnia) em i bihainim Wara Hudson na i go olgeta long Biksolwara Atlantik. Mi no lukim gen papa bilong mi, long wanem em i gat sik, na tupela yia bihain, taim mi stap long dispela longwe hap, em i dai.

Sip i sua long biktaun Baselona long Spen, em ples mipela mas mekim wok long en. Ren i kam daun na i mekim mipela i bel hevi liklik. Tasol taim mipela lusim sip na lusim kastam na i kam ausait, mipela lukim sampela man em pes bilong ol i lait. Alvaro Berecochea wantaim sampela brata moa bilong Spen ol i kam wetim mipela. Mipela amamas tru long harim tok olsem polis i bin lusim ol brata i go.

Nau mipela i mas lain long tok ples Spen. Long dispela taim bipo, taim ol misineri i laik lain long nupela tok ples, ol i mas bung wantaim ol man bilong ples na wok strong long lain. Sosaiti i no save putim ol skul bilong lainim ol misineri long nupela tok ples. Mipela i mas winim ol aua ol i makim long mekim wok autim tok, na mipela mas lain tu long dispela nupela tok ples.

Hatpela Bos Katolik i Bosim Ples, Tasol Mipela i Autim Tok

Long dispela taim, lain bilong Jehova i nupela long Spen. Long 1955 i gat 28 milion manmeri i stap long dispela kantri, na i gat 366 pablisa. I gat 10-pela kongrigesen tasol i stap. Olsem wanem? Lain bilong Jehova bai i stap liklik lain tasol, o lain bilong ol bai i go bikpela? Taim mitupela meri bilong mi i kirap autim tok long ol haus, mipela pilim olsem i no hatwok long autim tok. Ol manmeri long Spen i hangre long kisim save long tok i tru.

Tasol gavman i tambuim wok bilong mipela long autim tok. Orait, mipela i mekim olsem wanem? Taim mipela autim tok long wanpela hap, mipela i no save autim tok long olgeta haus long dispela hap. Na sapos mipela i laik autim tok long wanpela bikpela haus i gat planti haus long en, bai mipela autim tok long wan wan haus tasol. I gat planti bikpela haus long Baselona i gat 5-pela o 6-pela plua na i gat planti haus long olgeta plua bilong en. Mipela save go long ol dispela bikpela haus na autim tok long ol haus long hap antap pastaim, na mipela i wok i kam daun. Sampela taim mipela i go long wanpela haus tasol long olgeta plua, o mipela abrusim sampela plua. Mipela mekim olsem, na sapos wanpela man i strong long lotu bilong em na i birua long mipela na telefon long polis, i hatwok long polis i holim mipela.

Mipela save mekim ol miting bilong kongrigesen long haus bilong ol brata, ol brata sista bilong 3-pela o 4-pela buk-stadi bai bung wantaim long miting. Olsem na wasman bilong kongrigesen inap i go long olgeta wan wan grup inap wanpela taim long mun. Brata i lukautim buk-stadi em i mas lukautim olgeta miting, em ol i mekim long narapela narapela apinun long olgeta wik na inap olsem 10 o 20 manmeri i bung.

Mipela mas lain long nupela kain sindaun. Long dispela taim bipo i no gat ol haus misineri long Spen, olsem na sapos inap mipela save stap wantaim ol brata sista long haus bilong ol. Mipela i mas lain long kukim kaikai long paia, em hatwok liklik long Elsa! Bihain mipela baim wanpela stov kerasin bilong kukim kaikai long en.

Ol i Mekim Nogut Long Mipela na Rausim Mipela

Bihain liklik mipela harim tok olsem ol i wok long mekim nogut long ol Witnes long hap bilong Andalusia, na polis i holim pinis wanpela painia salim. Sori tru, dispela brata i holim wanpela buk i gat nem na atres bilong ol brata bilong ol narapela hap bilong kantri. Mipela harim tok long polis i wok long holim ol brata long ol narapela narapela biktaun. Dispela hevi i wok long i kam klostu moa long Baselona. Bihain ol i kirap mekim nogut long ol Witnes long Baselona.

Sampela mun paslain long dispela, polis i bin kisim mi i go long namba wan ofis bilong ol bilong givim sampela askim long mi. Ol i wok long givim askim long mi inap sampela aua, na bihain ol i larim mi i go, na mi ting ol i no inap kam kisim mi gen. Tasol ofis bilong Gavman Bilong Amerika (Embasi) long Spen i tok ol i laik bai mipela i lusim Spen, nogut gavman bilong Spen yet i rausim mipela. Liklik taim bihain, polis i tokim mipela olsem insait long 10-pela de tasol mipela i mas lusim Spen. Em liklik hap taim tasol na mipela i no gat taim bilong raitim pas i go long Sosaiti Was Taua, olsem na mipela i no save bai mekim mekim wanem? Mipela pilim olsem i gutpela sapos mipela i go long Potyugal, long wanem, dispela kantri i stap klostu na i gat ol misineri long en.

Narapela Ples Wok, Narapela Tok Ples

Taim mipela kamap long Lisbon, long Potyugal, long Julai 1957, Sosaiti i makim mipela bilong mekim wok misineri long biktaun Poto, em wanpela biktaun i stap longwe long Lisbon long hap bilong not. Ol man i tok em i namba tu biktaun bilong dispela kantri, na ol man long dispela hap ol i gat nem long wokim wanpela kain wain. Wanpela strongpela kongrigesen i stap long dispela hap na ol i save bung long wanpela rum aninit long wanpela haus na mekim ol miting bilong ol. Long Potyugal tu ol i tambuim wok bilong mipela, long wanem, hatpela bos Salazar i bosim ples. Tasol i no olsem Spen. Long Potyugal 40 i go inap 60 manmeri ol i save bung long haus bilong ol brata na mekim miting. Ol man i no inap save ol Witnes i bung long ol dispela haus. Mi no save long tok Potyugal, tasol ol i makim mi bilong lukautim wanpela kongrigesen. I no gat wanpela skul bilong helpim mipela long lainim tok ples Potyugal, olsem na mipela yet i mas hatwok long lainim dispela tok ples.

Inap olsem wanpela yia bihain, Sosaiti i makim mipela bilong i go mekim wok long biktaun Lisbon. Nau long namba wan taim mipela i gat haus bilong mipela yet. Sosaiti i makim mi long mekim wok olsem wasman sekit na mipela mas raun long olgeta hap bilong Potyugal. Taim mipela kamap pastaim long Potyugal, inap olsem 305 pablisa tasol i stap long 5-pela kongrigesen.

Taim Bilong Hevi i Kirap

Long sampela mep bilong Potyugal na ol hap em Potyugal i bosim, i gat wanpela rait, olsem: “San i no save go daun long ol hap em Potyugal i bosim.” Dispela tok i stret, long wanem Potyugal i bosim planti hap​—⁠tupela bikpela hap Potyugal i bosim, em Mosambik na Angola long Afrika. Long 1961 hevi i wok long kamap long dispela tupela kantri, na Potyugal i tingting long kisim sampela man moa bilong insait long ami na bai Potyugal i gat bikpela strongpela ami.

Taim ol i singautim ol yangpela brata long insait long ami, bai ol i mekim wanem? Sampela i gat sik na gavman i orait long ol i no ken insait long ami, tasol planti ol i sanap strong na tok ol i no ken insait long ami, long wanem ol i Kristen na ol Kristen i no save pait. I no longtaim na gavman i kirap mekim nogut long ol Witnes. Brens-ofis i harim tok olsem wanpela lain bilong polis (P.I.D.E. Polícia Internacional e Defesa do Estado) i holim sampela painia salim na paitim ol nogut tru. Polis i singautim sampela bilong mipela ol misineri i go long ofis bilong ol bilong givim askim long mipela. Ol i tokim 3-pela misineri wantaim meri bilong ol, ol i mas lusim dispela kantri insait long 30 de tasol. Mipela olgeta i askim gavman long larim mipela i stap.

Dispela lain polis (P.I.D.E.) i singautim mipela olgeta misineri wantaim meri bilong mipela long i go long namba wan ofis bilong polis bambai bos bilong ol em inap givim askim long mipela. Pastaim ol i singautim wasman bilong brens, em Eric Britten na meri bilong em Christina na givim askim long tupela. Bihain ol i singautim Eric Beveridge na meri bilong em Hazel, na bihain mitupela Elsa. Bos bilong polis i giaman na tok mipela mekim wok bilong ol Komyunis, na mipela laik daunim ol gavman long hap bilong wes, long wanem mipela tokim ol man ol i no ken insait long ami. Mipela apil, tasol ol i no harim tok bilong mipela.

Mipela bel hevi tru taim mipela mas lusim ol 1,200 brata i stap long dispela hap, em ol i karim bikpela hevi long han bilong wanpela bos nogut! Eric Beveridge wantaim meri bilong em i go long Spen, na Eric Britten wantaim meri bilong em i go bek long Inglan, tasol olsem wanem long mitupela Elsa? Bai mitupela i go mekim wok misineri long wanem hap? Ol i salim mitupela i go long Moroko, em hap bilong ol Muslim.

Autim Tok Long Moroko, Em Wanpela Kantri i Bihainim Lotu Islam

Mipela mas wet gen long Jehova na askim em long helpim mipela. Em nupela ples bilong mekim wok, na i gat ol nupela kain pasin na tok ples mipela mas kisim save long en! Ol manmeri bilong dispela hap ol i save mekim tok Arap, na tok Frans, na tok Spen. Inap olsem 234 Witnes i stap long dispela hap na i gat 8-pela kongrigesen. Lotu Islam em i bikpela lotu long dispela kantri, na i tambu long autim tok long ol lain bilong dispela lotu, em ol Muslim. Olsem na mipela i mas autim tok long ol manmeri bilong narapela hap em ol i kam i stap long Moroko.

Taim ol misineri i wok long i kam long Moroko, kirap long yia 1959 samting, nau lain Witnes long dispela hap i wok long i go bikpela. Tasol gavman bilong Moroko i wok long putim hevi long ol man bilong narapela hap, olsem na planti manmeri na planti brata tu, ol i lusim dispela kantri.

Lain manmeri bilong ol narapela hap i wok long i go liklik, olsem na mipela mas painim rot bilong toktok wantaim ol Muslim, na sampela i tokim polis ol i no laik bai mipela i mekim olsem. Planti man i kros long dispela wok mipela i mekim long taun Tanjia na sampela narapela biktaun, olsem na polis i tokim mipela, insait long 30 de tasol mipela i mas lusim dispela kantri. Long Me 1969, gavman i rausim mipela. Dispela samting i bin painim mipela bipo.

Bai Mipela i Stap Inap Hamas Yia?

Sosaiti i tok, mipela mas i go long Bruklin, na Sosaiti i singautim mi long i go long wanpela bung bilong ol wasman bilong brens. Taim mi stap long dispela bung, Sosaiti i tok bai mipela i go i stap long El Salvado, long Sentral Amerika, na bai mi mekim wok olsem wasman bilong brens. Ol i tok bai mi mekim dispela wok inap 5-pela yia, long wanem gavman i orait long ol misineri i ken i stap inap 5-pela yia tasol na bihain ol i mas lusim kantri, long wanem lo bilong gavman i no orait long ol Witnes i rejistaim wok bilong ol long dispela kantri.

Mipela amamas long i go long El Salvado. Inap 1,290 pablisa i stap long dispela hap, na long olgeta mun inap 114 painia i mekim wok. Ol manmeri bilong dispela hap ol i bilip long God, na ol i laikim Baibel, na ol i save mekim gut long narapela man. Taim mipela autim tok, klostu olgeta man i singautim mipela i go sindaun insait long haus bambai mipela inap toktok gut wantaim ol. I no longtaim na mipela mekim Baibel-stadi wantaim planti man tru.

Mipela lukim lain bilong Jehova i wok long i go bikpela, na planti man i laik harim tok, tasol mipela i save, taim mipela i stap olsem 5-pela yia pinis long dispela kantri bai mipela mas lusim na i go long narapela hap, na mipela i bel hevi. Olsem na mipela i tingting long traim askim gavman long orait long mipela rejistaim wok bilong Jehova long dispela kantri. Mipela wokim ol pepa na givim long gavman long Disemba 1971, na long Epril 26, 1972, mipela amamas tru long kaunim toksave long pepa bilong gavman (em Diario Oficial) olsem gavman i orait long rejistaim wok bilong lain bilong Jehova. Nau ol misineri i ken askim gavman long larim ol i stap longtaim long dispela kantri, winim 5-pela yia.

Ol Traim na Ol Blesing

Mipela mekim wok inap planti yia, long planti hap, na mipela kisim planti gutpela pren, na mipela lukim gutpela samting i kamap long wok bilong mipela. Wanpela gutpela samting i bin painim Elsa long San Salvado. Em i stadi wantaim wanpela tisa meri na man bilong em, em soldia. Wanpela wantok bilong dispela tisa tu i laik kisim save long tok i tru. Pastaim man bilong dispela tisa i no laik kisim save long tok bilong Baibel; tasol taim em i stap long haus sik, mipela i go lukim em, na em i amamas long lukim mipela. Bihain em tu i kirap long stadi na em i lusim ami na em i kirap autim tok wantaim mipela.

Wanpela meri i kam long Haus Kingdom bilong painim Elsa, na em i laik save, Elsa i stadi wantaim dispela man bipo em i soldia o nogat. Bihain mipela kisim save olsem bipo, maski dispela soldia i marit, em i bin prenim dispela meri. Dispela meri tu i wok long stadi wantaim ol Witnes! Long taim bilong kibung distrik, dispela man bipo em i wanpela soldia, na meri bilong em, na wantok bilong meri bilong em, na dispela meri bipo soldia i bin prenim, olgeta i kisim baptais.

Wok i Go Bikpela Long El Salvado

Wok i go bikpela tru long El Salvado, olsem na ol i bin sanapim planti Haus Kingdom, na nau inap olsem 18,000 Witnes i autim tok long dispela kantri. Tasol planti traim na hevi tu i bin painim ol Witnes long dispela hap. Inap 10-pela yia ol man long dispela kantri i pait. Maski i gat pait, ol Witnes i mas mekim wok bilong Jehova. Ol i stap gut long Kingdom bilong Jehova na ol i no insait long pait.

Sapos mitupela Elsa i bungim olgeta yia mipela i bin mekim wok painia na wok misineri samting, em inap olsem 85 yia olgeta. Mipela kisim save olsem, ‘ol man i wetim Jehova i helpim ol, ol i ken amamas.’ Ol man i mekim wok bilong Jehova long olgeta de, olsem mekim wok painia samting, ol i save stap belgut na i stap amamas.

[Ol Futnot]

[Piksa bilong Domenick na Elsa Piccone long pes 23]

[Piksa long pes 24]

Wanpela kibung long bus long Spen, long yia 1956

[Piksa long pes 25]

Mipela autim tok long ol man long Moroko, em ol i no bilong lain Muslim

[Piksa long pes 26]

Brens-ofis long El Salvado, nau mipela mekim wok long dispela hap