Stori Bilong Tupela Marit
Planti Senis i Kamap Taim Mipela i Mekim Wok Bilong Jehova
STORI BILONG ERIC NA HAZEL BEVERIDGE
“Kot i makim yu long kalabus inap sikspela mun.” Tok ya i stap yet long tingting bilong mi taim ol i karim mi i go long wanpela kalabus (Strangeways Prison) long Manchester, Inglan. Em Disemba 1950, na mi gat 19 krismas. Long dispela taim bikpela traim tru i painim mi—mi tok nogat taim gavman i singautim mi long insait long ami.—2 Korin 10:3-5.
MI WANPELA Witnes Bilong Jehova na wokman bilong God i save autim tok fultaim. Long dispela as gavman i no ken singautim mi long insait long ami, tasol lo bilong Briten i no ting mipela ol Witnes i stap olsem wokman tru bilong God. Olsem na mi sindaun wanpis long rum kalabus. Mi tingim papa, long wanem, em i gat liklik hap asua long mi stap long kalabus.
Papa em i wanpela woda bilong kalabus, na em i man bilong Yorkshire i gat strongpela tingting, na em i strong long mekim ol samting i stret. Ol samting i bin painim em taim em i insait long ami na mekim wok woda i as na em i no laikim tru lotu Katolik. Namba wan taim em i bungim ol Witnes em long 1930 samting, long dispela taim Papa i go long dua bilong rausim ol, tasol taim em i kam bek insait em holim ol buk bilong ol! Bihain em i kisim sabskripsen bilong nius Consolation (nau Kirap!). Ol Witnes i kam long olgeta yia bilong kirapim em long wokim gen sabskripsen. Taim mi gat 15 krismas, ol Witnes i kam na toktok moa wantaim Papa, mi wanbel long tok ol i kamapim na mi go long sait bilong ol. Long dispela taim mi stat long stadi long Baibel.
Taim mi gat 17 krismas, mi kisim baptais long Mas 1949, bilong makim olsem mi dediket pinis long Jehova. Bihain liklik mi bungim John na Michael Charuk, i no longtaim na ol i bin winim Skul Gileat bilong kamap misineri, na nau ol i laik go long Naijiria. Mi pilim tru bikpela laik bilong ol long mekim wok misineri. Ating ol yet i no save, tasol ol i bin kirapim wankain laik long bel bilong mi.
Taim mi wok long stadi long Baibel, mi no gat tingting moa long winim mak bilong go long yunivesiti. Mi bin lusim papamama bilong mekim wok skin long wanpela ofis bilong gavman long London. Tasol wanpela yia i no pinis yet na bel i kirapim mi long lusim dispela wok, long wanem, mi pilim olsem mi no inap truim dediket bilong mi long God na holim dispela wok bilong gavman wantaim. Taim mi lusim wok, wanpela man i bin wok longtaim long dispela ofis, em i tok amamas long mi lusim dispela “wok skin i save bagarapim tingting bilong man.”
Paslain long dispela i gat narapela traim mi mas winim—olsem wanem bai mi tokim Papa olsem mi laik lusim gutpela wok mani bilong mi bilong kamap wokman bilong God. Wanpela nait taim mi kisim malolo long wok na stap wantaim papamama, mi tokaut stret long samting mi laik mekim. Mi ting Papa bai kros bikpela long mi. Tasol mi kirap nogut taim em i tok: ‘Yu makim rot yu laik bihainim, na wanem samting dispela i kamapim, em samting bilong yu yet. Tasol sapos i no wok gut, no ken krai long mi.’ Long Janueri 1, 1950 mi raitim dispela tok long notbuk bilong mi: “Mi tokim Papa mi laik mekim wok painia. Mi kirap nogut tru long bekim bilong em i makim olsem em i no sakim tingting bilong mi. Aiwara i pundaun taim mi tingim gutpela pasin bilong em.” Mi lusim wok bilong gavman na kisim asainmen bilong mekim wok painia.
Haus Mipela i Stap Long En
Nau i gat narapela samting i traim pasin bilong mi long givim bel long God. Ol i laik bai mi painia long Lancashire na stap long wanpela liklik haus wantaim Lloyd Griffiths, em wanpela wanbilip Kristen bilong Wels. Mi wokim piksa long tingting long dispela haus, olsem haus i gutpela na mipela bai sindaun gut tru long en. Dispela tingting i stap yet taim mi kamap long taun Bacup long taim bilong ren. Tasol tingting bilong mi i senis wantu tasol taim mi kisim save olsem, mipela bai stap long ol rum ol i wokim insait long graun aninit long wanpela haus! Na long nait, mipela i no stap wanpis, i gat ol liklik rat na kokros i save raun. Klostu mi laik lusim dispela hap na go bek long ples. Tasol mi beten askim God long strongim mi long winim dispela traim. Wantu mi stap bel isi, na mi kisim stretpela tingting. Dispela em asainmen mi kisim long oganaisesen bilong Jehova. Mi bai bilip na wet long Jehova bilong helpim mi. Mi amamas tru long mi bin karim dispela hevi, long wanem, sapos mi bin lusim dispela asainmen, ol samting nau mi stori long en bai i narapela kain olgeta!—Aisaia 26:3, 4.
Rossendale Valley i no gat planti wok mani, na mi autim tok long dispela hap inap 9-pela mun. Bihain long dispela mi kalabus, long wanem, mi no laik insait long ami. Mi stap long kalabus Strangeways Prison inap tupela wik, na bihain ol i kisim mi i go long narapela kalabus (Lews Prison) i stap long saut kos bilong Inglan. Mipela 5-pela Witnes wantaim i stap long dispela kalabus, na insait long sel mipela i mekim Memorial bilong tingim i dai bilong Krais.
Papa i kam lukim mi wanpela taim tasol. Ating dispela i wanpela traim bilong em, long wanem, em i wanpela woda em planti man i save long en, na em i go lukim pikinini bilong em—wanpela kalabusman! Mi no inap lus tingting long dispela samting em i mekim. Mi pinis long kalabus long mun Epril 1951.
Taim mi lusim kalabus, mi kalap long tren na go long Cardiff, Wels, we papa i mekim wok olsem nambawan woda long haus kalabus. Mi namba wan bilong 4-pela pikinini, em tripela man na wanpela meri. Mi laik painim wanpela wok hap-taim bilong mi inap lukautim mi yet na mekim wok painia. Mi kisim wok long stua bilong salim ol klos, tasol nambawan bikpela samting long laip bilong mi, em wok Kristen bilong autim tok. Long dispela taim mama i lusim mipela. Dispela i bagarapim tru bel bilong papa na mipela ol pikinini, mi gat 19 krismas na laspela pikinini i gat 8-pela tasol. Sori tru, papamama bilong mipela i katim marit bilong ol.
Man i Painim Gutpela Meri . . .
I gat planti painia long kongrigesen. Wanpela bilong ol em wanpela sista. Long olgeta de em i lusim ples bilong ol main long Rhondda Valley na kam long taun bilong mekim wok skin na wok autim tok. Nem bilong em, Hazel Green, em i wanpela gutpela painia. Hazel i bin save long tok i tru longpela taim moa, winim mi—kirap long 1920 samting papamama bilong em i bin go long ol miting bilong ol Sumatin Bilong Baibel (em ol Witnes Bilong Jehova long nau). Tasol em i ken kamapim stori bilong em yet.
Em i tok: “Mi no givim bel long ol tok bilong Baibel i go inap long 1944, long dispela taim mi ritim wanpela buklet Religion Reaps the Wirlwind. Mama i bin kirapim mi long go long wanpela kibung sekit long Cardiff. Mi no gat planti save long Baibel, tasol ol i makim mi long sanap long ples ol stua i stap na pasim bikpela toksave long bros na baksait i tokaut long pablik-tok. Mi winim dispela traim, maski sampela pasto na sampela narapela man i laik givim hevi long mi. Mi kisim baptais long 1946, na long mun Disemba bilong dispela yia mi kirap na mekim wok painia. Long 1951, wanpela yangpela painia em i bin lusim kalabus nau tasol i kam long Cardiff. Em Eric.
“Mipela i autim tok wantaim. Mipela i pren gut wantaim. Mipela laik mekim wankain wok—helpim wok bilong Kingdom. Olsem na mipela i marit long Disemba 1952. Maski mitupela i mekim wok painia fultaim na mipela i no gat planti mani, i no gat wanpela taim mipela i sot tru long ol samting bilong skin. Sampela taim mipela i kisim presen long wanpela Witnes i bin baim planti tumas jem o sop na em i laik givim sampela long mipela—em samting i kam long taim stret! Mipela i tenkyu tru long ol gutpela helpim olsem. Tasol bihain ol bikpela samting moa i painim mipela.”
Nupela Samting i Kamapim Bikpela Senis
Long Novemba 1954, mi na Hazel i kirap nogut long kisim wanpela samting—em wanpela aplikesen i kam long brens-ofis bilong ol Witnes Bilong Jehova long Inglan. Ol i laik bai mi kamap wasman raun na wok wantaim narapela narapela kongrigesen long olgeta wik. Mipela i ting ol i popaia na salim pepa long mi, olsem na mipela i no toksave long ol narapela long kongrigesen. Tasol mi stretim aplikesen na salim i go, na wet tasol long kisim bekim. Sampela de bihain mipela kisim toksave olsem: “Kam long London bilong kisim trening”!
Mi kamap long ofis long London, mi gat 23 krismas na mi hatwok long bilip olsem mi stap wantaim ol strongpela brata em mi ting ol i winim mi tru long ol samting bilong spirit—em Pryce Hughes, Emlyn Wynes, Ernie Beavor, Ernie Guiver, Bob Gough, Glynn Parr, Stan na Martin Woodburn, na planti narapela, em planti bilong ol i no stap laip moa. Long 1940 i go inap long 1950 samting, pasin bilong dispela lain long givim bel long wok na stap gut long God i stap olsem gutpela piksa long ol brata bilong Briten i kamap bihain.
Wok Sekit Long Inglan
Mipela kirapim wok bilong raun long taim bilong kol na bikpela ais long 1954 na 1955. Ol i makim mipela long go long East Anglia, em i wanpela ples daun long Inglan em kolwin bilong solwara Notsi i save kam long en. I gat 31,000 Witness long Briten long dispela taim. Namba wan sekit i givim hatwok long mipela, na mi givim hatwok long ol brata. Mi no save gut long mekim dispela wok na mi gat pasin bilong ol Yorkshire long tokaut stret long ol samting, olsem na sampela taim mi bagarapim bel bilong ol brata. Inap planti yia mi wok long lain olsem pasin bilong isi long man i winim pasin bilong inapim olgeta wok hariap, na ol manmeri i bikpela samting moa, winim pasin bilong bihainim ol liklik liklik lo bilong mekim wanpela wok. Mi wok yet long traim bihainim pasin bilong Jisas na stap olsem man i givim nupela strong long ol narapela, tasol sampela taim mi pundaun long mekim olsem.—Matyu 11:28-30.
Mipela stap long East Anglia inap long 18 mun, na bihain ol i makim mipela long wok sekit long hap not-is bilong Inglan, long Newcastle upon Tyne na Northumberland. Mi laikim tru gutpela pasin bilong ol pipel long dispela naispela hap. Mi kisim bikpela helpim long wasman distrik, Don Ward, bilong Seattle, Washington, long Amerika. Em i winim klas namba 20 bilong Skul Gileat. Taim mi mekim tok, mi save kamapim planti toktok na mekim hariap tumas. Brata ya i lainim mi long toktok isi liklik, malolo taim mi toktok, na skulim ol man.
Narapela Bikpela Senis Long Laip Bilong Mipela
Long 1958 mipela i kisim wanpela pas i senisim tru laip bilong mipela. Ol i singautim mipela long go long Skul Gileat long South Lansing, New York, long Amerika. Mipela i salim liklik olpela ka bilong mipela na baim tiket bilong sip bilong go long New York. Pastaim mipela i go long kibung intenesenel bilong ol Witnes Bilong Jehova long biktaun New York. Bihain mipela i go long Peterborough, Ontario, na mekim wok painia inap sikspela mun paslain long mipela i go long Skul Gileat.
Ol tisa bilong dispela skul em Albert Schroeder, nau em i insait long lain Gavening Bodi, na Maxwell Friend na Jack Redford, em tupela i dai pinis. Pasin bilong poroman wantaim 82 sumatin bilong 14 narapela narapela kantri i strongim tru mipela. Isi isi mipela kisim liklik save long pasin bilong ples bilong ol narapela sumatin. Taim mipela toktok wantaim ol sumatin i hatwok long mekim tok Inglis, dispela i helpim mipela long save olsem bihain mipela yet bai i gat hatwok long lainim wanpela tok ples. Faipela mun bihain mipela ol sumatin i pinisim skul na ol i makim mipela long go long 27 kantri. Gretiuesen bilong skul i kamap, na sotpela taim bihain long dispela mipela i stap long biktaun New York na wetim sip, em Queen Elizabeth, bilong karim mipela i go bek long Yurop.
Namba Wan Asainmen Long Narapela Kantri
Ol i makim mipela long go long wanem kantri? Potugal! Mipela i kamap long Lisbon long Novemba 1959. Nau mipela i hatwok long lainim nupela tok ples na pasin bilong narapela ples. Long 1959, i gat 643 Witnes long Potugal, na kantri yet i gat klostu 9 milion manmeri long en. Tasol gavman i no orait long wok bilong mipela. Mipela gat ol Haus Kingdom, tasol ol i no gat sain-bot long ausait bilong en.
Pastaim narapela misineri, em Elsa Piccone, i skulim mipela long tok Potugal, na bihain mi na Hazel i go lukim ol kongrigesen na ol grup long hap bilong Lisbon, Faro, Evora, na Beja. Long 1961 ol samting i wok long senis. Mi stadi long Baibel wantaim wanpela yangpela man nem bilong em João Gonçalves Mateus. Em i kamapim klia em i laik stap olsem wanpela Kristen i no insait long ol samting bilong graun, olsem na em no laik insait long ami. I no longtaim bihain long dispela, ol polis i singautim mi long go long hetkota bilong ol na bekim sampela askim. Sampela de bihain ol i toksave olsem insait long 30 de mipela i mas lusim kantri! Wankain samting i painim ol misineri mipela i wok wantaim ol, em Eric na Christina Britten na Domenick na Elsa Piccone.
Mi laik kamapim gut tingting bilong mipela, olsem na ol i larim mipela long lukim hetman bilong ol polis. Em i tokaut stret long as na ol i tokim mipela long lusim kantri, na em i kamapim wanpela nem—João Gonçalves Mateus—em Baibel-stadi bilong mi! Man ya i tok Potugal i no olsem Briten, ol i no inap larim man i bihainim maus bilong bel na tok em i no laik insait long ami. Olsem na mipela i mas lusim Potugal, na mi no bungim João moa. Tasol 26 yia bihain, mipela kisim bikpela amamas taim mipela lukim em na meri na tripela pikinini meri bilong tupela long taim bilong dediketim nupela Betel long Potugal! Wok mipela i bin mekim long Potugal i no lus nating!—1 Korin 3:6-9.
Wanem narapela asainmen bilong mipela? Mipela i kirap nogut taim ol i makim mipela long go long kantri i stap klostu, Spen! Long Februeri 1962, mipela i krai taim mipela kisim tren long Lisbon i go long Madrid.
Lainim Pasin Bilong Narapela Ples
Long Spen mipela mas lain long autim tok na mekim ol miting bilong mipela long pasin hait. Taim mipela i autim tok, mipela i no autim tok long tupela haus i stap klostu klostu. Mipela i save go long wanpela haus, na bihain mipela i go long narapela rot o bikpela haus i gat ol flet long en. Dispela i mekim na ol polis—o pris—i hatwok long painim mipela. No ken lusim tingting, mipela stap aninit long gavman Fasis, em lotu Katolik i bosim, na ol i tambuim wok autim tok bilong mipela. Mipela i bilong narapela kantri, olsem na mipela kisim nem bilong Spen na ol man bai hatwok long save mipela i husat stret. Mi kisim nem Pablo, na Hazel i kisim nem Juana.
Mipela stap sampela mun long Madrid, na bihain ol i makim mipela long mekim wok sekit long Barcelona. Mipela go lukim ol kongrigesen long dispela biktaun, na planti taim mipela i stap tupela o tripela wik long wan wan kongrigesen. Mipela i mas stap longpela taim olsem, long wanem, mipela i mas wok wantaim ol wan wan Buk-Stadi grup olsem mipela i save wok wantaim ol kongrigesen. Olsem na mipela i lukim tupela grup insait long wanpela wik.
Senis Mipela i Kirap Nogut Long En
Long 1963 ol i askim mipela long mekim wok distrik long Spen. Bilong lukautim klostu 3,000 Witnes, mipela mas raun long kantri olgeta bilong lukim ol brata sista i stap insait long nainpela sekit long dispela taim. Mi no inap lusim tingting long sampela kibung sekit mipela i bin mekim long pasin hait long bus i stap klostu long Seville, long wanpela fam klostu long Gijon, na long arere bilong sampela wara klostu long Madrid, Barcelona, na Logroño.
Bilong bihainim savepasin long wok autim tok, mi save skelim ol rot long hap mipela i raun long en na bai mi inap save long wanem rot i gutpela long bihainim sapos hevi i kamap na mipela i mas ranawe. Wanpela taim mipela i autim tok long Madrid, mi na narapela Witnes i stap long ol flet antap taim mipela harim sampela ol i bikmaus na singaut daunbilo. Mipela i go daun na lukim sampela yangpela meri i gat 13 i go inap 19 krismas, em ol i bilong wanpela lain Katolik ol i kolim Hijas de María (Ol Pikinini Meri bilong Maria). Ol i tokim ol man i stap long dispela hap long ol i no ken putim yau long tok bilong mipela. Mipela i no inap toktok gut wantaim ol, na mi save mipela i mas go hariap, nogut ol polis bai holim mipela. Olsem na mipela i lusim dispela hap hariap tru!
Em i wanpela gutpela taim tru long stap long Spen. Mipela i wok long strongim bel bilong ol brata sista i stap long dispela kantri, wantaim ol painia salim tu. Ol inap kalabus, na planti taim ol i sot long ol samting bilong skin bilong ol i ken autim gutnius bilong Kingdom bilong God na kamapim na strongim ol kongrigesen.
Long dispela taim mipela i harim sampela tok i bagarapim bel bilong mipela. Hazel i tok: “Long 1964 mama bilong mi, em wanpela strongpela Witnes, em i dai. Mi sori tru long em i dai na mi no inap tok gutbai long em. Dispela em i wanpela hevi bilong wok misineri em planti narapela tu i bin karim.”
Mipela i Stap Fri Long Mekim Lotu
Gavman i birua long mipela inap planti yia, tasol long Julai 1970 gavman Franco i orait long wok bilong mipela ol Witnes. Mi na Hazel i amamas tru long lukim ol i kamapim ol Haus Kingdom, namba wan i kamap long Madrid na namba tu long Lesseps, long Barcelona. Olgeta i gat ol bikpela sain-bot, na planti i gat lait long en. Mipela i laik bai ol manmeri i save gavman i orait long mipela, na mipela bai i stap long Spen! Em yia 1972, na long dispela taim i gat klostu 17,000 Witnes long Spen.
Long dispela taim tu mi kisim gutpela tok i kam long Inglan. Papa i bin kam lukim mipela long Spen long 1969. Em i pilim tru gutpela pasin bilong ol brata sista long Spen, olsem na taim em i go bek long Inglan, em i kirap stadi long Baibel. Na long 1971, mi kisim toksave olsem em i kisim baptais pinis! Bel bilong mi i pilim tru bikpela sori taim mipela i go lukim papa, na em i stap olsem brata Kristen bilong mi na em i beten long kaikai. Mi wet inap 20 yia long kain samting olsem i ken kamap. Brata bilong mi Bob na meri bilong em Iris, ol i kamap Witnes long 1958. Long nau, pikinini bilong ol, Phillip, i mekim wok sekit long Spen wantaim meri bilong em, Jean. Mipela i amamas long lukim ol i mekim wok long dispela gutpela ples tru.
Wanpela Nupela Senis
Long Februeri 1980, wanpela brata bilong Gavening Bodi i kam long Spen olsem wasman son. Mi kirap nogut taim em i askim mi long wok wantaim em long autim tok. Mi no bin save olsem em i laik skelim pasin bilong mi! Bihain, long mun Septemba, mipela i kisim toksave long kam na stap long hetkota long Brooklyn, New York! Mipela i kirap nogut tru. Mipela i amamas long go, tasol bel bilong mipela i bagarap tru taim mipela i lusim ol brata long Spen. Long dispela taim i gat 48,000 Witnes long kantri!
Taim mipela i lusim kantri, wanpela brata i givim presen long mi, em liklik poket klok. Long dispela klok, em i katim tupela rait—“Lucas 16:10; Lucas 17:10.” Em i tok tupela skripsa i makim mi. Luk 16:10 i kirapim yumi long mekim gut ol wok maski em i liklik wok tasol; na Luk 17:10, i tok yumi stap olsem “wokboi,” olsem na i no gat as na yumi hambak long sampela wok bilong yumi. Kirap long bipo yet mi save olsem maski yumi mekim wanem wanem wok bilong Jehova, em i wanpela wok tasol i stret Kristen i dediket pinis i mas mekim.
Senis i Kamap Long Helt
Long 1990, klok bilong mi i stat long givim hevi long mi. Bihain, ol i mas stretim bikpela rop bilong blut i pas. Long dispela taim skin bilong mi i no gat strong na i hatwok tru, tasol Hazel i helpim mi long kain kain rot, em i karim ol bek na sutkes mi yet i no inap karim. Long Me 2000, ol i putim wanpela liklik masin insait long skin bilong mi bilong helpim klok. Dispela i helpim mi tru!
Insait long 50 yia i go pinis, mi na Hazel i luksave olsem Jehova i save helpim man, na em i save kamapim laik bilong em long taim em yet i makim, i no long taim yumi makim. (Aisaia 59:1; Habakuk 2:3) Long laip bilong mipela planti gutpela samting i bin givim amamas long mipela, na sampela samting i bin givim bel hevi long mipela, tasol oltaim Jehova i bin givim strong long mipela. Hia long hetkota bilong ol Witnes Bilong Jehova, em i wanpela blesing long olgeta de mipela inap i stap na wok wantaim ol brata bilong Gavening Bodi. Sampela taim mi askim mi yet olsem, ‘Tru tru mipela stap long hia o nogat?’ Mipela yet i no mekim wanpela samting na bai mipela mas kisim kain gutpela blesing olsem. (2 Korin 12:9) Mipela i bilip olsem Jehova bai lukautim yet mipela long ol traim samting Satan i save kamapim, na em bai helpim mipela long stap taim stretpela gavman bilong em i bosim graun.—Efesus 6:11-18; KTH 21:1-4.
[Piksa long pes 26]
Strangeways Prison long Manchester, namba wan kalabus mi go long en
[Piksa long pes 27]
Mipela wantaim liklik ka bilong mipela long wok sekit long Inglan
[Piksa long pes 28]
Kibung mipela mekim long pasin hait long Cercedilla, long Madrid, Spen, long 1962
[Piksa long pes 29]
Tebol mipela putim ol buk long en bilong mekim wok autim tok long Brooklyn