Samting Yumi Ken Mekim na Paia i No Ken Kirap Long Haus

LONG yia 1871 bikpela paia i bin kirap long biktaun Sikago long Amerika na i kamapim bikpela bagarap moa yet. Wanpela ripot i tok, planti haus i paia olgeta, winim 17,400, na nau 100,000 manmeri ol i no gat haus, na 250 ol i dai long dispela paia. Wanpela stori i tok, as bilong paia, em bulmakau bilong wanpela meri, em Misis Patrick O’Leary, em i kikim wanpela lam kerasin i stap insait long haus bulmakau na kerasin i kapsait na paia i kirap.

Tasol long nau i gat planti nupela samting ol i wokim bilong mekim dai paia, olsem na planti paia i no go bikpela tumas. Tasol paia i save kamap yet insait long ol haus na em inap bagarapim man. Wanpela lain bilong gavman (National Fire Protection Association, olsem NFPA) i tok, long hap bilong Not Amerika, insait long wanpela yia tasol, klostu olsem 5,000 manmeri ol i bin i dai taim ol haus i paia. Wanpela nius i kamapim tok bilong dispela lain NFPA long ol samting ol man i ken mekim na bai paia i no ken kirap insait long haus. Sampela tok bilong dispela lain i olsem:

◻ No ken larim ol man i smok insait long haus. Sampela i save tromoi nating smok na nau paia i kirap insait long haus. Planti man i save dai long ol paia em smok i as bilong en.

◻ No ken larim olkain stov o paia o samting bilong hatim rum i wok i stap taim i no gat man long haus o taim yu slip.

◻ No ken mekim wok long planti samting wantaim sapos ol i wok long paua, na sapos rop bilong en i bagarap liklik, yu no ken mekim wok long en. Na sapos yu mas senisim liklik waia pius insait long liklik bokis paua, namba o strong bilong waia i mas stret.

◻ Mas klinim paip bilong stov long olgeta yia samting na rausim pipia i pas insait long en.

◻ Sapos yu gat wanpela kain masin long haus i save krai taim paia i kirap insait long haus na smok i kamap, skelim masin olgeta taim, nogut em i no wok gut, na senisim batri bilong en long olgeta yia. Olgeta long famili i mas save long krai bilong en i makim paia i kirap insait long haus.

◻ Olgeta wan wan long famili i mas save long dua samting bilong ranawe i go ausait, na no ken putim ol samting long dispela hap na pasim rot.