Yu Inap Kisim Bagarap Long Haus?—20 Samting Bilong Skelim

TAIM yu bin wok strong long ples wok na yu amamas long kam bek long haus em yu ken i stap gut long en na bagarap i no inap painim yu, ating tingting bilong yu i stap isi na yu tok: “Gutpela tru mi stap long haus!” Tasol olsem wanem? Bagarap inap painim yu? Sampela manmeri inap kisim bikpela bagarap long haus bilong ol, em ol i no save long en. Ol man i gat ol liklik pikinini, ol i mas stretim gut ol samting bambai bagarap i no ken painim famili planti taim insait long haus. Mekim wok long lista daunbilo, na skelim haus bilong yu na makim ol samting yu mas stretim.

✔ Ol plaua. Sapos yu gat ol liklik pikinini, ol plaua i gat gip long en i no ken stap insait long haus. Tingim, ol liklik pikinini i save putim klostu olgeta samting insait long maus bilong ol.

✔ Laplap bilong windo. Rop bilong pasim na opim laplap bilong windo i no ken hangamap i go daun na pikinini inap holim. Rop inap raunim skin bilong pikinini o raunim nek bilong em na pasim win bilong em.

✔ Ol kabot samting. Putim huk samting long dua bilong ol kabot. Dispela bai mekim na ol pikinini i no inap holim ol samting i sap na ol marasin bilong klinim haus.

✔ Lata. Olsem wanem? Lam i lait gut long lata na ol kago samting i no stap nabaut long lata? Yu bin putim dua long antap na long daunbilo bilong lata bambai liklik pikinini i no ken pundaun long en?

✔ Stov. Tanim ol sospen samting na bai han bilong en i no stap long arere bilong stov. Dispela i bikpela samting moa taim yu kukim kaikai.

✔ Praipan. Wasim gut praipan. Praipan i gat planti wel long en inap mekim na haus kuk i paia.

✔ Pam i gat marasin bilong mekim i dai paia. Wanpela pam olsem i mas i stap long haus, na lainim olgeta i gat gutpela tingting long mekim wok long en.

✔ Bet bilong bebi. Ol plang bilong bet i mas i stap klostu klostu. Spes i stap namel long arere bilong matres na arere bilong bet i mas liklik, nogut het bilong pikinini i pas long en.

✔ Ol windo. Ol plang o hap ain i stap long windo bai lukautim pikinini na em i no ken pundaun, na man i bikpela pinis inap rausim ol plang samting sapos paia i kirap.

✔ Ol vaitamin na marasin. Putim ol dispela samting long kabot i gat lok, o long wanpela hap em pikinini i no inap kisim long en.

✔ Dis bilong waswas. Yu no ken lusim liklik pikinini long dis bilong waswas na i no gat man i was long em. Pikinini inap dring wara na i dai insait long liklik hap taim na insait long liklik hap wara.

✔ Aven maikrowev. Tingim, kaikai i save kamap hat hariap tru insait long aven maikrowev. Olsem: Kaikai bilong bebi ol i baim long stua inap kamap hat tru, maski botol em kaikai i stap long en i no hat tumas.

✔ Masin bilong hatim haus. Askim wokman bilong kampani samting long sekim masin, nogut wanpela hap bilong en i bruk na ges nogut bilong en bai kam insait long haus.

✔ Hap ain bilong kukim abus. Ol pikinini i no ken stap klostu long en taim ain i hat.

✔ Dua bilong haus ka. Tokim ol pikinini olsem ol i no ken ran aninit long dua bilong haus ka taim dua i go antap o i kam daun. Ol i mas was gut moa yet sapos dua i wok long paua.

✔ Masin i save krai taim paia i kirap. Oltaim klinim na sekim ol dispela masin. Senisim bateri bilong en long olgeta yia.

✔ Ol rop samting bilong paua. Tromoi ol rop bilong lam samting em sampela hap bilong en i bruk pinis. Sapos samting bilong kisim paua long en i stap nating, karamapim em long sampela samting.

✔ Ol samting i wok long paua. Ol dispela samting i no ken stap klostu long dis bilong waswas o dis bilong wasim plet samting.

✔ Bokis bilong ol samting pikinini i save pilai long en. Putim wanpela o tupela hul long bokis bambai win i ken go insait long en. Na putim hinsis long ai bilong bokis bambai em i no ken pundaun wantu tasol.

✔ Ain bilong ainim klos. Putim long hap ol pikinini i no inap kisim long en, na rop bilong en i no ken hangamap i kam daun.