Yu Ting Wanpela i Bin Wokim?
Hau Blak Paia Bitel i Save Paia i Stap We?
Ol bikpela paia long bus i save pretim ol animal na ol i save ranawe, tasol paia i save pulim ol blak paia bitel. Bilong wanem i olsem? Bikos ol diwai i paia nau tasol ol i gutpela ples bilong ol bitel long putim kiau bilong ol. Na tu, paia i save ronim ol birua bilong dispela bitel, olsem na bitel i stap fri long kaikai, painim poroman, na putim kiau. Tasol olsem wanem ol blak paia bitel i save painim ol bikpela paia long bus?
Hap bilong bodi bilong bitel i save pilim paia
Skelim: Paia bitel i gat wanpela hap bilong bodi i stap klostu long 2-pela namel lek bilong en. Dispela hap bilong bodi inap pilim rediesen bilong ol bikpela paia. Rediesen i mekim dispela hap bilong bodi bilong bitel i kamap hat na long dispela rot bitel i kirap wokabaut i go long painim paia.
Tasol ol dispela bitel i gat ol arapela hap bilong bodi tu i save helpim ol long painim paia. Taim feiveret diwai bilong ol i paia, antena bilong bitel inap pilim sampela liklik hap kemikal i kam long dispela diwai i paia. Sampela saveman i tok ol blak paia bitel inap yusim antena bilong ol long painim liklik smok bilong diwai i paia, maski diwai i stap longwe inap 1 kilomita. Ol dispela bitel i yusim save bilong ol long painim ol bikpela paia bilong bus maski paia i stap longwe long ol inap olsem 48 kilomita!
Ol saveman i wok long skelim hap bodi na antena bilong dispela blak paia bitel bilong helpim ol long wokim gut moa ol masin bilong luksave long rediesen na paia. Long nau ol dispela masin i no save wok gut sapos rum i hat tumas na ol i mas mekim samting bilong mekim ol i kol liklik. Olsem na save ol i kisim long dispela bitel inap helpim ol saientis long wokim ol masin i save wok gut maski rum i hat o kol. Save ol ensinia i kisim long antena bilong bitel i helpim ol long kamapim ol masin i gutpela moa long luksave olsem paia i stap na ol inap save long wanem samting i paia, olsem paia bilong bus o ol arapela kemikal samting.
Ol saveman i kirap nogut long narapela kain pasin bilong blak paia bitel long painim ples bilong putim ol kiau bilong en. E. Richard Hoebeke, long Cornell University, long Amerika, em man i save gut long ol bitel. Em i tok: “Olsem wanem ol dispela bitel i kamapim dispela pasin bilong putim kiau? Tingim, yumi gat liklik save tasol long ol binatang em ol inap save na pilim ol samting.”
Yu ting wanem? Pasin bilong blak paia bitel long painim ol bikpela paia long bus i kamap nating long rot bilong evolusen? O yu ting wanpela man i bin wokim?