Save Bilong Binatang Bilong Pekpek Long Stiaim Raun Bilong En

BINATANG bilong pekpek i save mekim planti wok long pekpek. Em i save kaikai pekpek na putim kiau insait long en. Sampela man binatang i save givim bikpela hap bilong pekpek i go long meri binatang bilong grisim em. Ol i save resis long kisim nupela pekpek bilong animal. Long wanpela wok painimaut, ol saveman i lukim 16,000 binatang i pulap long hip pekpek bilong elefan, na insait long tupela aua tasol ol dispela binatang i karim olgeta pekpek i go.

Sampela kain binatang bilong pekpek i save bungim ol pekpek i kamap olsem bal, na ol i save kisim i go longwe long bikpela hip pekpek, na digim hul na haitim. Ol i save rolim pekpek long stretpela lain, dispela i mekim na ol inap ranawe hariap na bai ol narapela binatang i no inap long stilim ol dispela pekpek long ol.

Tasol olsem wanem binatang bilong pekpek inap wokabaut long stretpela lain maski ples i tudak?

Tingim: Ol wok painimaut bilong pastaim i soim olsem ol binatang bilong pekpek i save bihainim lait bilong san na mun, dispela i helpim ol long wokabaut long stretpela lain maski ples i tudak. Ol saveman long Saut Afrika i painimaut olsem dispela binatang i save yusim bikpela lait i kam long Milkiwe galaksi, na i no lait bilong wan wan sta long wokabaut long stretpela lain. Nius Current Biology i tok dispela “em namba wan taim ol i kisim save olsem Milkiwe galaksi i stiaim raun bilong wanpela lain animal.”

Saveman Marcus Byrne i tok ol binatang bilong pekpek i gat “bikpela save long lukluk long nait maski lait bilong sta i no brait tumas.” Em i tok tu olsem: “Save bilong ol dispela binatang inap helpim ol man long stretim sampela hevi we ol man yet i no inap long lukim.” Olsem, ol inap putim program long wanpela robot bilong painim ol samting insait long wanpela bilding we i bruk wankain olsem save bilong binatang bilong pekpek.

Yu ting wanem? Save bilong binatang bilong pekpek long stiaim raun bilong en i kamap long rot bilong evolusen? O wanpela i bin wokim?