Gutpela Yumi Bihainim Pasin i Stret?

PLANTI manmeri i bikpela pinis ol i save mekim planti pasin giaman, olsem na ol pikinini tu i bihainim ol. Tasol sapos wanpela man i bihainim stretpela pasin, em gutpela samting tru, a? Wanpela nius (Sports Illustrated) i kamapim wanpela stori long dispela samting, na nau yumi ken kaunim.

Nius i stori long wanpela pilai sofbal bilong ol yangpela i kamap long Florida, long Amerika. Manki i was long namba wan beis i holim bal em narapela i bin paitim i go, na em i laik paitim narapela i ran lusim namba wan beis. Referi bilong pilai em Laura Benson, em i tokim manki i ran, ‘Yu aut.’ Tasol dispela manki i sanap long namba wan beis i tok: “Referi, mi no paitim em long bal.” Olsem na referi i orait long narapela manki i bin ran long em i ken sanap long namba tu beis.

Tupela wik bihain dispela manki i pilai, na referi em Benson gen. Wankain samting i kamap na referi i ting manki i no paitim narapela long bal. Olsem na em i orait long narapela i ken sanap long namba tu beis. Maski manki i no mekim wanpela tok, tasol taim referi i lukim pes bilong manki, referi i save em i popaia. Olsem na referi i askim manki: “Yu bin paitim manki taim em i bin ran?”

Na em i tok, “Yesa, em i stret.”

Olsem na taim referi i tok narapela manki em i aut, ol kosa i kros. Tasol referi i stori long samting i kamap tupela wik bipo, na em i tok: “Sapos wanpela pikinini i tok tru, mi bai bilipim tok em i mekim.”

Long nau ol man bilong mekim pasin giaman i save kisim planti samting. Baibel i mekim wankain tok tu olsem: “Ol man nogut i olsem. Ol i gat planti samting, tasol ol i wok long kisim moa yet.” (Buk Song 73:12) Sapos yumi skelim gut bai yumi save olsem pasin i stret i gat gutpela pe bilong en. Ol man bai litimapim nem bilong yu. Tasol bikpela samting em olsem Jehova bai amamas long yu na em bai givim pe long yu, olsem laip i stap oltaim.