Wanbel Long Singsing Bilong Litimapim Nem Bilong Jehova
‘OL I amamas tru long mekim singsing na aiwara i kamap long ai bilong ol man i harim. I no gat wok long musik, na sampela hap bilong singsing i hatwok liklik long mekim, tasol nek bilong olgeta i go stret wantaim.’
Presiden bilong Sosaiti Wastaua bilong bipo, Nathan H. Knorr, i mekim dispela tok bihain long taim em i go long kibung bilong ol Witnes Bilong Jehova long hap bilong Sambia.
Singsing em i wanpela hap wok long sindaun bilong ol Afrika. Long ol ples kanaka nabaut ol meri i save mekim singsing tumbuna taim ol i brukim graun bilong wokim gaden, na ol yangpela man i singsing taim ol i kisim susu bilong bulmakau, na taim ol i laik kirapim ol bulmakau long pulim strong wilka i gat ol hevipela samting long en. Klostu olgeta wok ol i mekim i gat singsing bilong en.
Long planti ol skul bilong Afrika, ol i lainim ol pikinini long singsing na ol i mekim long krai bilong nek ol i kolim long tok Inglis sol-fa. Em i gat wanem krai bilong en? Olsem: “do, re, mi.” Long wanpela piksa wokabaut bipo ol i mekim dispela kain krai i kamap namba wan tru. Dispela krai olsem do, re, mi, fa, sol, la, ti, em i wankain olsem 8-pela kain kain krai long musik bilong ol waitskin. Dispela kain musik i gat kain kain liklik mak bilong kamapim musik olsem. Na i gat 4-pela narapela narapela kain nek bilong en olsem soprano, alto, tenor, bass, na taim olgeta nek i kamap wantaim, em nau dispela i kamapim gutpela musik tru. Planti man i tok, dispela kain musik em i no hatwok long lainim.
Kain musik ol Witnes i mekim wok long en long buk bilong ol (Mekim Singsing Long Jehova), ol i putim ol dispela krai olsem sol-fa long buk singsing bilong ol lain long Afrika i ken mekim. Ol i lusim planti aua bilong putim ol dispela liklik mak i narapela narapela kain inap long ol i ken singsing long 4-pela hap bilong en. Bihain ol i senisim 4-pela kain nek bilong en long bihainim dispela kain krai bilong sol-fa. Na ol i makim wanpela man i save gut long mekim ol dispela 4-pela kain nek na em i mas skelim na save, olgeta wan wan krai i stret o nogat. Bihain ol i mekim wok long ol kompyuta bilong putim ol toktok na krai i stret long sol-fa. Na nau ol inap long prinim ol singsing na i no hatwok long kaunim na singsing long en. Lukim piksa daunbilo long pes.
Wanem gutpela samting i kamap long dispela wok? Ol Witnes Bilong Jehova long Afrika inap bihainim gut singsing na litimapim nem bilong Jehova. Tok bilong wanpela singsing i kamapim tru bel bilong ol, em i tok: “Yumi singaut na paitim han, God em i helpim yumi! Kam bung wantaim na amamas, singsing long God bilong yumi.”
[Sat bilong raitim singsing bilong kingdom long sol-fa long pes 27]
(Bilong save ol dispela rait i stap we long pes, lukim buk o magasin)