Narapela Kain Pasin Bilong Go Antap Long Maunten
MIPELA sindaun long dispela ka i ran long rop ain na ating long ai bilong sampela man em i olsem wanpela liklik binatang spaida i wokabaut long rop bilong umben bilong en. Mipela wok long go antap long wanpela maunten. Em i no hatwok—mipela sindaun tasol long dispela ka i ran long rop. Dispela rop em ka i ran long en, em longpela tru, i no gat narapela i longpela olsem dispela.
Long Nu Meksiko long Amerika i gat wanpela maunten ol i kolim Sandia Pik. Daunbilo i gat biktaun Alberkerki i stap. Dispela rop bilong ol ka i lusim Alberkerki na em i go antap inap olsem 4 kilomita samting long maunten Sandia Pik. Mipela kalap long haus bilong dispela ka. Haus i strong na 60 manmeri inap sindaun insait long en.
Klostu 20 minit samting na mipela i kamap long ples antap, em 3,163 mita antap long mak bilong solwara. Taim mipela lukluk nabaut mipela kirap nogut tru long ol samting mipela lukim. Mipela inap lukim ol samting i stap insait long 28,500 skwea kilomita.
Bihain mipela kisim save olsem dispela ol ka i ran long rop na i go antap long Sandia Pik em i bikpela samting tru ol ensinia i bin wokim. Long sampela hap i hatwok tru long wokabaut long lek na brukim ol dispela maunten. Olsem na ol man bilong wokim dispela samting ol i mekim wok long ol helikopta bilong karim ol samting. Ol helikopta i karim ain na simen na olgeta narapela samting. Ol i wokim tupela longpela taua bilong pasim ol rop bilong dispela ka long en na longpela bilong wanpela taua em 71 mita na narapela em 24 mita. Bilong wokim strongpela as bilong dispela tupela taua na bilong lainim gut tupela, em bikpela wok tru. Ol man i wok tupela yia long dispela samting na long yia 1966 ol i pinisim.
Taim mipela go antap long maunten na kam daun mipela i lukluk bek long maunten Sandia Pik. Ol dispela maunten i narapela kain stret! Mipela amamas tru long lukim. Na tu, taim mipela tingim Man i bin wokim dispela ol maunten em inap putim ol maunten long skel na skelim, mipela ting mipela i olsem man nating tasol! (Aisaia 40:12)—Wanpela man i salim dispela stori i kam.