Narapela Kain Pasindia-Ka Long Yuta

WANPELA toksave i olsem: ‘No Gat Narapela Pasindia-Ka Long Olgeta Hap i Go Antap Olsem Dispela.’ Dispela toksave i stori long wanpela kain pasindia-ka (Skytram) long wara kalap ol i kolim Braidel Vel Fols, long Provo Kanyon, long Yuta, Amerika. Mi bin ting olsem: ‘Tru, dispela pasindia-ka i winim ol narapela?’ Inap 15 yia i go pinis mi bin go antap long wanpela pasindia-ka long Spen bilong lukim ol maunten Montserat, na mi ting dispela ka i go antap moa, winim ka long Yuta. Tasol ol i tok pasindia-ka long Braidel Vel Fols i antap moa, long wanem, em i go antap olsem 374 mita, na longpela bilong waia bilong ka em 534 mita, na ka i slip olsem 45 digri. Na taim ka i go antap tru olsem 1,920 mita, ka i slip olsem 62 digri!

Insait long ka 6-pela man inap sindaun na ka inap ran 8-pela kilomita insait long wanpela aua. Taim ka i go antap, ol samting mipela i lukim i naispela tru. Long han kais bilong mipela i gat wara i kapsait i go daun long maunten, na ol maunten i raunim mipela. Taim mipela go antap moa, baksait long mipela i gat maunten Timpanogos na em i go antap olsem 3,660 mita, na maunten mipela i go antap long en, em maunten Kasket. Wara i kapsait i go daun long maunten olsem 180 mita na i go long wara Provo, na hap wara bilong en i ran long paip inap 6-pela kilomita na ol i mekim wok long en long haus paua.

Ol i wokim dispela pasindia-ka long Swiselan, na kirap long 1962 ol man inap raun long en. Wan milion 500 tausen man i bin raun long dispela ka na i no gat wanpela bikpela bagarap i kamap. Sapos yu pret long raun long pasindia-ka kain olsem dispela, tingim tok bilong wanpela liklik buk: ‘Ol samting i makim olsem, pasindia-ka olsem dispela long Yuta, i gutpela rot bilong raun, long wanem, i no gat planti man i kisim bagarap long en.’ Bihain sapos yu raun long wanpela pasindia-ka i go antap, skelim ran bilong em​—em i go antap moa, winim dispela ka long Yuta o nogat?

[Piksa Kredit Lain long pes 31]

Courtesy Mountainland Travel Region