Ol Wara Kalap Bilong Iguasu—I Olsem Gutpela Bilas Tru Long Bikbus
Man bilong Kirap! long Brasil i raitim dispela stori
“DISPELA em i wanpela gutpela hap tru bilong Saut Amerika.” Wanpela buk (Encyclopedia) i tok olsem long kirapim stori long ol naispela wara kalap i stap klostu long ples ol boda bilong Ajentina, Brasil na Paragwei i bung long en. I gat ol bikpela bikbus long en na dispela i mekim na ol dispela wara kalap i gutpela tru. Ol i olsem gutpela bilas tru long bikpela bus bilong dispela hap. Olsem na ol man i kam raun long hap bilong Saut Amerika ol i mas i go lukim dispela bikpela wara kalap!
Long tok ples Guarani, insait bilong dispela tok “Iguasu” em i olsem “Bikpela Wara.” Na dispela em i stret tru, long wanem em bikpela wara tru na yu inap harim ol pairap bilong en longwe tru, inap olsem 30 kilomita samting. Sapos em i gutpela taim bilong yia, yu inap harim pairap bilong 300 samting narapela narapela wara kalap, long taim wara i kalap i go daun long ol hap ston i hangamap long maunten. Sampela wara i sut i go daun stret, tasol sampela nogat—ol i pundaun pastaim long ol bikpela ston bilong maunten i stap long hap namel, na bihain wara i kalap i go daun long as bilong maunten. Ol i tok, long taim bilong bikpela ren, inap 10,000 kubit mita wara i sut i go daun wantu tasol, olsem long wanpela sekon tasol. Olsem na wara long as bilong maunten i sut i go nabaut na taim san i kam antap, dispela i kamapim ol renbo i gat kain kain kala long en.
Wanpela nius bilong helpim ol turis i stori long wanpela hap bilong wara kalap (ol i kolim Garganta do Diabo) na nius i tok, ‘wanpela gutpela samting long en em ol wara inap olsem 14 olgeta, ol i kalap i go daun long maunten inap 90 mita.’
Taim yu kalap long balus o helikopta samting yu inap lukim gut ol dispela naispela wara. Wanpela turis i mekim olsem na bihain em i tok, ‘Pilot bilong mipela i lukim olsem mipela i amamas tru long lukim ol dispela wara, olsem na em i kam raunim gen inap sampela taim moa. Mipela kisim planti piksa long kamera na long video-kamera samting na ol i kamapim long ples klia tru ol gutpela wok bilong Jehova.’
Tasol ol narapela man ol i amamas long wokabaut long ol hap rot i stap pinis na lukim ol samting. Sapos yu stap long hap bilong Brasil bai yu lukim gut ol dispela naispela wara kalap bilong Iguasu, na sapos yu sanap long hap bilong Ajentina, yu inap wokabaut long arere bilong ol wan wan wara kalap na long sampela hap bilong en em ol i bin wokim ol hap bilong wokabaut long simen, na yu inap i go long ol narapela narapela hap bilong en tu. Olsem na planti man i kam raun long dispela hap ol i lukim planti naispela samting long hia na ol i kisim planti ol gutpela piksa tu bilong ol dispela gutpela wara na ol naispela bikbus.
Ol man i kam raun long dispela hap, sapos ol i lukluk gut bai ol i lukim ol liklik pisin i sut i go daun insait long wara na bihain flai i go antap long ol diwai na ol i go daun gen. Na bai ol i lukim ol grinpela kalangar i sut i go daun long hap antap bilong wara, long ples em wara i no daun tumas, na ol i stap liklik long arere bilong maunten na ol i sut i kam antap na flai i go insait long ol diwai na ol i sindaun na stretim skin na bilas bilong ol. Na sapos ol turis i lukluk moa gen bai ol i lukim ol longpela haus bilong wanpela kain pisin i gat retpela tel, na ol dispela haus i hangamap long diwai. Ol pisin i save bung long ol liklik grup na ol i wokim haus bilong ol long gras i drai pinis na i hangamap long han bilong ol diwai. Na tu i gat ol kain kain naispela bembe yu inap lukim sapos yu go raun bilong lukim ol dispela wara.
Tru tumas, sapos yu inap lukim ol dispela wara kalap bilong Iguasu na yu harim pairap bilong en, ating bai yu amamas tru long en. Ol i bin wokim dispela Nesenel-Pak bilong Brasil long 1939, na winim planti tausen manmeri i save i go lukim long olgeta wan wan yia. Ol i bin amamas tru long taim ol i go lukim, olsem na yu tu bai yu amamas, sapos yu go raun long Saut Amerika long bihain.
[Mep/Ol Piksa long pes 20, 21]
(Bilong save ol dispela rait i stap we long pes, lukim buk o magasin)
Wara Kalap Bilong Iguasu
BRASIL
AJENTINA
PARAGWEI