Baibel i Tok Wanem?

Ol Pikinini i Dai—Bilong Wanem God i Larim i Kamap?

PLANTI papamama, em pikinini bilong ol i dai pinis, taim ol i save olsem God i no bin kisim pikinini bilong ol, orait, ol i no bel hevi tumas olsem pastaim—tasol sampela misin i bilip olsem God i mekim na ol pikinini i dai.a Tru, God i gat strong long pasim i dai, tasol em i larim dai i painim yet ol man.

Olsem na taim wanpela pikinini i dai, dispela i sutim tru bel bilong papamama na ol i gat askim olsem, “Bilong wanem God i larim em i dai?” Tru tumas, maski man i dai long wanem rot—long ka o long sik o man i bagarapim em—yumi pilim olsem i dai bilong ol i samting nogut tru. Tasol i dai bilong wanpela pikinini em i samting nogut moa yet, a? Long matmat bilong wanpela pikinini i gat rait olsem: ‘Em i liklik tru, em i naispela tru, em i dai yangpela tru.’

Man Bilong Wokim Yumi i Save Tingim Yumi

Bilong wanem God i larim bel bilong ol man i bagarap stret olsem? Sapos long nau tasol pikinini bilong yu i dai, orait, maski ol narapela i mekim gutpela tok long yu, dispela i no inap pinisim wantu bel hevi bilong yu. Long taim bilong ol man i raitim Baibel, ol man i gat strongpela bilip ol tu i save tingting planti long ol samting nogut i kamap na ol i askim God, bilong wanem em i larim dispela hevi i kamap? (Lukim Habakuk 1:1-3.) Tasol i gat gutpela tok i stap long Baibel na isi isi em inap mekim gut bel bilong yumi.

Pastaim yu mas save olsem, God i no laik tru long pikinini bilong yu i dai. God i no save amamas long man nogut i bagarap, olsem na em i no amamas long wanpela pikinini i dai. (Lukim 2 Pita 3:9.) Tru tumas, God i save pilim tru i dai bilong wanpela pikinini. Na yumi bel hevi long i dai bilong man, long wanem yumi inap sori long em na pilim tru i dai bilong em. Yumi mekim olsem, long wanem, God i wokim yumi olsem em yet, olsem na yumi bihainim dispela pasin bilong em, maski yumi no win tru long mekim. (Stat 1:26; 1 Jon 4:8) Baibel i tok, God i save long olgeta tingting tru i stap long bel bilong yumi, na hamas gras i stap long het bilong yumi, na em i save tu taim wanpela liklik pisin i pundaun long graun. Olsem na em i gat nem, olsem “Papa bilong . . . olgeta pasin marimari na pasin sori.”—2 Korin 1:3; Matyu 10:29-31.

Tru tumas, God i no laik tru long wanpela man i dai. Em bai pinisim dai na bai i no ken kamap gen. (Aisaia 25:8) Tasol sapos God i gat tingting olsem, orait, bilong wanem em i larim yet ol man na ol pikinini tu ol i dai?

Taim Dai i Kamap Long Graun

I gat as na God i larim ol pikinini i dai—em i wankain stret long as bilong i dai bilong ol man i bikpela pinis. Laik bilong Adam yet na em i dai—em i no i laik bilong God. Long Iden, taim Adam tupela Iv i no bikhet yet long Man bilong wokim ol, tupela i save pinis olsem God i makim dai i olsem pe bilong sin. Sapos tupela i no bin bikhet long God, ating tupela bai i stap laip yet, a? Tasol ol i mekim pasin longlong na tromoi wanpela gutpela samting tru ol inap givim long ol pikinini bilong ol—em nambawan laip bilong i stap oltaim long graun. Taim ol i mekim sin, ol i no stap gutpela olgeta olsem bipo. Olsem na ol inap givim sin na dai tasol long ol pikinini bilong ol.—Stat 3:1-7; Rom 5:12.

Tasol ating yu gat askim olsem: ‘I dai i bikpela strafe tumas, olsem na bilong wanem God i larim Adam na Iv i mekim sin? O bilong wanem em i no pasim ol long mekim pasin bikhet na bai ol i no ken givim pen na i dai long ol pikinini bilong ol—na ol pikinini bilong yumi tu?’

Wanpela Bikpela Tok i Kamap

God i larim namba wan tumbuna papamama bilong yumi i sakim tok bilong em, long wanem, em i no laik bai ol man i stap olsem wanpela masin i no gat tingting na ol i lotu long em long wanem, em i wokim ol olsem, na ol i mas mekim tasol. Olsem ol narapela papa ol i save mekim, God i laik bai ol pikinini bilong em i bihainim ol tok bilong em long wanem, ol i givim bel tru long em na ol i laikim tumas em. God i bin mekim gut tru long Adam tupela Iv, olsem na i gat gutpela as na ol i mas givim bel long em na laikim em; tasol ol i sakim tok bilong em na wok bos bilong em.—Stat 1:28, 29; 2:15-17.

Orait, bilong wanem God i no kilim i dai wantu ol dispela bikhetman? God i bin tokaut olsem, em i laik bai Adam tupela Iv i kamapim ol pikinini na bai ol i go sindaun long olgeta hap bilong graun. Olgeta samting God i tingting pinis long kamapim, em i save kamapim. (Aisaia 55:10, 11) Tasol wanpela bikpela tok i bin kamap long Iden, olsem: I stret God i stap bos bilong olgeta man na Em tasol inap bosim gut ol man? O ol man yet inap bosim gut wokabaut bilong ol, winim God?

I gat wanpela rot tasol bilong stretim dispela tok o askim na bai i no ken kamap moa inap long olgeta taim bihain, olsem: God i mas givim rot long man bilong bosim wokabaut bilong em yet. Na sori tru! Ol samting i kamap pinis i kamapim klia bekim bilong dispela askim. Ol man i bin bosim sindaun bilong ol na nau yumi lukim planti hevi moa yet i kamap long graun—planti pikinini i no gat asua ol i dai, na kain kain ol narapela samting nogut i kamap. Inap 6,000 yia pinis ol man i bin bosim graun na wanpela samting i kamap ples klia olsem: Dispela tingting olsem man inap bosim wokabaut bilong em yet na maski long God, em i wanpela bikpela tingting kranki na i giaman stret. Taim man i wok long bosim yet graun na sakim God, ol man bai wok yet long karim pen na hevi na ol i dai.

Tasol Jehova, em God bilong pasin sori na stretpela pasin, em i gat gutpela tingting. Olsem papamama i sori tru long pikinini na ol i larim dokta i katim em na em i kisim pen bambai em inap stap gutpela long bihain, olsem tasol God i tingim i stap bilong yumi long bihain na em i larim ol man i bosim graun na yumi karim pen na hevi long dispela. Na tu, dispela pen pikinini i kisim taim dokta i katim em i no bilong i stap olgeta taim, na i olsem tu long wok bilong man long bosim em yet—ol pasin nogut dispela wok i kamapim i no bilong i stap olgeta taim—liklik taim na em bai pinis.

Taim Kingdom bilong God tasol i bosim graun, planti milion milion pikinini bai kirap bek na bai yumi amamas long lukim ol. Olsem ol papamama em Jisas i bin kirapim bek ol pikinini bilong ol, olsem tasol planti papamama long dispela taim bihain ol tu bai “kirap nogut tru” na amamas moa yet taim pikinini bilong ol i kirap bek. (Mak 5:42; Luk 8:56; Jon 5:28, 29) Na taim olgeta manmeri i kisim bek nambawan gutpela laip em Adam tupela Iv i tromoi, orait, i no gat wanpela man o wanpela pikinini bai i dai gen!—Kamapim Tok Hait 21:3, 4.

[Futnot]

[Rait long pes 23]

Planti milion milion pikinini bai kirap bek long i dai na bai yumi amamas long lukim ol