Askim Bilong Ol Rida

Provep 24:16 i tok: “Stretpela man inap pundaun 7-pela taim, na em bai kirap gen.” Yu ting dispela tok i makim man em planti taim em i pundaun na mekim sin, tasol bihain God i fogivim em?

Nogat, dispela ves i no makim olsem. Dispela tok i makim man em planti taim em i bungim ol hevi, i olsem em i pundaun planti taim, tasol em i kirap gen olsem sanap strong na karim ol dispela hevi.

Yumi ken lukim ol tok i stap paslain na bihain long dispela ves: “No ken stap olsem man nogut husat i hait na slip na wet i stap klostu long haus bilong stretpela man; no ken bagarapim ples bilong em long malolo. Long wanem, stretpela man inap pundaun 7-pela taim, na em bai kirap gen, tasol hevi bai mekim na man nogut bai pundaun olgeta. Taim birua bilong yu i pundaun, yu no ken belgut, na taim wanpela samting i mekim na em i laik pundaun, no ken larim bel bilong yu i amamas.”—Prov. 24:15-17.

Sampela man i ting ves 16 i makim man husat i mekim sin, tasol em i tanim bel na God i orait long em. Tupela saveman bilong Briten i tok: “Ol man bilong autim tok long bipo na long nau i ting olsem mining bilong dispela ves i olsem.” Tupela i tok moa olsem, dispela kain tingting i makim olsem “gutpela man inap pundaun . . . na mekim ol bikpela sin, tasol em i no lusim pasin bilong laikim God, na long olgeta taim em i pundaun em i kirap gen long rot bilong tanim bel.” Kain tingting olsem bai swit long yau bilong man husat i save amamas long mekim sin. Em bai ting olsem em i ken mekim sin planti taim, tasol oltaim God bai fogivim em.

Dispela i no kamapim mining tru bilong ves 16.

Long tok Hibru, mining bilong dispela tok “pundaun” long ves 16 na 17 inap makim planti samting. Dispela inap makim wanpela samting i pundaun i go daun—olsem bulmakau i pundaun long rot, wanpela man i stap long rup na pundaun i kam daun, o wanpela liklik ston i pundaun i go daun long graun. (Lo 22:4, 8; Amo. 9:9) Dispela tok inap i gat narapela mining, olsem: “Jehova i save stiaim wokabaut bilong man taim Em i amamas long pasin bilong em. Maski man i pundaun, em bai no pundaun olgeta, long wanem, Jehova bai holim han bilong em na helpim em.”—Sng. 37:23, 24; Prov. 11:5; 13:17; 17:20.

Tasol tingim tok em Profesa Edward H. Plumptre i mekim, em i tok: “Dispela tok [“pundaun”] long tok Hibru, i no gat wanpela taim dispela tok i makim man i pundaun long sin.” Na narapela saveman i kamapim mining bilong ves 16 olsem: “Maski sapos yu mekim nogut long lain bilong God, oltaim ol bai win, tasol ol man nogut ol bai i no inap win!”

Dispela i soim olsem dispela tok “pundaun” long Provep 24:16 i no makim pasin bilong mekim sin, nogat, em i makim olsem man i karim planti hevi. Long dispela taim bilong hevi, wanpela stretpela man inap karim hevi long sait bilong helt o ol narapela hevi. Ating em i karim hevi long gavman i mekim nogut tru long em. Tasol em i ken bilip olsem God bai sapotim em na helpim em long sanap strong na karim hevi. Askim yu yet, ‘Olsem wanem? Mi yet i bin lukim ol gutpela samting i painim lain bilong God?’ Yes. Yumi bilip tru olsem “Jehova i save helpim olgeta manmeri em klostu ol i laik pundaun na em i save litimapim olgeta manmeri em hevi i daunim ol.”—Sng. 41:1-3; 145:14-19.

“Stretpela man” i no save amamas taim ol narapela i karim ol hevi, nogat. Tasol em i amamas long save olsem “gutpela samting bai painim ol man i pret long God tru, bikos ol i save pret long em.”—Ekl. 8:11-13; Jop 31:3-6; Sng. 27:5, 6.