Ol Samting Jehova i Wokim i Nambawan Tru

‘Yupela Ol Bikpela Wara, Yupela i Mas Paitim Han’

LUKLUK long wanpela mep bilong graun, na long planti hap, bai yu lukim ol longpela lain i baut baut i go. Ol dispela longpela lain i save brukim ol bikpela hap graun, ples wesan nating, na ples kunai. Ol i baut baut i go namel long ol ples daun, ol bikpela baret, na bikbus. (Habakuk 3:⁠9) Ol dispela longpela lain em ol wara, ol i helpim ol samting long graun long i stap laip. Ol dispela wara i save kamapim savetingting na pawa bilong Man Bilong Wokim dispela graun, em Jehova. Taim yumi lukim ol, yumi pilim wankain olsem man bilong raitim song, em i bin singsing olsem: “Yupela ol bikpela solwara [“wara,” NW ], yupela i mas paitim han. Yupela ol maunten, yupela i mas singim song bilong amamas long ai bilong Bikpela.”​—⁠Song 98:​8, 9.a

Ol wara i bin mekim bikpela wok long i stap bilong ol man bilong bipo. Baibel i tok long wanpela wara i kamap long Iden na em i bin bruk i kamap fopela hanwara. (Stat 2:​10-​14) Wanpela lain bilong bipo tru i bin sindaun long gutpela ples daun bilong wara Taigris na wara Yufretis long hap sankamap. Wara Hwang long Saina, wara Ganges na wara Indus long sauten Esia, na wara Nail long Isip i bin mekim bikpela wok bilong helpim sampela strongpela lain i kamap.

Olsem na yumi ken save i gat as na ol man i save kirap nogut long ol wara i gat bikpela strong, na ol i planti tru, na ol i luk naispela tru. Wara Nail bilong Isip i ran i go inap 6,670 kilomita. Nambawan bikpela wara em wara Amazon bilong Saut Amerika. Sampela wara i naispela long wanem ol i bikpela, tasol ol liklik wara i ron strong ol tu i luk naispela, olsem wara Tone long Japan.

Wanem samting i mekim ol wara i ran i go? Em wanpela kain strong ol i kolim graviti. Graviti i pulim wara long ples maunten na i go daun. Sampela taim dispela i mekim kamap ol wara kalap i pairap strong tru i go daun. Baibel i stori long strong bilong ol na ol strongpela wok ol wara i save mekim na i tok: “Bikpela, solwara [“wara,” NW ] i daun tumas i save pairap moa yet. Em i pairap strong tumas.”​—⁠Song 93:3.

Jehova i bin askim Jop, em man bilong lotu long God, olsem: “Husat i bin wokim baret antap long skai bai bikpela ren i ken bihainim na kapsait i kam daun long graun?” (Jop 38:25) Em tru, ol wara i save kam long we? Ol wara i save kam long wanpela kain rot we ren i pundaun na i go antap gen. Strong bilong san na graviti i mekim na oltaim wara i save ron i go daun long solwara na i go antap gen long skai. Hat bilong san i mekim na wara long solwara i tanim i kamap olsem smok na i go antap long skai. Bihain dispela smok i go kol na i kamap klaut. I no longtaim, dispela samting olsem smok i pundaun i kam long graun olsem ais o ren. Planti wara i save stap long biksolwara, ol raunwara, ol bikpela wara, ais, na ol wara aninit long graun.

Baibel i stori long dispela narakain samting na i tok: “Olgeta wara i save ran i go daun long solwara, tasol solwara i no pulap yet. Bihain, wara i save go bek long het bilong ol wara, na i ran i go daun gen.” (Saveman 1:⁠7) Jehova, em God i gat bikpela savetingting na em i save lukautim gut yumi, em tasol inap wokim dispela samting. Ol gutpela wok olsem i kamapim wanem ol pasin bilong God? Em God i gat gutpela savetingting na em i save lukautim gut yumi.​—⁠Song 104:​13-​15, 24, 25; Sindaun 3:​19, 20.

Long olgeta wara long graun, maski ol i bikpela na ol i planti tru, i gat liklik hap tasol long ol em wara bilong dring. Tasol maski i olsem, ol wara i bikpela samting bilong laip. Buk Water i tok: “Sapos i no gat rot bilong kisim wara na i no gat sampela lo bilong lukautim wara, ol manmeri bai hatwok long i stap laip. Pasin ol man i bihainim bilong kisim wara na lukautim wara i bin i stap bikpela samting long sindaun bilong ol man long bipo.”

Inap planti tausen yia, ol wara i bin stretim nek drai bilong man na i bin givim wara long gaden bilong em. Graun i gat gutpela gris i stap long arere bilong wara i gutpela bilong planim ol kaikai. Tingim olsem wanem dispela i stret wantaim wanpela blesing ol wokboi bilong Jehova i bin kisim: “Mi lukim ol haus sel bilong ol Israel, na ol i gutpela tru. Ol dispela haus sel i olsem ol longpela lain diwai det, na olsem ol gaden i stap long arere bilong bikpela wara, na olsem ol gutpela diwai Bikpela i bin planim, na olsem ol diwai sida i stap long arere bilong wara.” (Namba 24:​5, 6) Ol wara i save helpim ol animal olsem pato na weldok long i stap laip olsem yu lukim long hia. Tru tumas, sapos yumi wok long kisim save long ol wara, dispela bai kirapim yumi moa yet long tenkyu long Jehova.

[Futnot]

[Blok/Piksa long pes 8]

Wara kalap Iguaçú Falls, i stap long boda bilong Ajentina na Brasil, braitpela bilong en i bikpela tru winim olgeta narapela wara kalap. Braitpela bilong em i winim 3 kilomita stat long wanpela sait i go long narapela sait. Em i stap long gutpela bikbus tru, na klostu 300 liklik wara kalap i bung na mekim kamap dispela wara kalap. Long taim bilong ren, klostu 10,000 kubik mita bilong wara i ran i go daun long olgeta wan wan sekon.

[Piksa long pes 9]

Wara Tone long Japan