Ol i Harim Wanem Tok?
YU LAIK bai wanem kain pasin i stap long graun? Yu laik bai ol pikinini bilong yu i gat wanem kain sindaun long bihain? Sapos inap, yu laik bai yu gat strongpela skin na yu no gat sik liklik na yu no ken i dai?
Bai yu bekim wanem tok long ol dispela askim? Planti man, maski ol i bilong wanem wanem lotu o lain politik, ol i laik bai gutpela taim i ken i stap, olsem bel isi na i no gat pait samting, na i gat planti kaikai. Na ol i laik bai stretpela pasin na stretpela kot na pasin wanbel i stap, na i no gat pasin giaman, na i gat wankain lo tasol bilong ol man i gat planti samting na ol rabisman wantaim.
Na ating yu laik bai ol pikinini bilong yu i gat planti kaikai na gutpela haus na ol i ken skul gut—olsem yu laik bai yu yet wantaim ol pikinini bilong yu i gat gutpela sindaun. Na sapos inap, yu laik bai yu gat strongpela skin na yu no gat sik liklik, na yu inap i stap longtaim bambai yu ken inapim ol gutpela laik bilong yu wantaim dispela laik long i stap oltaim long gutpela paradais long graun, em bel isi i stap long en.
Tasol yu no ken ting dispela em i wanpela stori nating tasol na i no inap kamap tru. Em i wanpela tok bilong Baibel ol Witnes Bilong Jehova i autim long olgeta hap bilong graun na long ol kantri long hap bilong Is Yurop tu.
Tok Bilong Baibel Long Gutpela Samting Bai Kamap Bihain
Ol tok profet ol i bin raitim long Baibel inap planti handet handet yia bipo i tokaut long ol samting bai kamap long taim bilong yumi, olsem ‘sampela lain bai i kirapim pait long ol narapela narapela lain,’ na ‘ol bikpela bikpela guria bai kamap, na i gat taim bilong bikpela hangre,’ na ‘tingting bilong olgeta lain bai i bagarap tru,’ na ‘ol bai i tingting planti long ol samting i laik kamap long graun, na ol bai i pret tru na ai bilong ol i raun,’ na ‘ol man i bagarapim graun.’—Luk 21:10-33; Kamapim Tok Hait 11:18.
Tasol ol dispela samting na planti samting moa i kamap long nau ol i olsem mak na i makim stret olsem nupela taim God i tok promis pinis long en i klostu pinis. Bai i gat “nupela skai” na “nupela graun,” olsem wanpela nupela gavman bilong heven bai bosim graun, na bai i gat lain bilong en long graun em ol i senisim pinis pasin bilong ol, na bai i gat ‘stretpela pasin tasol i stap.’ Olsem na bai i ‘no gat pen moa, na i no gat dai o bel hevi moa.’—Aisaia 65:17-25; 2 Pita 3:13; Kamapim Tok Hait 21:1-4.
Yumi save, i no gat wanpela lain politik inap kamapim ol dispela gutpela samting long graun, maski ol i gat gutpela bel na ol i wok strong tru long kamapim. Bikpela King bilong heven na graun, em God Jehova, em tasol i gat laik na bikpela strong long kamapim dispela gutaim long graun. Olsem na Pikinini bilong em Krais Jisas i bin skulim lain bilong em long beten olsem: “Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”—Matyu 6:9, 10.
God i laik bai dispela graun i mas kamap gutpela ples tru, i gat ol gutpela lain i stap long en, em ol i laikim tumas pasin bilong i stap isi. Liklik taim bai God i kirap long kamapim dispela gutpela samting. Em bai pinisim olgeta samting nogut i bagarapim graun, na em bai pinisim tu ol man i wok long bagarapim graun. Olgeta samting nogut i save bagarapim win na wara samting, na olgeta pasin i no stret, God bai rausim olgeta long graun. Orait, husat tasol bai stap long dispela graun? Jisas i tok: “Ol man i save daunim nem bilong ol yet, em ol i ken amamas. Bai God i givim olgeta graun long ol.”—Matyu 5:5; Kamapim Tok Hait 16:14-16.
Yu laik i stap long dispela lain ol i gat pasin daun na God bai mekim gut long ol? Sapos olsem, orait tokim ol Witnes Bilong Jehova i stap long hap bilong yu olsem yu laik bai ol i ken i go long haus bilong yu na lainim yu long tok bilong Baibel, no gat pe samting. Sapos yu mekim olsem, bai yu inap save tru “long laik bilong God” na ‘ol pasin i gutpela na ol pasin God i laikim tumas na ol pasin i stret olgeta.’—Rom 12:2.