Nupela Taim God i Bin Tok Promis Long En
BAIBEL, em Tok Bilong God, i mekim na yumi inap bilip na wet long ol gutpela samting bai kamap. Em i tok: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.”—2 Pita 3:13.
“Nupela skai” em i wanem samting? Long Baibel dispela tok skai i makim wok gavman. (Aposel 7:49) “Nupela skai” em i nupela gavman em bai bosim graun. Em i nupela, long wanem, em bai kisim ples bilong ol gavman bilong nau, na tu, em i nupela samting bilong kamapim ol samting God i tingting pinis long mekim. Em i Kingdom Jisas i bin lainim yumi long beten long en. (Matyu 6:10) God em i As bilong dispela Kingdom na em i stap long heven, olsem na Baibel i kolim dispela Kingdom olsem “kingdom bilong heven.”—Matyu 7:21.
“Nupela graun” em wanem samting? Em i no nupela graun tru tru, long wanem, Baibel i kamapim klia olsem ol manmeri bai stap long graun inap oltaim oltaim. “Nupela graun” em i wanpela nupela lain man. Em i nupela, long wanem, ol man nogut bai i no stap moa. (Sindaun 2:21, 22) Olgeta man i stap long dispela taim ol bai rispek long Man Bilong Wokim yumi na bihainim tok bilong em na ol lo bilong em long wokabaut bilong ol. (Song 22:27) Singaut i go long ol manmeri bilong olgeta lain long ol i mas kisim save long ol dispela lo na senisim pasin bilong ol na bai em i stret wantaim ol dispela lo. Yu save mekim olsem?
Long nupela taim God bai kamapim, olgeta man bai rispektim wok bos bilong Em. Pasin bilong laikim God i kirapim yu long bihainim tok bilong em o nogat? (1 Jon 5:3) Dispela samting i stap ples klia long haus bilong yu? long ples wok o long skul? long pasin yu save bihainim long wokabaut bilong yu?
Long nupela taim, ol manmeri bai wanbel long lotuim trupela God. Olsem wanem? Yu save lotuim Man Bilong Wokim heven na graun? Pasin bilong yu long lotu i mekim na yu wanbel tru wantaim ol wanlotu bilong yu bilong olgeta lain, skin, na tok ples?—Song 86:9, 10; Aisaia 2:2-4; Sefanaia 3:9.
[Blok long pes 17]
Dispela God i Tok Promis Long Ol Dispela Samting
Em i Man Bilong Wokim heven na graun. Em i dispela man Jisas Krais i tok em ‘wanpela tasol i God tru.’—Jon 17:3.
Planti manmeri i givim ona long ol god ol yet i bin kamapim. Planti milion i brukim skru long ol imis i no gat laip. Planti arapela i litimapim nem bilong ol oganaisesen bilong ol man, tingting bilong ol man long mani kago, o laik bilong ol yet. Ol man husat i tok Baibel i as bilong lotu bilong ol, olgeta bilong ol i no givim ona long nem bilong dispela man em Baibel i tok em ‘wanpela tasol i God tru.’—Lo 4:35.
Man Bilong Wokim yumi i tok long em yet olsem: “Mi Bikpela. Bikpela [“Jehova,” NW ], em nem bilong mi.” (Aisaia 42:5, 8) Dispela nem i stap inap 7,000 taim long Baibel long ol tok ples bilong pastaim. Jisas Krais i lainim ol disaipel bilong em long prea olsem: “Papa bilong mipela, yu stap long heven, nem bilong yu i mas i stap holi.”—Matyu 6:9.
Dispela trupela God i gat wanem ol pasin? Em i tok em i ‘as bilong marimari na sori. Em i no save belhat kwik. Em i save laikim tru olgeta manmeri, na em i save bihainim olgeta tok bilong em.’ Na em i save mekim save long ol man i bikhet na sakim ol lo bilong em. (Kisim Bek 34:6, 7) Ol samting em i bin mekim long ol man long bipo i kamapim klia olsem dispela tok em i tru.
Yumi mas mekim holi dispela nem na man dispela nem i makim. Em i Man Bilong Wokim heven na graun na King Bilong Heven na Graun, olsem na i stret yumi bihainim tok bilong em na lotu long em. Yu yet i save mekim olsem?
[Blok/Piksa long pes 18]
“Nupela Skai na Nupela Graun” Bai Kamapim Wanem Ol Senis?
Graun bai kamap Paradais Luk 23:43, NW
Wanpela lain man long olgeta hap Jon 13:35;
ol i bilong olgeta lain, skin, na KTH 7:9, 10
tok ples na pasin bilong laikim ol
arapela i mekim na ol i stap wanbel
Bel isi i stap long olgeta hap, Song 37:10, 11;
olgeta i gat gutpela sindaun Maika 4:3, 4
Gutpela wok, planti kaikai Aisaia 25:6; 65:17, 21-23
No gat sik, bel hevi, na indai Aisaia 25:8; KTH 21:1, 4
Olgeta manmeri i wanbel long lotuim KTH 15:3, 4
trupela God
[Blok/Ol Piksa long pes 19]
Bai Yu Stap Long Nupela Taim?
God i no inap giaman!—Taitus 1:2.
Jehova i tok: “Tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.”—Aisaia 55:11.
Jehova i wok long kamapim “nupela skai na nupela graun.” Dispela gavman bilong heven i kirap pinis long mekim wok. God i kamapim pinis lain i as bilong “nupela graun.”
Buk Kamapim Tok Hait i stori long sampela gutpela samting tru “nupela skai na nupela graun” bai mekim long ol manmeri, na bihain dispela buk i kamapim tok God yet, em King Bilong Heven na Graun, i bin mekim: “Harim. Mi mekim olgeta samting i kamap nupela.” Na em i tok moa olsem, “Yu raitim dispela tok. Dispela tok em i tru olgeta, inap olgeta man i ken bilip tru long en.”—KTH 21:1, 5.
Bikpela askim em olsem: Yumi wok long senisim sampela pasin bilong yumi na bai yumi inap kamap hap bilong “nupela graun” aninit long “nupela skai”?