Kisim Pis Long Traipela Umben
WANPELA lain (UN General Assembly) long Nu Yok i tok, taim ol i kisim pis ol i no tingting gut, na ol pis samting i lus nating. Na narapela lain (International Institute for Environment and Development) long Landon i tok, dispela pasin i bagarapim ol animal sil long solwara. Inap 16 kantri long hap bilong Pasifik i tok, dispela pasin bilong kisim pis long umben i daun tumas em i pasin nogut. Planti lain i tok strong olsem dispela pasin em i pasin nogut. Bilong wanem ol i tok em pasin nogut?
Inap planti tausen yia ol man i bin kisim pis long longpela umben ol i kolim umben tripnet. Ol i tromoi long solwara na raunim ol pis. Bipo ol i bin mekim klostu long nambis, tasol long nau ol i save mekim long biksolwara. Winim wan tausen sip bilong Japan na Taiwan na Korea i kisim ol pis olsem long ol solwara Pasifik na Atlantik na Indian, na ol i laikim ol pis olsem tauka na tangir na melisa na samon na atun. Klostu olgeta sip i gat longpela umben inap 50 kilomita na i go daun insait long solwara inap 11 mita. Sapos yumi skruim ol umben wantaim, em bai inap olsem 50,000 kilomita na em inap raunim graun olgeta!
“Em i Pinisim Nating Ol Samting”
Ol i wokim umben long rop nailon, na ai bilong ol pis i no inap lukim. Wanpela nius (IIED Perspectives) i tok, inap tupela yia moa na ol dispela bikpela umben bai pinisim ol pis atun na bonito long solwara long hap bilong saut long Pasifik. Na wanpela saveman, em Sam Labut (Sam LaBudde), em i tok, dispela kain pasin bilong kisim pis i olsem sapos yumi laik kisim wanpela kain diwai tasol long bus na yumi katim olgeta diwai, em bus bai pinis na nau i no gat bus moa i stap. Ol dispela sip wantaim bikpela umben i save kisim olgeta samting long solwara olsem brum i kisim olgeta pipia long plua, na ol i pinisim planti kain pis olsem blufin na atun na malin na sopis samting.
Na narapela saveman, (James M. Coe, bilong National Marine Fisheries Service, United States), i tok, ol sip bilong Esia i brukim lo na kisim planti pis samon na ol dispela pis i no inap kam long ol wara bilong Not Amerika na karim ol nupela pikinini.
Na dispela bikpela umben i paulim ol samting bilong solwara olsem ol ota na sil na dolfin na popas na weil na trausel na ol pisin. Ol man i tok, dispela kain umben i samting bilong kilim i dai olgeta samting long solwara.
Wanpela saveman bilong Amerika i tok, 3-pela sip i raun 3-pela taim long kisim pis, tasol umben bilong ol i kisim tu wanpela dolfin na 8-pela popas na 18 sil na 19 waitpela dolfin na 65 weil.
Na wanpela ripot i go long Yunaitet Nesen i tok, long yia i go pinis ol Japan i kisim 106 milion tauka, tasol umben bilong ol i paulim na kilim i dai tu 39 milion narapela pis ol Japan i no laikim na ol i tromoi, na ol narapela samting tu olsem 700,000 sak, na 270,000 pisin, na 26,000 animal bilong solwara, na 406 trausel i no gat planti moa bilong dispela kain i stap.
Ol saveman i tok, sapos ol man i wok yet long kisim pis olsem, dispela pasin bai pinisim ol pis em bipo ol i ting i no inap pinisim. Long 1988 wanpela kepten bilong sip i tokim Labut olsem: ‘Long nau mipela i no kilim planti dolfin olsem bipo mipela i bin mekim.’ Na Labut i tok: ‘Long wanem, nau i no gat planti dolfin moa i stap.’
Nau Ol i Laik Pasim Tok Wantaim
Ol kantri, olsem Inglan na Alaska na Nu Silan, i gat tok long ol dispela bikpela umben, olsem na nau sampela lain i laik tambuim bikpela umben na rausim ol. Sampela lain long Saut Pasifik i laik bihainim tok ol man i mekim long Welingtan long Nu Silan, na ol i tambuim ol sip long kisim pis insait long mak bilong ol, em lusim nambis inap 320 kilomita, na ol i tambuim lain bilong ol yet long kisim pis long bikpela umben.
Long Disemba 1989 Yunaitet Nesen i tok, long Jun 30, 1992, ol kantri i mas pinis long mekim wok long bikpela umben long kisim pis long solwara. Wanpela lain (World Watch Institute) i tok, sapos ol man i no tambuim dispela pasin bilong kisim pis, ol samting bilong solwara bai pinis, olsem na ol i mas pasim wanpela tok long stretim dispela samting. Long Saut Pasifik wanpela lain (Forum Fisheries Agency) i tok, i mas i gat wanpela lo bilong bosim wok bilong ol kantri long kisim pis long hap not bilong solwara Pasifik, na ol man i mas bihainim.
Na olsem wanem? Ol kantri i harim, o nogat? Ol i harim, na ol i kirap long mekim sampela samting.
Long Novemba 26, 1991, ol Japan i tok ol i orait long bihainim tok bilong Yunaitet Nesen long putim tambu long ol bikpela umben bilong kisim pis. Pastaim ol man i gat tok long ol Japan i bagarapim ol samting long hap not bilong solwara Pasifik, tasol nau ol Japan bai stretim dispela rong, na ol i tok, paslain long Jun 1992 ol bai pinisim planti bikpela umben bilong ol, na paslain long taim dispela yia i pinis ol bai pinisim ol narapela bikpela umben bilong ol.
Ol i tok olsem, na de bihain wanpela nius (The New York Times) i tok, wanpela saveman i tingim dispela tok bilong ol Japan na em i amamas na i tok, em nau, ol man i bin toktok long pinisim bikpela umben, na tok bilong ol i win, na bihain long yia 1992 ol Japan i no ken mekim wok moa long bikpela umben.
Na wanpela nius (Time) bilong Disemba 9, 1991, i tok, Taiwan na Korea tu i tok ol i orait long lusim wok bilong kisim ol pis long rot bilong bikpela umben.
“Solwara i bikpela tru, na planti bikpela pis na liklik pis na ol arapela samting i stap long en. Mipela i no inap kaunim.”—Song 104:25.
[Ol Piksa long pes 15]
Sip i gat bikpela umben bilong kisim pis
[Kredit Lain]
Photo: Steve Ignell, ABL
Bun bilong ol ota ol i paul long bikpela umben
[Kredit Lain]
Photo: T. Merrell
[Ol Piksa long pes 16]
Umben i kalabusim ol pisin na ol i dai
[Kredit Lain]
Photo: A. Degànge
Umben i kalabusim popas
[Kredit Lain]
Photo: N. Stone