Indai—Hevi Bilong Olgeta Man
LONG olgeta yia long olgeta hap graun inap 50 milion manmeri i save dai. Olsem na long olgeta de 137,000 manmeri i save dai. I no gat wanpela famili inap abrusim indai—king, man nating, maniman, rabisman, man o meri—olgeta i save dai.
Long yia 1789 wanpela man (Benjamin Franklin) bilong Amerika em i gat namba, em i tok: ‘I gat tupela samting yumi no inap abrusim—wanpela em takis na wanpela em indai.’ Tasol tingting bilong em i no narapela kain long tingting bilong wanpela king bilong ol Israel long bipo. King Solomon i tok: “Ol [man] i save bai ol i dai.” Dispela tok bilong em i bin truim tok i bin kamap 3,000 yia paslain long King Solomon. Long namba wan man God i bin tok olsem: “Mi bin wokim yu long graun, na bai yu go bek gen long graun.”—Saveman 9:5; Stat 3:19.
Maski olgeta man i save ol bai dai, indai i save kamapim bikpela bel hevi. Yumi olgeta man i no laik i dai. Pasin bilong pas gut wantaim famili o ol pren bilong yumi i bikpela samting na yumi no laik bai dispela samting i pinis. Tasol taim yumi olgeta i go lapun, indai i save bagarapim dispela pasin bilong pas gut wantaim. Ol bubu bilong yumi i dai, na papamama tu i dai, na ol pren bilong yumi i dai.
Wanpela buk (Guinness Book of World Records) i tok: ‘Wan wan man tasol i save winim 113 krismas. Na long nau i no gat wanpela man i bin winim 120 krismas.’ Olsem na yumi save i no gat wanpela man i stap laip long nau i bin lukim dispela taim mama i bin karim Winston Sersil long 1874. Na i no gat wanpela man i stap laip long nau i bin stap taim Rasia i baim kantri Alaska i go long Amerika long 1867, o taim wanpela man i bin kilim i dai Abraham Linkon long 1865. Na ol samting i bin kamap paslain long yia 1800 samting, i no gat wanpela man i stap laip long nau i bin lukim.
Long nau ol saveman na ol dokta i gat bikpela save, tasol yumi man i no save stap longtaim long dispela graun. Olsem Moses i bin tok, “[Yumi] i save stap inap 70 yia tasol. Na sapos [yumi] i gat strong, [yumi] i ken i stap inap 80 yia. Tasol long dispela olgeta yia [yumi] i stap, [yumi] i save hatwok na painim hevi tasol. Dispela olgeta yia i pinis kwiktaim, na [yumi] tu i go pinis.” (Song 90:10) Moses i bin i stap laip 120 yia, olsem na taim em i stori hia, em i stori long olgeta man—sampela bai stap 70 yia, na sampela 80 yia, na sampela bai winim 80 yia.
Maski man i karim planti hevi long sindaun bilong em, sapos em i dai, ol narapela bai bel hevi. Na dispela bel hevi i mekim na man inap kisim sik. Sampela taim sik i mekim na nau dispela man tu i dai. Na maski husat i dai long famili, olgeta bai bel hevi. Wanpela dokta i tok: ‘Sapos papa o mama i dai, i olsem ol samting bilong yu bilong bipo i lus pinis. Taim pikinini bilong yu i dai, ol samting bilong yu i laik kamap bihain i lus pinis.’ Ol hevi dispela samting i mekim long bel bilong man i bikpela samting. Kain kain hevi inap kamap taim wanpela man i dai. Olsem: Mani bilong famili i sot na ol i no inap long planim man, o lain bilong famili i laik bihainim pasin bilong ples long planim dispela man. Olgeta dispela samting inap mekim na famili i karim planti hevi.
Olsem na i gat rot na yumi ken daunim sampela bel hevi taim wanpela long famili i dai?