Naispela Nambawan Ston Opal

WANPELA MAN LONG OSTRELIA I RAITIM DISPELA STORI BILONG KIRAP!

TOK bilong wanpela singsing planti man i laikim i tok, ‘nambawan pren bilong meri em daimon.’ Tasol i no ol daimon tasol i amamasim ol manmeri. Ol i save amamas long ston opal tu. Em i gat planti naispela kala i lait. Man! Em i samting tru long lukim. No gat narapela ston olsem dispela!

Ol samting i stap insait long ston opal i klostu wankain olsem ol samting i stap insait long wesan. Tasol opal i gat wara tu. Sampela handet yia bipo, wanpela kain samting olsem wara i bin ran i go insait long ol liklik hul na baret samting bilong ol ston. Taim wara i drai dispela samting i bin go strong na kamap ston opal.

Painim Ol Opal

Em i hatwok tru long rausim opal long ples ston bilong en. Ol i painim planti opal long ples wesan i no gat man, na ples i hat, na i gat planti tausen tausen lang, na wara i sot. Na olsem ol narapela samting ol man i laik painim insait long graun, wan wan taim tasol ol i painim opal.

Planti opal (95 pesen) ol i painim, i olsem opal nating i no save lait. Na ol narapela opal ol i kamautim long graun, liklik tasol i gutpela na ol inap mekim wok long en bilong wokim bilas samting.

Olsem na sampela man i painim opal ol i kamap maniman, tasol planti ol i bin hatwok nating. Inap planti yia ol man bilong painim ston i bin mekim wok long pika na savol na hama. Pastaim man bilong painim opal i mas digim liklik rot i go daun insait long graun. Graun i strong na drai. Em bai digim i go i go inap long em i painim strongpela graun, em ples opal inap i stap long en. Nau em bai wokim liklik rot i go stret. Em i holim lam bilong lukluk nabaut. Sapos opal i stap, kala bilong en bai lait long lait bilong lam.

Tasol nau ol i mekim wok long ol masin i gat bikpela pe. Sampela kampani i mekim wok long buldok bilong digim graun. Na bilong digim liklik rot i go daun insait long graun ol i mekim wok long bikpela boa. Na i gat narapela masin bilong wokim ol liklik rot i go nabaut insait long graun bilong painim hap opal i stap long en.

Wok Bilong Mekim Ston i Lait

Taim ol man i kisim opal long graun em i narapela kain long taim ol i katim na polisim. Taim ol i mekim olsem ol man inap wokim ol naispela bilas bilong pasim long skin. Wanpela buk (The World Book Encyclopedia) i tok: ‘Opal i gat ol naispela kala kala insait long en, olsem na ol man i no katim olsem ol i katim daimon. Nogat. Ol i katim na em i kamap olsem raunpela.’

Inap planti yia ol man i no save olsem wanem ston opal i gat planti naispela kala kala. Tasol nau ol saientis i mekim wok long wanpela kain strongpela glas bilong glasim ol samting na nau ol i kisim save olsem: Ol samting i stap insait long opal na long skin bilong en i save brukim lait na i kamapim kain kain kala insait long ston.

Wanpela buk (Australian Opals in Colour) i tok: ‘Sapos yu tantanim ston opal, olgeta kala bilong en bai senis senis. Olsem na ol man i save laikim opal.’

Pe i Liklik o Bikpela

Taim yu laik baim wanpela ston opal, yu mas save, i no olgeta opal i ston opal tru. Olsem: Opal ol i kolim dablet i olsem gutpela opal antap na aninit em ston opal nating, na ol i simenim tupela wantaim. Narapela kain opal ol i kolim triplet na em i wankain liklik long dablet, tasol long pes bilong en ol i penim liklik kwots i no gat kala, nogut wanpela samting i skrapim. Dispela ol kain opal i naispela tru, tasol wanpela buk (Australian Opals & Gemstones​—Nature’s Own Fireworks) i tok: ‘No ken tru putim opal dablet na triplet insait long wara, o insait long marasin bilong klinim samting, long wanem, ol i bin penim pes bilong ol dispela kain opal, na namel long en ol i simenim.’

Narapela samting i mekim na opal i gat bikpela o liklik pe, em kala long baksait bilong en. Planti opal i blakpela ol i gat bikpela pe. Dispela kain ol i kolim blakpela opal, tasol em tu i gat planti kala kala. Waitpela opal i no gat bikpela pe. Baksait bilong en i waitpela o waitpela liklik, tasol em tu i gat kala kala, olsem retpela, grinpela, blupela. Na narapela samting bilong save long en sapos yu laik save opal i gutpela moa o nogat, em bikpela hap bilong opal i mas retpela. Bikpela hap bilong opal i gat grinpela o blupela kala i no winim pe bilong opal i gat retpela kala.

Tasol maski ston olgeta em opal na i lait gut, o em opal dablet o triplet i no gat bikpela pe, o em i naispela retpela opal, o em i blupela na i no gat bikpela pe​—olgeta i naispela ston na yumi ken amamas long en.

[Ol Piksa long pes 24, 25]

Inap 95 pesen bilong ol ston opal ol i save wokim bilas long en, i kam long Ostrelia

[Kredit Lain]

Photos: By courtesy of Australian Overseas Information Service