No Inap Rit Rait—Em Bikpela Hevi Bilong Olgeta Hap

Wanpela man long Naijiria i raitim dispela stori bilong Kirap!

ALMAZ i save stap long Itiopia. Taim pikinini bilong em i kisim sik, dokta i givim marasin long Almaz, tasol Almaz i no inap kaunim toksave i stap long skin bilong dispela botol marasin​—em i mas givim hamas marasin long pikinini na em i mas givim long wanem taim. Gutpela tru wanpela man i stap klostu em inap kaunim dispela toksave, olsem na Almaz i givim stret marasin long pikinini na sik bilong em i pinis.

Ramu em i wanpela fama long India. Taim pikinini meri bilong em i laik marit em i tingting long givim graun bilong em olsem dinau long wanpela man i save mekim wok bisnis long givim mani long ol man olsem dinau. Ramu i no inap rit rait, olsem na em i putim mak bilong pinga long pepa olsem em i orait long tok bilong dispela pepa, tasol em i no save dispela pepa i tok wanem. Sampela mun bihain Ramu i kisim save olsem, dispela pepa i bin tok em i orait long baim graun bilong em i go long narapela man.

Michael i bin wok long wanpela bikpela fam long Amerika. Bos i bin tokim em long givim wanpela kain kaikai long ol bulmakau. Michael i painim tupela bek long haus bilong bulmakau tasol em i no inap kaunim toksave long skin bilong bek. Em i kisim wanpela, tasol bek i no gat kaikai long en, em i gat marasin nogut long en. Sampela de bihain ol bulmakau i dai. Sori tru, Michael i popaia na givim marasin nogut long ol bulmakau. Wantu bos i rausim Michael long wok.

Man i no inap rit rait em inap kisim planti hevi. Michael i raus long wok; ol gutpela bulmakau bilong bos bilong Michael i bagarap; Ramu i no gat graun moa; klostu pikinini bilong Almaz i bagarap.

Wanpela lain UNESCO (United Nations Educational, Scientific, and Cultural Organization) i tok, winim 960 milion manmeri long olgeta hap ol i no inap rit rait.a Long olgeta 3-pela 3-pela man long ol kantri i stap rabis, wanpela tasol inap rit rait. Olsem Almaz na Ramu na Michael, ol dispela planti milion manmeri i no inap kaunim ol toksave i stap long arere bilong rot, o kaunim niuspepa, o wanpela hap tok bilong Baibel. Ol i lus tru long kisim planti save i stap long ol buk na nius samting. Ol i no inap raitim pas o raitim tok long pepa bilong gavman samting, na planti bilong ol i no inap sainim nem bilong ol. Olsem na maski man inap mekim wok, sapos em i no inap rit rait, dispela i pasim em long kisim wok mani na lain gut long wanpela wok.

Na i gat planti manmeri moa ol inap rit rait liklik, tasol ol i no save gut long kaunim o raitim wanpela pepa i gat bikpela tok long en. Long Amerika i gat 27 milion manmeri olsem.

Olsem wanem long ol pikinini? Ol man i no bin skelim dispela hevi long olgeta kantri, olsem na yumi no save long olgeta pikinini, tasol wanpela lain bilong Yunaitet Nesen (Children’s Fund) i tok, 100 milion pikinini long olgeta hap bai ol i no skul. Na 100 milion pikinini moa bai ol i no skul gut. Na narapela lain bilong Yunaitet Nesen (Department of Public Information) i tok, long olgeta 10-pela 10-pela pikinini long ol liklik ples bilong ol kantri i stap rabis, 5-pela bai skul inap 4-pela yia tasol. Na long sampela kantri i gat planti wok bisnis long en, planti pikinini i save tromoi planti aua long lukim televisen, winim ol aua ol i save stap long skul.

Olsem na pikinini i no inap rit rait, ating taim em i go bikpela, em i no inap rit rait tu. Wanem as bilong dispela hevi? Yumi ken mekim wanem bilong helpim wanpela man o meri em i no inap rit o rait? Bai yumi bekim ol dispela askim long stori i kam bihain.

[Ol Futnot]

[Piksa long pes 3]

Winim 960 milion manmeri long olgeta hap ol i no inap rit rait