Rit Rait Insait Long Lain Bilong God

LONG bipo yet planti manmeri bilong God ol inap rit rait. Inap 3,500 yia bipo, Moses i bin raitim 5-pela hap bilong Baibel​—Stat i go inap long hap bilong Lo. God i bin tokim man i bin kisim ples bilong Moses, em Josua, long kaunim buk bilong God long “san na long nait,” na dispela bai helpim em long mekim gut wok God i givim long em. Na God i bin tokim ol king bilong Israel, taim ol i kirap mekim wok king bilong ol, ol i mas wokim kopi bilong Lo na kaunim hap tok bilong en long olgeta de.​—Josua 1:8; Lo 17:​18, 19.

I no olsem ol king o hetman tasol inap rit rait, nogat. God i bin tokim ol Israel long “raitim” ol lo bilong em long dua bilong haus bilong ol. Tru, dispela em i tok piksa, tasol ol i mas inap rit rait na bai ol i ken save long dispela tok na pilim. Amos em i man bilong lukautim sipsip na Maika em i wanpela profet bilong wanpela liklik ples, tasol Amos na Maika i bin raitim sampela hap bilong Baibel.​—Lo 6:​8, 9; Amos 1:1; Maika 1:1.

Buk bilong Olpela Testamen i stap long ol haus lotu na long laik bilong em yet Jisas inap kaunim. Wanpela taim em i kaunim wanpela tok long ol man na tokim ol, dispela tok profet i makim em yet. Ol aposel bilong Jisas inap rit rait. Taim ol i raitim sampela hap bilong Baibel, planti taim ol i save raitim sampela tok i stap long Olpela Testamen.​—Luk 4:​16-21; Aposel 17:11.

Lain Bilong God Long Nau

Jisas i tokim ol disaipel bilong em long ‘mekim olgeta lain manmeri i kamap disaipel bilong em, na lainim ol long bihainim olgeta tok em i bin givim long ol.’ Na ol bai autim “gutnius bilong kingdom bilong God long olgeta hap bilong graun” olsem Jisas i tok profet long en.​—Matyu 24:14; 28:​19, 20.

Olsem ol Kristen long taim bilong Jisas, ol Witnes Bilong Jehova long nau i save givim bel long mekim dispela wok long autim tok na lainim ol man. Ol i save mekim olsem long maus na long rot bilong ol buk na nius samting. Kirap long 1920, ol Witnes Bilong Jehova i bin wokim na tilim long ol man 9 bilion Baibel, na buk, na magasin, na liklik nius, long 200 samting tok ples.

Sampela milion manmeri bilong olgeta hap i bin harim tok na ol i kamap disaipel bilong Krais. Na sampela bilong ol em ol man na meri ol i no inap rit rait. Tasol i no olsem ol i no Kristen. Sampela bilong ol i bin stap gut long wok bilong God inap planti yia, na karim hevi taim ol man i mekim nogut long ol, na ol i save bihainim ol lo bilong God bilong makim olsem ol i laikim tru em.​—1 Jon 5:3.

Planti i laik tru long rit rait, long wanem, ol i save sapos ol inap mekim olsem, dispela bai opim rot na ol i ken mekim bikpela wok moa long lotuim God. Long ol miting bilong ol, ol i laik kaunim Baibel na ol buk bilong Baibel, na ol i laik kaunim ol tok bilong singsing bambai ol i ken singsing wantaim ol brata sista spirit bilong ol. Na ol i laik mekim stadi bilong ol yet na mekim Baibel-stadi wantaim famili bilong ol bambai ol i ken stap strong long ol samting bilong spirit. Na taim ol i autim tok, ol i gat bikpela laik long ol yet i ken kaunim Baibel long man bilong haus na narapela i no gat wok long helpim ol long mekim olsem.

Lain Long Kaunim Buk

Olsem na bilong helpim ol dispela man i no inap rit rait, ol kongrigesen bilong ol Witnes Bilong Jehova i wokim skul bilong rit rait, o wanpela Witnes yet i helpim man long rit rait. Long olgeta hap ol i bin skulim pinis planti manmeri. Long Naijiria ol Witnes Bilong Jehova i bin lainim 23,000 long rit rait. Wanpela bilong ol em Effor, na em i tok olsem:

‘Long 1950 mi gat 16 krismas na long dispela taim mi kirap lain long rit rait. Ol Witnes Bilong Jehova i wokim skul bilong rit rait. Mipela mekim wok long wanpela buk Sosaiti Was Taua i bin wokim, na tisa i bin makim sampela samting mipela yet i ken kaunim long haus bihain long dispela skul.

‘Mi no inap rit rait, olsem na mi ting i olsem wanpela sik. Mi laik skulim ol brata na pren bilong mi long Baibel, tasol mi no inap mekim gut dispela wok, long wanem, mi no inap rit rait. Samting i bin kirapim mi long givim bel long skul, em laik bilong mi long autim tok na lainim ol man long kamap disaipel bilong Krais. Olsem na wanem samting mi inap holim na rait long en, maski em lip bilong banana samting, mi bin rait long en. Mi gat bikpela laik tru long rit rait, olsem na taim mi slip mi save driman long pasin bilong lain long rit rait. Na mi no sem long askim ol narapela long helpim mi. Mi inap tingim taim mi bin raitim pas long ol pren bilong mi. Mi bin givim ol dispela pas long ol skulmanki bilong ol i ken kaunim na lukim​—mi raitim stret o nogat.

‘Mi stap wanpela yia long skul bilong rit rait bilong kongrigesen na mi kisim save. Bihain ol i makim mi long lukautim skul. Dispela i opim rot bilong mi ken helpim planti man long lain long rit rait.

‘Dispela skul i bin helpim mi tru, olsem na inap sampela yia mi inap mekim gutpela wok long tanim ol pilai bilong Sosaiti long tok Inglis i go long tok ples bilong mi yet, em tok ples Isoko. Na tu, bihain long 1960 mi kirap mekim wok wasman insait long kongrigesen, na bihain long 1980 mi bin mekim wok olsem helpim bilong wasman bilong raun. Na narapela gutpela samting mi bin mekim em bilong lukautim Skul Bilong Wok Painia [em wanpela skul bilong ol man i save autim tok long olgeta de]. Na tupela taim mi bin lukautim Skul Bilong Wok Kingdom [em skul bilong ol elda Kristen]. Mi save sapos mi no inap rit rait, mi no inap kisim ol dispela gutpela wok.

‘Mi save amamas long dispela wok bilong lainim ol man i gat pasin daun long rit rait! Taim mi laik slip long nait, sampela taim mi save tok tenkyu long Jehova olsem mi amamas mi no stap moa olsem man i no inap rit rait.’

Man bilong wokim yumi, God Jehova, i wokim yumi inap long yumi ken lain long rit rait. Tasol yumi yet mas wok strong long kisim dispela save. Sapos yumi lain long rit rait, yumi inap holim Baibel na kaunim long “san na long nait”​—dispela i nambawan gutpela samting.​—Josua 1:8.

[Blok long pes 9]

Samting Yu Ken Mekim Bilong Helpim Pikinini Long Laikim Ol Buk

● Yu yet mas stap olsem gutpela piksa na kaunim buk olgeta taim. Sapos papamama i kaunim buk, pikinini tu bai kaunim buk.

● Kirap na toktok wantaim pikinini taim em i nupela yet. Pikinini i save harim gutpela tok bai kisim save na em i no ken hatwok tumas long lain long kaunim buk.

● Olgeta taim kaunim buk long pikinini. Sapos pikinini i sindaun long lek bilong yu na yu kaunim buk long em, em bai save toktok na buk i gutpela samting, maski em i liklik na em i no save yet long samting yu stori long en. Na bihain taim pikinini inap kaunim buk, gutpela sapos yu mekim yet dispela pasin long kaunim buk long pikinini. Tisa i save lainim pikinini long kaunim buk, tasol yu ken helpim em long amamas long kaunim buk. Pikinini i save amamas long harim planti taim wanpela stori em i save laikim tumas.

● Gutpela sapos i gat ol buk long haus na pikinini inap kisim na kaunim.

● Strongim pikinini long lain long rait. Pikinini i save long rait em i save tu long kaunim buk.

● Makim hap taim long olgeta de long kaunim buk wantaim pikinini. Yu ken kaunim sampela tok na bihain pikinini i ken kaunim sampela tok na bihain yutupela i ken toktok long ol samting yupela i kaunim. Em i gutpela sapos taim bilong kaunim buk na toktok long en i taim bilong amamas, na yupela i pilim i gutpela samting bilong helpim yupela.

[Piksa long pes 8]

Ol man bilong bipo em ol i aninit long God, ol inap rit rait