Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w85 5/1 p. 24-28
  • ‘Bikpela Hetman Maikel’—Em i Husat?

No gat vidio bilong dispela seksen.

Sori, popaia kamap long lodim vidio.

  • ‘Bikpela Hetman Maikel’—Em i Husat?
  • Wastaua i Tokaut Long Kingdom Bilong Jehova—1985
  • Ol Liklik Het Tok
  • Wankain Infomesen
  • “Hetman Bilong Yupela”
  • Maikel i Kirap Sanap
  • Namba Wan Ensel
  • Pait long Heven
  • Jisas Em i Wanpela Ensel?
  • Nambawan Ensel Maikel Em Husat?
    Bekim Bilong Ol Askim Bilong Baibel
  • Nambawan Ensel Maikel Em i Husat?
    Tru Tru Baibel i Tok Wanem?
  • Jisas Em i Namba Wan Ensel Maikel?
    Wastaua i Tokaut Long Kingdom Bilong Jehova—2010
  • Nambawan Ensel Maikel Em i Husat?
    Kirap!—2002
Lukim Moa
Wastaua i Tokaut Long Kingdom Bilong Jehova—1985
w85 5/1 p. 24-28

‘Bikpela Hetman Maikel’—Em i Husat?

WAN WAN TAIM tasol Baibel i kolim nem bilong dispela ensel Maikel. Taim Baibel i stori long Maikel, Baibel i stori long em i pait wantaim ol ensel nogut. Long hap bilong Danyel Baibel i stori long Maikel i pait wantaim ol spirit nogut bilong helpim lain bilong God. Long Jut Baibel i stori long Maikel i pait wantaim Seten long husat bai kisim bodi bilong Moses. Na long Revelesen Baibel i stori long Maikel i pait wantaim Seten na ol spirit nogut na tromoi ol i kam daun long graun. Dispela ensel, Maikel, em i mekim bikpela wok. Olsem na yumi laik save, Maikel em i husat?

Inap planti yia pinis, ol Witnes Bilong Jehova i save lainim ol man olsem Maikel em i nem bilong namba wan Pikinini bilong God long heven, em dispela Pikinini i kisim nem Jisas taim em i kam long graun. Tasol planti misin i tok, Maikel em i wanpela bilong ol namba wan ensel. Ol i ting i gat planti namba wan ensel. Orait, olsem wanem long tok bilong ol Witnes? Dispela tok i stret? Baibel i tok wanem long Maikel?

“Hetman Bilong Yupela”

Namba wan taim Baibel i stori long Maikel em long hap bilong Danyel. Long Danyel wanpela ensel i stori long Maikel na em i tok: “Hetman bilong kingdom bilong Pesia em i pasim rot bilong mi inap 21 de, tasol harim! Maikel, wanpela bilong ol namba wan hetman, em i kam helpim mi. . . . Nau bai mi go bek na pait wantaim hetman bilong Pesia. Mi wokabaut i go na lukim! hetman bilong Grik em i kam. Tasol mi laik tokim yu long ol tok i tru, i no gat wanpela bilong helpim mi, Maikel, hetman bilong yupela, em tasol.”—Danyel 10:13, 20, 21, NW.

Dispela tok i helpim yumi na yumi inap save long sampela samting i kamap long ples bilong ol spirit. Nau yumi save, ol spirit—ol gutpela spirit na ol spirit nogut—ol i insait long ol samting i kamap hia long graun. I gat wanpela “hetman bilong kingdom bilong Pesia” em i laik pasim wok bilong wanpela ensel bilong God. Bihain wanpela “hetman bilong Grik” em i kam. Em i helpim wok bilong bikpela gavman bilong Grik long graun. Namel long ol dispela spirit o ensel, Maikel em i wanpela “namba wan hetman.” Em i lukautim na soim rot long wanem lain? Lain bilong Danyel, em ol Juda.

Insait bilong dispela nem “Maikel” i olsem: “Husat i Olsem God?” Olsem na yumi save, dispela namba wan hetman em i litimapim nem bilong God Jehova, em i King. Maikel i helpim lain bilong God, olsem na i gat as na yumi ken tok, em i dispela ensel Baibel i no kolim nem bilong em na God i bin salim em i go pas long ol Isrel planti handet yia bipo: “Harim, bai mi salim ensel i go pas long yupela bilong lukautim yupela long rot. Na em bai i bringim yupela i go kamap long dispela kantri mi bin redim bilong yupela. Yupela mas harim gut tok bilong en na bihainim. Yupela no ken sakim tok bilong en, long wanem mi yet mi stap wantaim em, na em bai i no inap lusim rong bilong ol manmeri i sakim tok.”—Eksodas 23:20, 21.

Yumi ken save em i dispela ensel em i bin givim planti bikpela tok bilong God long lain bilong God. (Aposel 7:30, 35; Hetman 2:1-3) God i givim namba long em bilong mekim wok long nem bilong Em, olsem ol king bilong bipo i save givim ring bilong ol long sampela man na dispela i givim namba long ol dispela man bilong mekim wok long nem bilong king.—Eksodas 3:2, 3; 4:10.

Olsem wanem? I gat sampela samting na yumi ken tok dispela ensel Maikel em Krais Jisas? Baibel i kolim Jisas olsem “Tok.” (Jon 1:1) Long wanem em i save givim tok bilong God long ol man. Dispela ensel i gat namba em i namba wan man bilong givim ol tok bilong God long lain Isrel.

Maikel i Kirap Sanap

Maikel em i “hetman bilong yupela.” Tasol em i kisim namba bilong mekim sampela wok moa. Long laspela sapta bilong Danyel, Baibel i tok: “Long dispela taim bai Maikel i kirap sanap, em dispela bikpela hetman em i sanap bilong helpim lain bilong yu. Na long dispela taim bai taim bilong bikpela hevi tru i kamap, winim olgeta taim bipo, kirap long taim wanpela lain i kamap na i kam inap long dispela taim.”—Danyel 12:1, NW.

Pastaim, long sapta 11, Danyel i stori long ol bikpela bikpela gavman i mas kamap long graun kirap long taim bilong em na i go inap long taim bihain. Em i kolim stret ol samting i mas kamap, olsem gavman bilong Pesia bai pinis na bikpela gavman bilong Grik bai kamap. Na bihain gavman bilong Grik i bruk long narapela narapela lain na tupela lain politik i kamap, em king bilong not na king bilong saut. Dispela tupela lain i save mekim pait na i laik daunim na bosim lain bilong God. Taim pasin birua i kamap bikpela tru namel long dispela tupela lain, long dispela taim Maikel i mas “kirap sanap.” Wanem insait bilong dispela tok?

Long ol narapela hap bilong dispela tok profet, taim Danyel i tok wanpela man i “kirap sanap” i olsem em i kirap mekim wok king—em i kisim namba bilong mekim wok king. (Danyel 11:3, 4, 7, 20, 21) Olsem na taim Maikel i “kirap sanap,” em i kisim namba bilong mekim wok king. Em i kamap king. Orait, nau yumi ken tingim ol samting i kamap long rot bilong dispela samting.

Taim Danyel i no i dai yet, ol i rausim pinis laspela king bilong Juda, em Sedekaia. Bihain, inap planti handet yia, i no gat wanpela king bilong Juda. Tasol Danyel i tok, bihain moa bai lain bilong God i gat king, em Maikel.

Profet Esikiel i stap long taim bilong profet Danyel na em i tok, wanpela man bai kamap em i man bilong kisim dispela wok king na em bai bosim lain bilong God. (Esikiel 21:25-27) Dispela i no makim ol Makabi, em ol i bilong lain bilong Livai na inap liklik taim ol i bin bosim ol Isrel. Nogat. Ol i no man bilong kisim dispela wok, ol i no bilong lain bilong King Devit. Dispela tok i makim Krais Jisas, God i makim em bilong i stap king long kingdom bilong heven. (Luk 1:31-33; 22:29, 30; Sam 110:1) God i makim em wanpela tasol. Olsem na i stret yumi ken tok Jisas em i Maikel.

Long Danyel sapta 7 profet Danyel i mekim sampela tok long ol bikpela bikpela gavman i mas kamap long graun na dispela tok i wankain long tok bilong sapta 11. Danyel 7:13, 14 (NW) i stori long wanpela man na God i “mekim em king na givim em strong na biknem.” Planti man i save, dispela “man” em Jisas. (Matyu 10:23; 26:64; Revelesen 14:14) Olsem na wanpela tok profet bilong Danyel i tok Jisas i kamap king na wanpela tok profet i tok Maikel i kamap king. Dispela tupela tok wantaim i stori long wanpela samting tasol em i mas kamap long wanpela taim tasol. Olsem na i stret yumi ken tok, dispela tupela tok wantaim i stori long wanpela man tasol.

Namba Wan Ensel

Nupela Testamen i stori long Maikel long hap bilong Jut. Jut 9 i tok: “Bipo namba wan ensel Maikel em i pait long toktok wantaim Seten. Tupela i mekim planti toktok long husat bai i kisim bodi bilong Moses. Tasol Maikel i no bikhet, na em i no bekim tok bilas long Seten. Nogat. Em i tok olsem: ‘Bikpela yet i ken krosim yu.”’ Dispela tok i helpim yumi long save, Maikel i save wok wantaim lain bilong God long bipo. Na i helpim dispela tok olsem em i dispela ensel em i bin i go pas long ol Isrel bilong lukautim ol long rot.

Na Jut i tok Maikel em i “namba wan ensel.” Baibel i no tok long narapela “namba wan ensel.” Na Baibel i no tok i gat planti namba wan ensel. Nogat. Wanpela tasol. Insait bilong dispela tok “namba wan ensel” i olsem: “Hetman bilong ol ensel.” (Thayer’s Greek-English Lexicon of the New Testament) Namel long ol wokboi spirit bilong God i gat tupela nem tasol bilong ensel i gat namba bilong bosim ol narapela ensel, em Maikel na Krais Jisas. (Matyu 16:27; 25:31; 2 Teslonaika 1:7) Dispela samting i makim olsem Jisas na Maikel i wanpela man tasol.

Long wanpela pas bilong Pol, em i stori long Bikpela Krais Jisas i kam bek na em i tok: “namba wan ensel i singaut.” Em i tok: “Namba wan ensel i singaut, na biugel bilong God i krai. Na bai Bikpela [Krais Jisas] i lusim heven na i kam daun.” (1 Tesalonaika 4:16) Dispela samting i kamap taim “Bikpela i kam bek,” taim Bikpela Krais Jisas i kirap mekim wok king.—1 Tesalonaika 4:15; Matyu 24:3; Revelesen 11:15-18.

Jehova i laik bai Jisas i mas kirapim bek ol man i dai pinis na em i givim wok long em bilong mekim olsem. (Jon 6:38-40) Biugel bilong God i krai na ol man i dai pinis ol i kirap bek. Bipo God i tokim ol Isrel ol i mas winim biugel bilong singautim ol manmeri i kam bung. (Nambas 10:1-10) Jisas i “singaut” na ol man i dai pinis bai ol i kirap bek, olsem em i bin mekim taim em i stap long graun. (Jon 11:43) Tasol long dispela taim bihain em i no i stap man na em i singaut. Nogat. Baibel i tok, “namba wan ensel i singaut.” “Namba wan ensel” i singaut na ol man i dai pinis ol i kirap bek. God i givim namba long Jisas tasol bilong kirapim bek ol man i dai pinis, olsem na yumi save, Jisas em i dispela namba wan ensel. Dispela tok profet tu i helpim yumi long save, namba wan ensel, Maikel, em i Jisas.

Pait long Heven

Laspela taim dispela nem Maikel i kamap long Baibel em long hap bilong Revelesen: “Bikpela pait i kirap long heven. Maikel wantaim ol ensel bilong en ol i pait wantaim bikpela snek. Na dispela snek wantaim ol ensel bilong en ol i bekim pait long ol. Tasol ol i no gat strong bilong winim pait.” (Revelesen 12:7, 8) Maikel i mekim wok olsem namba wan ensel bilong God. Em wantaim “ol ensel bilong en” ol i daunim Seten na tromoi em i go daun long graun.

Long dispela taim “sotpela taim” bilong Seten i kirap. Liklik taim tasol na pasin nogut Seten i bin kamapim long graun em bai pinis. Ol lain man bai bagarapim Bikpela Babilon na bihain ol dispela lain yet i bagarap long han bilong Jisas na ol ami bilong em long heven. (Revelesen 12:12; 17:16, 17; 19:11-16) Na bihain bai ol i kalabusim Seten long hul i no gat as. Em bai i stap kalabus inap 1,000 yia na bai em i bagarap olgeta long “bikpela hul i gat hatpela paia.” (Revelesen 20:1, 2, 10) Jisas i mekim dispela wok tu. Em wantaim ol brata spirit bilong em em ol i kirap bek pinis, ol i ‘krungutim het bilong Seten.’—Jenesis 3:15; Galesia 3:16; Rom 16:20.

Baibel i tok, Jisas bai krungutim het bilong Seten na em i mekim ol dispela narapela wok bilong givim strafe bilong God long ol birua bilong em, olsem na yumi save em i go pas long ol ami bilong heven na tromoi Seten i kam daun long graun. Dispela Maikel, em Revelesen 12 i tok em i winim pait, em Jisas. Jehova i bin tokim em: “Yu bosim [daunim] ol birua bilong yu.”—Sam 110:1, 2; Aposel 2:34, 35.

Long Revelesen sapta 12 Baibel i no kolim nem bilong Jisas, em i kolim dispela nem Maikel. Dispela samting i kirapim yumi long tingim ol tok bilong Danyel sapta 12. Danyel i tok, Maikel i kirap sanap. (Danyel 12:1) Long Revelesen sapta 12 Maikel i winim pait olsem wanpela king i winim pait na em i tromoi Seten i kam daun long graun. Na wanem samting i kamap? Baibel i tok: “Yu graun, na yu solwara, yupela lukaut! Bikpela hevi i laik kamap long yupela!”—Revelesen 12:12.

Jisas Em i Wanpela Ensel?

Tasol sampela i tok, Jisas i no dispela ensel bilong God em Olpela Testamen i stori long em. Ol man i bilip olsem God em i tripela, olsem God Triwan ol i no laikim dispela tok, long wanem i makim Jisas i no bikpela olsem God Jehova na bilip bilong ol i kranki. Tasol sampela man i no bilip long dispela tok bilong God Triwan, ol tu i no laik bai yumi tok Jisas em i wanpela ensel. Ol i pilim olsem dispela samting i daunim nem bilong em.

Tasol yumi mas tingim as bilong dispela tok “ensel” (tok Hibru, mal. ’akh’; tok Grik, ag’ge.los) em olsem: “Man bilong bringim tok.” Jisas em i “Tok” (tok Grik, lo’gos), em i man bilong bringim tok bilong God. Jisas em i namba wan ensel na em i ‘namba wan bilong olgeta samting God i bin wokim,’ olsem na paslain long taim em i kam daun long graun, em i gat bikpela nem na namba, winim olgeta narapela ensel.—Kolosi 1:15.

Tru, Aposel Pol i raitim pas long ol Hibru na em i tok: “Dispela nem em [Jisas] i kisim pinis long Papa, em i winim nem bilong ol ensel, na i gutpela tumas.” (Hibru 1:4; Filipai 2:9, 10) Tasol Pol i stori long bikpela nem Jisas i kisim taim em i bin kam daun long graun na em i go bek gen long heven. Em i stap yet olsem namba wan ensel na ‘namba wan bilong olgeta samting God i bin wokim.’ (Revelesen 3:14) Tasol nau em i kisim nem i ‘gutpela tumas’ na i winim tru nem bilong ol ensel. Em i no holim bikpela nem o bikpela wok olsem taim em i no kam daun yet long graun. (Ol man i bilip long God Triwan ol i tok, long olgeta samting Pikinini i bikpela olsem Papa. Tasol ol dispela ves bilong Baibel i makim dispela tok i kranki.)

Nau yumi save Maikel em i namba wan ensel, na em i hetman bilong ol ensel, na em i kirap sanap bilong mekim wok king, na em i go pas long rausim Seten long heven taim Kingdom bilong God i kamap long heven. Olgeta dispela samting i kirapim yumi long ting olsem: ‘Bikpela Hetman Maikel’ em i Krais Jisas yet.—Danyel 12:1.

[Ol rait long pes 26, 27]

Maikel em i namba wan ensel na em i kamap king . . .

. . .na tu em i go pas long rausim Seten long heven

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim