Baibel i Tok Wanem?
Nambawan Ensel Maikel Em i Husat?
BAIBEL i tok i gat planti milion ensel i stap long ples spirit. (Daniel 7:9, 10; KTH 5:11) Kirap long namba wan hap bilong Baibel i go inap long pinis bilong en, i gat planti handet tok i stori long ol ensel i stap gut long God. Tasol i gat tupela ensel tasol em Baibel i kolim nem bilong ol. Wanpela em Gebriel—insait long 600 yia em i bin bringim tok bilong God i kam long 3-pela man. (Daniel 9:20-22; Luk 1:8-19, 26-28) Na wanpela em Maikel.
Ol samting i kamapim klia olsem Maikel em i wanpela ensel i gat namba. Olsem: Buk Daniel i stori long Maikel i pait wantaim ol spirit nogut bilong helpim ol manmeri bilong Jehova. (Daniel 10:13; 12:1) Long Buk Jut, Maikel i tok pait wantaim Satan long husat bai i kisim bodi bilong Moses. (Jut 9) Long Buk Kamapim Tok Hait, Maikel i pait wantaim Satan na ol spirit nogut bilong em na em i rausim ol long heven. (KTH 12:7-9) I no gat stori bilong narapela ensel i gat kain bikpela strong na namba olsem bilong bosim ol birua bilong God. Olsem na i gat as na Baibel i toktok long Maikel olsem ‘nambawan ensel,’ em ensel i winim olgeta narapela ensel.
Narapela Narapela Tingting Long Maikel i Husat
Ol lotu bilong Kristendom, na lotu Juda na Islam tu, ol i gat narapela narapela tingting long ol ensel. Sampela tingting bilong ol i no klia tumas. Olsem: Buk The Anchor Bible Dictionary i tok: ‘Sampela i ting i gat wanpela ensel i winim olgeta narapela ensel, na sampela i ting i gat wanpela liklik lain nambawan ensel (inap olsem 4-pela o 7-pela).’ Buk The Imperial Bible-Dictionary i tok Maikel em ‘nem bilong wanpela ensel—sampela i ting em Bikpela Jisas Krais, Pikinini bilong God, na sampela i ting em i wanpela bilong ol 7-pela nambawan ensel.’
Stori bilong ol Juda i tok olsem ol dispela 7-pela nambawan ensel em Gebriel, Jeremiel, Maikel, Raguel, Rafael, Sariel, na Uriel. Tasol lotu Islam i bilip long 4-pela nambawan ensel, em Jibril, Mikal, Israil, na Israfil. Lotu Katolik tu i bilip long 4-pela nambawan ensel: Maikel, Gebriel, Rafael, na Uriel. Baibel i tok wanem? I gat planti nambawan ensel o olsem wanem?
Baibel i Tok Wanem?
Baibel i stori long Maikel olsem nambawan ensel—i no gat narapela nambawan ensel Baibel i stori long en, nogat. Na Baibel i no stori long planti “nambawan ensel.” Long tok Grik ol i raitim Jut 9 long en, ol i raitim tok “dispela” paslain long nambawan ensel na dispela i makim olsem Maikel wanpela tasol i holim dispela nem. Olsem na i stret yumi ken ting olsem God Jehova i bin makim wanpela ensel tasol long kisim bikpela namba long bosim olgeta narapela ensel.
Man bilong wokim yumi em i gat ol ensel i stap aninit long em, tasol i gat wanpela gutpela man moa em i gat ol ensel i stap aninit long em—em Jisas Krais. (Matyu 13:41; 16:27; 24:31) Aposel Pol i stori long “Bikpela Jisas” na “olgeta strongpela ensel bilong en.” (2 Tesalonaika 1:7) Na Pita i stori long Jisas em i kirap bek pinis, olsem: “Krais i go pinis long heven, na em i stap long han sut bilong God. Na ol ensel na ol strongpela spirit na olgeta samting i gat strong, olgeta i stap aninit long em.”—1 Pita 3:22.
Tru, i no gat wanpela tok long Baibel i tokaut stret olsem nambawan ensel Maikel em Jisas, nogat; tasol i gat wanpela ves i stori long Jisas wantaim wok bilong nambawan ensel. Long pas aposel Pol i salim long ol Tesalonaika, Pol i tok profet olsem: “Bikpela yet bai i lusim heven na kam daun wantaim bikpela singaut, na wantaim maus [nek] bilong nambawan ensel, na wantaim biugel bilong God. Na ol daiman i stap insait long Kraist bai i kirap bek pastaim.” (1 Tesalonaika 4:16, King Jems Nupela Testamen) Dispela ves i stori long Jisas, em i kisim pinis wok King. Tasol maski em i King, em i mekim tok long ‘nek bilong nambawan ensel.’ Na tingim: Em i gat strong long kirapim bek ol man i dai pinis.
Taim Jisas i stap long graun, em i bin kirapim bek sampela man. Taim em i mekim olsem, em i bin mekim wok long nek bilong em na mekim bikpela singaut. Olsem: Taim em i kirapim bek pikinini man bilong wanpela meri wanpis long taun Nain, em i tok: “Yangpela man, mi tokim yu, yu kirap.” (Luk 7:14, 15) Bihain, taim Jisas i laik kirapim bek pren bilong em Lasarus, Jisas i “singaut strong, ‘Lasarus, yu kam ausait.’ ” (Jon 11:43) Tasol long dispela tupela taim, nek bilong Jisas i bilong wanpela man i gutpela olgeta.
Taim Jisas i kirap bek pinis olsem spirit, God i mekim em i stap “antap tru” long heven. (Filipai 2:9) Em i no stap moa olsem wanpela man bilong graun. Nau em i gat nek bilong nambawan ensel. Olsem na taim biugel bilong God i krai bilong “ol daiman i stap insait long Kraist” i ken kirap bek na i go long heven, Jisas i mekim “bikpela singaut,” tasol long dispela taim, nek bilong em i bilong “nambawan ensel.” Olsem na i stret yumi ken ting, man i singaut long ‘nek bilong nambawan ensel,’ em yet i mas stap nambawan ensel.
Tru, i gat sampela ensel moa i gat bikpela namba, olsem ol serafim na ol serap. (Stat 3:24, NW; Aisaia 6:2, NW ) Tasol Baibel i makim olsem Jisas Krais, em i kirap bek pinis, em i nambawan bilong olgeta ensel—em nambawan ensel Maikel.