Ol Man i Askim . . .

Jisas Em i Namba Wan Ensel Maikel?

▪ Yes. Long planti ples, em pasin bilong ol man long ol i gat planti nem. Na dispela pasin i wankain tu long ol nem i stap long Baibel. Olsem: Jekop i gat narapela nem tu, em Israel. (Stat 35:10) Long Baibel ol i bin raitim long pastaim tru, aposel Pita i gat 5-pela narapela nem​​—Simeon, Saimon, Pita, Sifas, na Saimon Pita. (Matyu 10:2; 16:16; Jon 1:​42; Aposel 15:​7, 14) Olsem wanem yumi inap save tru olsem Maikel em narapela nem bilong Jisas? Orait, skelim ol dispela ves bilong Baibel i stap daunbilo.

Inap 5-pela taim Baibel i stori long dispela strongpela ensel Maikel. Tripela taim long Buk Daniel. Long Daniel 10:​13, 20, 21, Baibel i stori olsem Maikel em ol i kolim tu olsem “namba wan ensel” na ‘ensel bilong lukautim ol Israel,’ em i kam na helpim wanpela ensel husat i kam bilong mekim wanpela wok. Long Daniel 12:​1, yumi kisim save olsem long taim bilong pinis, ‘namba wan ensel Maikel bai i kamap, em ensel i save lukautim ol Israel.’

Baibel i kolim gen nem bilong Maikel long Kamapim Tok Hait 12:​7, em i stori olsem “Maikel wantaim ol ensel bilong en” ol i insait long wanpela bikpela pait na ol i rausim Satan wantaim ol ensel nogut bilong em long heven.

Yumi luksave olsem long ol dispela skripsa em yumi skelim pinis, ol i stori long Maikel olsem wanpela ensel bilong mekim pait na bilong lukautim lain bilong God, na tu, em i mekim pait long nambawan birua bilong Jehova, em Satan.

Jut ves 9 i kolim Maikel olsem “namba wan ensel.” Baibel i no kolim dispela nem “namba wan ensel” long planti man, nogat, long wanpela man tasol. Narapela hap long Baibel we dispela nem i stap, em long 1 Tesalonaika 4:16. Taim Pol i stori long Jisas, em i bin kirap bek pinis, em i tok: “God bai i tok strong, na namba wan ensel bai i singaut, na biugel bilong God bai i krai. Na Bikpela [Jisas] bai i lusim heven na i kam daun.” Olsem na Baibel i kamapim klia olsem Jisas Krais, em i dispela namba wan ensel.

Yumi skelim pinis ol dispela ves, na yumi kisim wanem save? Olsem: Jisas Krais em Maikel, dispela namba wan ensel. Dispela tupela nem​—Maikel (mining bilong en “Husat i Wankain Olsem God?”) na Jisas (mining bilong en “Jehova i Save Kisim Bek Ol Man”)​—i makim wok bilong Jisas olsem man i go pas long litimapim wok bos bilong God. Filipai 2:9 i tok: “God i litimapim Jisas na mekim em i stap antap tru. Na God i givim em wanpela nem i gutpela tru na i winim olgeta arapela nem.”

Em bikpela samting long save olsem laip bilong Jisas i no kirap long taim mama i bin karim em long graun, nogat. Paslain long Jisas i bon, wanpela ensel i bin i go lukim Maria na tokim em olsem long rot bilong holi spirit em bai kisim bel na em i mas kolim nem bilong dispela pikinini, Jisas. (Luk 1:31) Taim Jisas i mekim wok bilong em hia long graun, planti taim em i tok olsem paslain long em i kam long graun em i bin stap pinis long heven.​—Jon 3:13; 8:​23, 58.

Olsem na taim Jisas i no kam daun yet long graun, em i dispela namba wan ensel, Maikel. Bihain long em i kirap bek na i go long heven, Jisas i kirapim gen wok bilong em olsem namba wan ensel, Maikel, bambai em i ken “givim biknem long God Papa.”​—Filipai 2:11.