Planti Ol i Stap Rabis i Go Inap Long Taim Ol i Dai!
YATI em i lusim liklik pipia haus bilong em long wanpela kantri bilong saut-is Esia. Em i go long faktori bilong samapim sampela samting long skin bilong bulmakau, na em i wokim rop bilong su tu. Long wanpela mun—em 40 aua long olgeta wik na 90 aua ovataim—em i save kisim K107 tasol. Yati i save wok long wanpela kampani bilong wokim su na bos i ting ol samting kampani i mekim i stret bilong helpim sindaun bilong ol man long ol kantri i stap rabis. Dispela kampani i save baim ol su i go long ol kantri bilong Wes, na pe bilong olgeta su wan wan i winim K80. Long dispela K80 samting, kampani bai mekim wok long K1.90 olsem pe bilong wokman.
Nius Boston Globe i tok, faktori Yati i wok long en i ‘klin na i gat ol lait, tasol Yati i kisim liklik mani inap long em i ken baim long mun wanpela liklik pipia haus. Ol banis insait i doti nogut tru na i pulap long ol palai. Haus i no gat tebol o bet samting, olsem na Yati wantaim tupela meri moa i mas slip long plua ol i bin wokim long graun.’ Sori tru, planti man i gat wankain sindaun olsem Yati.
Wanpela bikman bilong wanpela lain bilong kampani em i tok: “Sapos mi no helpim ol dispela man, yu ting sindaun bilong ol bai winim sindaun bilong ol long nau? Liklik pe ol i kisim i helpim ol long sindaun gut. Tru, ol i no sindaun olsem maniman, tasol ol i no dai long hangre.” Tasol planti taim ol dispela man i sot long kaikai na ol pikinini i go slip nating. Olgeta de ol i mas go long ples wok na mekim wanpela kain wok em inap bagarapim skin bilong ol. Skin bilong planti i wok long bagarap, long wanem, ol i mas mekim wok long marasin i gat gip long en na long pipia marasin nogut. Yu ting em “gutpela sindaun”?
Wanpela man i wok leba long wanpela fam long hap saut bilong Esia, em Hari, em i no ting ol i gat gutpela sindaun. Em i raitim sampela tok olsem stori long sindaun nogut bilong ol man klostu long em, em ol i hatwok i go i go inap long ol i dai. Hari i tok: “Lombo i no inap i stap taim man i mekim wok long tupela ston bilong brukim. Mipela ol rabisman i olsem lombo—olgeta yia ol i brukbrukim mipela, na klostu nau mipela olgeta bai pinis.” Hari em i no kisim “gutpela sindaun,” na em i no save liklik long gutpela sindaun bilong ol bos bilong em. Sampela de bihain Hari em i dai—em tu i bagarap long pasin bilong i stap rabis.
Planti man i gat wankain sindaun olsem Hari, na ol i bagarap tu olsem Hari. Ol i bel hevi stret na ol i no gat strong long sakim ol dispela man i wok long bagarapim ol. Husat i wok long bagarapim ol? Wanem kain man bai mekim olsem? Ol i olsem gutpela man i mekim wok bos. Ol i tok, ol i laik givim kaikai long pikinini bilong yu, helpim gaden kaikai bilong yu i kamap gutpela, helpim sindaun bilong yu, na helpim yu long kamap maniman. Tasol nogat, ol yet i laik kamap maniman. Ol i save rot i op bilong wokim samting na baim i go long ol man na kisim winmani. Sapos pasin mangal bilong ol i kamapim ol pikinini i sot long kaikai, na skin bilong ol wokman i bagarap long marasin nogut, na ol i sindaun long ples i nogut tru—ol i no tingting planti. Ol kampani i gat pasin mangal na ol i no tingim ol hevi ol i save kamapim. Olsem na taim winmani bilong ol kampani i wok long i go antap, ol hevi nogut tru bilong ol rabisman i wok long i go antap tu.
[Piksa Kredit Lain long pes 3]
U.N. Photo 156200/John Isaac