Ol i Kalabus Long i Stap Rabis

LONG yia 33 C.E., Krais Jisas i tokim ol disaipel olsem: “Oltaim ol rabisman bai i stap wantaim yupela.” (Matyu 26:11) Wanem insait bilong tok bilong em? Yu ting em i tok i no gat rot long winim hevi bilong i stap rabis?

James Speth, em nambawan bilong wanpela lain (United Nations Development Programme), em i tok: “Yumi no inap bilip olsem [pasin bilong i stap rabis] bai stap wantaim yumi long olgeta taim. Long dispela taim nau yumi stap long en, yumi gat ol samting bilong helpim ol man, na bikpela save bilong pinisim hevi bilong i stap rabis.” Tasol yu ting ol lain bilong nau inap pinisim hevi bilong i stap rabis?

Lain Jeneral Asembli Bilong Yunaitet Nesen i laik bai wok bilong ol man i pinisim hevi bilong i stap rabis, na ol i tok ol yia kirap long 1997 i go inap 2006 em “Tenpela Yia Yunaitet Nesen i Makim Bilong Pinisim Hevi Bilong i Stap Rabis.” Yunaitet Nesen i tok, ol bai wok wantaim ol gavman, ol man, na ol lain bambai ol i ken helpim wok bisnis bilong ol long kamap gutpela. Na ol i laik stretim sampela samting bilong helpim sindaun bilong ol man, na helpim ol meri long kisim nem, na helpim ol man long painim rot bilong kisim mani na wok mani.

Em ol bikpela laik, a? Olsem wanem? Ol man bai kisim ol dispela samting ol i laik tru long kisim? Tingim sampela hevi i pasim ol man long pinisim hevi bilong i stap rabis.

Hangre na Sot Long Gutpela Kaikai

Ayembe, em i stap long Saier na em i mas lukautim 15 wanfamili. Sampela taim famili inap kaikai wanpela taim long olgeta de​—⁠em sup ol i wokim long kon, lip tapiok, sol na suga. Sampela taim ol i no gat kaikai inap 2-pela o 3-pela de. Ayembe i tok: “Mi save wet inap long ol pikinini i krai krai long kaikai na nau mi kirap na kukim kaikai.”

I stap bilong ol i no narapela kain​—⁠planti man i stap olsem. Long ol kantri i stap rabis, wanpela man long olgeta 5-pela 5-pela, i save go slip nating long olgeta nait​—⁠ol i no kaikai. Long olgeta hap, inap olsem 800 milion manmeri​—⁠200 milion em ol pikinini​—⁠ol i sot tru long gutpela kaikai. Skin bilong ol dispela pikinini i no inap go bikpela long mak tru bilong en; planti taim ol i sik. Ol i no skul gut. Na taim ol i bikpela, ol i karim hevi long ol dispela samting i bin painim ol. Olsem na pasin bilong i stap rabis i mekim na planti man i sot long gutpela kaikai, na pasin bilong sot long gutpela kaikai i mekim na planti man i stap rabis.

Planti man tru i stap rabis, hangre, na sot long gutpela kaikai, olsem na ol wok politik, na ol samting bilong mani na wok bisnis, na wok welfe samting, ol i no inap tru long pinisim ol dispela hevi. Tru tumas, sindaun bilong ol rabisman i no wok long senis na kamap gutpela​—⁠em i go moa nogut.

Skin i No Gat Strong

Wol Helt Oganaisesen i tok, pasin bilong i stap rabis “em i nambawan hevi bilong bagarapim planti man” na “em i nambawan bikpela samting bilong kilim i dai ol man, kamapim sik, pen na hevi.”

Wanpela buk (An Urbanizing World: Global Report on Human Settlements, 1996) i tok, inap 600 milion manmeri long Latin-Amerika, Esia, na Afrika, ol i sindaun long ol haus nogut i sot long wara, toilet, na rot bilong rausim pekpek samting, olsem na long olgeta taim laip na skin bilong ol inap bagarap. Long olgeta hap bilong graun, winim wan bilion manmeri i no gat klinpela wara. Planti handet milion manmeri i no gat mani bilong baim gutpela kaikai bilong helpim skin. Ol dispela samting i mekim na ol rabisman i hatwok long pasim sik.

Na planti rabisman i no gat rot long stretim sik. Taim ol rabisman i sik, ating ol i no gat mani bilong baim gutpela marasin o dokta samting. Ol rabisman i save dai taim ol i no lapun yet, na ol rabisman i abrusim indai, skin bilong ol inap bagarap long ol bikpela sik.

Zahida, em i wokim liklik bisnis long rot long ol ailan Moldaiv, em i tok: “Pasin bilong i stap rabis i mekim na skin i sik planti taim, na dispela i pasim mipela ol rabisman long wok.” Na taim ol rabisman i no gat wok, ol i go rabis moa yet. Em nau, samting i save kamap long dispela i nogut tru, long wanem, pasin bilong i stap rabis i save kamapim sik na sik i mekim man i stap rabis yet.

No Gat Wok Mani na Kisim Liklik Pe

Narapela hevi i save painim ol rabisman em wok mani​—⁠ol i no inap kisim wanpela wok mani. Long olgeta hap, inap 120 milion manmeri inap wok, tasol ol i no inap painim wok. Na inap olsem 700 milion manmeri ol i wok planti aua, tasol pe ol i save kisim i liklik na i no inap long baim ol samting ol i mas kisim.

Rudeen em i wok draiva long Kambodia. Em i tok: “Pasin bilong i stap rabis i mekim na mi mas wok 18 aua samting long olgeta de, tasol mani mi kisim i no inap long baim kaikai bilong mi, meri bilong mi, na 2-pela pikinini bilong mipela.”

Bagarapim Ol Samting Bilong Graun

Pasin bilong bagarapim ol samting bilong graun i insait long dispela hevi bilong i stap rabis. Elsa, em i wanpela savemeri long Gaiana, Saut Amerika, em i tok: “Pasin bilong i stap rabis em pasin bilong bagarapim ol samting bilong graun, olsem bus, graun, ol animal, ol wara na raunwara.” Em nau, em narapela samting nogut​—⁠pasin bilong i stap rabis i kirapim ol rabisman long bagarapim ol samting bilong graun na dispela i mekim ol i kamap rabis moa.

Pasin bilong planim kaikai long wanpela hap graun tasol long olgeta taim inap long graun i no gat gris moa o ol i mekim narapela wok long en, em i wanpela pasin bilong bipo tru. Na pasin bilong katim na rausim bikbus bilong kisim diwai bilong wokim haus samting o bilong kisim paiawut o bilong planim kaikai, em tu i wanpela pasin bilong bipo tru. Tasol ol man i wok long kamap planti tumas, olsem na nau dispela pasin i kamap wanpela bikpela hevi tru.

Wanpela lain (International Fund for Agricultural Development) i tok, insait long 30 yia i go pinis, klostu 20 pesen bilong graun long olgeta hap i no gat gris moa, olsem na graun i no gutpela moa bilong planim kaikai. Bikpela as bilong dispela hevi em ol i sot long mani na nupela save na masin samting tu bilong lukautim graun. Na insait long ol dispela yia, planti milion hekta i kamap olsem graun nating, long wanem, ol man i no wokim gut o lukautim gut ol paip samting bilong putim wara long ol gaden. Long olgeta yia ol i save katim na rausim planti milion hekta bikbus bilong planim kaikai o bilong kisim ol diwai bilong wokim ol haus samting o bilong kisim paiawut.

I gat 2-pela samting i as na dispela pasin bilong bagarapim graun i insait long hevi bilong i stap rabis. Namba wan i olsem: Planti rabisman i bagarapim ol samting bilong graun, long wanem, ol i mas kisim kaikai na paiawut. Olsem wanem yumi ken tokim ol lain i hangre na i stap rabis long ol i mas lukautim gut ol samting bilong graun taim ol i mekim wok long en? Na olsem wanem yumi ken tokim ol long tingim i stap bilong ol lain i kamap bihain? Ol dispela lain i hangre na i stap rabis, ol i bagarapim ol samting bilong graun olsem ol diwai samting bambai ol i ken stap laip. Namba 2 i olsem: Bilong kisim winmani, ol lain i gat mani ol i save pinisim ol samting bilong graun olsem ol diwai samting bilong ol lain i stap rabis. Olsem na maski ol lain i gat mani na ol lain i stap rabis ol i bagarapim ol samting bilong graun olsem ol diwai samting, dispela i mekim na pasin bilong i stap rabis i go bikpela moa.

Skul

Alicia, em i wok welfe long Filipin na em i tok: “Pasin bilong i stap rabis i olsem: Wanpela meri i salim ol pikinini bilong em i go long rot bilong singaut long mani long ol man; em i no salim ol i go long skul. Sapos ol i go long skul, famili i no gat kaikai. Mama i save em i bihainim wankain pasin i bin kalabusim em bipo, tasol i no gat narapela samting em i ting em inap mekim.”

I no gat planti skul, olsem na 500 milion pikinini i no inap skul. Wan bilion manmeri i no save tumas long rit rait. Sapos man i no skul, em i hatwok long kisim gutpela wok mani. Olsem na pasin bilong i stap rabis i mekim na pikinini i no inap skul, na dispela i kamapim planti rabisman moa.

Haus

Long ol kantri i stap rabis planti man i no gat haus, na dispela hevi i stap tu long sampela kantri i gat planti mani. Wanpela ripot i tok, insait long 5-pela yia, klostu 250,000 manmeri long Nu Yok Siti ol i bin slip long wanpela kain haus bilong helpim ol man i no gat ples slip. Ol rabisman i stap long Yurop tu. Long Landon, ol i save long 400,000 manmeri i no gat ples slip. Long Frans, inap 500,000 manmeri i no gat ples slip.

Tasol long ol kantri i no gat planti wok bisnis long en, hevi i bikpela moa. Planti manmeri i go sindaun long ol taun na biktaun, long wanem, ol i gat strongpela laik long kisim kaikai, wok mani, na gutpela sindaun. Long sampela biktaun, winim 60 pesen bilong olgeta manmeri, ol i sindaun long ol skwota setelmen. Em nau, pasin bilong i stap rabis long ples i helpim pasin bilong i stap rabis long taun i go bikpela moa.

Ol Manmeri

Na wanpela samting i save mekim ol dispela hevi i go bikpela moa em ol manmeri​—⁠ol i kamap planti tumas. Insait long 45 yia i go pinis, namba bilong ol manmeri i go antap moa​—⁠winim dabol. Yunaitet Nesen i ting, long yia 2000 dispela namba bai go bikpela moa inap long 6.2 bilion manmeri, na long yia 2050 bai i gat 9.8 bilion manmeri long graun. Planti man moa i save kamap long ol hap i stap rabis tru. Long 1995, inap olsem 90 milion bebi i kamap na 85 milion i bin kamap long ol kantri i no gat planti samting bilong lukautim ol.

Olsem wanem? Yu bilip olsem wantu tasol ol man bai kirap na wok gut wantaim bilong pinisim pasin bilong i stap rabis? Yu ting ol man bai stretim ol samting i as bilong hevi bilong i stap rabis olsem hangre, sik, no gat wok, bagarapim ol samting bilong graun, sot long skul, no gat gutpela haus, na pait? Ating yu bilip olsem ol i no inap, a?

Olsem wanem? Dispela i makim olsem ol rabisman i lus na ol i no gat rot moa? Nogat, long wanem, klostu nau samting bai stretim tru dispela hevi bilong i stap rabis. Ol man i no inap stretim. Orait, olsem wanem dispela hevi bai pinis? Na olsem wanem long tok bilong Jisas taim em i tok: “Oltaim ol rabisman bai i stap wantaim yupela”?

[Blok long pes 7]

Ol i Stap Rabis Olgeta

Long 1971, Yunaitet Nesen i kamapim tok “ol kantri i no gat wok bisnis long en” bilong makim “ol kantri i rabis olgeta na ol i sot tru long mani, winim ol narapela kantri i no gat planti wok bisnis.” Long 1971, inap 21 kantri i bin stap olsem. Long nau, inap 48 kantri i stap olsem, na 33 bilong ol dispela kantri i stap long Afrika.

[Piksa long pes 5]

Planti milion manmeri ol i wok planti aua, tasol ol i kisim liklik pe

[Kredit Lain]

Godo-Foto

[Piksa long pes 6]

Ol gutpela gutpela haus i stap klostu long ol rabis haus

[Piksa long pes 7]

Planti milion manmeri i sindaun long ol haus nogut