Ol Yangpela i Laik Save . . .

Olsem Wanem Sapos Famili Bilong Mi i Rabis?

SAMPELA taim Jos i tingting bek long taim em i go bikpela long wanpela rabis taun long Saut Afrika. Jos i tok: ‘Mipela bin stap long wanpela liklik haus kapa i gat tupela rum tasol.’ Jos wantaim 8-pela brata susa ol i slip long wanpela rum. Long taim bilong kol em i wokabaut long win i kol tumas bilong kisim wara. Tasol Jos i tok: ‘Taim mi liklik na mi stap rabis, mi nolaik tru long lukim papa i wok wok oltaim bilong painim kaikai samting bilong helpim mipela long i stap laip. Mi bel hevi long dispela, long wanem, i olsem i no gat narapela rot bilong helpim mipela.’

Long ol kantri i no gat planti wok bisnis, planti man i hatwok long painim mani samting. Tasol ol kantri i gat planti wok bisnis, ol tu i gat planti man i stap rabis. Ating yu wanpela bilong ol, a? Ating yu olsem Jos na yu ting yu no gat rot long lusim pasin bilong i stap rabis. Tasol kain tingting olsem inap kirapim yu long mekim ol samting i nogutim moa yet sindaun bilong yu.

Rot Bilong Abrusim

Planti yangpela i stap rabis ol i laik abrusim hevi bilong ol na ol i dring planti na kisim drak, na ol i ting dispela bai pinisim bel hevi bilong ol. Wanpela meri (Jill Swart) em i skelim hevi bilong ol pikinini i stap rabis long wanpela biktaun long Afrika. Em i tok, ‘ol dispela pikinini i no kisim drak bilong kisim amamas tasol​—ol i kisim na bai ol i no ken pilim ol hevi bilong ol, olsem skin bilong ol i kol, o ol i no gat poroman, o ol i hangre.’

Tasol taim strong bilong drak i pinis long skin bilong ol, ol i pilim olsem wanem? Dispela meri (Jill Swart) i kolim ol hevi i save painim ol, olsem ‘bikpela bel hevi,’ o ‘bel nogut long narapela,’ o ‘tingting i senis senis,’ o ‘ol i no inap lukluk gut,’ na planti narapela hevi long skin. Tasol ol dispela hevi i no rot bilong “abrusim” pasin bilong i stap rabis, a?

Wanpela king i gat bikpela save, em Solomon, em i tok: “Ol spakman . . . ol bai i kamap rabisman tru. Sapos man i kaikai na i slip tasol, i no longtaim na em bai i gat pipia laplap tasol bilong karamapim skin bilong en.” (Sindaun 23:21) Sapos tru yu stap rabis tasol yu laik daunim dispela hevi na yu mekim long rot bilong dring, o kisim drak samting, dispela i no ken pinisim hevi bilong yu. (Skelim Sindaun 31:7.) Yangpela meri, Maria, em i gat 16 krismas tasol na em i stap wantaim mama long Saut Afrika na ol i stap rabis. Em i tok: ‘Sapos yumi wok long abrusim samting i stap tru, dispela i save kamapim hevi​—em i no pinisim.’ Na tu, bilong painim mani samting bilong baim dring o ol drak, em bai mekim yu i kamap rabis moa. Sapos yangpela i stap rabis, em i mas kisim stretpela tingting long dispela, em tasol inap helpim em.

Belhat na Bel Nogut

Planti yangpela i belhat long ol i no gat gutpela sindaun, olsem na ol i kros pait, bagarapim samting bilong ol man, stil, na ol samting olsem. Wanpela buk (The World Book Encyclopedia) i tok, ol yangpela i mekim olsem long wanem, ol i ting ‘em tasol i rot bilong abrusim pasin bilong i stap rabis na ol narapela hevi.’ Jos i tok, taim em i yangpela, planti yangpela i belhat na bel nogut long ol i no gat gutpela sindaun, olsem na ol i insait long ol lain raskol na ol i raun na pretim ol man. Jos i tok, ‘oltaim ol i pait na stil bilong kisim samting bilong skin.’ Na sampela yangpela i laik winim hevi bilong i stap rabis, na ol i mekim sampela wok i no stret long ai bilong gavman, olsem baim ol drak i go long ol man.

Tasol pait na stil na bagarapim samting bilong narapela man i no pinisim hevi​—em i kamapim hevi. Ol dispela yangpela i lusim strong bilong ol long pasin nogut, tasol ol inap lusim dispela strong long lain long mekim wanpela gutpela kain wok. Taim yangpela i no wokabaut stret, em i no helpim sindaun bilong em, nogat; em i kamapim sampela hevi moa long tingting na bel na long skin bilong em. Sampela yangpela i kalabus o ol i lusim laip bilong ol long wanem, ol i kros pait. King Solomon i mekim tok lukaut long dispela, na em i tok: “Sapos man i no larim ol arapela man i stretim em, em bai i stap rabis na i sem nogut tru.”​—Sindaun 13:18.

Ol i Ting i No Gat Rot

Sampela samting inap bagarapim ol yangpela i stap rabis em olsem, ol i ting ol i olsem samting nating tasol. Buk (World Book Encyclopedia) i tok, planti yangpela i ‘kisim tingting bilong papamama, olsem ol i no inap mekim wanpela samting bilong helpim sindaun bilong ol, na tu, ol i olsem samting nating.’ Olsem na bihain ol i ting ol i mas i rabis olsem i go inap long ol i dai.

Tasol dispela tingting olsem i no gat wanpela samting inap helpim yu long abrusim dispela hevi, yu ting dispela bai helpim sindaun bilong yu? Nogat! Dispela tingting i mekim hevi i go bikpela moa. Wanpela savetok i stap long Saveman 11:4 i tok: “Sapos yu wetim gutpela taim bilong win na ren samting, orait bai yu no inap wokim gaden na yu no inap kisim kaikai i mau.” Sapos man bilong wokim gaden i tingting tasol long ol hevi inap kamap​—olsem win inap karim pikinini kaikai i go, o ren inap bagarapim gaden​—bai em i no mekim sampela samting bilong pasim dispela hevi. Olsem na sapos yu tingting long ol hevi tasol, dispela bai pasim yu long mekim wanpela samting bilong helpim sindaun bilong yu.

King Solomon i mekim sampela toksave moa, em i tok: “Yu mas planim sampela lain kaikai long moningtaim na sampela long apinun tu. Yu no inap save, lain kaikai yu planim long moning o lain kaikai bilong apinun tasol bai i kamap gut, o tupela lain wantaim bai i kamap gut.” (Saveman 11:6) Yes, yu no ken pret long mekim wanpela samting. No ken ting sapos yu mekim wanpela samting bilong helpim yu yet, dispela wok bai lus nating. I gat sampela samting yu ken mekim bilong helpim yu na bai isi isi ol gutpela tingting i ken daunim ol tingting i save mekim yu i bel hevi.

Wok Long Amamas Long Yu Yet

Jems i gat 11-pela krismas tasol. Em i stap wantaim mama na susa bilong em long kem bilong ol skwota klostu long biktaun Johanisbek long Saut Afrika. Ol i gat liklik samting tasol bilong skin. Long olgeta Sarere Sande Jems i helpim ol man long wokim wanpela Haus Kingdom bilong ol Witnes Bilong Jehova. Dispela i helpim Jems long tingim gutpela wok em i mekim, na taim bilong em i no lus nating. Jems i tok: ‘Taim mi wok long Haus Kingdom na dispela de i pinis, mi stap bel isi.’ Dispela yangpela i stap rabis, tasol em i gat ol gutpela samting​—em taim na strong bilong em.

Narapela gutpela wok bilong mekim em wok bilong autim tok bilong Baibel long haus bilong ol man. (Matyu 24:14) Planti yangpela Witnes Bilong Jehova i mekim dispela wok olgeta taim, na ol i amamas long tingim gutpela wok ol i mekim, na tu, ol i helpim ol narapela man long wetim gutpela sindaun ol inap kisim long bihain. Tru, ol i no kisim mani long dispela kain wok, tasol tingim tok Jisas i bin givim long ol Kristen long kongrigesen Smerna long bipo. Ol tu i stap rabis, tasol ol i man bilong tingim ol samting bilong spirit, olsem na Jisas i tok: “Mi save olsem yu stap rabis tru. Tasol yu gat planti samting moa yet.” Ol i bilip long blut bilong Krais em i bin givim olsem ofa na ol i kamapim dispela bilip bilong ol, olsem na ol bai kisim planti samting, olsem ol bai kisim prais, em laip i stap oltaim oltaim.​—KTH 2:​9, 10.

Sapos wanpela i stap rabis na em i go bikpela long dispela kain sindaun, em i hatwok. Tasol i no gat as na yu sem long dispela, o yu pilim olsem yu no gat gutpela samting yu ken wetim i kamap. Pasin bilong stap rabis i stap long wanem, “sampela bikman i wok long daunim ol arapela manmeri na mekim nogut long ol.” (Saveman 8:9) Baibel i soim yumi, klostu nau God bai bosim dispela graun na em bai pinisim pasin bilong i stap rabis na ol hevi dispela i kamapim. (Song 37:​9-11) Krais Jisas bai kamapim Paradais long graun na planti bilion manmeri bai stap long en. Tasol sapos long nau yu stap rabis, i gat planti samting yu ken mekim bilong helpim yu long karim dispela hevi. Mipela bai stori long dispela ol samting long narapela stori bihain.

[Blok long pes 20]

“Mi Pilim Olsem Mi Kalabus Long i Stap Rabis”

Yangpela Afrika, em Jos, em i laik tru long winim bikpela skul. Em i ting sapos em i mekim olsem, ol samting em i lain long en long skul bai helpim em long kisim gutpela wok mani na em wantaim famili bilong em i no ken i stap rabis moa. Tasol famili bilong em i kisim bikpela hevi long mani samting, olsem na taim Jos i skul inap 6-pela yia tasol em i mas lusim skul na painim wok mani. Bihain em i kisim wok mani long wanpela faktori bilong wokim ol botol. Em i kisim K5 tasol long olgeta wik. Olsem na em i tromoi olgeta pe bilong em bilong helpim famili.

Jos i tok: ‘Mi stap rabis na mi pilim olsem dispela i kalabusim mi, tasol mi save sapos mi insait long wanpela lain raskol o stil samting, dispela i no ken helpim sindaun bilong mipela. Long nau, planti wankrismas bilong mi em ol i bin insait long lain raskol o stil samting, ol i kalabus long dring na drak o ol i stap long kalabus, na sampela, em ol narapela i kilim ol i dai.’

Bihain Jos i bungim ol Witnes Bilong Jehova. Em i tok, ‘Taim mi go long ol miting Kristen, namba wan samting mi lukim na mi amamas long en, em olgeta i kam toktok wantaim mi.’ Em i tok moa olsem: ‘Isi isi mi kisim gutpela tingting na mi no tingting moa olsem mi man nogut.’ Na tok bilong Baibel i mekim gut bel bilong Jos, olsem Song 72:​12, 13 i tok: “Em [King bilong Kingdom bilong God] i save helpim ol rabisman i singaut long em. . . . Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol.” Ol tok promis bilong Baibel i helpim Jos long wetim ol gutpela samting bai kamap.

Long nau taim yu lukim Jos yu no inap save olsem bipo em i ting i no gat rot tru bilong helpim em. Nau em i marit na em i stap amamas, na em i save lukautim wanpela kongrigesen bilong ol Witnes Bilong Jehova long Soweto long Saut Afrika.

[Ol Piksa long pes 19]

Tromoi strong na taim bilong yu long gutpela samting. Nogut yu ting i no gat rot bilong helpim yu yet