Klostu Nau Pasin Bilong i Stap Rabis Bai Pinis
WANEM insait bilong tok bilong Jisas, em i tok olsem: “Oltaim ol rabisman bai i stap wantaim yupela”? (Matyu 26:11) Em i laik tok olsem hevi bilong i stap rabis bai stap oltaim na i no gat rot bilong stretim?
Jisas i save taim ol man i wok yet long bosim graun, pasin bilong i stap rabis i no inap pinis. Em i save i no gat wanpela gavman bilong dispela graun, o wanpela wok bisnis, o wanpela lain em inap pinisim tru hevi bilong i stap rabis. Na ol samting i bin kamap bipo yet na i kam inap nau i kamapim klia dispela samting.
Inap planti tausen yia ol man i bin traim ol kain kain gavman na wok bisnis na sindaun, tasol ol rabisman i stap yet. Tru tumas, maski wok bilong saiens na bisnis na marasin i kamap gutpela, long olgeta hap bilong graun namba bilong ol man i kalabus long pasin bilong i stap rabis i wok yet long go antap.
Jisas i save planti samting i as bilong pasin bilong i stap rabis, olsem bikpela hangre, bikpela san, ami bilong ol birua i kam pait, gavman nogut, mekim wok nogut long mani samting, ol maniman na ol bikman i daunim ol rabisman na ol man i no gat strong, birua i kamap na sik, na ol poroman marit i dai, olsem na ol meri wanpis na pikinini i no gat papa, ol i stap rabis tru. Tasol em i save, pasin nogut bilong ol man yet na famili bilong ol inap mekim ol i kamap rabis, olsem pasin bilong les, spak, pilai laki, na kisim drak.
Olsem na taim Jisas i tok, “oltaim ol rabisman bai i stap wantaim yupela,” dispela i makim olsem i no gat wanpela lain o oganaisesen bilong dispela graun em inap pinisim tru pasin bilong i stap rabis. I olsem em i tok, taim ol man i wok yet long bosim graun bai i gat ol rabisman.
Hevi bilong i stap rabis em i wanpela hevi bilong bipo tru, tasol yumi no ken ting Jisas o Papa bilong em long heven ol i no tingim ol rabisman, nogat. Na yumi no ken ting tok bilong Jisas i makim olsem pasin bilong i stap rabis i no inap pinis, nogat. Tok bilong Baibel i helpim yumi long save, dispela hevi bai pinis.
Stap Rabis na Lo Bilong Moses
Yumi ken tingim Lo God i bin givim long Israel bilong bipo long han bilong Moses. Lo i tok, olgeta famili bilong Israel ol i mas kisim hap graun long Kenan olsem graun bilong ol yet. (Lo 11:8-15; 19:14) Lain Livai tasol i no kisim hap graun. Ol Livai i mas mekim bikpela wok long haus lotu, olsem na bilong lukautim ol, ol Israel i bin tilim ol kaikai bilong gaden long 10-pela hap na givim wanpela hap long ol Livai.—Namba 18:20, 21, 24.
Na aninit long Lo Bilong Moses i gat ol lo olsem, hap graun samting bilong wanpela man i mas stap long famili bilong em, olsem na ol dispela lo i helpim famili o lain long holim graun ol i bin kisim. (Namba 27:8-11) Sapos wanpela man i salim graun bilong em, nupela papa bilong en inap holim dispela graun inap liklik taim tasol. Bihain em i mas bekim bek long famili bilong man i bin salim.
I gat kain kain as na sampela Israel i kamap rabis, olsem: Ating ol i no mekim gutpela wok long graun bilong ol o ol i bin lusim nating ol samting bilong ol. Lo i tok, taim ol Israel i kisim kaikai long ol gaden bilong ol—gaden prut na gaden wain tu—ol i mas larim hap kaikai i stap bilong ol rabisman i ken kisim. (Wok Pris 23:22) Na sapos wanpela Israel i sot tru, em inap kisim mani olsem dinau, tasol em i no ken givim winmani taim em i bekim dinau. Tru tumas, ol Israel i mas mekim gutpela pasin long ol rabisman na givim ol samting long ol.—Kisim Bek 22:25.
Jisas i Tingim Tru Ol Rabisman
Planti handet yia bihain taim Jisas i kam daun long graun, em i kamapim yet gutpela pasin Papa bilong em, Jehova, i bin skulim em long en. Jisas i tingim gut ol man i sot long ol samting bilong skin. Em na ol disaipel bilong em i gat wanpela bokis mani na ol i bin mekim wok long dispela mani bilong helpim ol Israel i sot.—Jon 12:5-8.
Bihain long ol i kilim i dai Jisas, ol Kristen i tingim ol rabisman olsem Jisas i bin tingim na ol i helpim ol long ol samting bilong skin—na mekim moa yet long ol brata sista spirit bilong ol, em ol i stap rabis. (Rom 15:26) Long nau ol Kristen tru i mekim wankain gutpela pasin long ol narapela.
Tru, Baibel i mekim sampela tok marimari long ol man i kisim hevi long ol pasin i no stret, tasol Baibel i krosim ol man i bagarapim skin bilong ol yet, long wanem, ol i sindaun nating na i no mekim wok. (Saveman 4:1, 5) Aposel Pol i tok: “Sapos man i no laik mekim wok, orait em i no ken kisim kaikai.” (2 Tesalonaika 3:10) Na i wankain long ol man i mekim nabaut long mani bilong ol bilong kisim drak, smok, o dring—ol tu inap kamap rabisman. Ol i kamap rabis long pasin nogut bilong ol yet; i olsem ol i kamautim ol samting ol i bin planim.—Galesia 6:7.
Bel Isi Long Nau
Baibel i tok, God i save tingim tru i stap bilong ol man i wok long bihainim laik bilong em. Olsem: Long Song 37:25, Devit i tok: “Bipo mi yangpela, na nau mi lapun pinis, tasol mi no lukim God i givim baksait long wanpela stretpela man. Na mi no lukim ol pikinini bilong stretpela man i sot long kaikai.” God i no tok em bai givim planti mani kago long ol man i gat stretpela bel, nogat; tasol i olsem em i tok em bai lukautim ol long ol samting bilong skin inap long ol i ken stap laip. Na ves 28 bilong dispela song i tok: “God i laikim tumas stretpela pasin. Em i no inap larim ol manmeri bilong en i lus.”
Tasol wok bilong Jisas long tingim ol rabisman na helpim ol long samting bilong skin taim em i stap long graun, i no dispela wok tasol em i mekim. Em i tokim ol, sapos ol i wok long bihainim laik bilong God, God bai lukautim ol na ol bai kisim ol samting ol i mas kisim—long nau na long bihain. Jisas i tok olsem:
“Yupela lukim ol pisin. Ol i no save planim kaikai, na ol i no save bungim na putim long haus kaikai. Tasol Papa bilong yupela i stap long heven em i save givim kaikai long ol. Ating yupela i no winim tru ol pisin, a? . . . Bilong wanem yupela i save tingting planti long ol klos samting? Yupela i mas lukim gut ol plaua i stap nabaut, ol i kamap olsem wanem. Ol i no save hatwok. Ol i no save wokim laplap. Tasol mi tokim yupela, bipo King Solomon i save putim olgeta gutpela bilas bilong en, tasol gutpela bilas bilong ol dispela plaua i winim tru bilas bilong Solomon. Nau ol dispela gras samting i stap nabaut, na tumora tasol ol man bai i katim na tromoi i go long paia. Na kain gras nating olsem, em God i save bilasim. Olsem na yupela ol manmeri i gat liklik bilip tasol, yupela i ken save tru olsem, God bai i givim bilas long yupela tu. Yupela i no ken tingting planti na tok, ‘Bai yumi kaikai wanem samting? Bai yumi dring wanem samting?’ Nogat. . . . Papa bilong yupela i stap long heven em i save pinis, yupela i mas kisim dispela olgeta kain samting.”—Matyu 6:26-32.
Bilong pinisim dispela tok Jisas i kirapim lain bilong em olsem: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.” (Matyu 6:33, Nupela Testamen na Ol Sam) Em gutpela tok tru bilong strongim bel bilong ol man i stap rabis tasol ol i wok long bihainim laik bilong God! Na tingim: Jisas i tok Kingdom bilong God i mas stap olsem nambawan bikpela samting long lain bilong em. Jisas i save taim Kingdom bilong God long heven i kirap bosim graun olgeta, long dispela taim—long narapela taim nogat—pasin bilong i stap rabis bai pinis.
Em Bai Pinis
Em nau, Jisas i tokaut long gutpela samting tru yumi inap wet long en. Olsem na taim em i tok, “oltaim ol rabisman bai i stap wantaim yupela,” em i stori long i stap bilong yumi taim ol man i bosim graun. Em i no stori long i stap bilong yumi long bihain taim Kingdom bilong God long heven i bosim graun, nogat. Baibel i tok: “Oltaim God i no save lusim tingting long ol rabisman. Ol man i gat bikpela hevi ol i save bilip long God na wetim em i helpim ol. Na em bai i no inap larim ol i wet nating.” (Song 9:18) Na Krais Jisas, olsem King bilong Kingdom bilong God, em i no ken orait long wanpela man i mekim nogut long ol narapela na daunim ol.
Nambawan bikpela tok Jisas i bin autim em tok bilong Kingdom bilong God long heven bai bosim graun. (Matyu 4:17) Aninit long Kingdom, ol samting long graun bai wankain olsem ol samting long heven. Olsem na em i lainim ol disaipel bilong em long beten long God olsem: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”—Matyu 6:10.
Dispela bai kamap olsem wanem? God i laik pinisim olgeta wok bos bilong man long graun na Kingdom bilong em long heven i bosim graun. Tok profet bilong Daniel 2:44 i tok: “Taim ol dispela king i stap yet [long nau] God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol [wok bos bilong ol man bai pinis] na bagarapim ol arapela king [bilong nau] na kingdom bilong en bai i stap oltaim.”
Olsem na long nupela taim, Kingdom bilong God bai bosim graun na graun olgeta bai kamap wanpela paradais i gat planti kaikai samting—pasin bilong i stap rabis bai pinis olgeta. Tingim sampela tok profet bilong Baibel i stori long ol samting bai kamap long dispela taim:
“Bikpela I Gat Olgeta Strong bai i redim bikpela kaikai tru. Bai i gat planti gutpela gutpela abus na nambawan wain tru bilong dring. Na ol manmeri bilong olgeta kantri bai i kam bung long dispela kaikai.” (Aisaia 25:6) “Planti rais na wit samting i ken kamap long ol gaden bilong ol manmeri, inap olsem i save kamap long Lebanon.” (Song 72:16) “Bai ren i mekim graun i kamap gutpela tru. Na ol diwai i save karim kaikai, bai ol i karim planti moa. Na planti kaikai bai i kamap long ol gaden. Na bai mi kisim bek ol manmeri bilong mi.” (Esekiel 34:26, 27) “Planti gutpela kaikai i kamap pinis long graun bilong mipela. God, em i God bilong mipela, em i bin mekim gut tru long mipela.” (Song 67:6) “Ples wesan nating wantaim ples drai bai ol i amamas tru, long wanem, ol naispela plaua bai i kamap na karamapim ol dispela hap.”—Aisaia 35:1.
Na Maika 4:4 i tok promis olsem: “Olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.” Olgeta man bai i gat haus bilong ol yet: “Ol manmeri bilong mi bai i wokim ol haus na stap long ol. Ol birua bai i no inap . . . sindaun long ol haus bilong ol.” (Aisaia 65:21, 22) Olsem na Jisas inap tok promis long ol man i bilipim tok bilong em olsem: “Mi tok tru long yu nau, bai yu stap wantaim mi long Paradais”!—Luk 23:43, NW.
Tru tumas, Baibel i lainim yumi olsem pasin bilong i stap rabis bai pinis olgeta. Na dispela taim i wok long kam klostu, long wanem, ol tok profet bilong Baibel i tok dispela graun i stap long “las de” bilong en, olsem na “planti hevi nogut tru” i kamap. (2 Timoti 3:1-5, 13) Klostu nau dispela taim nogut yumi stap long en bai pinis na pasin bilong i stap rabis i pinis olgeta—wok bilong ol man i no inap pinisim, nogat; God tasol inap pinisim. King Krais Jisas bai “helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol.”—Song 72:12, 13.
[Piksa long pes 8, 9]
Long nupela taim God bai kamapim, olgeta man i gat gutpela haus na planti kaikai
[Piksa long pes 10]
Long nupela taim, bai i no gat tru ol pikinini i stap hangre