Klostu Nau Bai i No Gat Pasin Bilong i Stap Rabis
OL MAN i stap rabis, ol i save laikim ol piksa bilong Paradais, olsem dispela piksa yumi lukim long fran bilong dispela nius. Namba wan man na meri, Adam na Iv, ol i bin stap long wanpela paradais. Ol i bin stap long gaden bilong Iden. (Stat 2:7-23) Tru, dispela Paradais i bin lus, tasol bilip long wanpela paradais bihain bai kamap—long wanpela nupela taim we i no gat pasin bilong i stap rabis—dispela i no wanpela driman nating, nogat. Ol tok promis i stap long Baibel i as bilong dispela bilip.
Tingim tok promis Jisas Krais i bin mekim long laspela de bilong em long i stap laip long graun. Wanpela man nogut i bin dai wantaim Jisas em i kamapim olsem em i bilip God inap pinisim ol hevi bilong ol man. Em i tok: “Jisas, taim yu kamap king, yu ken tingting long mi.” Dispela tok i kamapim klia olsem dispela man nogut i bilip olsem Jisas bai kamap King na ol man i dai pinis bai kamap laip gen. Jisas i tokim em. “Mi tok tru long yu nau, bai yu stap wantaim mi long Paradais.”—Luk 23:42, 43; NW.
Baibel i stori long ol man ol bai stap long Paradais, olsem: “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring.” (Aisaia 65:21) Yes, “olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret. Bikpela I Gat Olgeta Strong i bin promis long mekim ol dispela samting.”—Maika 4:4.
Tasol bilong wanem God i larim pasin bilong i stap rabis i stap long nau? God i givim wanem helpim long ol man i stap rabis? Wanem taim bai pasin bilong i stap rabis i pinis?
Pasin Bilong i Stap Rabis i Stap—Bilong Wanem God i Bin Larim i Stap?
Dispela Paradais God i bin putim Adam tupela Iv long en i bin lus, long wanem, wanpela ensel nogut, Satan, i bin kirapim tupela long bikhet long God. Satan i mekim wok long wanpela snek olsem maus bilong em na em i pulim Iv long brukim lo bilong God i tambu long ol i kaikai pikinini bilong wanpela diwai. Em i giamanim Iv long bilip olsem sapos em i lusim God na bosim wokabaut bilong em yet, sindaun bilong em bai i kamap gutpela moa. Taim Iv i givim dispela prut tambu long Adam, em tu i kaikai na i givim baksait long God, long wanem, em i laik amamasim meri bilong em.—Stat 3:1-6; 1 Timoti 2:14.
God i rausim tupela bikhetman long Paradais—i stret em i mekim olsem—na nau tupela i mas hatwok long lukautim tupela yet. I kam inap long nau, Jehova i bin larim Satan i bosim ol man i gat sin, na ol samting nogut i bin kamap long pasin bilong sakim tok bilong God i kamap ples klia. Ol samting i bin kamap i soim olsem ol man i no inap kamapim Paradais long graun. (Jeremaia 10:23) Pasin bilong bosim wokabaut bilong ol yet na sakim wok bos bilong God, dispela i bin kamapim planti bikpela hevi, na pasin bilong i stap rabis tu.—Saveman 8:9.
Tasol long dispela taim bilong planti hevi, i no olsem ol rabisman i no gat helpim, nogat. Long Buk Bilong God, em Baibel, i gat planti gutpela tok bilong soim rot long ol.
“No Ken Tingting Planti”
Taim Jisas i givim tok long wanpela bikpela lain manmeri, em planti ol i stap rabis, em i tok: “Yupela lukim ol pisin. Ol i no save planim kaikai, na ol i no save bungim na putim long haus kaikai. Tasol Papa bilong yupela i stap long heven em i save givim kaikai long ol. Ating yupela i no winim tru ol pisin, a? . . . Yupela i no ken tingting planti na tok, ‘Bai yumi kaikai wanem samting? Bai yumi dring wanem samting?’ Nogat. Ol haiden i save wari long painim olgeta dispela samting. Tasol Papa bilong yupela i stap long heven em i save pinis, yupela i mas kisim dispela olgeta kain samting. Tasol namba wan samting yupela i mas mekim i olsem. Yupela i mas larim God i stap king bilong yupela, na kisim stretpela pasin bilong em, na bai em i givim dispela olgeta arapela samting tu long yupela.”—Matyu 6:26-33.
I no olsem man i stap rabis em i mas stil, nogat. (Sindaun 6:30, 31) Em bai kisim ol samting em i mas i gat sapos em i putim God i stap namba wan long laip bilong em. Tingim Tukiso, wanpela man long Lesoto, long hap saut bilong Afrika. Long 1998, ol soldia bilong narapela kantri i kam insait long Lesoto bilong pinisim wok bilong sampela lain i laik daunim gavman. Pait i kamap long dispela i mekim na ol man i go insait long ol stua na stilim ol samting, ol man i lusim wok mani bilong ol, na kaikai i sot.
Tukiso i sindaun long wanpela hap bilong taun we i gat planti man i stap rabis. Planti neiba bilong em i bin go insait long ol stua na stilim ol samting na bai ol i gat kaikai. Taim Tukiso i kam bek long ples slip bilong em, em wanpela rum tasol, em i lukim planti samting i stap, em Maseiso, meri em i sindaun wantaim em, i bin stilim. Tukiso i tokim em, “Kisim ol dispela samting i go ausait.” Em i tok pasin stil i brukim lo bilong God. Maseiso i bihainim tok bilong em. Ol neiba i tok bilas long tupela na kisim ol dispela kaikai Maseiso i bin stilim.
Tukiso i mekim olsem, long wanem, em i tingim ol samting em i bin lainim long stadi em i bin mekim long Baibel wantaim ol Witnes Bilong Jehova. Olsem wanem? Pasin bilong em long bihainim lo bilong God i mekim na em i hangre? Nogat. Bihain, ol elda long kongrigesen bilong ol Witnes Bilong Jehova em i save go long en, ol i kam lukim Tukiso na givim sampela kaikai long em. Ol Witnes Bilong Jehova long Saut Afrika, em kantri i stap klostu, ol i bin salim 2-pela ton kaikai samting i kam long ol bratasista Kristen bilong ol long Lesoto. Bel bilong Maseiso i pilim tru pasin bilong Tukiso long bihainim tok bilong God, na ol gutpela helpim ol i bin kisim long kongrigesen. Em tu i kirap stadi long Baibel. Bihain, tupela i stretim marit long gavman na long dispela rot ol i winim mak long ol i ken baptais na kamap Witnes Bilong Jehova. Ol i mekim yet wok bilong God.
God Jehova i save tingim na lukautim ol rabisman. (Lukim blok “Wanem Tingting Bilong God Long Ol Rabisman?”) Em i bin stretim rot bilong helpim ol lain olsem Tukiso na Maseiso long kisim sampela save moa long em. Na em i bin putim ol gutpela tok long Baibel bilong helpim ol man long olgeta wan wan de.
Wanpela Gutpela Helpim
Ol Witnes Bilong Jehova i wok long kamapim pasin bilong God long tingim gut ol rabisman. (Galesia 2:10) Taim bagarap i kamap long wanpela kantri na ol trupela Kristen i stap nogut, ol Witnes i save stretim rot bilong helpim ol. Na bikpela samting moa yet, ol Witnes i laik helpim olgeta manmeri long ol samting bilong spirit, na ol rabisman tu. (Matyu 9:36-38) Insait long 60 yia i go pinis, planti tausen manmeri em ol i bin kisim trening ol i bin volantia long go mekim wok misineri long ol narapela kantri. Tupela misineri bilong Finlan i bin lain long tok ples Sesoto, na long dispela rot ol i bin lainim Tukiso na Maseiso long kamap disaipel bilong Jisas. (Matyu 28:19, 20) Planti taim, bilong mekim wok misineri olsem, ol Witnes i mas lusim gutpela sindaun bilong ol yet na go stap long wanpela kantri i stap rabis.
Taim ol trupela Kristen i sot tru, ol i no save stil. Ol i bilip long God Jehova inap lukautim ol. (Hibru 13:5, 6) Wanpela samting Jehova i mekim bilong lukautim lain bilong em, em long rot bilong oganaisesen bilong em i stap long olgeta hap, em ol manmeri insait long en ol i lotu long em, na narapela i tingim tru narapela.
Narapela samting Jehova i mekim bilong helpim ol rabisman, em long rot bilong givim gutpela tok long ol bilong helpim wokabaut bilong ol long olgeta wan wan de. Baibel i tok: “Ol stilman i no ken stil moa. Nogat. Nau ol i mas wok. Ol i mas mekim gutpela wok long han bilong ol yet, na ol bai i kisim planti samting, inap long ol i ken helpim ol man i sot long ol samting.” (Efesus 4:28) Planti manmeri i no gat wok mani, ol yet i bin kamapim sampela wok bilong ol, olsem wokim wanpela gaden, na kain samting olsem. Na Baibel i helpim ol rabisman long lukautim gut mani long rot bilong lainim ol long abrusim ol pasin nogut, olsem pasin bilong dring planti alkohol.—Efesus 5:18.
Pasin Bilong i Stap Rabis Bai Pinis—Wanem Taim?
Baibel i kamapim klia olsem yumi stap long “las de” bilong wok bos bilong Satan. (2 Timoti 3:1) Klostu nau, God Jehova bai salim Jisas Krais i kam bilong skelim ol man. Wanem samting bai kamap long dispela taim? Jisas i givim bekim bilong dispela askim long wanpela tok piksa. Em i tok: “Taim Pikinini Bilong Man i kam bek olsem king wantaim olgeta ensel, orait em bai i sindaun long sia king bilong en. Na olgeta lain manmeri bai ol i kam bung long pes bilong em. Na em bai i tilim ol na putim ol long tupela lain, olsem wasman i save tilim ol sipsip i go long hap na ol meme i go long hap.”—Matyu 25:31-33.
Ol sipsip long dispela tok piksa em ol manmeri i daun long wok king bilong Jisas. Jisas i tok ol i kain olsem sipsip, long wanem, ol i bihainim em olsem Wasman bilong ol. (Jon 10:16) Ol dispela manmeri i gat pasin olsem sipsip ol bai kisim laip aninit long gutpela wok bos bilong Jisas. Long dispela nupela taim, ol manmeri bai stap amamas na i no gat pasin bilong i stap rabis. Ol man i gat pasin olsem meme, em ol i sakim wok bos bilong Jisas, ol bai pinis olgeta.—Matyu 25:46.
Kingdom Bilong God bai pinisim pasin nogut. Pasin bilong i stap rabis i no ken i stap moa. Ol manmeri i stap long graun long dispela taim, narapela bai laikim na tingim tru narapela. Yumi ken save kain taim olsem inap kamap taim yumi lukim bikpela lain brata bilong ol Witnes Bilong Jehova i stap long olgeta hap em narapela i laikim tru narapela. Jisas i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”—Jon 13:35.
[Blok/Ol Piksa long pes 6, 7]
WANEM TINGTING BILONG GOD LONG OL RABISMAN?
Baibel i tok Man Bilong Wokim yumi “i save givim kaikai long ol manmeri i hangre.” (Song 146:7) Long Baibel, winim 100 ves i kamapim klia olsem God i save tingim ol rabisman.
Olsem: Taim Jehova i givim Lo bilong em long lain Israel bilong bipo, em i tokim ol Israel olsem taim ol i kisim kaikai long gaden bilong ol, ol i no ken kisim kaikai i sanap long arere tru bilong gaden. Ol i mas larim sampela i stap. Na ol i no ken go bek namba tu taim na bungim ol pikinini bilong diwai oliv o pikinini wain i stap yet long diwai. Ol dispela lo i gutpela samting tru God i putim bilong helpim ol manmeri bilong ol arapela kantri na ol pikinini, papa bilong ol i dai pinis, na ol meri, man bilong ol i dai pinis, na ol arapela tarangu.—Wok Pris 19:9, 10; Lo 24:19-21.
Na tu, God i tokim ol Israel: “Yupela i no ken mekim nogut long meri, man bilong en i dai pinis, o long pikinini, papa i dai pinis. Sapos yupela i mekim nogut long ol na ol i krai long mi long helpim ol, bai mi harim singaut bilong ol. Na bai mi belhat na mi mekim ol birua i kam pait long yupela na kilim yupela i dai. Olsem na ol meri bilong yupela bai i no gat man, na ol pikinini bai i no gat papa.” (Kisim Bek 22:22-24) Tasol sori tru, planti maniman Israel ol i sakim dispela tok. Long dispela rong na sampela rong moa ol i mekim, God Jehova i givim kain kain strongpela tok long ol long maus bilong ol profet. (Aisaia 10:1, 2; Jeremaia 5:28; Amos 4:1-3) Bihain, God i kirapim ol Asiria, na bihain moa, ol Babilon, long i go kisim graun bilong Israel. Ol i kilim i dai planti Israel, na kisim ol Israel i abrusim bagarap i go kalabus long ol narapela kantri.
Jisas Krais, gutpela Pikinini bilong God, em i bin kamapim gutpela pasin bilong Papa bilong em long tingim tru ol rabisman. Jisas i stori long as na em i mekim wok bilong em, na em i tok: “Spirit bilong Bikpela i kam i stap long mi, . . . bilong makim mi bilong i go bringim gutpela tok bilong en long ol rabisman.” (Luk 4:18) Tasol dispela i no makim olsem Jisas i autim tok long ol rabisman tasol, nogat. Em i helpim ol maniman tu. Tasol taim em i helpim ol maniman, em i save kamapim olsem em i tingim ol rabisman. Em i tokim wanpela maniman i gat namba: “Yu mas salim olgeta samting bilong yu, na dispela mani yu kisim yu mas tilim i go long ol rabisman. Yu mekim olsem, na bai yu gat ol gutpela samting tru long heven. Na yu kam bihainim mi.”—Luk 14:1, 12-14; 18:18, 22; 19:1-10.
God Jehova na Pikinini bilong em ol i save tingim tru ol rabisman. (Mak 12:41-44; Jems 2:1-6) Planti milion rabisman i dai pinis ol i stap long tingting bilong Jehova, na dispela i kamapim klia olsem Jehova i tingim ol. Olgeta bai kirap bek na stap long wanpela nupela taim we i no gat pasin bilong i stap rabis.—Aposel 24:15.
[Ol Piksa]
Lain brata bilong ol Witnes Bilong Jehova i stap long olgeta hap i kamapim klia olsem wanpela nupela taim inap kamap
[Piksa long pes 5]
Tukiso na Maseiso wantaim misineri i bin mekim Baibel stadi wantaim Tukiso
[Piksa long pes 5]
Maseiso long haus bilong em wantaim misineri i bin mekim Baibel stadi wantaim em